El Apocalipsis 19:9 - Xochapa Mixteco

⁹ Saa ndi̱kaꞌan iin tatun xiꞌin i, káchi ya saa: ―Vaꞌa taa un tuꞌun yóꞌó, kachi un saa: “Vaꞌa ni kée naꞌa, na ka̱na Ndioxi kuꞌun na kuxini na nuu íyo viko tíndaꞌa ra kúu Levo loꞌo kachi un”, ―káchi ya xiꞌin i. Saa ndi̱kaꞌan ka ya xiꞌin i, káchi ya saa: ―Ndiꞌi tuꞌun ya ndi̱kaꞌan i xiꞌin un ku tuꞌun ya ndaa ni, ya ke̱e nuu Ndioxi ―káchi ya xiꞌin i.

El Apocalipsis 19:9 ပူးပေါင်းရင်းမြစ်များ

San Lucas 22:16

Saa chi inka pascua ya vaxi ta köo ka i kuxini xiꞌin ndo. Sundi nda ná xinu ndiꞌi ya kúni kaꞌan viko yóꞌó, nda saa kuxini i xiꞌin ndo nuu xáꞌnda chiñu Ndioxi ―káchi Jesús xiꞌin nda.

1 Timoteo 1:15

Ta vaꞌa ná kundaa ini un xiꞌin ya káꞌan i xiꞌin un, chi ya ndaa ni kua, ta ndiꞌi na xíniñuꞌu kundaa ini xaꞌa ya yóꞌó: Chi Tata yo Jesucristo ku ra ki̱xi ñuu ivi yóꞌó ya sikaku ra yo ivi kuachi, ta kúni i káꞌan i xiꞌin un, xiꞌna yeꞌe ku ra ndee ni kuachi íyo nuu ndiꞌi na ivi.

1 Timoteo 4:9

Ta ya ndixa ni ku tuꞌun ya káꞌan i xiꞌin ndo yóꞌó, yakan ndiꞌi na xíniñuꞌu kandixa ya.

2 Timoteo 2:11

Ta ya káꞌan i xiꞌin ndo yóꞌó, ta ya ndaa ni kua: tá tu xíꞌi yo xiꞌin ra, ta saa kutaku tu yo xiꞌin va ra.

Tito 3:8

Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.

El Apocalipsis 1:1

Ya yóꞌó kua si̱naꞌa Ndioxi nuu Jesucristo ya ná sinaꞌa ra ya nuu nda xi̱taꞌan xiꞌin ra xaꞌa ñaꞌa ya kama ni kuu, ya kundaa ini naꞌa xaꞌa ndiꞌi ñaꞌa ya ikan Ndioxi, chi kama ni ikan ra ya, sixinu ndiꞌi ra ya yóꞌó. Yakan ti̱ꞌvi Tata yo Jesucristo iin ra tatun Ndioxi ki̱xi ra si̱naꞌa ndiꞌi ra ya nuu yeꞌe Juan, ra xi̱taꞌan xiꞌin ra.

El Apocalipsis 1:19

Saa ndi̱kaꞌan ka ra xiꞌin i, káchi ra saa: ―Ndiꞌi ñaꞌa ya xi̱ni un, ta taa ndiꞌi un ya nuu tutu: saa taa tu un tá kúu ndiꞌi ya kúu kivi vitin tin ya kuu kivi vaxi.

El Apocalipsis 10:4

Xa íyo tuꞌva i taa i tuꞌun ya xi̱ni soꞌo i tá ndee ni ndi̱ndaꞌi savi, ñaa xi̱ni soꞌo i ke̱ta tachi na nuu ndivi ndi̱kaꞌan ya xiꞌin i, káchi ya saa: “Ini mií un ná ndi̱kaa sěꞌe tuꞌun ya xi̱ni soꞌo un tá ndi̱ndaꞌi uxa nuu savi, ta nda iin ya xi̱ni soꞌo un täa un”, káchi tachi na ke̱ta nuu ndivi xiꞌin i.

El Apocalipsis 14:13

Saa xi̱ni soꞌo i tuꞌun ya ke̱ta nuu ndivi, ndi̱kaꞌan ya xiꞌin i káchi ya saa: ―Taa tuꞌun káꞌan i xiꞌin un: “Kivi vitin xiꞌin ndiꞌi saa kivi ya vaxi, ndiꞌi naꞌa na ndíkun Tata yo Jesucristo, tá ná kuvi na xaꞌa ya kándixa na ra, ta taxi Ndioxi koo vaꞌa ni na xiꞌin ra, nuu kusini ni na” ―káchi tuꞌun ya xi̱ni soꞌo i. Saa ndi̱kaꞌan Tachi i̱í Ndioxi, káchi ya saa: ―Saa ndi̱xa íyo ya, tá ná xaa na nuu ndivi, ta ndixa kua ndikundee na, chi xa si̱xinu na chiñu i̱kan na ñuu ivi yóꞌó. Ni Ndioxi ta ndi̱kaꞌán ini ra xaꞌa ya vaꞌa i̱kan na, ta nuu ndivi ikán ndichaꞌvi ra na xaꞌa chiñu ya i̱kan na ñuu ivi yóꞌó ―Soꞌva káchi Tachi Ndioxi xi̱ni soꞌo i.

El Apocalipsis 17:1

Ta saa xa̱a iin na taꞌan na tatun ya xi̱niꞌi copa ya uxa xa̱a ya nuu i, ndi̱kaꞌan ya xiꞌin i, káchi ya saa: ―Naꞌa yóꞌó, ná sinaꞌa i yóꞌo̱ ndá kuꞌva tixuꞌvi ni na ñuu Babilonia, chi ñuu yóꞌó tá íyo iin yá ndee ni xíko ikin kuñu saa káa ya. Ta índuꞌu koo yá nuu nduta tikuii nduta kuaꞌa ni.

El Apocalipsis 17:17

Ta mií Ndioxi ku ra chi̱tuni ya koo yuꞌu uxi saa nda rey ikán xiꞌin taꞌan nda, ya taxi nda ichí ndaꞌa ri ìyo ni káa ikán ya kaꞌnda chiñu ri. Ta saa kaꞌnda chiñu ri nuu nda rey ya sixinu nda ya káꞌan tuꞌun Ndioxi.

El Apocalipsis 2:1

Saa ndi̱kaꞌan ka ra xiꞌin i, káchi ra saa: ―Vaꞌa taa un tuꞌun yóꞌó ná kuꞌun ya ndaꞌa tatun Ndioxi ya ndáa na kándixa yeꞌe, nuu ndíkitaꞌan na xáa kaꞌnu na Ndioxi ñuu Éfeso. Yeꞌe ku taa ra ndóso uxa kimi nuu ndaꞌa kuáꞌá, ta yeꞌe ku ra xíka maꞌñu candelero ya oro nuu ndóso ñu̱ꞌu̱ xíxi ya, ta káꞌan i xiꞌin ndóꞌo̱ ndóo ñuu Efeso, ndo kándixa yeꞌe, ta soꞌva káchi i xiꞌin ndo:

El Apocalipsis 2:12

Saa ndi̱kaꞌan ka ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun, ya ndáa naꞌa, na kándixa yeꞌe, na ndíkitaꞌan ñuu Pérgamo ya xáa kaꞌnu na Ndioxi. Ta káꞌan i xiꞌin na, káchi i soꞌva: Yeꞌe ku taa ra níꞌi i̱chi̱ ya xíin uvi saa ñaꞌñu yuꞌu.

El Apocalipsis 2:18

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun, ya ndáa naꞌa, na kándixa yeꞌe, na ndóo ñuu Tiatira, na xáa kaꞌnu Ndioxi. Yeꞌe ku taa ra káꞌan xiꞌin ndo, yeꞌe ku Seꞌe Ndioxi, ta yéꞌe̱ ni nduchi nuu i nda tá kuva yéꞌe̱ ñu̱ꞌu̱ ya xíxi, saa yéꞌe̱ ya. Ta xaꞌa i yéꞌe̱ ya tá kuꞌva yéꞌe̱ kàà ya yáꞌa tá sikan ndíyakun na ya, ndúyeꞌe ni ya, saa yéꞌe̱ xaꞌa i. Ta káꞌan i xiꞌin ndo tuꞌun yóꞌó:

El Apocalipsis 2:8

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó ya ná kuꞌun ya ndaꞌa tatun Ndioxi ya ndáa naꞌa, na kándixa yeꞌe, nuu ndíkitaꞌan na xáa kaꞌnu na Ndioxi ñuu Esmirna. Ta yeꞌe káꞌan i xiꞌin na ikán, káchi i saa: Yeꞌe, ta táku i nda kivi núnu̱ú iin saa kutaku i nda kivi sindiꞌi. Yeꞌe kúu ra ndi̱xiꞌi ta ndi̱taku i, táku i vitin.

El Apocalipsis 21:5

Saa ndi̱kaꞌan ra índuꞌu nuu tai toꞌo, káchi ra saa: ―Ndasa xa̱á ndiꞌi i ñaꞌa ya si̱kuaꞌa i yachi. Saa ndi̱kaꞌan tuku ra xiꞌin i, káchi ra saa: ―Taa tuꞌun ya káꞌan i xiꞌin un, chi ya ndaa ni ndixa ku ya káꞌan i xiꞌin un ―káchi ra xiꞌin i.

El Apocalipsis 22:6

Saa ndi̱kaꞌan tatun Ndioxi xiꞌin i, káchi ya saa: ―Tuꞌun yóꞌó ku ya ndaa ni, ya ndixa ni. Mií Iva yo Ndioxi ku ra ta̱xi ya xínituni ndaꞌa nda ndi̱kaꞌan ndoso tuꞌun yuꞌu ra xinaꞌa, ta vitin xa ti̱ꞌvi ra tatun ra ya kuꞌun ya ndituꞌun ya xiꞌin na xáa chiñu nuu ra ya ná kundaa ini na xaꞌa ñaꞌa ya xa numí ni kuu.

El Apocalipsis 3:1

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun ya ndáa naꞌa, na kándixa yeꞌe nuu ndíkitaꞌan na xáa kaꞌnu na Ndioxi ñuu Sardis. Yeꞌe ku ra kúu mií uxa tachi Ndioxi, ta ndíso i uxa kiti kimi. Xíni ndiꞌi i ya íkan ndo, xíni i ya káꞌan naꞌa xaꞌa ndo ya vaꞌa ni íkan ndo, ni ínuu vaꞌa ni tuꞌun ndo ya kándixa ni ndo yeꞌe, ta süvi ya ndaa ku ya. Chi ndóꞌo̱, ta tá íin na ndíi va saa íin ndo nuu i.

El Apocalipsis 3:14

Saa ndi̱kaꞌan tuku ra xiꞌin i, káchi ra saa: ―Taa un tutu yóꞌó kuꞌun ya ndaꞌa tatun Ndioxi ya ndáa naꞌa, na kándixa yeꞌe nuu ndíkitaꞌan na xáa kaꞌnu na yeꞌe ñuu Laodicea: “Ya yóꞌó kua káꞌan yeꞌe, ra kúu Amén. Ndee ni ndíkuiin i xaꞌa ya i̱kan Ndioxi, ra ndaa ni. Ta yeꞌe ku ra ndi̱xiyo núnu̱ú tá sikan xa̱á xi̱koo xaꞌa ñuu ivi ya si̱kuaꞌa Ndioxi.

El Apocalipsis 3:20

¡Koto ndo! Yeꞌe ku ra ndíchi yeꞌe ndo, ta kána i ndóꞌo̱. Tá ndá ndóꞌo̱ xíni soꞌo tachi i, ta xúna ndo yeꞌe ndo nuu i, saa káꞌan ndo xiꞌin i kiꞌvi i veꞌe ndo kuxíni i xiꞌin ndo, ta kuxíni ndo xiꞌin i.

El Apocalipsis 3:7

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun Ndioxi, ya ndáa naꞌa, na kándixa yeꞌe, ta ndíkitaꞌan na ñuu Filadelfia xáa kaꞌnu na Ndioxi. Yeꞌe káꞌan xiꞌin ndo ku ra i̱í, ra ndixa ni ndaa. Yeꞌe ku ra níꞌi llave ya ku̱u mií ra rey David. Tá xúna i yéꞌe, ta nda iin na küchiñu ndikasi ya. Tá ndíkasi i ya ta nda iin na küchiñu kuna ya.