Santiago 1:2 - Xochapa Mixteco

² Ñani mani mií i ku ndo, ta káꞌan ni i xiꞌin ndo ya ná kusini ni ndo tá kivi vaxi tindoꞌo ya ndee ni uꞌvi nuu ndo xíto ndoso ya ndóꞌo̱.

Santiago 1:2 ပူးပေါင်းရင်းမြစ်များ

Los Hechos 5:41

Tá ka̱na koo nda kuaꞌan nda ta kúsini ni nda kuaꞌan nda, chi ta̱xi Ndioxi ichí ndo̱ꞌo nda xaꞌa ya ndítuꞌun nda xiꞌin naꞌa xaꞌa kivi Jesús.

ROMANOS 5:3

Ta süvi ndisaa xaꞌa ya vaꞌa yóꞌó ku ya kúsini yo, chi kúsini tu yo tá vaxi tindoꞌo nuu va yo. Saa chi xíni yo ndiꞌi tindoꞌo ndóꞌo yo ta xáa ndee ka ya ini yo xiꞌin ya uꞌvi vaxi nuu yo, ta ndee ka ndíkundikun yo ichí Ndioxi.

Filipenses 1:29

Ta mií Ndioxi ku ra chi̱kaa ya vaꞌa ndóꞌo̱ ya kandixa ndo Cristo xiꞌin ya ndoꞌo ni ndo xaꞌa ra.

Filipenses 2:17

Tá tu xíniñuꞌu kuvi i xaꞌa Cristo, ta xa íyo ndúvi va i ikan i saa, ta kúsini ni i chi kuvi i nuu Ndioxi ya soko i mií i nuu ra, ta nduu i tá kuꞌva káa nduta, rá sóko na nuu ra, nuu chindee taꞌan i xiꞌin ndo sixinu i ya sóko ndo nuu ra xaꞌa ya ndee ni kándixa ndo ra. Xaꞌa ya ñaa kua kúsini ni i ikan i ndá ka ñaꞌa xaꞌa ndo.

Filipenses 2:18

Ta saa tu ndóꞌo̱ va kusini ndo xiꞌin i tá kuꞌva kúsini i.

Colosenses 1:24

Ta yeꞌe, ta kúsini ni va i ya tíxuꞌvi i xaꞌa ndo vitin ñani yo xiꞌin kuꞌva yo na veꞌe ñuꞌu, chi xaꞌa ya tíxuꞌvi i saa kua síxinu ka i ya ti̱xuꞌvi ni Jesucristo xaꞌa ndóꞌo̱ kándixa ra, chi ikin kuñu ra ku ndo.

HEBREOS 10:34

Saa ku̱ndaꞌvi ni ini ndo xi̱ni ndo na tá ñúꞌu na veꞌe kàà. Ta nda kúsini ndo tá xíto ndo kíndaa na ñaꞌa ndo ndaꞌa ndo. Saa chi ndóꞌo̱, ra xíni ndo, vaꞌa ni ka ñaꞌa kúu mií ndo nuu ndivi, ya taxi Ndioxi ndaꞌa ndo, saa chi ya ikán ta nda iin ichí ndïꞌi xaꞌa ya.

Santiago 1:12

Vaꞌa ni kée naꞌa, na kúndee ini xiꞌin tindoꞌo vaxi nuu na, saa chi Ndioxi ta taxi ra kutaku na xiꞌin ra ndiꞌi saa kúu kivi. Tá íyo ya ndi̱kaꞌan ra xiꞌin naꞌa, na kúꞌvi ni ini ra xíni ra, saa koo ya ikan ra xiꞌin na, niꞌi na ichí kutaku na xiꞌin ra.

Santiago 1:16

Yakan ndóꞌo̱ ñani mani mií i, ta sïndaꞌvi ndo mií ndo.

Santiago 1:19

Ñani yo xiꞌin kuꞌva yo, yeꞌe ta kúni i ndituꞌun i xiꞌin ndo ya ná kundaa ini ndo ya xíniñuꞌu ni ndo sikuaꞌá ndo kuni soꞌo ndo ya káꞌan inka naꞌa xiꞌin ndo, xiꞌna kuni soꞌo ndo ya káꞌan na xiꞌin ndo, saa ndi̱kuiin ndo yuꞌu na. Ta säa kama ni ndo.

Santiago 5:11

Ta nuu ndeꞌe ta ndee ni va vaꞌa kée nda ikán chi ndi̱xaꞌa ndee ni ini nda ya ndo̱ꞌo ni nda. Xa xi̱ni soꞌo mií ndo ndá kuꞌva ndo̱ꞌo ra Job, ndi̱xaꞌa ndee ni ini ra xiꞌin ya ndo̱ꞌo ni ra, yakan vaꞌa ni ndi̱niꞌi ra nuu Ndioxi tá sindiꞌi. Ndiꞌi ya yóꞌó sínaꞌa ya mií yo ya íyo tuꞌva Iva yo ya xaa kaꞌnu ini ra xaꞌa yo, chi kúndaꞌvi ni ini ra xíni ra yoo.

2 Pedro 2:9

Yóꞌó ku nuu kúndaa ini yo ya síkaku Ndioxi na íkan ya vaꞌa nuu ra, tá nuu ñúꞌu na nuu tindoꞌo. Ta saa xíni vaꞌa tu ra ndá kuꞌva kua xaa nduvaꞌa ra xiꞌin naꞌa, na íkan ya väꞌa yakan kua xaa nani ra kuachi xiꞌin na ñuu ivi.

El Apocalipsis 2:10

Ta ndóꞌo̱ ku ïꞌvi ndo nuu tindoꞌo ya uꞌvi ni vaxi nuu ndo. Saa chi íyo naꞌa, na kúni xaa súvi ya kúni kiti nǎꞌa án kiti Timiaꞌa, kiti Satanás. Tiin na sava ndóꞌo̱ taan na veꞌe kàà, nuu koto ndoso na ndóꞌo̱ án ya ndixa kua kándixa ndo yeꞌe. Ta ndoꞌo ni ndo uxi kivi. Ta káꞌan ni i xiꞌin ndo ya ná síndikoo ndo ichí i, ndinuꞌu ni ini ndo kandixa ndo yeꞌe, nda kivi tá ná kuvi ndo. Saa ndikiꞌin ndo ya vaꞌa taxi i ndaꞌa ndo nuu kutaku ndo xiꞌin i ndiꞌi saa kivi ya vaxi.