San Marcos 13:11 - Xochapa Mixteco

¹¹ Tá ti̱in na ndóꞌo̱ ndi̱xaa ndo nuu na chiñu ta kündiꞌi ini ndo xaꞌa tuꞌun ya kaꞌan ndo xiꞌin na, ni ndïkani ini ndo xaꞌa ya. Tá ndi̱xaa ndo nuu na, ta unku mií tuꞌun chi̱nuu Ndioxi yuꞌu ndo, ta ya ikán kaꞌan ndo xiꞌin na, saa chi süvi mií ndo ku ndo kaꞌan, Tachi I̱í mií Ndioxi ya íyo xiꞌin ndo kua kaꞌan xiꞌin na.

San Marcos 13:11 ပူးပေါင်းရင်းမြစ်များ

San Mateo 10:17

Kuenta ni koo ndo xiꞌin naꞌa, saa chi taxi na ndóꞌo̱ ndaꞌa na ndíso chiñu xiꞌin veꞌe ñuꞌu sinagoga, ta ikán ndikitaꞌan na xaa nduvaꞌa ni na xiꞌin ndo, kani ni na ndóꞌo̱.

San Marcos 13:12

Nda ni ñani ndo ta taxi nda ndóꞌo̱ kaꞌni na ndóꞌo̱, ta nda taa taxi nda kaꞌni na seꞌe nda, saa seꞌe na taxi na kuachi xaꞌa iva siꞌí na ya kaꞌni ñaꞌa na.

San Marcos 13:9

’Ta kuenta ni koo ndo xiꞌin mií ndo, saa chi taxi na kuachi xaꞌa ndo ndaꞌa na chiñu, saa xaa nduvaꞌa ni na xiꞌin ndo veꞌe ñuꞌu sinagoga. Saa kundaka na ndóꞌo̱ kuꞌun ndo nuu na chiñu án nuu nda rey, ta xaꞌa yeꞌe kua kundoꞌo ndo saa. Tá ndi̱xaa ndo nuu na chiñu ikán, ta saa kaꞌan ndo xaꞌa i xiꞌin na.

San Lucas 21:12

’Sundi xiꞌna ndoꞌo ni ndóꞌo̱, saa yaꞌa ya ñaa. Xaa nduvaꞌa ni na xiꞌin ndo. Taxi na kuachi xaꞌa ndo nuu na naꞌnu veꞌe ñuꞌu sinagoga, taan na ndóꞌo̱ veꞌe kàà tin taxi na kuachi xaꞌa ndo kuꞌun ndo nuu na veꞌe chiñu án nuu nda rey. Xaꞌa ya ndíkun ndo sata i kua ikan na saa xiꞌin ndo.

San Juan 3:27

Ta saa ndi̱kuiin ra Juan káchi ra saa: ―Nda iin ñaꞌa küvi ikan naꞌa tá tu süvi Ndioxi ku ra táxi ndee ndaꞌa na.

Los Hechos 2:4

Ta Tachi I̱í Ndioxi kua xa̱a sata iin iin na, ñaa xa̱á iin iin na káꞌan na inka nuu tuꞌun ya káꞌan na inka ñuu. Tá íyo ya ta̱xi Tachi I̱í Ndioxi ndaꞌa na kaꞌan na, saa íyo ya xa̱á na káꞌan na.

Los Hechos 3:13

Chi Ndioxi ra kaꞌnu, ra ka̱ñuꞌu ni xii sikua yo ra Abraham xiꞌin ra Isaac tin ra Jacob, ra ikán ku ra nda̱sa chee ni Jesús ra kúu Seꞌe ra, ta suvi ra ikán ku ra ti̱in ndo taxi ndo ndaꞌa na chiñu ta köo ndi̱xiin ndo saña ra tá ku̱ni ra Pilato saña ñaꞌa ra.

Los Hechos 4:31

Ñaa tá si̱ndiꞌi na ndi̱kaꞌan na xiꞌin Ndioxi ta xa̱á táan nuu ndi̱kitaꞌan na ndóo na. Saa ta̱xi Ndioxi Tachi ra ndaꞌa na, ndee ni íyo Tachi I̱í Ndioxi xiꞌin na. Ñaa xa̱á ndu̱ndee ini na ndi̱nuni loꞌo xíka na ndíkani na tuꞌun Ndioxi.

Los Hechos 6:10

Sundi köo ndíkuchiñu na xiꞌin ra saa chi ndíchi ni káꞌan ra xiꞌin na xaꞌa ya ndee ni íyo Tachi I̱í Ndioxi xiꞌin ra.

Los Hechos 6:15

Ñaa ndi̱koto na chiñu xiꞌin ndiꞌi ka na ndóo ikán, ndi̱koto na nuu ra Esteban. Tá káa nuu tatun Ndioxi saa ndu̱u nuu ra xi̱ni na.

Los Hechos 7:55

Sundi Tachi I̱í Ndioxi ta íyo ya xiꞌin ra Esteban. Ñaa ndi̱koto ra nuu ndivi, ta xi̱ni ra ya yeꞌe Ndioxi, xi̱ni ra ndíchi Jesús ñaꞌñu kuáꞌá Ndioxi.

1 Corintios 2:13

Sundi ndeꞌe, ta ndítuꞌun nde xaꞌa ya ndíchi xiꞌin naꞌa, ta ya sínaꞌa Tachi I̱í ra ndeꞌe kua ndítuꞌun nde xaꞌa xiꞌin na. Ta süvi taꞌan tuꞌun ndíchi ya íyo xi̱ní na ñuu ivi yóꞌó kua ndítuꞌun nde xiꞌin na. Xiꞌin tuꞌun ndíchi, ya vaꞌa ke̱e nuu ndivi kua ndíkani nde xaꞌa ñaꞌa ya vaꞌa, ya ke̱e nuu ndivi xiꞌin na.

Efesios 3:5

Ta ya íyo sěꞌe taꞌan ya káꞌan i xaꞌa xiꞌin ndo yóꞌó yachi, ta nda iin naꞌa köo ndi̱kundaa ini xaꞌa ya, sundi vitin ta Ndioxi si̱naꞌa ra ya nuu nda i̱í, nda kúu apóstol xiꞌin nda profeta. Saa i̱kan ra si̱naꞌa ra ya nuu nda tixin Tachi I̱í ra.

Santiago 1:5

Tá ndá ndóꞌo̱ kúmani ya ndíchi nuu, ta vaꞌa nduku ndo ya nuu Ndioxi chi vaꞌa ni ra, ta küxinda ra ya nuu ndo taxi va ra ya ndaꞌa ndo.

1 Pedro 1:12

Ta ya ta̱xi Ndioxi ku̱ndaa ini nda ndi̱kaꞌan tuꞌun yuꞌu ra xaꞌa, ta süvi xaꞌa mií nda kua ndi̱kaꞌan ya, xaꞌa yoo kua ndi̱kaꞌan ya. Ta taꞌan ya ikán ku tuꞌun vaꞌa xaꞌa Tata yo Jesucristo ya ndi̱kaꞌan ndoso inka nda xiꞌin ndo tixin Tachi I̱í Ndioxi ya ke̱e nuu ndivi. Ta nda mií na tatun Ndioxi ta kútoo ni na kuni na ya vaꞌa ikan Ndioxi xiꞌin yo.