Santiago 5:9 - Xochapa Mixteco

⁹ Ñani yo xiꞌin kuꞌva yo, käꞌan kuachi ni ndo xaꞌa taꞌan ndo, chi ìyo ni taxi Ndioxi tindoꞌo kixi ya nuu ndo. Koto ndo chi mií Tata yo Jesucristo kúu juez, ta xa íyo tuꞌva ra ndíchi ra yéꞌe ya ndiko koo ra kixi ra.

Santiago 5:9 ပူးပေါင်းရင်းမြစ်များ

San Mateo 24:33

Kuꞌva saa kua íyo tu ya yóꞌó va, tá xíto ndo kuaꞌan xínu ndiꞌi ya ndi̱tuꞌun i xiꞌin ndo, saa kundaa ini ndo xa vaxi kúyati ni kivi ya ndiko koo i ñuu ivi yóꞌó.

San Marcos 13:29

Yakan saa ndóꞌo̱ tá xi̱ni ndo xa̱á kúu ndiꞌi ya káꞌan i xaꞌa xiꞌin ndo, ta saa kundaa ini ndo ya xa ku̱yati ni ndiko koo i kixi i.

San Marcos 6:19

Xaꞌa ya ikán kua kini ni ku̱ndasi nuu yá Herodías xi̱ni yá ra Juan, yakan kúni yá kaꞌni ñaꞌa yá. Ta köo níꞌi yá kuꞌva kaꞌni yá ra,

1 Corintios 10:11

Ndiꞌi ya yóꞌó ku ya ndo̱ꞌo xií sikua yo, yakan ndi̱ndoo ya ndaꞌa yo, ndi̱kaꞌi ya nuu tutu Ndioxi ya ndítuꞌun ya xiꞌin yo ya ná ïkan yo saa, chi tiempo ya xa kuaꞌan ndíꞌi ku ya ndóo yo vitin.

1 Corintios 4:5

Xaꞌa ya ñaa kua káꞌan i xiꞌin ndo, táxi i nuu ndo. Käꞌan kama ni ndo xaꞌa naꞌa ya xaa nani ndo kuachi xiꞌin na. Kundatun ndo nda ná xinu mií tiempo ya ndiko koo Tata yo Jesucristo, chi mií ra ku ra sindiyeꞌe ndiꞌi saa kúu. Ta saa kua ndituvi ndiꞌi ñaꞌa ya íyo sěꞌe vitin. Ta saa kua ndituvi nda ñaꞌa ya íyo sěꞌe nima naꞌa, ndá kuꞌva ku ya ndíkani ini na. Ta suvi mií tiempo ikán kua xaa kaꞌnu Ndioxi naꞌa, tá kuꞌva íyo ya i̱kan na, saa koo ya ikan ra xiꞌin na.

2 Corintios 9:7

Xaꞌa ya ñaa kua vaꞌa taxi ndo xuꞌun ya chindee ndo naꞌa, tá kuꞌva chi̱kaa ini mií ndo taxi ndo ndaꞌa na, ta saa koo ya taxi ndo. Ta küsuchi ini ndo tá táxi ndo ya ndaꞌa na, ta ni chïndee ndo na xiꞌin ya nduxa. Chi Ndioxi, ta kúꞌvi ni ini ra xíni ra naꞌa, na táxi ya xiꞌin ndinuꞌu nima na.

Gálatas 5:14

Chi ley Ndioxi ya ta̱a ra Moisés, ta xiꞌin iin tuꞌun yóꞌó kua xáa súvi ndo ndiꞌi ya káꞌan ya, káchi ya saa: “Kuꞌvi ni ini ndo kuni taꞌan ndo, tá kuꞌva kúꞌvi ini ndo xíni ndo mií ndo”, káchi ya.

Gálatas 5:26

Ta saa ná küu yo naꞌa, na ndee ni kútai ini, ni ná sïsaa yo ini taꞌan yo ya kani taꞌan na xiꞌin taꞌan na, saa ná chïkaa yo ya uni xiꞌin taꞌan yo.

Santiago 4:11

Ñani yo xiꞌin kuꞌva yo, käꞌan väꞌa ndo xaꞌa ñani taꞌan ndo. Chi ndiꞌi ndóꞌo̱ íkan saa, ta tá íin ndo xáa nani kuachi xiꞌin taꞌan ndo, saa íin ndo, tá káꞌan väꞌa ndo xaꞌa ley saa xáa nani ndo ya káꞌan ya. Chi tá káꞌan väꞌa ndo xaꞌa ya ta köo xáa súvi ndo ya káꞌan ya, saa ndúu ndo tá íyo na xáa nani ya káꞌan va ya.

Santiago 4:12

Chi iindaa mií va Ndioxi ku ra chi̱nduꞌu ley ra, yakan iindaa mií ra ku ra kúu mií ichí ya xaa nani ra kuachi xiꞌin naꞌa, chi íyo ichí ra ya sikaku ra na, ta íyo ichí ra ya sindiꞌi xaꞌa ra na. Yakan ndóꞌo̱ ta köo ichí ndo kaꞌan ndo xaꞌa na taꞌan ndo ya íyo kuachi na.

Santiago 5:10

Ñani yo xiꞌin kuꞌva yo, sikuaꞌa ndo tá kuꞌva i̱kan nda ndi̱kaꞌan ndoso tuꞌun yuꞌu Iva yo Ndioxi xinaꞌa, ndee ni ti̱xuꞌvi nda ta ndi̱xaꞌa ndee ndiꞌi ini nda xiꞌin ya ndo̱ꞌo nda saa xaꞌa Iva yo Ndioxi.

Santiago 5:7

Sundi ndóꞌo̱ ñani yo xiꞌin kuꞌva yo, ta ndaku ni koo ini ndo, kündiꞌi ini ndo, kundatun ndo nda ná ndiko koo Tata yo Jesucristo kixi ra. Tá ndóꞌo iin ra chíꞌi nuu ñuꞌú ra, köo ndíꞌi ini ra, kuekuee ndátun ra nda ná ndiyaa, küun ka savi, saa vi xáa ra síkee ra ñaꞌa chi̱ꞌi ra nuu ñuꞌú ra.

1 Pedro 4:5

Ta kündiꞌi ini ndo xaꞌa na, chi vaxi kivi ta ndikuaꞌa ndiꞌi na kuenta nuu Iva yo Ndioxi xaꞌa ya väꞌa íkan na, chi mií ra ku ra íyo ichí ndaꞌa, ta xa íyo ndúvi ra ya xaa nani ra kuachi xiꞌin ndiꞌi naꞌa, nuu taxi ra kuachi xaꞌa na táku tin na xa ndi̱xiꞌi.

1 Pedro 4:9

Ta kusini ni ndo ndikuiso vií ndo na ñani yo na xáa uvi ndaa kivi veꞌe ndo, ta käꞌan kuachi ndo xaꞌa ya íkan ndo saa xiꞌin na.

El Apocalipsis 3:20

¡Koto ndo! Yeꞌe ku ra ndíchi yeꞌe ndo, ta kána i ndóꞌo̱. Tá ndá ndóꞌo̱ xíni soꞌo tachi i, ta xúna ndo yeꞌe ndo nuu i, saa káꞌan ndo xiꞌin i kiꞌvi i veꞌe ndo kuxíni i xiꞌin ndo, ta kuxíni ndo xiꞌin i.