Santiago 4:1 - Xochapa Mixteco

¹ Ñani yo, ¿mií chí káku kuachi xiꞌin ndo ya xáa ndo káni taꞌan ndo, túvi ndo? Ndiꞌi ya väꞌa, ya kútoo ni ndo ikan ndo, ta chí nima mií va ndo kána ya väꞌa, ya ñaa kua síkani taꞌan ndóꞌo̱.

Santiago 4:1 ပူးပေါင်းရင်းမြစ်များ

San Mateo 15:19

Saa chi ya väꞌa ndíkani ini na ta chí nima na kána koo ya. Ta ya ikán kua chíndaꞌa na kaꞌni na ndìì, án ya kaka sii na xiꞌin taꞌan na, saa tu ya kuakiꞌvi na kuâán xiꞌin taꞌan na, xiꞌin ndiꞌi ka ya kini íkan na, saa tu ya síkuiꞌna na tin ya káꞌan vata na xiꞌin ya kánaꞌa na xaꞌa inka naꞌa.

San Juan 8:44

Kiti nǎꞌa va ku iva ndo: Seꞌe ri ikán va ku ndóꞌo̱ yakan kúni ndo ikan ndo ya íkan ri ikán. Saa chi ri ikán ta nda tá xaꞌa vi xa̱á ri xáꞌni ri ndìì. Ta nda iin ichí köo íkan ri ya ndaa, ta ni köo káꞌan ri ya ndaa. Tá káꞌan ri ya siki ta ndínaꞌa ri mií ri ya saa íyo ri, ta ri ikán ku iva siꞌí ndiꞌi ya vata.

ROMANOS 7:23

Sundi yeꞌe ta kúni ni i ikan i ya vaꞌa ndíkani ini i ikan i, ta saa ni ini ikin kuñu i íyo inka ñaꞌa ya káni taꞌan ni xiꞌin ley Ndioxi. Ta ya ikán kua chi̱nduꞌu kuachi i. Saa chi íyo ya ini ikin kuñu i, ta táxi ya ndúu i tá íin naꞌa, na ñúꞌu veꞌe kàà, saa káa i ndíkaa i ndaꞌa kuachi i.

ROMANOS 7:5

Chi tá täꞌan kandixa yo Jesucristo ta ndi̱xika yo ichí väꞌa nuu xa̱ꞌnda chiñu ni ndiꞌi ñaꞌa ya väꞌa nuu yo, tá ndi̱xiyo yo tixin ley ya ta̱a ra Moisés, ta si̱ndikaꞌán ni ka ya ikán ini yo ikan yo kuachi ku̱too ni mií ikin kuñu yo ikan ya. Ta ndiꞌi ñaꞌa i̱kan yo ta süvi ya vaꞌa ku ya, chi ya xa̱ꞌni mií va yo ndi̱xiyo ya.

ROMANOS 8:7

Naꞌa na ndíkani ini xaꞌa ya väꞌa ya kútoo ni mií ikin kuñu na ikan ya, na ikán, ta na káni taꞌan xiꞌin Ndioxi ku na. Chi köo xíin na xaa súvi na ley ra, ta ni köo kúu mií na ndee xaa súvi na ya.

Gálatas 5:17

Chi ñaꞌa ya kútoo ni ikin kuñu yo xaa súvi ya ta köo íyo yuꞌu ya xiꞌin Tachi I̱í Ndioxi. Saa tu mií Tachi I̱í Ndioxi va, köo íyo yuꞌu ya xiꞌin ñaꞌa väꞌa ya kúni ikin kuñu yo xaa súvi ya. Káni taꞌan va uvi saa ya xiꞌin taꞌan ya. Xaꞌa ya ñaa kua köo kúchiñu ndo xaa súvi ndo ya ndixa kúni ndo xaa súvi ndo.

Colosenses 3:5

Ta vitin köo ka ndo tá kuꞌva ndi̱xiyo ndo yachi. Vaꞌa sindiꞌi xaꞌa ndo ya chíndaꞌa ndóꞌo̱ ikan ndo ya väꞌa, tá kúu nda taa ta küvi kiꞌvi nda xiꞌin inka ñaꞌa tá tu süvi yá síꞌi nda ku yá, ni ná síꞌi ta ná kïꞌvi ná xiꞌin inka taa tá tu süvi i̱í ná ku nda, ta saa küni ndo ikan ndo ndá ka ñaꞌa ya väꞌa, kütoo ni ndo ndikani ini ndo xaꞌa ya väꞌa, ta ni kütoo ni ndo koo kuaꞌa ni ñaꞌa ndo, chi tá íkan ndo saa, ta tá íin naꞌa, na xáa kaꞌnu ndioxi ndíi, saa íin ndo.

2 Timoteo 2:23

Ta küni soꞌo un ndá ka tuꞌun kíꞌvi ya káꞌan kuachi naꞌa xaꞌa, ya köo ndáa yaꞌvi káni taꞌan na xaꞌa. Saa chi ya ñaa, ta ya síkani taꞌan naꞌa va kua.

Tito 3:3

Chi saa ndi̱xiyo yo yachi tá täꞌan ndikundikun yo ichí Tata yo Jesucristo: kíꞌvi ni ndi̱xiyo ini yo, ikú ni ndi̱xiyo yo, tá íin yo nda̱ñuꞌu saa ndi̱xiyo yo nuu Ndioxi, ta xi̱nuꞌni yo ndaꞌa ndiꞌi kuachi ya ku̱too ni ikin kuñu yo ikan ya, kuaꞌa ni nuu ya väꞌa i̱kan yo, saa kûni ni ini yo xi̱ni yo naꞌa. Ta ndiꞌi naꞌa ndi̱saa ini xi̱ni yoo, ta saa tu yoo va, ndi̱saa ni ini yo xi̱ni yo na.

Tito 3:9

Ta küni soꞌo un ya ndítuꞌun kuachi na ñani yo xaꞌa ñaꞌa ya köo ndáa yaꞌvi ndítuꞌun na xaꞌa xií síkua na. Vaꞌa kuxika un nuu ya ñaa, xiꞌin ya kánitaꞌan na xaꞌa, ta káꞌan kuachi na xaꞌa ley ya ta̱a ra Moisés, chi ya ñaa ta köo chíndee ya nda iin naꞌa.

Santiago 1:14

Ta vaꞌa ná kundaa ini ndo chi xaꞌa ya kútoo yo ikan yo ya väꞌa, ya ñaa kua ndíxita yoo ya íkan yo ya väꞌa, saa kóyo yo nuu kuachi íkan yo ya väꞌa.

Santiago 4:3

Tá ndúku ndo ya nuu Ndioxi, ta köo níꞌi ndo ya ndúku ndo nuu ra, chi ya ndúku ndo ta ndisaa xaꞌa ya kútoo mií va ndo kua ndúku ndo nuu ra.

1 Pedro 1:14

Yachi ta köo ndi̱kundaa ini ndo xaꞌa tuꞌun ra, yakan ke̱ꞌe ndo ya väꞌa nuu ra, sundi vitin ta ndu̱u ndo seꞌe ra, na xáa súvi ni ya kúni ra, yakan köo xíniñuꞌu ka ndo koo ndo tá kuꞌva ndi̱xiyo ndo yachi.

1 Pedro 2:11

Ñani yo tin kuꞌva yo, ndóꞌo̱ ta tá íin naꞌa, na ndóo tóo xiꞌin na xíka tóo ñuu ivi yóꞌó saa íin ndo, yakan xíkan ni i ya mani nuu ndo, ndee koo ini ndo ta täxi ka ndo kaꞌnda chiñu ya väꞌa kúni kaꞌnda chiñu nuu ikin kuñu ndo, chi ndiꞌi ya väꞌa ñaa ta kánitaꞌan ya xiꞌin ya vaꞌa ndo.

2 Pedro 2:18

Chi nda ikán ta ndee ni chínuu vaꞌa nda tuꞌun káꞌan nda xiꞌin naꞌa ya sáka nda xi̱ní na, síxinu nda i̱ni na xiꞌin tuꞌun ya káꞌan nda xiꞌin na ndisaa xaꞌa ya kútoo ni mií ikin kuñu nda kua káꞌan nda xaꞌa. Ta na íkan nda saa xiꞌin ku naꞌa, na xa si̱ndoo ya väꞌa i̱kan na, na xa ka̱na koo tañu na väꞌa ku na íkan nda saa xiꞌin.

2 Pedro 3:3

Ya núnu̱ú xíniñuꞌu ni ndo kuñuꞌu ini ndo ku ya yóꞌó, ndá kuꞌva koo tá xa ku̱yati vaxi kivi sindiꞌi, chi kivi ikán kua koo kuaꞌa ni naꞌa, na ndikani ini ndisaa xaꞌa ya väꞌa, ya kútoo ni mií ikin kuñu na ikan na, ta na ikán ta kuaku ndaa na ndóꞌo̱.