San Marcos 2:17 - Xochapa Mixteco

¹⁷ Saa xi̱ni soꞌo Jesús ya ndi̱kaꞌan nda, ta ndi̱kuiin ra káꞌan ra xiꞌin nda, káchi ra saa: ―Na íyo vaꞌa ini, ta köo xíniñuꞌu na kuꞌun na nuu ndotor. Na kúꞌvi ku na xíniñuꞌu kuꞌun kutatan. Ta yeꞌe, vaxi i kana i ivi na väꞌa, süvi na vaꞌa vaxi i kana i ―káchi Jesús xiꞌin nda.

San Marcos 2:17 ပူးပေါင်းရင်းမြစ်များ

San Mateo 18:10

Saa ndi̱tuꞌun tuku ra iin tuꞌun ndíchi xiꞌin na sínaꞌa ra na, káchi ra saa: ―Koto ndo ndïkani ini ndo ya köo ndáa yaꞌvi na vali yóꞌó. Saa chi na tatun ndáa na vali yóꞌó, ta ndiꞌi saa kivi íyo na xiꞌin Iva i Ndioxi nuu ndivi.

San Lucas 15:10

Ya ndaa kua kúsini ni ná yóꞌó chi saa kúsini ni na tatun Ndioxi nuu ndivi xiꞌin iin naꞌa na ndíko koo ini xaꞌa ya väꞌa íkan na ―káchi Jesús xiꞌin na.

San Lucas 15:29

Saa ndi̱kaꞌan ra xiꞌin iva ra, káchi ra saa: “Xa xíni mií un, Tata, ndisaa vi kuiya xáa chiñu i xiꞌin un ta xíni soꞌo ndiꞌi i ya káꞌan un xiꞌin i. Ta nda iin ichí täꞌan taxi loꞌo un iin tixuꞌu loꞌo ndaꞌa i ikan i viko kuxi i xiꞌin nda migo i.

San Lucas 15:7

Ya ndaa kua kúsini ni ndo tá nde̱ta iin kiti sana ndo ti nda̱ñuꞌu. Tá kuꞌva kúsini ndo xiꞌin sana ndo, saa kúsini Ndioxi xiꞌin iin naꞌa na i̱kan ya väꞌa kivi ndíko koo na nuu ra. Kúsini ni ka va ra xiꞌin na yóꞌó nuu na vaꞌa, na xa íyo xiꞌin Ndioxi, na köo xíniñuꞌu ndiko koo ini ―káchi Jesús xiꞌin na.

San Lucas 16:15

Saa ndi̱kaꞌan ra xiꞌin nda, káchi ra saa: ―Ndóꞌo̱ ta ndása vaꞌa ni ndo mií ndo nuu naꞌa. Sundi Ndioxi ta xíni vaꞌa ra nima ndo köo íyo ndaku ini ndo. Ndiꞌi ñaꞌa ya ndee ni ndáa yaꞌvi nuu ndo ñuu ivi yóꞌó ta köo ndáa yaꞌvi ya nuu Ndioxi, ya kúndasi nuu va ra ku ya ―káchi Jesús xiꞌin nda.

San Lucas 19:10

Ta yeꞌe ku Taa ra xa̱a ñuu ivi yóꞌó ta vaxi i nduku i na nda̱ñuꞌu ya sikaku i na ―káchi Jesús.

San Juan 9:34

Saa ndi̱kuiin nda ndi̱kaꞌan nda xiꞌin ra, káchi nda saa: ―Tixin kuachi ka̱ku un, ta ni köo ichí kúu mií un ya sinaꞌa un ndeꞌe ―káchi nda xiꞌin ra. Saa ta̱va ndaꞌa nda ra veꞌe ñuꞌu sinagoga ke̱ta ra kuaꞌan ra.

San Juan 9:40

Ta nda fariseo nda íyo xiꞌin Jesús, tá xi̱ni soꞌo nda ya ndi̱kaꞌan ra saa, ta ndi̱kaꞌan nda xiꞌin ra, káchi nda saa: ―¿Án nda ndeꞌe ku nde kuáa̱ túvi un? ―káchi nda xiꞌin ra.

Los Hechos 20:21

Ndi̱kaꞌan ndoso i tuꞌun ra xiꞌin na kúu judío tin na köo kúu judío, ya xíniñuꞌu na ndiko koo ini na xaꞌa kuachi na nuu Ndioxi, saa xáa na kundaa ni ini na kuni na Tata yo Jesucristo.

Los Hechos 26:20

Ndikun xa̱á i káꞌan i xiꞌin na, xiꞌna na ndóo ñuu Damasco xa̱á i káꞌan i xiꞌin, tá ndi̱ꞌi ikán ta xa̱á i káꞌan i xiꞌin na ndóo ñuu Jerusalén, saa ndi̱xaꞌan i ndiꞌi ka inka ñuu ya ñúꞌu estado Judea. Saa ke̱e tu i ndi̱xaꞌan i nda inka ñuu nuu ndóo na köo kúu judío. Ndi̱xaꞌan i ndi̱kaꞌan ndoso i xiꞌin na ya ná ndiko koo ini na nuu Ndioxi, saa ikan na ya vaꞌa xaꞌa ya ndi̱ko koo ini na nuu ra.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.