Colosenses 3:4 - Xochapa Mixteco

⁴ Tá ná ndiko koo Jesucristo, ra táxi táku ndo, ta iin káchi nduu ndo xiꞌin ra, saa ndikundixi níí ndo ya vaꞌa, ya luvi ni xiꞌin ra.

Colosenses 3:4 ပူးပေါင်းရင်းမြစ်များ

San Mateo 13:43

Sundi na xáa súvi ya kúni Ndioxi ta kundoo na nuu xáꞌnda chiñu Iva yo Ndioxi, ta ndiyeꞌe na nda tá kuꞌva ndíyeꞌe ñu̱ꞌù ―káchi ra. Saa ndikaꞌan ka ra, káchi ra saa: ―¡Ndiꞌi ndóꞌo̱ íyo soꞌo ta kuni soꞌo ni ndo ya káꞌan i xiꞌin ndo! ―káchi ra xiꞌin nda ítaꞌan xiꞌin ra.

San Lucas 17:30

Tá ku̱u tiempo ikán, köo ndi̱xika ini na ndiꞌi xaꞌa na, ta ndi̱ꞌi xaꞌa na. Saa kuu ñuu ivi yóꞌó kivi ná ndiko koo yeꞌe, Taa ra xa̱a ñuu ivi yóꞌó.

San Juan 11:25

Saa ndi̱kaꞌan Jesús xiꞌin yá, káchi ra saa: ―Yeꞌe ku ra sínditaku naꞌa, ta yeꞌe ku ra táxi kutaku na. Ndiꞌi na kándixa yeꞌe vani xa ndi̱xiꞌi na, ta taxi i kutaku na.

San Juan 14:3

Tá tu ná kuꞌun i xa̱a vií i nuu koo ndo saa ndiko koo i ndikuiso i ndóꞌo̱, kuꞌun ndo koo ndo xiꞌin i nuu koo i.

San Juan 14:6

Saa ndi̱kuiin Jesús ndi̱kaꞌan ra xiꞌin ra, káchi ra saa: ―Yeꞌe ku ra ku ichí, ta yeꞌe ku mií ya ndaa, yeꞌe ku ra táxi kutaku na. Nda iin na küvi kuꞌun nuu Iva i, tá tu süvi xiꞌna nuu yeꞌe vaxi na.

San Juan 17:24

’Tata Iva yo, na ta̱xi un ndaꞌa i ndíkun yeꞌe, ta kúni i ná koo na xiꞌin i nuu ndivi nuu koo i. Saa kuni na ndiꞌi ya vaꞌa, ya luvi ta̱xi un ndaꞌa i, saa chi yóꞌo̱ ta kúꞌvi ni ini un xíni un yeꞌe, nda tá täꞌan xikoo xaꞌa ñuu ivi yóꞌó vi kúꞌvi ni ini un xíni un yeꞌe.

San Juan 20:31

Ta ndiꞌi tuꞌun ya vaxi nuu tutu yóꞌó, ta̱a i ya, ná kundaa ini ndo xaꞌa Jesús ya kúu ra Cristo Seꞌe Ndioxi. Saa tá kándixa ndo ra ta saa kuchiñu ndo kutaku ndo tixin kivi ra.

Los Hechos 3:15

Ta xa̱ꞌni ndo taa ra vaꞌa ni, chi iin mituꞌun ra ikán ku ra táxi ichí ya kutaku yo. Sundi Ndioxi ta si̱taku ñaꞌa ra. Ndeꞌe ku testigo xaꞌa ra, xi̱ni nde ndi̱taku ra.

ROMANOS 8:18

Ya ndaa ni káꞌan i xiꞌin ndo, ndiꞌi ya ndóꞌo yo ñuu ivi yóꞌó tíxuꞌvi ni yo vitin, ta ni süvi ya ndee ku ya nuu ya taxi Ndioxi ndaꞌa yo. Ndee ni ka koo ya niꞌi yo nuu ra kivi vaxi.

ROMANOS 8:19

Ta vitin ndiꞌi ñaꞌa si̱kuaꞌa Ndioxi ndátun ni ya, ta kúni ya ná tindaa kíi kivi ya sinaꞌa Ndioxi ya kúu yo seꞌe ra.

1 Corintios 1:7

Xaꞌa ya ikán kua nda iin ñaꞌa vaꞌa köo kümani ka nuu ndo, nani tá ndátun ndo iin saa nda kivi tá ná ndiko koo Tata yo Jesucristo kixi tuku ra ñuu ivi yóꞌó.

1 Corintios 15:43

Chi ikin kuñu ya ndúxin ta ni köo ka saví kúu mií ya, sundi tá ná nditaku ikin kuñu yo ta ndee ni luvi nduu ya. Vita ni kúni ya tá sínduxin na ya, ta ná nditaku ya ta ndee ni ndee nduu ya.

2 Corintios 4:17

Chi tindoꞌo ya ndee ni ndóꞌo nde vitin tíxuvi nde, ta ni süvi ya ndee ni kua, ya yáꞌa va kua, ni köo ítaꞌan ya xiꞌin ñaꞌa ya ndee ni luvi táxi Ndioxi ndaꞌa nde níꞌi nde nuu ra, ta ya táxi ra ndaꞌa nde ta köo ndíꞌi xaꞌa nda iin ichí.

Gálatas 2:20

Ta yeꞌe, nda tá káa ra ínuu nuu cruzin xiꞌin Tata yo Jesucristo saa káa i, ta köo táku ka i xaꞌa mií i, chi ndisaa xaꞌa mií ra kua táku i. Kivi táku i ini ikin kuñu i ya kúu mií i, ta ndisaa xaꞌa ya ndáa ni ini i xíni i Tata yo Jesucristo ra kúu Seꞌe Ndioxi kua táku i, chi mií ra ku ra kúꞌvi ni ini xíni yeꞌe, saa ta̱xi ra mií ra ndi̱xiꞌi ra xaꞌa i.

Filipenses 3:21

Ta ndinama ra ikin kuñu yo ya vita ni kúu mií yo, saa nduu ya tá káa ikin kuñu mií ra, ya luvi ni. Ta xiꞌin ndee kúu mií ra ya xáꞌnda chiñu ra nuu ndiꞌi ñaꞌa kua ndisama ra yoo.

1 Tesalonicenses 4:17

Sindiꞌi saa kuꞌun yoo ndi̱ndoo sindikuita ra yoo ndaa yo kuꞌun yo koo yo nuu viko nuu ndikitaꞌan yo xiꞌin naꞌa, na xa ndi̱taku. Ta ikán ndikitaꞌan yo ndikiꞌin yo Tata yo Jesucristo, ta saa koo yo xiꞌin ra ndiꞌi saa kivi ya vaxi.

1 Timoteo 6:14

yakan káꞌan i xiꞌin un ya ná xaa súvi un ndiꞌi ñaꞌa tá íyo ya ndi̱kaꞌan i xiꞌin un, saa ikan un ya ná köo naꞌa kanaꞌa xaꞌa un. Ta kuꞌva saa ikan un nda kivi ná ndiko koo Tata yo Jesucristo.

2 Timoteo 1:1

Yeꞌe Pablo, ra ndi̱kaxin Ndioxi xáa chiñu nuu Tata yo Jesucristo ku i, saa chi saa chi̱tuni mií ra ta̱xi ra chiñu yóꞌó ndaꞌa i ya káꞌan ndoso i xiꞌin naꞌa xaꞌa ya ki̱ndoo ra xiꞌin na taxi ra kutaku na tixin Tata yo Jesucristo.

2 Timoteo 4:8

Ta xíni i vaꞌa ni ini Ndioxi ta nina ya ndaa íkan ra xiꞌin naꞌa, chi mií ra ku ra xáa nani kuachi xiꞌin na. Ta saa ikan ra xiꞌin i taxi ra ya vaꞌa ndaꞌa i, tá kuꞌva íkan na xiꞌin naꞌa, na kéꞌe taꞌan níꞌi na ñaꞌa xaꞌa ya vaꞌa íkan na. Kuꞌva saa ikan Ndioxi xiꞌin i, taxi ra ya vaꞌa ndaꞌa i chi xa xa̱a súvi ndiꞌi i chiñu ya ta̱xi ra ndaꞌa i. Ta süvi ndisaa yeꞌe niꞌi ya vaꞌa ikan ra, ndiꞌi na ndíkun ichí ra ta ndátun na ndiko koo ra, na ikán ku na niꞌi ya vaꞌa.

Tito 2:13

Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

HEBREOS 9:28

Saa chi saa i̱kan Jesucristo iin ichí va ndi̱xiꞌi ra ya ndi̱soko ra mií ra nuu ndi̱kata ra kuachi kuaꞌa ni naꞌa. Ta sindiꞌi, tá ná ndiko koo tuku ra ichí uvi, ta kïxi ka ra ya kuvi ra xaꞌa kuachi yo, sundi kixi ra sikaku ra yo ndátun ñaꞌa.

1 Pedro 1:13

Xaꞌa ya ikán kua koo ndúvi ndo vívií ndikani ini ndo, táku koo ini ndo, ndee ni ndaku koo ini ndo ya ndikiꞌin ndo ñaꞌa vaꞌa ya niꞌi ndo nuu Tata yo Jesucristo tá ná ndiko koo ra kixi ra.

1 Pedro 5:4

Saa chi tá ná ndiko koo Tata yo Jesucristo, ra ndáa yoo, ra chee nuu yo, ra íyo tá íyo nda ndáa levo, ta saa kua niꞌi yo iin corona ya ndee ni luvi ta nda iin ichí ndïꞌi xaꞌa ya.

1 Juan 2:28

Ta káꞌan tuku i xiꞌin ndo ñani yo, ndóꞌo̱ ta tá íin seꞌe i na kúꞌvi ni ini i xíni i, saa íin ndo. Ta kutaꞌan vaꞌa ni ndo xiꞌin Tata yo Jesucristo ta saa tá ná ndiko koo ra ñuu ivi yóꞌó ta vaꞌa ni kuni ndo kuyati ndo nuu ra, kükaꞌan nuu ndo kuni ndo ra.

1 Juan 3:2

Ñani mani, vitin ta xa seꞌe Ndioxi kúu yoo, ta köo xíni yo ndá kuꞌva nduu yo kivi ná ndiko koo tuku Tata yo Jesucristo ñuu ivi yóꞌó. Sundi yoo ta kúndaa ini yo, kivi ná ndiko koo ra ta nduu yo tá kuꞌva káa mií ra, saa chi kivi ikán ta kuni xiꞌin nuu yo ra tá kuꞌva káa ra.

1 Juan 5:12

Ndiꞌi na táku Seꞌe Ndioxi ini ta táku na xiꞌin Ndioxi. Ta ndiꞌi na köo táku Seꞌe Ndioxi ini ta küchiñu na kutaku na xiꞌin Ndioxi.

Judas 1:24

Ná xaa kaꞌnu ni yo Ndioxi chi ndee ni ndee kúu mií ra ya chindee ra yoo ya ná sïndikoo yo ichí ra ya ndaa kándixa yo. Ta vaxi kivi kundita yo nuu ra nuu íyo ndiꞌi ya kaꞌnu luvi ni. Saa ndasa vaꞌa ra yoo nduu yo naꞌa, na köo ka kuachi kúu mií nuu ra, ta yáꞌa ni kusini yo kivi ikán.

El Apocalipsis 2:7

Ndiꞌi ndóꞌo̱ kándixa yeꞌe, ta kuni soꞌo ni ndo tuꞌun ya káꞌan Tachi I̱í Ndioxi xiꞌin ndo. Ndiꞌi ndóꞌo̱ na kúchiñu nuu ndee ya väꞌa, ndóꞌo̱ köo síndikoo ichí i, ta ndaꞌa ndóꞌo̱ kua taxi i kuiꞌi kaxi ndo, kiti kúun ndaꞌa itun ndíchi maꞌñu corra Ndioxi nuu luvi ni káa. Ta kuiꞌi ikán ku ri táxi ichí ndaꞌa ndo ya koo ndo ndiꞌi saa kivi ya vaxi xiꞌin Ndioxi ―káchi Jesucristo xiꞌin i.

El Apocalipsis 22:1

Saa si̱naꞌa tatun ikán iin i̱tà nuu i, ta ndee ni yaa rá, ta rá ikán ku rá táxi ichí ya kutaku naꞌa ndiꞌi saa kivi xiꞌin Ndioxi. Ta kána koo rá nuu ndíchi tai toꞌo nuu índuꞌu Ndioxi xiꞌin Levo loꞌo. Tá kuꞌva yéꞌe̱ taxan vidrio, saa yéꞌe̱ rá.

El Apocalipsis 22:14

Vaꞌa ni kée na ndíkata toto na ya ndúyaa ni ya, chi na ikán ta kuu mií na ichí kaxi na kuiꞌi ndaꞌa itun táxi kutaku na xiꞌin Ndioxi ndiꞌi saa ichí. Saa kuchiñu na kiꞌvi na yeꞌe ñuu i̱í ikán.