El Apocalipsis 4:11 - Xochapa Mixteco

¹¹ ―Iva yo Ndioxi, iin mií un ku un kaꞌnu ni nuu nde, yakan iindaa yóꞌo̱ ku ra kúu mií ichí ndikiꞌin ni un tuꞌun vaꞌa ya káꞌan nde xiꞌin un, saa ná ndikunuu sukun ni ya toꞌo un, chi yóꞌo̱ ku ra ndee ni ndee kúu mií, ta iindaa yóꞌo̱ ku un si̱kuaꞌa ndiꞌi ni kúu ñaꞌa ya íyo ñuu ivi yóꞌó. Tá íyo ya chi̱tuni mií un, saa íyo ndiꞌi ya si̱kuaꞌa un, ―káchi na xikuaꞌa ikán xiꞌin Ndioxi.

El Apocalipsis 4:11 ပူးပေါင်းရင်းမြစ်များ

Los Hechos 14:15

―¡Tata!, ¿ndachu kua íkan ndo saa? Ta süvi ndioxi ku nde, taꞌan mií ndo ku tu ndeꞌe va. Xaꞌa ya íkan ndo saa yakan vaxi nde ndikani nde tuꞌun vaꞌa xaꞌa Ndioxi nuu ndo, ya ná kundaa ini ndo xäa toꞌo ka ndo inka ñaꞌa ya köo kúu Ndioxi, ta ndiko koo ini ndo xaꞌa ya íkan ndo. Saa ndikundikun ndo Ndioxi, ra táku, ra si̱kuaꞌa ndivi xiꞌin ñuꞌú tin nduta ñûꞌu xiꞌin ndiꞌi ka ñaꞌa ya íyo ñuu ivi yóꞌó.

Los Hechos 17:24

’Suvi Ndioxi ikán ku ra si̱kuaꞌa ñuu ivi xiꞌin ndiꞌi ka ñaꞌa ya íyo ñuu ivi yóꞌó. Ta suvi mií ra ku ra xáꞌnda chiñu nuu ndiꞌi ya íyo nuu ndivi xiꞌin ya íyo ñuu ivi yóꞌó. Ta köo íyo ra veꞌe ñuꞌu ya síkuaꞌa na ivi.

ROMANOS 11:36

Mií Ndioxi ku ra si̱kuaꞌa ndiꞌi ni kúu ñaꞌa ya íyo, xaꞌa mií ra si̱kuaꞌa ra ndiꞌi ya, ta ndiꞌi ya ndi̱kuaꞌa íyo ya xaa súvi ya kúni mií ra. ¡Yakan kua ná kunuu vaꞌa ni ya toꞌo ra ndiꞌi saa tiempo! Saa ná koo.

Efesios 3:9

Ta̱xi Ndioxi chiñu ndaꞌa i ya kuchiñu i ndituꞌun i xiꞌin naꞌa xaꞌa ñaꞌa ya chi̱tuni mií ra ndi̱xiyo sěꞌe yachi, chi mií ra ku ra si̱kuaꞌa ndiꞌi ni kúu ñaꞌa ya íyo, ta nda yachi vi ndi̱xiyo sěꞌe ñaꞌa ya chi̱tuni mií ra, nda tá si̱kuaꞌa ra ñuu ivi yoꞌo vi kua i̱kan ra saa.

HEBREOS 1:10

Saa káꞌan tuku tuꞌun Ndioxi xaꞌa Seꞌe ra, káchi ya saa: Tata, nda tá xi̱koo ñuu ivi yóꞌó tá xaꞌá, ta nda iin ñaꞌa köo ndi̱xiyo, ta yóꞌo̱ ku un si̱kuaꞌa ndiꞌi ni kúu ya íyo ñuu ivi yóꞌó xiꞌin ya íyo nuu ndivi xiꞌin ndaꞌa mií un si̱kuaꞌa ndiꞌi un ya.

HEBREOS 1:2

Sundi tiempo ya kuaꞌan ndíꞌi ndóo yo vitin ta köo káꞌan ka ra xiꞌin yo tixin nda ikán, tixin Seꞌe ra kua káꞌan ra xiꞌin yo, chi tixin ra ikán kua si̱kuaꞌa ra ndiꞌi ni kúu ñaꞌa ya íyo nuu ndivi xiꞌin ya íyo ñuu ivi yóꞌó. Saa ta̱xi ndiꞌi ra ya ndaꞌa Seꞌe ra, ta ra ikán ku ra ndíso chiñu xiꞌin ndiꞌi ni kúu ñaꞌa ra.

El Apocalipsis 1:6

Ta ta̱xi Tata yo Jesucristo ichí ndaꞌa yo ndu̱u yo tá íyo nda rey nda xáꞌnda chiñu, saa chi kaꞌnda chiñu yo xiꞌin ra. Ta saa ta̱xi ra ichí ndaꞌa yo koo yo tá íyo nda sutu i̱í, saa chi tá íin nda ikán saa koo yo xaa chiñu yo nuu Iva yo Ndioxi. ¡Ta ná xaa kaꞌnu ni yo Ndioxi ndiꞌi saa kivi! ¡Ta ndiꞌi saa kivi ná kaꞌnda chiñu ra ñuu ivi yóꞌó! Saa ná koo ya.

El Apocalipsis 10:6

saa chi̱naꞌa ya Ndioxi, ra táku ndiꞌi saa kivi, ra si̱kuaꞌa ndivi xiꞌin ñuꞌú, saa si̱kuaꞌa ra nduta ñûꞌu xiꞌin ndiꞌi kiti íyo ini rá, ta ndi̱kaꞌan ya, káchi ya saa: ―Köo ka kivi ya kundatun Ndioxi ya sixinu ra ya ndi̱kaꞌan ra.

El Apocalipsis 14:7

Ta ndee ka vi káꞌan tatun ikán, káchi ya saa: ―Ku iꞌvi ndo nuu Ndioxi ta xaa toꞌo ni ndo ra, ta saa xaa kaꞌnu ndo ra, chi xa ti̱ndaa kivi ya xaa nani ra kuachi xiꞌin ndiꞌi naꞌa. Xaa kaꞌnu ndo ra chi mií ra si̱kuaꞌa ñuu ivi yóꞌó, xiꞌin ndivi tin ñuꞌú xiꞌin nduta ñûꞌu xiꞌin ndiꞌi ka ñaꞌñu nuu kána tikuii.

El Apocalipsis 19:1

Tá ndi̱ꞌi ndi̱yaꞌa ya ikán saa xi̱ni soꞌo i tachi kuaꞌa ni naꞌa nuu ndivi, ndee ni káꞌan na, káchi na saa: ―¡Ná xaa kaꞌnu yo Ndioxi! ¡Chi Ndioxi ku ra ndee ni ndee, si̱kaku ra mií yo! Ndiꞌi ya vaꞌa ya ndee ni ndee xiꞌin ya toꞌo tin ya luvi ni yéꞌe̱ íyo ya xiꞌin Ndioxi.

El Apocalipsis 5:12

Saa káꞌan ni na tatun Ndioxi ikán, káchi na saa: Levo loꞌo kiti ndi̱soko xiꞌin mií nuu Ndioxi, kiti ti̱kueꞌe ni, ri ikán ku ri ndee ni ndee kúu mií, saa kúu mií ri ndiꞌi ya kuika xiꞌin ya ndichi ni. Ta ndee ni ri, ná ndikunuu vaꞌa ni ya toꞌo ri. Ná kaꞌan vaꞌa ni yo xaꞌa ri chi ya ndixa kua ndi̱kiꞌin ndiꞌi ri ya vaꞌa, káchi na tatun Ndioxi ikán ya xáa kaꞌnu na kiti Levo loꞌo ikán.

El Apocalipsis 5:2

Saa xi̱ni i iin tatun Ndioxi ya ndee ni ndaku, ta ndee ka vi ndi̱kaꞌan ya, káchi ya saa: ―¿Unku vi ra kúu mií ichí ya ndaxin ra ya kixin núꞌni toko tutu yóꞌó ta ndikani ra ya? ―káchi tatun Ndioxi ikán.

El Apocalipsis 5:9

Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.