San Marcos 12:14 - Xochapa Mixteco

¹⁴ Saa ndi̱xaa nda ndi̱kaꞌan nda xiꞌin ra, káchi nda saa: ―Tata Maestro, xíni nde yóꞌo̱ ta nina ya ndaa káꞌan un, ta köo kíꞌin un kuenta xaꞌa ya káꞌan naꞌa xaꞌa ya sínaꞌa un, ta ni köo ndíkaxin un naꞌa, iin káchi káꞌan un xiꞌin ndiꞌi na. Ta ya ndixa ni kua káꞌan un, chi káꞌan un xiꞌin na ná ikan na ndisaa ya kúni Ndioxi. Ta kaꞌan un xiꞌin nde, ¿án xíniñuꞌu nde kakuꞌun nde xaꞌa xuꞌun ya kuaꞌan ndaꞌa ra rey César ra chiñu ñuu Roma án täxi nde ya? ¿Án vaꞌa chaꞌvi nde ya án chäꞌvi nde ya? ―káchi nda xiꞌin ra.

San Marcos 12:14 ပူးပေါင်းရင်းမြစ်များ

San Mateo 22:16

Ñaa ti̱ꞌvi nda ikán nda taꞌan nda, nda ítaꞌan xiꞌin nda ñúꞌu xiꞌin partido ra Herodes, saa ndi̱xaa nda nuu Jesús ndi̱kaꞌan nda xiꞌin ra, káchi nda saa: ―Tata Maestro, xíni nde ya káꞌan un ya ndaa. Ta ndinuꞌu ni ini un sínaꞌa un naꞌa xiꞌin ya ndaa xaꞌa ichí Ndioxi. Ta köo xáꞌni un mií un ya káꞌan naꞌa xaꞌa ya sínaꞌa un na, saa chi köo kíꞌin un kuꞌva xiꞌin na tá kuꞌva íin na, iin káchi íkan un xiꞌin ndiꞌi va na.

San Mateo 22:17

Ta vitin kaꞌan un xiꞌin nde unkua ndíkani ini un. ¿Án vaꞌa chaꞌvi yo xuꞌun ya káku yo xaꞌa nuu na chiñu ya kuaꞌan ndaꞌa ra tata chiñu ra rey César ñuu Roma? ¿Án väꞌa chaꞌvi yo ya? ―káchi nda xiꞌin ra.

San Marcos 12:13

Saa ti̱ꞌvi na xikuaꞌa sava nda fariseo xiꞌin nda ñúꞌu xiꞌin na partido ra Herodes, ti̱ꞌvi na nda kuaꞌan nda kaꞌan nda xiꞌin Jesús ya koto ndoso ñaꞌa nda án ndá tuꞌun väꞌa kaꞌan ra, ta saa kuchiñu niꞌi nda kuꞌva taxi nda kuachi xaꞌa ra.

San Marcos 12:15

Ta xa ku̱ndaa va ini Jesús nda uvi yuꞌu ku nda, saa ndi̱kaꞌan ra xiꞌin nda, káchi ra saa: ―¿Ndachu kua xíto ndoso ndo yeꞌe? Taxi ndo iin xuꞌun kàà ná koto i nuu ya ―káchi ra xiꞌin nda.

San Marcos 14:45

Saa ndi̱xaa ra ta ku̱yati ra nuu Jesús ndi̱kaꞌan ra xiꞌin ra, káchi ra saa: ―¡Tata Maestro! ¡Tata Maestro! ―káchi ra. Saa chu̱tu ra nuu Jesús, ya ndi̱kaꞌan ndioxi ra xiꞌin ra.

San Lucas 20:22

Ta vitin kúni nde kundaa ini nde unkua káchi yóꞌo̱, ¿án vaꞌa chaꞌvi yo xuꞌun ya káꞌan ra César, ra rey ñuu Roma xiꞌin yo án chäꞌvi yo ya? ―káchi nda xiꞌin ra.

San Lucas 23:2

Tá ndi̱xaa na xiꞌin ra nuu ra Pilato, ta xa̱á na táxi na kuachi siki xaꞌa ra, káchi na saa: ―Xi̱ni nde ra yóꞌó táa sii ni ra naꞌa ya kuꞌun na sata ra. Ta väꞌa íkan ra, ra táꞌvi ñuu yo ku ra chi káꞌan ra xiꞌin na, ya ná chäꞌvi na xuꞌun ya kuaꞌan ndaꞌa ra rey César, saa chi mií ra ku Cristo, ra ti̱ꞌvi Ndioxi vaxi ra nduu ra rey ñuu ivi yóꞌó, káchi ra xiꞌin na ―káchi nda.

San Juan 7:18

Iin taa, ra káꞌan xaꞌa ichí kúu mií ra, ta íkan ra saa chinuu vaꞌa ra tuꞌun ra ya ná xaa toꞌo ñaꞌa inka naꞌa. Sundi tá íyo iin ra köo chínuu vaꞌa ra tuꞌun mií ra, ta ndíkundee ra ndúku ra ya ná chinuu vaꞌa naꞌa tuꞌun ra ti̱ꞌvi ñaꞌa, ta saa kúndaa ini yo ra ndaa ku ra, ta köo ya síki íyo ini ra.

ROMANOS 13:6

Nda ni mií ndo ta kákuꞌun ndo, cháꞌvi ndo nuu na chiñu. Saa chi na xáa chiñu nuu Ndioxi ku na, yakan kúu mií na ichí kiꞌin yaꞌvi na xaꞌa chiñu íkan na, chi táxi ndiꞌi na tiempo kúu mií na xaꞌa ya síxinu na chiñu na.

2 Corintios 2:17

Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.

2 Corintios 2:2

Saa chi tá ná xaa suchi i ini ndo ta köo naꞌa sindiko ini yeꞌe, chi tá íyo suchi ini ndo ta küvi sindiko ndo ini i.

2 Corintios 4:1

Ta ndeꞌe ta köo ndíko koo ini nde xiꞌin chiñu ya ta̱xi Ndioxi ndaꞌa nde íkan nde, chi xaꞌa ya kúndaꞌvi ni ini ra xíni ra ndeꞌe va kua ta̱xi ra chiñu yóꞌó ndaꞌa nde.

2 Corintios 5:11

Ta xíni nde ya xíniñuꞌu ndiꞌi naꞌa xaa toꞌo na Ndioxi, xaꞌa ya ñaa kua xáꞌa ni nde ndee ya síxinu nde ini na ya ná xi̱nu ini na kundikun na ya ndaa. Chi mií Ndioxi ku ra xíni vaꞌa ndeꞌe, ta saa kúni nde ná kuni vaꞌa ndo ini nde, ndá kúꞌva ku mií ya ndaa íyo nde.

2 Corintios 5:16

Ta vitin xiꞌin ndiꞌi saa kivi ya vaxi, ta ndeꞌe ta xa si̱ndikoo nde ya ndíkani ini nde xaꞌa inka naꞌa, köo íkan ka nde tá kuꞌva íkan na ñuu ivi yóꞌó. Ya ndixa kua saa ndi̱kani ini nde xaꞌa na yachi tá täꞌan kundikun nde Jesucristo. Nda ni mií ra ta saa ndi̱kani ini nde xaꞌa ra, ta vitin ta köo ndíkani ka ini nde xaꞌa ra kuꞌva saa.

Gálatas 1:10

Xaꞌa ya ndi̱tuꞌun i xiꞌin ndo, ta ¿án ndíkani ini ndo ya kúni i ná kaꞌan vaꞌa naꞌa xaꞌa i kua, túvi ndo? ¿án ya kaꞌan vaꞌa Ndioxi xaꞌa i kua túvi ndo? Chi tá tu kúni i kindoo vaꞌa i nuu naꞌa, ta süvi ra xáa chiñu nuu Jesucristo vi kuu i, ndikuu.

Gálatas 2:6

Ta nda ñani yo ndóo ñuu Jerusalén, nda kúnaꞌnu, ndíso chiñu xiꞌin na veꞌe ñuꞌu, ta nda iin ya köo ndi̱kaꞌan nda xiꞌin i ya nama i kuꞌva sínaꞌa i naꞌa. Ta saa ni yeꞌe ta köo xíka ini i xaꞌa ya káꞌan nda, ni nda naꞌnu ni va ku nda. Saa chi nuu Ndioxi ta iin káchi íin ndiꞌi va yo ivi yóꞌó nuu ra.

1 Tesalonicenses 2:4

Chi mií Ndioxi ku ra xi̱to ndoso ndeꞌe, ta xi̱ni ra kuchiñu nde xiꞌin chiñu ya ta̱xi ra ndaꞌa nde ya kaꞌan ndoso nde tuꞌun vaꞌa xaꞌa ra xiꞌin naꞌa. Ta ndeꞌe, ta köo íkan nde ndá ka ñaꞌa ya xaa sií nde ini na ñuu ivi yóꞌó, sundi íkan nde ñaꞌa ya xaa sií nde ini Ndioxi, chi mií ra ku ra xíto ndoso nima ndiꞌi yo án ya vaꞌa kua, án süvi ya vaꞌa kua.