El Apocalipsis 3:18 - Xochapa Mixteco

¹⁸ Yakan yeꞌe, ta káꞌan i xiꞌin ndo, vaꞌa sata ndo oro ya ndinuꞌu nuu i, oro ya xáꞌmi na xiꞌin ñu̱ꞌu̱ xíxi, ya ndúu ya oro nina. Taꞌan ya ikán kua íyo nuu i. Sata ndo ya nuu i, saa nduu ndo naꞌa, na ndixa ni kuika. Tá tu köo kúni ndo kukaꞌan ni nuu ndo xaꞌa ya chála ndo, ta sata ndo toto yaa ni nuu i kundixi ndo. Saa sata tu ndo tatan nuu i, kee nduchi nuu ndo ya ná ndikoto vaꞌa ndo.

El Apocalipsis 3:18 ပူးပေါင်းရင်းမြစ်များ

San Mateo 13:44

Saa ndi̱kaꞌan tuku Jesús tuꞌun ndíchi xiꞌin na nuu sínaꞌa ra na, káchi ra saa: ―Ichí nuu xáꞌnda chiñu Ndioxi ta tá káa iin ñaꞌa ya ndíkaa sěꞌe nuu ñuꞌú xi̱ni iin taa, saa káa ya. Tá xi̱ni ra ikán ya, saa ki̱ꞌin tuku ra ya chi̱kaa sěꞌe ra tixin mií ñuꞌú ikán, ñaa ndi̱ko koo ra kuanuꞌu ra. Kúsini ka vi ra ndi̱kiꞌin ra kuaꞌan ra ta ndi̱xiko ndiꞌi ra ñaꞌa kúu mií ra, saa ku̱chiñu ra sa̱ta ra ñuꞌú nuu ndíkaa ya kuika ikán.

San Mateo 25:9

Ñaa ndi̱kuiin ná xa íyo ndúvi ikán káꞌan ná: “Küvi taxi nde rá ndaꞌa ndo, saa chi näni rá kuniñuꞌu ndo xiꞌin nde, vaꞌa ka kuáꞌan ndo nuu xíko na rá, ta sata ndo rá kuniñuꞌu ndo”, káchi ná xiꞌin taꞌan ná.

San Lucas 12:21

Ñaa ndi̱kaꞌan ka ra xiꞌin na káchi ra saa: ―Tá ndo̱ꞌo ra kuika ikán, saa kundoꞌo ndiꞌi na chívaꞌa ni ya kuika kúu mií na, chi nuu Ndioxi ta ndaꞌvi ni va na ―káchi Jesús.

2 Corintios 5:3

Chi tá ná tindaa kivi ya ndundaa ikin kuñu kúu mií yo vitin, ta köo chála yo, chi ndi̱kiꞌin yo inka ikin kuñu ya xa̱á.

2 Corintios 8:9

Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

1 Timoteo 6:18

Vaꞌa kaꞌan un xiꞌin nda ñani yo, nda ndúkuika ni, ya xíniñuꞌu nda ikan ni nda ya vaꞌa. Ta ná küxiꞌnda nda, ná kusini ni nda nditaꞌvi nda ñaꞌa nda xiꞌin inka naꞌa.

Santiago 2:5

Ñani mani xiꞌin kuꞌva yo, ndóꞌo̱ ku ndo kúꞌvi ni ini i xíni i, ta kuni soꞌo ndo ya kaꞌan i xiꞌin ndo: Ndioxi ku ra ndi̱kaxin na ndaꞌvi ndóo ñuu ivi ya ná nduu na naꞌa, na ndinuꞌu ni ini ndáa ini xíni ra xiꞌin ndiꞌi nima na, ta saa ndikiꞌin na ya ndi̱kaꞌan ra taxi ndaꞌa na kúꞌvi ini xíni ra, saa koo na kaꞌnda chiñu na xiꞌin ra.

1 Pedro 1:7

Chi ndiꞌi tindoꞌo ya vaxi nuu ndo, ta tá kuꞌva xíto ndoso na kàà ya oro xiꞌin ñu̱ꞌu̱ iꞌni ni, ya ná nduyéꞌe̱ luvi ya nduu latun ni ka ya. Ta kuꞌva saa íyo ya ndáa ni ini ndo Ndioxi, chi ya ikán kua ndáa yaꞌvi ni ka nuu oro ya ndíꞌi xaꞌa, yakan tá ndóꞌo̱ ndo saa, ta ndïkava ini ndo, chi tá ná ndiko koo Tata yo Jesucristo kixi ra ta vaꞌa ni kaꞌan ra xaꞌa ndo, chinuu vaꞌa ni ra tuꞌun ndo.

El Apocalipsis 16:15

Xaꞌa ya ikán kua xíniñuꞌu ndi̱kaꞌán ini ndo xaꞌa tuꞌun ya ndi̱kaꞌan Tata yo Jesucristo xiꞌin na ndíkun sata ra, káchi ra saa: ―¡Koto ndo vii! Tá íkan iin ra kuiꞌna, kivi köo ndátun ndo ra. Saa koo kivi ndiko koo i ñuu ivi. Ta naꞌa na ndíto koo tuꞌva na ndikiꞌin na yeꞌe, ta taxi Ndioxi ya ndixa kusini na ikán. Ta naꞌa na ndíto, xíniñuꞌu koo tuꞌva tikoto na ya kundixi na, ya ná kükaꞌan nuu na íyo chála na kivi ndiko koo i ―káchi Tata yo Jesucristo ndi̱kaꞌan ra.

El Apocalipsis 19:8

Ta ñaꞌa yá tíndaꞌa ikán ta xa kúu mií yá ichí kundixi yá toto yaa ni, ya kúu ya lino, ya yéꞌe̱ táxan ni, chi ya lino yaa ni ikán ku ya vaꞌa ni, ya i̱í íkan na ndíkun Tata yo Jesucristo káchi tuꞌun ya xi̱ni soꞌo i.

El Apocalipsis 2:9

Xíni ndiꞌi i ya ndee ni ndóꞌo ini ndo, ta saa xíni i ya kúndaꞌvi ni ndo. Vani saa va, sundi ndóꞌo̱ ta tá íin ndo kuika ni va saa íin ndo. Saa ni xíni i ya káꞌan kini ni naꞌa xaꞌa ndo. Na ikán káꞌan na kúu na judío, ta süvi ya ndaa ku ya káꞌan na, chi na ikán ta na xáa kaꞌnu kiti nǎꞌa, kiti náni Satanás va ku na.

El Apocalipsis 3:17

Káꞌan ndo kuika ni ndo, ta nda iin ñaꞌa köo kúmani nuu ndo káchi ndo. Sundi ndóꞌo̱, ta köo kíꞌin ndo kuenta ya ndixa ni ndaꞌvi ndo, nda loꞌo ñaꞌa köo nuu ndo, nda ya kuxi ndo köo, iin kúndaꞌvi chála ndo, tá íin na kuáa̱ küvi koto saa íin ndo, ta köo kíꞌin ndo kuenta.

El Apocalipsis 4:4

Ta nuu ndíchi tai toꞌo chee ikán ndíta ka oko kumi tai toꞌo, ndi̱kava nduu ndiꞌi nu sata itun tai toꞌo chee ikán, ta ndóo oko kumi na xikuaꞌa nuu nu, yaa ka vi toto ndíxi iin iin na xikuaꞌa ikán, saa ínuu iin corona ya oro xiní iin iin na.

El Apocalipsis 7:13

Saa ndi̱ndakan tuꞌun iin ra taꞌan na xikuaꞌa ikán yeꞌe, káchi ra saa xiꞌin i: ―¿Unku na ndíxi tikoto yaa ni ndíta yóꞌó? ¿Ta míi chí ke̱e na? ―káchi ra xiꞌin i.