Los Hechos 21:3 - Xochapa Mixteco

³ Tá yáꞌa nde kuaꞌan nde nuu nduta ñûꞌu ta xi̱ni nde Chipre ya ndíkaa ñuꞌú íchi maꞌñu nduta ñûꞌu chí ñaꞌñu ítin nde. Ñaa kuaꞌan ka nde nda estado Siria. Ndi̱xaa nde ñuu Tiro ya ndíkun ndaa estado Siria. Ñuu ikán xíniñuꞌu nu sindoo nu ñaꞌa ndíso nu kuaꞌan nu.

Los Hechos 21:3 ပူးပေါင်းရင်းမြစ်များ

Los Hechos 27:4

Ndi̱ꞌi ikán ta ke̱e nde kuaꞌan nde xiꞌin barco ta ni väꞌa kuaꞌan nde chi xíka ni tachi, ta ìyo ka vi ndikava nu xiꞌin nde. Saa vaꞌa ka ndi̱kiꞌin nu kuaꞌan nu xiꞌin nde chí inka ñaꞌñu ñuꞌú íchi ndíkaa Chipre nuu köo xíka ni tachi.

Los Hechos 21:16

Saa kuaꞌan sava na ndíkun ichí Jesús ndóo ñuu Cesarea ikán xiꞌin nde. Kuaꞌan tu inka ra náni Mnasón xiꞌin nde, ta xa yachi vi ndi̱kundikun ra ikán ichí Ndioxi, ta ra ke̱e Chipre ku ra, ta veꞌe ra ikán kua koo nde tá ná xaa nde ñuu Jerusalén.

Los Hechos 12:20

Ta xa yachi vi sáa ra rey Herodes ikán xíni ra na ñuu Tiro xiꞌin na ñuu Sidón. Saa kúni na ikán ndikitaꞌan mani na xiꞌin ra, chi ñaꞌa xíxi na ta ñuu nuu xáꞌnda chiñu ra kée ya. Xaꞌa ya ikán kua chi̱taꞌan tuꞌun na ndá kuꞌva koo nuu ndikitaꞌan mani na xiꞌin ra. Ñaa nda̱sa migo na iin ra kúu mií chiñu ndee veꞌe mií ra rey ikán, ta Blasto náni ra ikán. Ta tixin ra Blasto ikán kuchiñu na ndikitaꞌan mani na xiꞌin ra Herodes kúni na.

Los Hechos 4:36

Saa i̱kan tu iin ra kúu seꞌe sikua ra Leví, ra náni José va. Ta ra José ikán ke̱e ra ñuꞌu íchi ya ndikaa maꞌñu nduta ñûꞌu, ya náni Chipre. José náni ra ñuu ra, sundi nda apóstol ta chi̱nuu nda kivi ra náni ra Bernabé chi tuꞌun Bernabé kúni kachi ya taa ra síndiko ini naꞌa.

San Mateo 4:24

Saa ndi̱xita tuꞌun xaꞌa ra ndiꞌi ni kúu ñuu Siria, ta ndáka naꞌa na taꞌan na, na kúꞌvi, na ndóꞌo ndiꞌi ni kúu nuu kueꞌe, xiꞌin na kúu mií tachi nduvaꞌa tin na xíꞌi ndiuu xiꞌin na küvi kaka. Ndi̱xaa na nuu ra ta si̱ndaꞌa ndiꞌi ra na ikán.

Los Hechos 18:18

Ta naꞌá ni ndi̱ndoo ra Pablo ñuu Corinto ndi̱xiyo ra xiꞌin na xíka ichí Jesús. Sindiꞌi ikán ta ndi̱kaꞌan ndioxi ra xiꞌin na, saa ndi̱kiꞌin ra kuaꞌan ra xiꞌin ra Aquila tin yá Priscila síꞌi ra Aquila. Nda̱a na sata iin barco itun kuaꞌan nda estado Siria. Ñaa ndi̱xaa na ñuu Cencrea ta ikán ndi̱xata teꞌe ra Pablo xiní ra, nuu ndínaꞌa ra mií ra ya síxinu ra ya xa ki̱ndoo ra xiꞌin Ndioxi.

Los Hechos 15:41

Ndi̱yaꞌa nda estado Siria xiꞌin estado Cilicia ndi̱kaꞌan nda xiꞌin na ta̱xi nda ndee ndaꞌa na veꞌe ñuꞌu ndóo ikán.

Los Hechos 15:39

Xaꞌa ra Juan Marco ikán ta xa̱á káni taꞌan nda xiꞌin tuꞌun, ta köo ndi̱kuchiñu xinu tuꞌun nda. Ñaa vaꞌa ka ta̱ꞌvi taꞌan nda. Ra Bernabé xiꞌin ra Juan Marcos nda̱a nda itun barco kuaꞌan nda ñuu Chipre ya ndíkaa ñuꞌú íchi maꞌñu nduta ñûꞌu.

Los Hechos 15:23

Ta tutu ya ti̱ꞌvi nda kuaꞌan xiꞌin nda ikán káchi ya saa: “Ndeꞌe apóstol xiꞌin na xikuaꞌa tin ndiꞌi ka na taꞌan yo na ndíkun Jesús chíndee ni nde ndóꞌo̱ na taꞌan yo, ndóꞌo̱ köo kúu judío ndóo ñuu Antioquía estado Siria tin Cilicia.

Los Hechos 13:4

Saa ti̱ꞌvi Tachi I̱í Ndioxi ra Bernabé xiꞌin ra Saulo kuaꞌan nda kaꞌan ndoso nda tuꞌun Ndioxi. Xiꞌna ñuu Seleucia ndi̱xaa nda, saa nda̱a nda tun barco kuaꞌan nda ñuu Chipre, ya ndíkaa ñuꞌú íchi maꞌñu nduta ñûꞌu.

Los Hechos 11:19

Tá kivi xa̱ꞌni na chiñu ra Esteban, ta saa ku nu xa̱á ndóꞌo ni na ndíkun Jesús, xaꞌa ya ikán kua ndi̱xita ndiꞌi na kuaꞌan na. Ta sava na ikán xi̱nu na kuaꞌan na chí estado Fenicia xiꞌin ñuu Chipre tin ñuu Antioquía. Ta iin iin ñuu nuu kuaꞌan na ndítuꞌun na tuꞌun vaꞌa xaꞌa Ndioxi. Ndisaa xiꞌin na judío ndítuꞌun na köo ndítuꞌun na xiꞌin inka naꞌa.

San Lucas 10:13

Saa xa̱á ra káꞌan ra, káchi ra saa: ―¡Ndaꞌvi ni ndóꞌo̱ ñuu Corazín xiꞌin ndóꞌo̱ ñuu Betsaida! Saa chi kuaꞌa ni ka ya vaꞌa i̱kan i ñuu ndóꞌo̱ ta köo ndi̱ndiko koo ini ndo. Na ñuu Tiro xiꞌin na ñuu Sidón kini ni ivi ku tu na ikán va, tá tu ndi̱kan i taꞌan ya íkan i ñuu ndo yóꞌó nuu na ikán, ta xa yachi vi ndi̱ko koo na nuu Ndioxi. Xa ndi̱kundixi na tikoto ndai ni nuu, ndi̱kundoo na nuu yaa ñu̱ꞌu̱, ya sínaꞌa na mií na ndi̱ko koo na nuu Ndioxi, ndikuu.

San Lucas 2:2

Ta ya ikán ku censo ya núnuú ndi̱kuita tá kivi ku̱u ra Cirenio chiñu xa̱ꞌnda chiñu ra nuu na ñuu ya ñúꞌu estado Siria.

San Mateo 11:21

―¡Ndaꞌvi ni ndóꞌo̱ na ñuu Corazín! ¡Ndaꞌvi ni ndóꞌo̱ na ñuu Betsaida! Chi vaxi kivi tixuꞌvi ni ndo. Xinaꞌa tá ndi̱xini na ñuu Tiro xiꞌin na ñuu Sidón taꞌan yatuꞌun xíto ndo vitin, ta ndá tiempo vi ndi̱ko koo ini na ikán xaꞌa kuachi na, xa ndi̱kundixi na toto ndai ni nuu, ta xa chi̱kaa na yaa ñu̱ꞌu̱ xiní na xaꞌa ya sínaꞌa na mií na ya ndi̱ko koo ini na xaꞌa kuachi na ndikuu.

Los Hechos 21:2

Ñuu Pátara ikán ndi̱taꞌan nde inka barco tun yáꞌa estado Fenicia, saa nda̱a nde sata nu ikán kuaꞌan nde.

Los Hechos 21:7

Ta ñaa ka̱na koo nde ñuu Tiro saa ndi̱xaa nde ñuu Tolemaida, ikán ku nuu ndi̱ꞌi ya ndi̱xika nde nuu nduta ñûꞌu. Tá ndi̱xaa nde ñuu ikán, ta ndi̱xaꞌan nde xíto nde na ndíkun Jesús. Ñaa ndi̱ndoo nde xi̱ndoo nde xiꞌin na iin kivi.