Colosenses 2:9 - Xochapa Mixteco

⁹ Ta iin tá kuꞌva íyo ini mií Iva yo Ndioxi iin kuꞌva ndaa saa íyo tu ikin kuñu mií Tata yo Jesucristo va.

Colosenses 2:9 ပူးပေါင်းရင်းမြစ်များ

San Mateo 1:23

“Kee seꞌe iin yá kuâán loꞌo, taa loꞌo koo seꞌe yá kaku. Ta ra loꞌo seꞌe yá ta kunani ra Emanuel”. Chi kivi ra yóꞌó ta kúni kachi ya: “Ndioxi íyo xiꞌin yo” ―káchi ra ndi̱kaꞌan ndoso tuꞌun Ndioxi xinaꞌa.

San Lucas 14:22

Ñaa ke̱e ra moso ikán ndi̱xaꞌan ra ndi̱kaya ra na. Saa xa̱á ra káꞌan ra xiꞌin xitoꞌo ra, káchi ra saa: “Tata, xa i̱kan ndiꞌi i ya ndi̱kaꞌan un xiꞌin i, ta núna ka va nuu mesa”, káchi ra.

San Lucas 3:22

Saa nu̱u Tachi I̱í Ndioxi, tá káa kiti sata, saa káa ya nu̱u xíka nuu ya xiní ra. Ta saa xi̱ni soꞌo na ndóo ikán ndi̱kaꞌan Ndioxi xiꞌin Jesús, káchi ra saa: ―Yóꞌo̱ ku seꞌe mani i, ta íyo vaꞌa ni ini i xíni i yóꞌo̱ ―káchi ra.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 1:16

Ta xaꞌa ya chútu ni ya vaꞌa ini ra ikán, ta nda yoo ndi̱niꞌi ya vaꞌa xiꞌin ra. Ndakua ndíkun taꞌan ya táxi ra ndaꞌa yo.

San Juan 10:30

Yeꞌe xiꞌin Iva i Ndioxi ta iin ku nde ―káchi Jesús xiꞌin na.

San Juan 10:38

Tá tu xáa súvi i chiñu Iva i, ta vaꞌa kandixa ndo ya ikán, vani ná kändixa ndo yeꞌe. Tá tu kándixa ndo ya íkan i, ta saa kundaa ini ndo ya íyo Iva i xiꞌin i, ta yeꞌe íyo i xiꞌin ra ―káchi Jesús xiꞌin nda.

San Juan 14:20

Tá ná tindaa kivi nuu ndixa kutaku ndo, ta saa kuni ndo ya ndixa iin kuu i xiꞌin Iva i, ta saa ndóꞌo̱ iin ku ndo xiꞌin i, ta yeꞌe iin ku i xiꞌin ndo.

San Juan 17:21

ya ná kutaꞌan vaꞌa na xiꞌin taꞌan na, tá kuꞌva íyo mií yo xiꞌin taꞌan yo Iva mani. Ta saa iin yuꞌu ná koo na xiꞌin yo, saa kundaa ini na ñuu ivi ya ti̱ꞌvi un yeꞌe vaxi i.

San Juan 2:21

Sundi Jesús ta köo ndi̱kaꞌan ra xaꞌa veꞌe ñuꞌu ya ndíkaa ñuu Jerusalén, xaꞌa ikin kuñu va ra kua ndi̱kaꞌan ra.

Los Hechos 17:29

Tá tu seꞌe Ndioxi ku ndiꞌi yo ta köo xíniñuꞌu yo ndikani ini yo ya káa Ndioxi tá káa iin ñaꞌa ya síkuaꞌa na xiꞌin kàà án xiꞌin yu̱ú án xiꞌin itun, köo xíniñuꞌu yo nduku xiní yo ndá kuꞌva káa Ndioxi.

2 Corintios 5:19

Ta ya káꞌan i xiꞌin ndo kua, kúni i ná kundaa ini ndo, chi tixin Tata yo Jesucristo kua si̱kitaꞌan mani Ndioxi yoo ñuu ivi yóꞌó xiꞌin mií ra, ta köo ndíkiꞌin ra kuenta xaꞌa kuachi nda iin naꞌa. Saa ta̱xi ra chiñu ndaꞌa ndeꞌe ya ndituꞌun nde xiꞌin na ya ná ndikitaꞌan mani na xiꞌin ra.

Colosenses 1:19

Ta kúsini ni mií Iva yo Ndioxi ta̱xi ra ndiꞌi ni kúu ñaꞌa ya kúu mií ra ndaꞌa Tata yo Jesucristo.

1 Timoteo 3:16

Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.

Tito 2:13

Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

1 Juan 5:7

Uni ku na ndíkuiin xaꞌa ra nuu ndivi: Iva yo Ndioxi tin Tuꞌun ra xiꞌin Tachi I̱í Ndioxi ku na ndíkuiin xaꞌa ra, ta iin ku uni saa na yóꞌó.