El Apocalipsis 3:7 - Xochapa Mixteco7 Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun Ndioxi, ya ndáa naꞌa, na kándixa yeꞌe, ta ndíkitaꞌan na ñuu Filadelfia xáa kaꞌnu na Ndioxi. Yeꞌe káꞌan xiꞌin ndo ku ra i̱í, ra ndixa ni ndaa. Yeꞌe ku ra níꞌi llave ya ku̱u mií ra rey David. Tá xúna i yéꞌe, ta nda iin na küchiñu ndikasi ya. Tá ndíkasi i ya ta nda iin na küchiñu kuna ya. အခန်းကိုကြည့်ပါ။ |
El Apocalipsis 3:7
38 ပူးပေါင်းရင်းမြစ်များ
―Yeꞌe ku i náni “Alfa tin Omega”, chi tuꞌun yóꞌó kúni kachi ya, yeꞌe ku ra táku nda kivi núnu̱ú, ta táku i vitin ta saa kutaku i iin saa nda kivi sindiꞌi. Ta vitin xíniñuꞌu un taa un nuu tutu ya sinaꞌa i nuu un kuni un. Ta ya taa un ñaa, ta tiꞌvi un ya ná kuꞌun ya ndaꞌa uxa ñuu nuu ndóo na kándixa yeꞌe. Uxa ñuu yóꞌó kua ñúꞌu estado Asia, ya náni Éfeso xiꞌin Esmirna tin Pérgamo xiꞌin Tiatira tin Sardis xiꞌin Filadelfia tin Laodicea ―káchi tachi ra ya xi̱ni soꞌo i.
Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.
Saa xíta na yaa i̱í nuu Ndioxi, yaa ya náni: yaa kiti Levo, ya xi̱ta ra Moisés, ra xa̱a chiñu nuu Ndioxi xinaꞌa, káchi na saa: Tata Iva yo Ndioxi, ra ndee ni ndee kúu mií un. Saa vaꞌa ni chiñu íkan un, chee ni ya íkan un. Ndaa ni ichí un ta ndaku ni ya. Iin yóꞌó ku rey ra i̱í ni xáꞌnda chiñu nuu ndiꞌi na ñuu ivi.
Chi Ndioxi ta xáa nani ra kuachi na xiꞌin ya ndaa tin ya ndixa. Chi xa si̱tixuꞌvi ni ra na ñuu chee ni ikán xaꞌa ya väꞌa i̱kan na. Chi na ñuu ikán tá íyo iin yá ñaꞌa xíko ikin kuñu saa íin na, ta xaꞌa ya íkan na saa kua xáa kini ni na xiꞌin ndiꞌi ni kúu na ñuu ivi. Saa xa̱ꞌni na kuaꞌa ni naꞌa na kándixa Ndioxi. Ta xaꞌa ya väꞌa i̱kan na kua sítixuꞌvi ni Ndioxi na ―káchi tachi na kuaꞌa ni xi̱ni soꞌo i.
Saa ndi̱kaꞌan ka ra xiꞌin i, káchi ra saa: ―Vaꞌa taa un tuꞌun yóꞌó ná kuꞌun ya ndaꞌa tatun Ndioxi ya ndáa na kándixa yeꞌe, nuu ndíkitaꞌan na xáa kaꞌnu na Ndioxi ñuu Éfeso. Yeꞌe ku taa ra ndóso uxa kimi nuu ndaꞌa kuáꞌá, ta yeꞌe ku ra xíka maꞌñu candelero ya oro nuu ndóso ñu̱ꞌu̱ xíxi ya, ta káꞌan i xiꞌin ndóꞌo̱ ndóo ñuu Efeso, ndo kándixa yeꞌe, ta soꞌva káchi i xiꞌin ndo:
Saa ndi̱kaꞌan tuku ra xiꞌin i, káchi ra saa: ―Taa un tutu yóꞌó kuꞌun ya ndaꞌa tatun Ndioxi ya ndáa naꞌa, na kándixa yeꞌe nuu ndíkitaꞌan na xáa kaꞌnu na yeꞌe ñuu Laodicea: “Ya yóꞌó kua káꞌan yeꞌe, ra kúu Amén. Ndee ni ndíkuiin i xaꞌa ya i̱kan Ndioxi, ra ndaa ni. Ta yeꞌe ku ra ndi̱xiyo núnu̱ú tá sikan xa̱á xi̱koo xaꞌa ñuu ivi ya si̱kuaꞌa Ndioxi.
Ta iin iin mií ya táku ikán íyo iñu ndixin iin iin ya. Ta ndiꞌi ni kúu ñaꞌñu ya íyo nina nduchi nuu, sata ya tin ini ya kúu mií ya nduchi nuu. Ta köo xíkuiin ya káꞌan ya, nduvi niuun káꞌan ya, káchi ya saa: ―¡Ra i̱í, ra i̱í, ra i̱í ni ku Ndioxi! ¡Taa ra ndixa ni ndee ku Ndioxi! Ndioxi ku ra táku nda kivi núnu̱ú, ta saa táku ra nda kivi vitin, saa kutaku ra ndiꞌi kivi ya vaxi, ―káchi kumi saa ya táku ikán, káꞌan ya xaꞌa Ndioxi.
Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.
ကြော်ငြာတွေ