2 Tesalonicenses 2:2 - Xochapa Mixteco

² täxi ndo ndinama kama ni ini ndo xaꞌa ya káꞌan na xiꞌin ndo, síꞌvi na ndóꞌo̱ ya si̱kaꞌan Ndioxi ini na kaꞌan na tuꞌun yuꞌu ra ya xa ndi̱ko koo Tata yo Jesucristo ñuu ivi yóꞌó, án kaꞌan na xiꞌin ndo ndá ka tuꞌun ya taa na tutu xaa ya nuu ndo nuu síndaꞌvi na ndóꞌo̱, ya ta̱a ndeꞌe ya xaa ya nuu ndo, káchi na xiꞌin ndo, ta ni süvi ya ndaa kua.

2 Tesalonicenses 2:2 ပူးပေါင်းရင်းမြစ်များ

San Mateo 24:24

Chi kana koo kuaꞌa ni na vata kachi na saa: “Yeꞌe ku ra ku Cristo ra ti̱ꞌvi Ndioxi”, án “Yeꞌe ku profeta ra káꞌan ndoso tuꞌun yuꞌu Ndioxi”, kachi na, ta süvi na ndaa ku na. Ikan na yatuꞌun nuu sindaꞌvi na naꞌa, saa ndikanda ni ini na xiꞌin ya vata ikan na nuu naꞌa, ta nda na ndi̱kaxin Ndioxi kuni na sindaꞌvi na.

San Marcos 13:7

’Saa tá xa̱á xíni soꞌo ndo íyo kuachi ñuu yati án ñuu xika, ta ku ïꞌvi ndo. Saa chi nduxa saa xíniñuꞌu kuu, sundi süvi ya xa ndiꞌi xaꞌa ku ñuu ivi.

San Lucas 21:19

Yakan ndóꞌo̱ ta xaꞌa ndee ni ini ndo saa kuchiñu ndo sikaku ndo ya vaꞌa ndo.

San Lucas 21:9

Tá xa̱á xíni soꞌo ndo íyo kuachi yóꞌó tin kaá, ta ku ïꞌvi ndo, saa chi nduxa koo ndiꞌi ya yóꞌó, sundi täꞌan vi tindaa kivi ya ndiꞌi xaꞌa ñuu ivi.

San Juan 14:1

Saa ndi̱kaꞌan Jesús xiꞌin nda ítaꞌan xiꞌin ra káchi ra saa: ―Kündiꞌi ini ndo. Kandixa ndo Ndioxi ta kandixa ndo yeꞌe.

San Juan 14:27

’Táxi i tuꞌun vaꞌa ndaꞌa ndo ya koo vaꞌa ni ini ndo, ta köo táxi i ya tá kuꞌva táxi na ñuu ivi yoꞌo ya, síndoo i tuꞌun vaꞌa yóꞌó ya koo ya xiꞌin ndo. Ta ya táxi i koo vaꞌa ini ndo, ta süvi taꞌan ya táxi na ñuu ivi yóꞌó kua. Ta ku ïꞌvi ndo, ni kündiꞌi ini ndo.

1 Corintios 1:8

Chi suvi mií Ndioxi ku ra xáꞌa ni ndee xiꞌin ndo, nda kivi tá ná ndiko koo Tata yo Jesucristo, ta nditaꞌan ra ndóꞌo̱ ya köo nda iin kuachi kúu mií ndo.

1 Corintios 14:32

Ta naꞌa, na káꞌan ndoso tuꞌun yuꞌu Ndioxi, ta kúu mií na ndee ya kaꞌnu na mií na, kutaxin yuꞌu na.

1 Corintios 7:26

Ya ndíkani ini yeꞌe, ta vaꞌa ni kua ná tïndaꞌa nda taa, vaꞌa ni ka kua ná kindoo kuâán nda xaꞌa ya uꞌvi ni tiempo ndóo yo vitin.

Efesios 5:6

Täxi ndo sindaꞌvi nda iin naꞌa ndóꞌo̱ ya sixinu na ini ndo ikan ndo ndá ka ñaꞌa ya kini ni káa, ya väꞌa ya yakua ya xáa yakua ikin kuñu ndo. Saa chi Ndioxi ta xaa nduvaꞌa ni ra xiꞌin ndiꞌi naꞌa, na köo xíni soꞌo ya káꞌan ra.

1 Tesalonicenses 3:3

ya ná ndïkava ini ndo xaꞌa ya tíxuꞌvi ni ndo vitin. Xa xíni tu mií va ndo ya xíniñuꞌu yo ndoꞌo ni yo.

1 Tesalonicenses 4:15

Yakan kua káꞌan nde xiꞌin ndo vitin xaꞌa tuꞌun ya ta̱xi Tata yo Jesucristo ndaꞌa nde. Kivi ná ndiko koo ra kixi tuku ra ñuu ivi yóꞌó ta xiꞌna ka naꞌa, na xa ndi̱xiꞌi kuꞌun xiꞌin ra, sindiꞌi saa kuꞌun yoo xiꞌin ra.

1 Tesalonicenses 5:2

Chi xa xíni vaꞌa ndo ndá kuꞌva koo ndiko koo ra kixi ra. Tá kuꞌva íkan iin ra kuiꞌna kíꞌvi síkuiꞌna ñǔu, saa ikan ra, iin naá ini naꞌa ndiko koo ra.

2 Tesalonicenses 2:15

Yakan káꞌan nde xiꞌin ndo ñani yo tin kuꞌva yo, tuun ni kundikun ndo ya si̱naꞌa nde ndóꞌo̱ kándixa ndo, xiꞌin ya ndi̱kaꞌan nde xiꞌin ndo, tin ya xi̱ni soꞌo ndo xaꞌa nde xiꞌin ya ta̱a nde nuu tutu ti̱ꞌvi nde xaa ndaꞌa ndo.

2 Tesalonicenses 3:17

Ta mií yeꞌe Pablo ku ra táa tutu yóꞌó xiꞌin ndaꞌa i táa i ya, letra mií i kua táa i xaa ya nuu ndo ya kundaa ini ndo yeꞌe ku i tíꞌvi ya xaa ya ndaꞌa ndo.

El Apocalipsis 19:20

Ta Taa ra chee ni ra yóso kuai yaa xiꞌin nda lapa ítaꞌan xiꞌin ra, tíin nda kiti ìyo ni káa ikán saa tíin tu nda ra profeta vata. Ta ra ikán ku ra si̱ndaꞌvi naꞌa xaꞌa ya i̱kan ra kuaꞌa ni yatúꞌun nuu na, ta ta̱xi na ndi̱kunuu sello ra taan na, saa xa̱a kaꞌnu na naꞌna mií kiti ìyo ni káa ikán. Ta saa xi̱ni i tíin ra nda kíꞌin ra nda síkana táku ra ini xitun chee ni nuu ndee ni xíxi ñu̱ꞌu̱ xiꞌin ñu̱ꞌu̱ káꞌndi ya náni azufre.