El Apocalipsis 1:7 - Xochapa Mixteco

⁷ Vaxi kivi ta ndiko koo Tata yo Jesucristo ñuu ivi yóꞌó, kixi ra tañu vi̱kó. Ndiꞌi saa naꞌa kuni xiꞌin nuu na ra kixi ra. Nda naꞌa, na tu̱vi itun íyo kàà xi̱ín nuu, na xa̱a ndu̱vaꞌa ni xiꞌin ra, si̱tikueꞌe ni na ra, ta nda na ikán kuni kixi ra. Ta naꞌa, na ndóo ndiꞌi ni kúu ñaꞌñu ñuu ivi, na köo ndi̱xiin kandixa ñaꞌa, nda na ikán kusuchi ni ini, kuaku ni na tá ná kuni na ra. Saa ná koo.

El Apocalipsis 1:7 ပူးပေါင်းရင်းမြစ်များ

San Mateo 16:27

Ta yeꞌe, Taa ra xa̱a ñuu ivi yóꞌó, vaxi kivi ndiko koo i ñuu ivi yóꞌó xiꞌin ndee ya vaꞌa Iva i Ndioxi, ta kixi na tatun ra xiꞌin i, ta saa chaꞌvi i iin iin na xaꞌa ya vaꞌa án ya väꞌa i̱kan na ñuu ivi yóꞌó.

San Mateo 16:28

Ya ndaa káꞌan i xiꞌin ndo, sava ndo ndóo yóꞌó vitin, ta kutaku ka ndo nda kivi tá ná ndiko koo yeꞌe, Taa ra xa̱a ñuu ivi yóꞌó, ndiko koo i ya kaꞌnda chiñu i ―káchi Jesús.

San Mateo 24:30

Ta ndiꞌi naꞌa kuni na koo seña nuu ndivi ya ndiko koo yeꞌe, Taa ra xa̱a ñuu ivi yóꞌó, saa kuaku ni na ñuu ivi yóꞌó, kusuchi ni ini na. Ta ndiꞌi naꞌa kuni na yeꞌe kixi i xiꞌin viko, kixi i xiꞌin ndee chee ni xiꞌin ndiꞌi ya yéꞌe̱ ni.

San Mateo 25:31

Saa ndi̱kaꞌan ka Jesús xiꞌin na, káchi ra saa: ―Kivi tá ná ndiko koo yeꞌe, Taa ra xa̱a ñuu ivi yóꞌó, ta ndiko koo i xiꞌin ndiꞌi na tatun Ndioxi, tá káa rey ra ndee ni ndee saa koo i tá ná ndiko koo i xiꞌin ndiꞌi ñaꞌa ya ndee ni luvi yéꞌe̱. Ta saa ndikunduꞌu i nuu tai toꞌo kaꞌnda chiñu i.

San Mateo 26:64

Saa ndi̱kuiin Jesús káꞌan ra: ―Tá íyo ya ndi̱kaꞌan un saa íyo ya, ikán ku i. Ta káꞌan tuku i xiꞌin ndo, vaxi kivi ta kuni ndo yeꞌe, Taa ra xa̱a ñuu ivi yóꞌó koo i nuu tai toꞌo, itun íyo ñaꞌñu kuáꞌá Ndioxi, ta ndee ni ndee kúu mií ra. Saa kuni ndo yeꞌe ndiko koo i kixi i tañu viko nuu ndivi ―káchi Jesús xiꞌin nda.

San Marcos 13:26

Tá ndiꞌi ikán, saa kuni ndiꞌi na ivi yeꞌe, ra Taa ra xa̱a ñuu ivi yóꞌó, kuni na kixi i xiꞌin viko, ta ndee ni ndee koo i kixi i, iin ndiyeꞌe ndaa ndiꞌi, chi kixi ndiꞌi ndee i xiꞌin i.

San Marcos 14:62

Saa ndi̱kuiin Jesús káꞌan ra: ―Ikán kuu i. Ta kuni ndo yeꞌe, Taa ra xa̱a ñuu ivi yóꞌó, kuni ndo kunduꞌu i ñaꞌñu kuaꞌá Ndioxi ra kaꞌnu, saa kuni ndo yeꞌe ndiko koo i kixi i tañu viko nuu ndivi ni̱nù ―káchi ra xiꞌin nda.

San Lucas 21:27

Tá sindiꞌi ikán, saa kuni ndiꞌi naꞌa yeꞌe, Taa ra xa̱a ñuu ivi yóꞌó, kuni na ndiko koo i kixi i xiꞌin viko kixi i, ta ndee ni koo ya yéꞌe̱ ná kixi i. Nda tá káa iin ra rey, ra chee, saa koo i kixi i, chi kixi ndee Ndioxi xiꞌin i.

San Juan 19:34

Sundi iin ra lapa ikán tu̱vi ra itun íyo kàà nuu ñaꞌñu xiín Jesús, tá tu̱vi soꞌva ra ya ta ndikun ke̱e nií xiꞌin tikuii.

San Juan 19:37

Ta inka tuku ñaꞌñu nuu tuꞌun Ndioxi káchi ya saa: “Koto na nuu taa, ra ka̱an na kandika xiꞌin itun íyo kàà nuu”, káchi ya.

1 Tesalonicenses 1:10

Ta káꞌan na xaꞌa ndo ya ndátun ndo Jesús, ra kúu seꞌe Ndioxi ra ke̱e nuu ndivi, ta ndiko koo tuku ra kixi ra ñuu ivi yóꞌó. Chi Ndioxi ku ra si̱taku ñaꞌa tañu na ndíi, ta ra ikán ku ra sikaku yoo nuu tindoꞌo ya ndee ni vaxi sata na ñuu ivi yóꞌó.

1 Tesalonicenses 4:17

Sindiꞌi saa kuꞌun yoo ndi̱ndoo sindikuita ra yoo ndaa yo kuꞌun yo koo yo nuu viko nuu ndikitaꞌan yo xiꞌin naꞌa, na xa ndi̱taku. Ta ikán ndikitaꞌan yo ndikiꞌin yo Tata yo Jesucristo, ta saa koo yo xiꞌin ra ndiꞌi saa kivi ya vaxi.

HEBREOS 10:29

Ta ndisaa ka vi ndee ni ndee kundoꞌo naꞌa, na kóso kava Tata yo Jesucristo, ra kúu Seꞌe Ndioxi, chi köo kíꞌin na kuenta xaꞌa nií ra, nda tá káa rá väꞌa saa káa ra nuu na, saa íkan naꞌa, na kúndasi nuu xíni Tachi I̱í Ndioxi, ra kúꞌvi ni ini xíni ñaꞌa, chi suvi xiꞌin nií Tata yo Jesucristo kua ki̱ndoo ra trato ya ikan ra ya vaꞌa xiꞌin yo.

HEBREOS 6:6

Xaꞌa ya íkan kua küvi ka ndiko koo tuku ini na, chi tá ná ikan tuku na saa, ta tá íin na xáꞌni tuku Seꞌe Ndioxi nuu cruzin va saa íin na, chi kúsiki ndaa na ra nuu ndiꞌi naꞌa.

1 Juan 3:2

Ñani mani, vitin ta xa seꞌe Ndioxi kúu yoo, ta köo xíni yo ndá kuꞌva nduu yo kivi ná ndiko koo tuku Tata yo Jesucristo ñuu ivi yóꞌó. Sundi yoo ta kúndaa ini yo, kivi ná ndiko koo ra ta nduu yo tá kuꞌva káa mií ra, saa chi kivi ikán ta kuni xiꞌin nuu yo ra tá kuꞌva káa ra.

Judas 1:14

Ra Enoc, ra uxa ra kúu seꞌe ñani sikua ra Adán, ra ikán ku ra ndi̱kaꞌan xaꞌa nda taa nda sinaꞌa ya vata ñaa, ka̱chi ra saa: “¡Koto ndo vii! Xa xi̱ni i vaxi kuaꞌa ni mil na tatun Ndioxi xiꞌin ra,

El Apocalipsis 22:20

Jesús ra ndíkani xaꞌa tuꞌun yóꞌó ya kúu ya ndaa, ra ikán ku ra káꞌan xiꞌin ndo, káchi ra saa: “Ndixa kama ni ndiko koo i”, káchi ra. Ta ndiꞌi na kándixa ya káꞌan ra, káchi na: Saa ná koo. ¡Naꞌa Tata Jesús, ra chee nuu nde! káchi na.

El Apocalipsis 22:4

Saa kuni xiꞌin nuu ndiꞌi na Ndioxi, ta saa ndikunuu kivi ra taan na.