2 Pedro 3:18 - Xochapa Mixteco

¹⁸ Ta ndóꞌo̱ xíniñuꞌu ndo kunitaꞌan vaꞌa ka ndo xiꞌin Tata yo Jesucristo, ra síkaku yoo, ra kúꞌvi ni ini xíni yoo. Ta ná xaa kaꞌnu ni yo ra ndiꞌi saa kivi xiꞌin ndiꞌi kivi ya vaxi. Saa ná koo.

2 Pedro 3:18 ပူးပေါင်းရင်းမြစ်များ

San Mateo 28:20

Saa sinaꞌa ndo na ya ná xaa súvi ndiꞌi na ya ndi̱kaꞌan i xiꞌin ndo. Ta ná kundaa ini ndo, chi yeꞌe, ta ndiꞌi saa kivi koo i xiꞌin ndo, iin saa nda ná ndiꞌi xaꞌa ñuu ivi ―káchi Jesús xiꞌin nda xi̱taꞌan xiꞌin ra. Saa ná koo.

San Mateo 6:13

Täxi un ndikava nde ndaꞌa ya väꞌa, chindee un ndeꞌe nuu ya väꞌa. Chi yóꞌo̱ ku ra xáꞌnda chiñu, yóꞌo̱ ku ra kúu mií ndee ta ndiꞌi naꞌa xáa kaꞌnu yóꞌo̱ ndiꞌi saa kivi ya vaxi. Saa ná koo ya”. Soꞌva kachi ndo xiꞌin Ndioxi ―káchi Jesús xiꞌin na.

San Juan 17:3

Ta ya kutaku na ndiꞌi saa ichí kua kúni kachi ya ná kuni vaꞌa na ini un, chi iin yóꞌo̱ ku Ndioxi ra ndaa ni xiꞌin Jesucristo, ra ti̱ꞌvi un vaxi ñuu ivi yóꞌó.

San Juan 5:23

chi kúni Ndioxi ya ná xaa toꞌo ndiꞌi na Seꞌe ra, tá kuꞌva xáa toꞌo na mií ra, saa ná xaa toꞌo na Seꞌe ra. Saa chi ndiꞌi na köo xíin xaa toꞌo Seꞌe ra, ta kúni kachi ya köo xáa toꞌo na Iva ra, ra ti̱ꞌvi ra vaxi.

ROMANOS 11:36

Mií Ndioxi ku ra si̱kuaꞌa ndiꞌi ni kúu ñaꞌa ya íyo, xaꞌa mií ra si̱kuaꞌa ra ndiꞌi ya, ta ndiꞌi ya ndi̱kuaꞌa íyo ya xaa súvi ya kúni mií ra. ¡Yakan kua ná kunuu vaꞌa ni ya toꞌo ra ndiꞌi saa tiempo! Saa ná koo.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

Efesios 1:17

Xáku ndaꞌvi i nuu Ndioxi ra chee ni, ra kúu Iva Tata yo Jesucristo ya ná taxi ra ya xínituni ndaꞌa ndo, ta saa ná xinu ndo kundaa vaꞌa ini ndo xaꞌa ra ta nda kuni taꞌan vaꞌa ka ndo xiꞌin ra,

Efesios 4:15

Vaꞌa ka ná kuxuxa ini yo xaꞌa ndiꞌi ni kúu kuꞌva ya ndíkani ini yo, ta saa nduu yo tá káa mií Cristo, ná sinaꞌa taꞌan yo xiꞌin ya ndaa xaꞌa ya kúꞌvi ini yo xínitaꞌan yo. Chi mií Tata yo Cristo ku ra ku xi̱ní, ra xáꞌnda chiñu nuu yo veꞌe ñuꞌu.

Filipenses 3:8

Ta ndiꞌi ya vaꞌa ni ndi̱xiyo nuu i yachi, ta nda loꞌo ka köo ndáa yaꞌvi ya nuu i vitin xaꞌa ya xi̱ni taꞌan i xiꞌin Tata yo Jesucristo, ra Chee ni nuu yo. Xaꞌa ra yóꞌó kua si̱ndoo ndaꞌa ndiꞌi i ñaꞌa ya ndee ni vaꞌa xi̱ndaa yaꞌvi nuu i tá yachi, ta ni köo xaꞌa ka ya nuu i vitin, tá íyo taka va saa íyo ya nuu i chi ya ndee ni vaꞌa ka kua nduu i kuenta Jesucristo.

Colosenses 1:10

Ta saa kua vaꞌa kuchiñu ndo ikan ndo tá kuꞌva kúni mií Tata yo Jesucristo, chi saa kua xaa kaꞌnu ni ndo ra xiꞌin ndiꞌi ni kúu ñaꞌa vaꞌa íkan ndo nuu ra, koo ndo tá kuꞌva íyo naꞌa, na ndíkun Tata yo Jesucristo. Ta saa kua vaꞌa kuaꞌnu ka ndo xiꞌin ya ndíchi xaꞌa mií ra.

Colosenses 3:10

Chi vitin ta xa ndu̱u ndo naꞌa, na xa̱á, na íin tá kuꞌva káa mií Ndioxi ra si̱kuaꞌa ndóꞌo̱ ku ra íkan saa xiꞌin ndo iin iin kivi nda ná xinu koo ndo kuni taꞌan vaꞌa ndo xiꞌin ra tá kuꞌva káa mií ra.

2 Tesalonicenses 1:3

Ñani yo xiꞌin kuꞌva yo, ndiꞌi saa ichí xíniñuꞌu ni nde kaꞌan nde xaꞌa ndo xiꞌin Ndioxi. Chi ndóꞌo̱, ta kándixa ni ndo ra, ta vitin taan xáꞌnu ka ndo xiꞌin tuꞌun ra, saa kúꞌvi ni ini ndo xíni taꞌan ndo.

2 Timoteo 4:18

Ta mií Iva yo ku ra sikaku yeꞌe nuu ndiꞌi ñaꞌa väꞌa, saa kuniꞌi ra yeꞌe kuꞌun i xiꞌin ra nuu ndivi nuu xáꞌnda chiñu ra. ¡Saa ná kunuu sukun ni ya toꞌo ra, ndiꞌi saa kivi ya vaxi! Saa ná koo.

1 Pedro 2:2

Koo ndo tá kuꞌva íin na vali, na sikan ka̱ku, na ndee ni káꞌun ini ta kúni ni na chichin na, kuꞌva saa xíniñuꞌu ndo nduku ni ndo nina tuꞌun ya vaꞌa, ya kúu tuꞌun Tata yo, saa kua nduu ndo na ndinuꞌu ni ndíkun ichí ra, ya kaku ndo.

2 Pedro 1:11

Ta saa kusini ni Ndioxi xiꞌin ndo saa kuna koꞌo ra yeꞌe nuu ndo kiꞌvi ndo koo ndo xiꞌin ra ndiꞌi saa tiempo nuu ndivi nuu koo Tata yo Jesucristo ra síkaku yoo kaꞌnda chiñu ra.

2 Pedro 1:2

Ta mií Iva yo Ndioxi, ná taxi kuaꞌa ni ya vaꞌa koo xiꞌin ndo, saa ná koo vaꞌa ni ndo xaꞌa ya xíni taꞌan vaꞌa ni ndo xiꞌin Iva yo Ndioxi tin mií Tata yo Jesucristo, ra chee ni nuu yo.

2 Pedro 1:3

Ta xiꞌin ndee Ndioxi kua xa ta̱xi ra ndiꞌi ya xíniñuꞌu ndo ndaꞌa ndo ya vaꞌa kutaku yo nuu ra tá kuꞌva kúni mií ra. Xa ndi̱kiꞌin yo ndiꞌi ya yóꞌó chi vitin ta ndinuꞌu ni ini yo xíni yo Jesucristo, ra ka̱na yoo ya ndu̱u yo naꞌa, na kúu mií ya vaꞌa, ya luvi kaꞌnu ni kúu mií ra.

2 Pedro 1:8

Tá tu íkan ndo ndiꞌi ya káꞌan i xaꞌa xiꞌin ndo yóꞌó iin iin kivi, saa kua nduu ndo naꞌa, na íkan chiñu ya ndee ni ndáa yaꞌvi, ta ya ñaa kua káꞌan vaꞌa ni xaꞌa ndo, ya xíni ni ndo Tata yo Jesucristo.

2 Pedro 2:20

Ta naꞌa, na ndíkani ini kundikun na nda sínaꞌa ya vata ikán ta xa ndi̱saña na nuu ya väꞌa íyo ñuu ivi yóꞌó tá ku̱ndaa ini na xaꞌa tuꞌun vaꞌa xaꞌa Tata yo Jesucristo ra síkaku yoo. Sundi tá ndi̱koyo tuku na íkan na ya väꞌa taꞌan ya xa i̱kan na yachi, ta ndee ni ka kini xáꞌnda chiñu ya väꞌa ikán nuu na vitin, süvi ka vi tá kuꞌva ndi̱xiyo na tá núnu̱ú.

Judas 1:25

Ná xaa kaꞌnu ni yo Ndioxi chi iin mituꞌun mií ra ku Ndioxi ra ndíchi ni, ra síkaku yoo, saa ná kunuu sukun ni ya toꞌo ra nuu luvi ni íyo ra, nuu ndee ni xáꞌnda chiñu ra xiꞌin ndiꞌi ndai kúu mií ra vitin tin ndiꞌi saa kúu kivi ya vaxi. Saa ná koo.

El Apocalipsis 1:6

Ta ta̱xi Tata yo Jesucristo ichí ndaꞌa yo ndu̱u yo tá íyo nda rey nda xáꞌnda chiñu, saa chi kaꞌnda chiñu yo xiꞌin ra. Ta saa ta̱xi ra ichí ndaꞌa yo koo yo tá íyo nda sutu i̱í, saa chi tá íin nda ikán saa koo yo xaa chiñu yo nuu Iva yo Ndioxi. ¡Ta ná xaa kaꞌnu ni yo Ndioxi ndiꞌi saa kivi! ¡Ta ndiꞌi saa kivi ná kaꞌnda chiñu ra ñuu ivi yóꞌó! Saa ná koo ya.