El Apocalipsis 11:18 - Xochapa Mixteco

¹⁸ Ndiꞌi ni kúu na ñuu ivi yóꞌó, sáa ni ini xíni yóꞌo̱, Iva yo Ndioxi, ta vitin kua ti̱ndaa kivi nuu ndee ni sitixuꞌvi un na xaꞌa ya väꞌa íkan na. Vitin kua ti̱ndaa kivi ya xaa nani un kuachi xiꞌin ndiꞌi na xa ndíi. Saa taxi un ya vaꞌa ndaꞌa nda ndi̱kaꞌan ndoso tuꞌun yuꞌu un, nda xa̱a chiñu nuu un xinaꞌa, xiꞌin na ñuu un, na i̱í, saa chi kándixa ni na yóꞌo̱, ta xáa kaꞌnu na yóꞌo̱, án na vali ku na, án na naꞌnu ku na, ta ndiꞌi na niꞌi ya vaꞌa nuu un. Saa sindiꞌi xaꞌa un ndiꞌi naꞌa, na si̱ndiꞌi xaꞌa ndiꞌi ñaꞌa ya si̱kuaꞌa un ñuu ivi yóꞌó ―káchi nda xikuaꞌa ikán xiꞌin Ndioxi.

El Apocalipsis 11:18 ပူးပေါင်းရင်းမြစ်များ

San Mateo 5:12

’Tá ndóꞌo̱ ndo saa, tíxuꞌvi ndo, ta ná koo vaꞌa ni ini ndo, kusini ni ndo, saa chi chee ni koo ya vaꞌa taxi Ndioxi ndaꞌa ndo nuu ndivi. Saa ndo̱ꞌo nda ndi̱kaꞌan ndoso tuꞌun yuꞌu Ndioxi xi̱ndoo xi̱naꞌa, ndi̱xuꞌvi ni nda ―káchi Jesús xiꞌin na.

San Lucas 1:50

Ndiꞌi saa tiempo xáa kaꞌnu ini ra xaꞌa na ivi, na káñuꞌu ñaꞌa, íkan ra ya vaꞌa xiꞌin na íyo tiempo vitin tin ndiꞌi saa ka tiempo ya vaxi kundaꞌvi ini ra kuni ra na.

HEBREOS 9:27

Tá ndo̱ꞌo Tata yo Jesucristo ndi̱xiꞌi ra iindaa ichí, ta saa kundoꞌo ndiꞌi yo, iindaa ichí va kuvi yo, ta sindiꞌi saa xaa nani Ndioxi kuachi yo.

El Apocalipsis 10:7

Tá ná tindaa kivi ya tivi tatun ra ya uxa itun trompeta ya, saa kua sixinu ndiꞌi Ndioxi ya xa chi̱tuni ra xaa súvi ra, ta köo ndi̱kundaa ini naꞌa xaꞌa ya ndi̱kaꞌan ra xiꞌin nda profeta, nda ndi̱kaꞌan tuꞌun yuꞌu ra xinaꞌa ―káchi tatun ikán xi̱ni soꞌo i.

El Apocalipsis 11:2

Ta kïꞌin kuꞌva un keꞌe veꞌe ñuꞌu kaꞌnu, saa chi xa ta̱xi i ya ndaꞌa naꞌa, na köo kúu judío, na köo kándixa yeꞌe. Ta na ikán xaa yakua na ñuu i̱í, nuu ndíkaa veꞌe ñuꞌu kaꞌnu tixin uvi xiko uvi yoó ikan na saa.

El Apocalipsis 13:10

Tá íyo naꞌa chi̱tuni Ndioxi ya kundasi na veꞌe kàà, ta xíniñuꞌu na kundasi na veꞌe kàà. Tá íyo naꞌa, na xáꞌni ndìì xiꞌin i̱chi xiín, ta suvi kuꞌva saa xíniñuꞌu na kuvi na xiꞌin i̱chi̱. Tuꞌun yóꞌó kúni kachi ya ndiꞌi naꞌa, na ndíkun Ndioxi, ta xíniñuꞌu na sikuaꞌa na kundee ini na xiꞌin tindoꞌo ya uꞌvi ni tixuꞌvi na, ta ná sïndikoo na ya kándixa na Ndioxi.

El Apocalipsis 13:16

Ta kiti uvi, ri ìyo ni káa ikán xa̱ꞌnda ri chiñu ya ndikunuu sello iin iin na, kaꞌi na vali tin na naꞌnu, saa tu na kuika tin na ndaꞌvi, saa tu na íkan chiñu mií na án na xáa chiñu xiꞌin ya nduxa nuu xitoꞌo na. Ndi̱taꞌnda chiñu ya ndikunuu sello ndaꞌa kuáꞌá na án taan na.

El Apocalipsis 14:10

ta yáꞌa ni uꞌvi tixuꞌvi na ikán, chi Ndioxi ta yáꞌa ni kini sáa ini ra xíni ra na íkan ya väꞌa, xaꞌa ya ikán kua sitixuꞌvi ni ra na. Ta ndee ni uꞌvi tixuꞌvi na xiꞌin ñu̱ꞌu̱ xíxi, inka ñu̱ꞌu̱ káꞌndi ya náni azufre. Ta kuni tatun, ya i̱í, xiꞌin kiti Levo loꞌo ikán ya ndee ni tixuꞌvi na ikán.

El Apocalipsis 15:1

Saa xi̱ni i iin seña chee ni nuu ndivi, ta ndi̱kanda ka vi ini i xaꞌa ya xi̱ni i. Ñaa xi̱ni i uxa tatun Ndioxi kúu mií ichí taxi ya uxa nuu tindoꞌo ya ndee ni tixuꞌvi naꞌa, tá xa yati ni tindaa kivi ya ndiꞌi xaꞌa ñuu ivi. Ta ndakua xinu uxa ya ndee ni ndoꞌo na ikán, nda saa yaa ya sáa ni ini Ndioxi xíni ra ya väꞌa íkan na ñuu ivi yóꞌó.

El Apocalipsis 15:7

Ta iin taꞌan ya kumi ya táku ikán, ta̱xi ya iin copa ya oro ndaꞌa iin iin tatun ikán. Ta chútu ndaa ya sáa ni ini Ndioxi ini iin iin copa ya oro ikán chi mií ra ku ra táku ndiꞌi saa kúu kivi.

El Apocalipsis 18:6

Vaꞌa ná ndoꞌo ni na ñuu yóꞌó ikan Ndioxi, saa chi saa si̱tixuꞌvi ni mií na kuaꞌa ni naꞌa. Tá kuꞌva i̱kan na ya väꞌa xiꞌin inka naꞌa saa ná kundoꞌo ni na, nda uvi ichí taxi un ya ndee ni ná kundoꞌo na saa xaꞌa ya si̱ndoꞌo ni na naꞌa. Xa kuaꞌa ni naꞌa ndóꞌo xaꞌa ya väꞌa i̱kan na yóꞌó.

El Apocalipsis 19:15

Saa ke̱ta iin i̱chi yáꞌa ni xiín yuꞌu ra. Ta xiꞌin ya ikán si̱tikueꞌe ni ra naꞌa, na ndóo ndiꞌi ni kúu saa ñuu ivi. Ta ndee ni ndee kaꞌnda chiñu ra nuu ndiꞌi na ikán xiꞌin kàà ya káa tá káa iin itun káni ni. Tá íkan naꞌa tá kóꞌni na kiti uva, xáñu ndoso na ri saa kána nduta ri, ta xiꞌin rá ikán síkuaꞌa na nduta vinu. Kuꞌva saa ikan ra xiꞌin na väꞌa ikán, chi ndee ni ndee kúu mií Ndioxi.

El Apocalipsis 19:18

Kixi ndo kaxi ndo kuñu nda rey, kaxi ndo kuñu nda naꞌnu nuu nda lapa xiꞌin nda taa nda ndee ni, nda xa̱ꞌni kuaꞌa ni naꞌa nuu ndi̱xiyo kuachi. Saa kaxi ndo kuñu kuai xiꞌin kuñu nda taa nda xi̱yoso ri, kaxi ndo kuñu ndiꞌi saa nuu naꞌa, na naꞌnu tin na vali, na íyo ndíka tin na xáa chiñu xiꞌin ya nduxa nuu patron na. Naꞌa ndo kaxi ndo kuñu ndiꞌi na yóꞌó ―káchi tatun ikán xiꞌin ndiꞌi kiti ndáchi.

El Apocalipsis 19:5

Saa xi̱ni soꞌo i tachi na ya ke̱e nuu íin tai toꞌo, ta ndi̱kaꞌan ya, káchi ya saa: ¡Ná xaa kaꞌnu ni yo Ndioxi, ra chee ni nuu yo! Ndiꞌi ndóꞌo̱ xáa chiñu nuu ra, saa ndiꞌi ndóꞌo̱ xáa toꞌo ni ra án ndóꞌo̱ vali ku ndo án ndóꞌo̱ naꞌnu ku ndo, káchi tuꞌun ya xi̱ni soꞌo i.

El Apocalipsis 20:12

Saa xi̱ni i ndiꞌi na ndi̱xiꞌi, na kúu mií chiñu naꞌnu tin na kúu mií chiñu vali. Ta ndíta ndiꞌi na ikán yati nuu ndíchi tai i̱í itun toꞌo chee. Saa ndi̱xuna kuaꞌa ni tutu nuu ndóso ya i̱kan ndiꞌi naꞌa tá xi̱taku na ñuu ivi, ñaa ndi̱xuna inka tutu nuu ndóso kivi ndiꞌi na koo xiꞌin Ndioxi ndiꞌi saa kivi ya vaxi. Saa xa̱a nani Ndioxi xaꞌa kuachi ndiꞌi na xa ndi̱xiꞌi. Tá kuꞌva íyo ya i̱kan na ndóso nuu tutu ikán, saa íyo kuachi na ya xa̱a nani Ndioxi xiꞌin na, na i̱kan ya vaꞌa ta koo na xiꞌin ra, na i̱kan ya väꞌa ta kuꞌun na ndaya.

El Apocalipsis 20:15

Ta ndiꞌi na köo ndóso kivi nuu tutu Ndioxi ya koo na xiꞌin ra, ta ki̱ꞌin tatun Ndioxi na ta̱an ya ini xitun nuu ndee ni xíxi ñu̱ꞌu̱.

El Apocalipsis 22:12

Ta saa ndi̱kaꞌan Tata yo Jesucristo, káchi ra saa: ―¡Koo tuꞌva ndo, chi kama ni ndiko koo tuku i! Ta saa kuniꞌi i ya chaꞌvi i iin iin naꞌa, tá íyo chiñu i̱kan na saa koo ya chaꞌvi i na.