El Apocalipsis 13:6 - Xochapa Mixteco

⁶ Ta xiꞌin ichí kúu mií ri xu̱na ri yuꞌu ri, saa xa̱á ri káꞌan ri nina tuꞌun kini xaꞌa Ndioxi, saa kini ni káꞌan tu ri xaꞌa kivi Ndioxi va, káꞌan kini ni tu ri xaꞌa veꞌe ñuꞌu ndivi nuu íyo Ndioxi, saa káꞌan kini ni tu ri xaꞌa ndiꞌi na ndóo nuu ndivi va.

El Apocalipsis 13:6 ပူးပေါင်းရင်းမြစ်များ

San Mateo 12:34

Saa ndóꞌo̱, káꞌan i xiꞌin ndo: ¡Tá íin seꞌe kiti ko̱ó saa íin ndo, káchi i! Chi süvi ndóꞌo̱ vaꞌa ku ndo, yakan küvi kaꞌan ndo ya vaꞌa. Chi tá kuꞌva íyo nima ndo, saa íyo tuꞌun káꞌan ndo.

San Mateo 15:19

Saa chi ya väꞌa ndíkani ini na ta chí nima na kána koo ya. Ta ya ikán kua chíndaꞌa na kaꞌni na ndìì, án ya kaka sii na xiꞌin taꞌan na, saa tu ya kuakiꞌvi na kuâán xiꞌin taꞌan na, xiꞌin ndiꞌi ka ya kini íkan na, saa tu ya síkuiꞌna na tin ya káꞌan vata na xiꞌin ya kánaꞌa na xaꞌa inka naꞌa.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

ROMANOS 3:13

Tá íin yavi nuu ndúxin ndìì, ya núna yuꞌu, saa íyo yuꞌu na ikán. Ndisaa ya vata kána koo yuꞌu na, síndaꞌvi na naꞌa. Tá íin ya xatu kúu mií kiti ko̱ó kueꞌe, saa íin tuꞌun kána koo yuꞌu na.

Colosenses 1:19

Ta kúsini ni mií Iva yo Ndioxi ta̱xi ra ndiꞌi ni kúu ñaꞌa ya kúu mií ra ndaꞌa Tata yo Jesucristo.

Colosenses 2:9

Ta iin tá kuꞌva íyo ini mií Iva yo Ndioxi iin kuꞌva ndaa saa íyo tu ikin kuñu mií Tata yo Jesucristo va.

HEBREOS 9:2

Ta soꞌva ndi̱xiyo veꞌe ñuꞌu ikán: Ya núnu̱ú ndi̱xiyo ku Cuarto ya náni Cuarto I̱í, ta ikán xi̱ndichi kàà ya náni candelero nuu xíxi ñu̱ꞌu̱, ta saa xi̱ndichi mesa nuu ndóso xita vaꞌa ya sóko nda sutu nuu Ndioxi.

HEBREOS 9:24

Saa chi veꞌe ñuꞌu nuu ndee ni I̱í ndi̱kiꞌvi Jesucristo, ta süvi na ñuu ivi yóꞌó ku na ndi̱sikuaꞌa ya. Chi ya si̱kuaꞌa na ivi yóꞌó, ta tá káa copia mií veꞌe ñuꞌu ya ndee ni vaꞌa íyo mií nuu ndivi saa káa ya si̱kuaꞌa na. Ta ikán ku nuu ndi̱kiꞌvi Jesucristo ini veꞌe ñuꞌu ya ndee ni vaꞌa ikán, káꞌan ndaꞌvi ra xaꞌa yo xiꞌin Ndioxi, ya ná xaa kaꞌnu ini ra xaꞌa yo.

El Apocalipsis 11:12

Ta xi̱ni soꞌo uvi saa nda ikán tachi ki̱xi chí nuu ndivi, ta ndee ni ndi̱kaꞌan ya xiꞌin nda, káchi ya saa: ―Naꞌa ndo, ndaa ndo yóꞌó ―káchi ya xiꞌin nda. Saa nuu iin viko, ta ndi̱kava nduu ndiꞌi ya nda, saa nda̱a nda xiꞌin ya kuaꞌan nda nuu ndivi. Ta xi̱ni ndiꞌi naꞌa, na sáa ini xíni ñaꞌa, ya nda̱a nda kuaꞌan nda nuu ndivi.

El Apocalipsis 12:12

Yakan ¡ná kusini ni ndivi xiꞌin ndóꞌo̱ ndóo nuu ya! ¡Ta ndaꞌvi ni ndóꞌo̱ ndóo ñuu ivi! ¡xiꞌin ndiꞌi kiti táku ini nduta ñûꞌu! Ndaꞌvi ni naꞌa, chi nu̱u kiti nǎꞌa nuu ñuꞌú ta ndixa ni sáa ini ri xíni ñaꞌa ri, chi xa xíni ri siloꞌo ni kivi kúu mií ri ichí ya kaꞌnda chiñu ri, sixinu ri chiñu ya väꞌa. Soꞌva káchi tachi na xi̱ni soꞌo i nuu ndivi.

El Apocalipsis 15:5

Saa ndi̱koto i nuu ndivi ta xi̱ni i ndi̱xuna yeꞌe veꞌe ñuꞌu manta. Ta ini veꞌe ñuꞌu ikán ndíchi itun xatun nuu ndíkáꞌán ini naꞌa ya ndixa kua xaa súvi Ndioxi tuꞌun ra ya ndi̱ka̱ꞌa̱n ra xiꞌin na xinaꞌa.

El Apocalipsis 18:20

Saa xi̱ni soꞌo i tuꞌun ya ndi̱kaꞌan iin na, káchi ya saa: Ndóꞌo̱ ndóo nuu ndivi nuu íyo Ndioxi, ¡ta kusini ni ndo! Saa kusini ni ndóꞌo̱ ndi̱kaxin Ndioxi xáa chiñu nuu ra. Saa ndóꞌo̱ káꞌan tuꞌun yuꞌu Ndioxi, ndo ndi̱kaꞌan ndoso tuꞌun ra, xiꞌin ndiꞌi ndóꞌo̱ na i̱í xaꞌa ya ndíkun ndo Ndioxi. ¡Vaꞌa kusini ni ndiꞌi ndo! Chi xa̱a súvi Ndioxi ya ndaa xaꞌa ndo.

El Apocalipsis 21:3

Saa xi̱ni soꞌo i tuꞌun ya ke̱e nuu íin tai toꞌo itun i̱í, ta ndee ka vi ndi̱kaꞌan tachi na, káchi ya saa: ―Na ñuu yóꞌó ku na ku ñuu Ndioxi, saa koo ra xiꞌin na, ta na ñuu ra kuu na. Saa koo ra xiꞌin na, nda iin kivi sindikoo ra na.

El Apocalipsis 4:1

Tá ndi̱ꞌi ikán saa ndi̱koto i ta xi̱ni i iin yéꞌe núna ya nuu ndivi, ñaa xi̱ni soꞌo tuku i tachi na tá kuꞌva káa ya xi̱ni soꞌo i núnu̱ú, saa káa tachi itun trompeta tívi na, saa ke̱ta tachi na ndi̱kaꞌan ya xiꞌin i, káchi ya saa: ―Naꞌa ndaa un ni̱nù yóꞌó, saa sinaꞌa i yóꞌo̱ ya kuu kivi vaxi ―káchi ya xiꞌin i.

El Apocalipsis 4:4

Ta nuu ndíchi tai toꞌo chee ikán ndíta ka oko kumi tai toꞌo, ndi̱kava nduu ndiꞌi nu sata itun tai toꞌo chee ikán, ta ndóo oko kumi na xikuaꞌa nuu nu, yaa ka vi toto ndíxi iin iin na xikuaꞌa ikán, saa ínuu iin corona ya oro xiní iin iin na.

El Apocalipsis 5:13

Ta saa xi̱ni soꞌo i ndiꞌi ya si̱kuaꞌa Ndioxi, ya íyo nuu ndivi tin ya íyo ñuu ivi yóꞌó xiꞌin ya íyo tixin ñuꞌú tin ya íyo ini nduta ñûꞌu, xa̱á ndiꞌi ya xáa kaꞌnu ya ra chee ra índuꞌu nuu tai toꞌo xiꞌin kiti Levo loꞌo ikán, káchi ya saa: Ná kunuu vaꞌa ni ya toꞌo ra, ta ná kaꞌan vaꞌa ni yo xaꞌa ra, chi ndee ni ndee kúu mií ra ta nda iin ichí ndïꞌi xaꞌa chiñu kúu mií ra índuꞌu nuu tai toꞌo, ta saa tu kiti levo loꞌo va, káchi ya si̱kuaꞌa Ndioxi.

El Apocalipsis 7:15

Xaꞌa ya ikán kua kúu mií na ichí ndíta na yati nuu íyo tai toꞌo nuu índuꞌu ra kaꞌnu. Nduvi niuun xáa kaꞌnu na ra ini veꞌe ñuꞌu ra. Ndioxi ra índuꞌu nuu tai toꞌo, ta koo ra xiꞌin na, vií ni kundaa ra na xiꞌin ndee ra.

El Apocalipsis 7:9

Sindiꞌi ikán saa ndi̱koto i, ta xi̱ni i íyo kuaꞌa ni naꞌa, yáꞌa ni kuaꞌa ku na, nda iin naꞌa küchiñu kaꞌvi na ikán. Na ikán ta ndiꞌi ni kúu xaꞌa ñuu ivi yóꞌó ka̱na koo na, na ke̱e ñuu naꞌnu tin ñuu vali, kuaꞌa ni nuu tuꞌun káꞌan ndiꞌi na. Ndíta ndiꞌi na ikán yati nuu ndíchi tai toꞌo nuu índuꞌu ra kaꞌnu xiꞌin Levo loꞌo. Yaa ka vi tikoto ndíxi ndiꞌi na, saa ndíso na ñu̱ú síkuiko na ya nuu ra xiꞌin kiti Levo loꞌo.