HEBREOS 11:3 - Xochapa Mixteco

³ Xaꞌa ya ndáa ni ini yo xíni yo Ndioxi yakan kúndaa ini yo xiꞌin tuꞌun ra ya xa̱ꞌnda ra chiñu kua ndi̱kuaꞌa ñuu ivi yóꞌó xiꞌin ndivi ni̱nù. Ya yóꞌó kúni kachi ya ndi̱kuaꞌa ñuu ivi yóꞌó xiꞌin ñaꞌa ya köo ndi̱kuvi koto xiꞌin nuu yo.

HEBREOS 11:3 ပူးပေါင်းရင်းမြစ်များ

San Juan 1:3

Tixin ra ikán kua si̱kuaꞌa Ndioxi ndiꞌi ñaꞌa. Nda iin ya köo ndi̱kan mií Ndioxi, sundi ndiꞌi ni kúu ya íyo, ta tixin ra ikán si̱kuaꞌa ndiꞌi Ndioxi ya.

Los Hechos 14:15

―¡Tata!, ¿ndachu kua íkan ndo saa? Ta süvi ndioxi ku nde, taꞌan mií ndo ku tu ndeꞌe va. Xaꞌa ya íkan ndo saa yakan vaxi nde ndikani nde tuꞌun vaꞌa xaꞌa Ndioxi nuu ndo, ya ná kundaa ini ndo xäa toꞌo ka ndo inka ñaꞌa ya köo kúu Ndioxi, ta ndiko koo ini ndo xaꞌa ya íkan ndo. Saa ndikundikun ndo Ndioxi, ra táku, ra si̱kuaꞌa ndivi xiꞌin ñuꞌú tin nduta ñûꞌu xiꞌin ndiꞌi ka ñaꞌa ya íyo ñuu ivi yóꞌó.

Los Hechos 17:24

’Suvi Ndioxi ikán ku ra si̱kuaꞌa ñuu ivi xiꞌin ndiꞌi ka ñaꞌa ya íyo ñuu ivi yóꞌó. Ta suvi mií ra ku ra xáꞌnda chiñu nuu ndiꞌi ya íyo nuu ndivi xiꞌin ya íyo ñuu ivi yóꞌó. Ta köo íyo ra veꞌe ñuꞌu ya síkuaꞌa na ivi.

ROMANOS 4:17

Ta soꞌva ndi̱kaꞌan Ndioxi xiꞌin ra Abraham nuu ya ta̱a na xinaꞌa, káchi ra saa: “Yeꞌe ku Ndioxi, ta taxi i ichí ndaꞌa un nduu un iva ndiꞌi ni kúu naꞌa, na ndóo ñuu ivi yóꞌó”, káchi Ndioxi xiꞌin ra. Saa ka̱ndixa ra Abraham tuꞌun ya ndi̱kaꞌan Ndioxi xiꞌin ra. Chi Ndioxi ta kúu mií ra ichí ya sitaku ra na ndíi, saa kúu mií ra ichí ya sikuaꞌa ra ñaꞌa ya täꞌan kuaꞌa.

1 Corintios 2:7

Ndeꞌe, ta sínaꞌa nde ya ndíchi kúu mií Ndioxi, ya ndi̱xiyo sěꞌe yachi nda kivi tá xi̱koo xaꞌa ñuu ivi yóꞌó. Nda saa vi chi̱tuni Ndioxi ya ndíchi yóꞌó ya kuchiñu niꞌi ni yo ya vaꞌa xiꞌin ya.

1 Timoteo 4:5

Saa chi mií tuꞌun Ndioxi kua ndása i̱í ñaꞌa xíxi yo tá káꞌan yo xiꞌin ra táxi yo tixaꞌvi ndaꞌa ra xaꞌa ya.

HEBREOS 1:2

Sundi tiempo ya kuaꞌan ndíꞌi ndóo yo vitin ta köo káꞌan ka ra xiꞌin yo tixin nda ikán, tixin Seꞌe ra kua káꞌan ra xiꞌin yo, chi tixin ra ikán kua si̱kuaꞌa ra ndiꞌi ni kúu ñaꞌa ya íyo nuu ndivi xiꞌin ya íyo ñuu ivi yóꞌó. Saa ta̱xi ndiꞌi ra ya ndaꞌa Seꞌe ra, ta ra ikán ku ra ndíso chiñu xiꞌin ndiꞌi ni kúu ñaꞌa ra.

HEBREOS 6:5

Na ikán ta kúndaa ini na ya vaꞌa ni ku tuꞌun Ndioxi, saa kúndaa ini na ya ndee ni ndee kúu mií ra kaꞌnda chiñu ra kivi vaxi.

2 Pedro 3:5

Chi na ñaa ta köo xíin a kiꞌin na kuenta ya si̱kuaꞌa Ndioxi ndivi xiꞌin ñuꞌú tiempo xinaꞌa, ta iin kuiti tuꞌun ndi̱kaꞌan ra, xa̱ꞌnda ra chiñu ta saa ndi̱kuaꞌa ndivi xiꞌin ñuꞌú, ta ñuꞌú ra ini tikuií ndi̱kuaꞌa ya ndíkaa ya nda vitin.

El Apocalipsis 4:11

―Iva yo Ndioxi, iin mií un ku un kaꞌnu ni nuu nde, yakan iindaa yóꞌo̱ ku ra kúu mií ichí ndikiꞌin ni un tuꞌun vaꞌa ya káꞌan nde xiꞌin un, saa ná ndikunuu sukun ni ya toꞌo un, chi yóꞌo̱ ku ra ndee ni ndee kúu mií, ta iindaa yóꞌo̱ ku un si̱kuaꞌa ndiꞌi ni kúu ñaꞌa ya íyo ñuu ivi yóꞌó. Tá íyo ya chi̱tuni mií un, saa íyo ndiꞌi ya si̱kuaꞌa un, ―káchi na xikuaꞌa ikán xiꞌin Ndioxi.