San Marcos 1:24 - Xochapa Mixteco

²⁴ ―Yóꞌo̱ ku Jesús, ra ñuu Nazaret, ta ¿ndachu kuakiꞌvi un xiꞌin nde? ¿Án vaxi un sindiꞌi xaꞌa un ndeꞌe? Chi yeꞌe ta xíni vaꞌa i yóꞌo̱, yóꞌo̱ ku ra i̱í, ra ke̱e nuu Ndioxi ―káchi ya xiꞌin ra.

San Marcos 1:24 ပူးပေါင်းရင်းမြစ်များ

San Mateo 2:23

Tá ndi̱xaa ra ikán ta ndi̱kiꞌin ra kuaꞌan ra koo ra ñuu Nazaret ya ndíkaa estado Galilea, saa ndi̱xinu tuꞌun ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, ka̱chi nda saa: “Ra tiꞌvi Ndioxi sikaku na ñuu ivi ta ra ñuu Nazaret ku ra”, káchi tuꞌun Ndioxi ya ta̱a na xinaꞌa.

San Mateo 8:29

Ñaa iin ndi̱ndaꞌi koꞌo uvi saa nda, káchi nda saa: ―¿Unkua kúni un ikan un xiꞌin nde, Jesús? Kïꞌvi un xiꞌin nde saa chi Seꞌe Ndioxi ku yóꞌo̱. ¿Án xa̱a un ya xaa nduvaꞌa un xiꞌin nde, yachi ka tá täꞌan tindaa tiempo? ―káchi nda xiꞌin Jesús.

San Marcos 1:23

Ta saa ndíkaa iin ra kúu mií tachi nduvaꞌa ini veꞌe ñuꞌu sinagoga ikán, ta ndee ka vi ndi̱kaꞌan ra, ndi̱ndaꞌi koꞌo tachi nduvaꞌa nuu Jesús, káchi ya saa:

San Marcos 1:25

Saa ndi̱kuiin Jesús ndi̱ndaꞌi ra xiꞌin tachi ikán, káchi ra saa: ―Kutaxin yuꞌu un, ta keta kuáꞌan ―káchi ra xiꞌin ya.

San Marcos 10:47

Ñaa tá xi̱ni soꞌo ra yáꞌa Jesús ra ke̱e ñuu Nazaret kuaꞌan ra, saa xa̱á ra kána koꞌo ra, káchi ra saa: ―¡Jesús, seꞌe ra David, kundaꞌvi ini un kuni un yeꞌe, ndaꞌvi ni i! ―káchi ra.

San Marcos 14:67

Tá xi̱ni yá ra Pedro ndísaa ra nuu ñu̱ꞌu̱, saa ndi̱koto yá nuu ra ta ndi̱kaꞌan yá xiꞌin ra, káchi yá saa: ―Ra xi̱taꞌan xiꞌin Jesús ra ñuu Nazaret ku tu yóꞌo̱ va ―káchi yá xiꞌin ra.

San Marcos 16:6

Ta saa ndi̱kaꞌan ra xiꞌin ná, káchi ra saa: ―Ku ïꞌvi ndo, chi Jesús ra Nazaret, ra ti̱kaa na ndaꞌa cruzin, ta köo ka ra yóꞌó, xa ndi̱taku va ra. Koto ndo nuu xi̱nduꞌu ra, köo ka ra.

San Marcos 5:7

Iin ndáꞌi koꞌo mií ra, káchi ra saa: ―Tata, ¿unkua kúni un ikan un xiꞌin i? Chi yóꞌo̱ ku Jesús Seꞌe Ndioxi ra kaꞌnu. Xáku ndaꞌvi i nuu un, xäa nduvaꞌa un xiꞌin i ―káchi ra xiꞌin Jesús.

San Lucas 1:35

Saa ndi̱kuiin tatun Ndioxi, káchi ya saa: ―Käka ini un chi mií Tachi I̱í Ndioxi ku ya kixi sata un, tá káa vikó saa koo ndee Ndioxi ra Chee ni kixi ya ndikasi ya yóꞌo̱, ñaa kee mií seꞌe un. Yakan kua koo ra, ra i̱í, saa kunani ra Seꞌe Ndioxi.

San Lucas 24:19

Saa ndi̱kaꞌan ra xiꞌin nda káchi ra saa: ―¿Ta unkua ku̱u kua? ―káchi ra xiꞌin nda. Saa ndi̱kuiin nda, káꞌan nda: ―Xaꞌa ra Jesús, ra ñuu Nazaret va kua káꞌan nde. Ra ndi̱kaꞌan ndoso tuꞌun yuꞌu Ndioxi ndi̱xiyo ra, ta ndee ni ndee taa ku̱u mií ra, kuaꞌa ni ya vaꞌa i̱kan ra, vaꞌa ni si̱naꞌa ra. Ta vaꞌa ni káꞌan Ndioxi xaꞌa ra tin ndiꞌi naꞌa.

San Lucas 4:34

―¿Unkua kúni un ikan un xiꞌin nde Jesús ra ñuu Nazaret? ¿Án vaxi un sindiꞌi xaꞌa un ndeꞌe? Saa chi xíni va i yóꞌó. Yóꞌo̱ ku ra i̱í, ra ke̱e nuu Ndioxi ―káchi ri xiꞌin Jesús.

San Lucas 8:28

Ñaa tá xi̱ni ra Jesús ta ndi̱xaa ra si̱kusiti ra nuu ra, ndi̱ndaꞌi koꞌo ra, káchi ra saa: ―Tata, ¿unkua kúni un ikan un xiꞌin i? Chi yóꞌo̱ ku Jesús, Seꞌe Ndioxi ra kaꞌnu nuu i. Xáku ndaꞌvi ni i nuu un xäa nduvaꞌa un xiꞌin i ―káchi ra xiꞌin Jesús.

San Lucas 8:37

Ta ndiꞌi na ñuu Gadara xiꞌin inka ka na ñuu vali ya ítaꞌan yati xiꞌin ya, ndi̱xikan na ya mani nuu Jesús ya ná keta ra ñuu na kuꞌun ra chi yáꞌa ni íꞌvi na. Ta saa ndi̱kiꞌvi Jesús ini tun barco xiꞌin nda ítaꞌan xiꞌin ra ndi̱kiꞌin nda kuaꞌan nda.

San Juan 6:69

Ta ndeꞌe kándixa nde yóꞌo̱, saa xíni nde yóꞌo̱ ku Cristo, Seꞌe Ndioxi ra táku ―káchi ra Pedro xiꞌin Jesús.

Los Hechos 2:27

chi ndáa ni ini i yóꞌo̱, Tata Ndioxi, ta xíni i täxi un ndoo ikin kuñu i ndikaa ya tixin ñuꞌú nuu ñúꞌu na ndíi. Ta ni täxi un taꞌi kuñu i, chi ra i̱í ku i.

Los Hechos 24:5

Ra Pablo yóꞌó ta süvi ra vaꞌa ku ra, ndi̱taꞌan nde ra xíka ra táꞌvi ra na ñuu nde, ndiꞌi ni kúu ñuu xíka ra táꞌvi ra na. Mií ra ku xiní xiꞌin na vata, na káꞌan na xaꞌa nani nazareno.

Los Hechos 3:14

Sundi ndóꞌo̱ ta köo ndi̱xiin ndo saña ra vaꞌa, ra i̱í ni, chi ra xa̱ꞌni ndìì va ku ra ndi̱kaꞌan ndo xaꞌa saña.

Los Hechos 4:27

’Ta vitin ku nuu ti̱ndaa kivi ndi̱xinu ya ndi̱kaꞌan ra rey David, saa chi ra rey Herodes xiꞌin ra Poncio Pilato iin káchi ndi̱kitaꞌan nda ñuu yóꞌó, xiꞌin na inka ñuu na köo kúu judío xiꞌin sava na ñuu Jerusalén yóꞌó. Iin yuꞌu ku̱u na xiꞌin taꞌan na ndu̱ku na kuꞌva xa̱ꞌni na Jesús ra i̱í, ra kúu mií ichí un ya ta̱xi un ndaꞌa ra, Iva yo Ndioxi.

Santiago 2:19

Ta vaꞌa ni va íkan ndo xaꞌa ya kándixa ndo iindaa kú Ndioxi, túvi ndo. Ta ¿án köo xíni ndo nda mií kiti nǎꞌa ta kuꞌva saa íkan ri kándixa ri ya íyo iindaa Ndioxi, ta nda kísi ni̱nù ñaꞌa ya, xaꞌa ya íꞌvi ri.

1 Juan 2:20

Sundi ndóꞌo̱ ta ta̱xi Tata yo Jesucristo Tachi I̱í ra ndaꞌa ndo, ta xa xíni ndiꞌi ndo ya ndaa.

El Apocalipsis 3:7

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun Ndioxi, ya ndáa naꞌa, na kándixa yeꞌe, ta ndíkitaꞌan na ñuu Filadelfia xáa kaꞌnu na Ndioxi. Yeꞌe káꞌan xiꞌin ndo ku ra i̱í, ra ndixa ni ndaa. Yeꞌe ku ra níꞌi llave ya ku̱u mií ra rey David. Tá xúna i yéꞌe, ta nda iin na küchiñu ndikasi ya. Tá ndíkasi i ya ta nda iin na küchiñu kuna ya.