2 Pedro 2:9 - New Testament Psalms and Proverbs in Mixtec Magdalena Peñasco

⁹ Kovaa sa'a, te ka jini o ja Iya Tátnuni ma chi kuu kasi ndee kasi ndoso ya ñayii kándija ja ká'an ya ma ja ma ska'an ña'a tachi ma, te koneva'a tu'va ya ñayii ka sa'a ja u'vi ma onde kenda kivi ndakan ya kuenda nuu i ma te jin ndachunaa i ja ni ka yo sa'a, ni ka yo kuu i ma.

2 Pedro 2:9 ပူးပေါင်းရင်းမြစ်များ

Salmos 12:1

Iya Tátnuni, sa'a ni ja kaku sa, vaa ñatuu‑ka na ñayii ka sa'a sukan jatna ini ni ma ka iyo ne'un ñayii ka iyo ñuu ñayivi ya.

Salmos 32:6

Visi na yanduu ndute ma nuu ñu'u de ma te ndakana de, kovaa masu kenda de nuu ka iyo ñayii ma. Te sukan kúu ni ji'in ñayii ka iyo va'a nuu ni ma chi ka jikan‑ta'vi i nuu ni ora ka kuxii xeen ini i ma, te maa ni chi chíndee ni i.

Salmos 37:33

Kovaa Iya Tátnuni ma chi masu kua'a ya tnu'u ja sa'a i sukan jani ini i ma, te ni masu kua'a ya tnu'u ja xndo'o xneni i ñayii yukan.

Salmos 4:3

Kovaa jin kona'a ni ja Su'si ma chi játna ini ya ñayii sa'a sukan kúni ya ma te ndí ini i ja ko kuu i ñuu maa ya ma. Te chukan kúu ja saña chi nuna kakan‑ta'vi sa nuu ya ma chi koniniso'o ya ja kuña'a sa ya ma, vaa sa'a sa sukan kúni ya ma.

Proverbios 12:13

Ñayii sa'a ja u'vi ma chi maa ja xnda'vi i ñayii ma nukun‑tuu maa i te ndando'o ndaneni i, kovaa ñayii ká'an ndimaa ja va'a ja ndaa ma chi vivii yanduu yandoso i nuu ndaka tnundo'o kenda ma.

Proverbios 16:4

Ndaka ja ni sa'a ya ñuu ñayivi a chi jâ ni jani ini ya naxe jin ko kuu i te ni sa'a ya ma, nawa kúu ja onde ñayii sa'a ja u'vi ma chi jâ ndetu ña'a kivi ndachunaa i ja u'vi sa'a i ma.

Mateo 10:15

Te ja ndaa ká'an sa ja kivi ndakan Su'si ma kuenda ma chi jin ndo'o xeen‑ka ñayii ñuu yukan sana ñayii ñuu Sodoma ma ji'in Gomorra ma.

Mateo 6:13

Te máko kua'a ni tnu'u ja ska'an ña'a tachi ma ja jin sa'a sa ja u'vi ma, su'va chindee ña'a ni ja na jin kaku sa nuu ja u'vi ma. Vaa maa ni kúu iya tátnuni, te maa ni iyo tnu'u ndee tnu'u ndatnu ji'in jayiñu'u ni‑kani ni‑jika. Te sukan kó kuu.

Romanos 2:5

Kovaa ja sukan ndee ini ni a te ñatuu ndákani ndáka'vi ini ni a, sa'a ni ja ndákiti xeen ini Su'si ma nuu ni, kivi kenda ja ndakan ndi'i ndakan tu'u ya kuenda nawa ni yo sa'a, ni yo kuu ni ma.

1 Corintios 10:13

Jin kona'a ni ja tachi ma chi iyo ñukuun kuiti i ja kototnuni ña'a i, te ska'an ña'a i, sukan ska'an i ndaka‑ka ñayii ma ja jin sa'a i ja u'vi ma. Kovaa yo'o chi jin kukanu ini o Su'si ma, vaa masu kua'a ya tnu'u ja kototnuni ña'a tachi ma in ja masu jin kundee o nuu i. Vaa jâ ni skuiso maa Su'si ma ja maa ya chindee ña'a, te vivii jin yanduu o, te jin kaku o nuu ja u'vi ma.

2 Timoteo 3:12

Te suni ndaka tna'a o ñayii ka kuni ja jin sa'a i sukan játna ini Cristo Jesús ma chi suni jin sondikin tna ña'a ñayii ma, te jin ndo'o jin neni tna i.

Tito 2:14

Vaa maa ya chi ni kachi ya ja ni ndo'o ni neni ya nuu tniñu o ma, te sukan, te ni ndene'e ña'a ya nuu ndaka ja u'vi ma, te ni ndasavii, ni ndasandoo ña'a ya, sukan‑va'a jin ko kuu o ñayii ñuu maa ya ma, te ndimaa jín ku'un ini o ja jin ko sa'a o ja vii ja va'a ma.

2 Pedro 2:4

Vaa Su'si ma, masu ni sakanu ini ya ángel ja ni ka jiso kuechi ma, su'va ni skuita nuu ya i nuu andeya ma, te ni chinee va'a ya i nuu nee ma, ja masu kuu jin nde koo i ma, te yukan jin koo i onde kivi ndakan Su'si ma kuenda nuu i ma.

2 Pedro 3:7

Kovaa andivi a ji'in ñuu ñayivi iyo vitna a, ka iyo tu'va i sukan ká'an maa tnu'u Su'si ma ja jin kayu jin koko i kivi ndakan Su'si ma kuenda ma te jin ndachunaa maa ñayii ñatuu ka kandija Su'si ma.

Judas 1:6

Te sukan ni sa'a tna ya ji'in ángel ñatuu ni ka kandija ma, ja ni ka xndoo i nuu ka iyo i ma, te ni masu ni ka ndi ini i ja ka ndanuu‑ka i sana ñayii ma. Te chukan kúu ja maa Su'si ma ni nune'e i nuu nee ma, te ni chunee ya i onde kunu ma, te yukan jin koo maa i ni‑kani ni‑jika, onde kenda kivi ndakan ya kuenda nuu i ma.

Apocalipsis 3:10

Vaa ni kandija ro tnu'u ni ka'an ri a, te ni kanda ro, visi ni ndo'o ni neni ro, te chukan kúu ja ru'u ya chi koto va'a ña'a ri ora kenda ja jin ndo'o jin neni ndaka ñayii ka iyo ni‑ka'nu ñuu ñayivi a, sukan‑va'a kototnuni ri i naxe ka iyo i.