2 Pedro 1:16 - Xochapa Mixteco

¹⁶ Ta xa ndi̱tuꞌun nde xiꞌin ndo, si̱naꞌa nde ndóꞌo̱ xaꞌa ndee ya kúu mií Tata yo Jesucristo xiꞌin ya ndiko koo ra kixi tuku ra ñuu ivi yóꞌó, ta ya ndaa ni kua ndi̱kaꞌan nde xiꞌin ndo, süvi kuento vata kua ndi̱tuꞌun nde xiꞌin ndo. Chi ndeꞌe ta xi̱ni xiꞌin nuu mií nde ndee chee ni kúu mií ra.

2 Pedro 1:16 ပူးပေါင်းရင်းမြစ်များ

San Mateo 16:27

Ta yeꞌe, Taa ra xa̱a ñuu ivi yóꞌó, vaxi kivi ndiko koo i ñuu ivi yóꞌó xiꞌin ndee ya vaꞌa Iva i Ndioxi, ta kixi na tatun ra xiꞌin i, ta saa chaꞌvi i iin iin na xaꞌa ya vaꞌa án ya väꞌa i̱kan na ñuu ivi yóꞌó.

San Mateo 16:28

Ya ndaa káꞌan i xiꞌin ndo, sava ndo ndóo yóꞌó vitin, ta kutaku ka ndo nda kivi tá ná ndiko koo yeꞌe, Taa ra xa̱a ñuu ivi yóꞌó, ndiko koo i ya kaꞌnda chiñu i ―káchi Jesús.

San Mateo 17:1

Ndi̱yaꞌa iñu kivi saa ndi̱kundaka Jesús ra Pedro xiꞌin ra Jacobo tin ra Juan ñani ra, ndi̱kundaka ra nda kuaꞌan nda xiꞌin ra iin iku sukun ni, ta ikán ndóo uni mií nda xiꞌin ra.

San Mateo 24:27

Tá ná ndiko koo yeꞌe Taa ra xa̱a ñuu ivi yóꞌó, ta tá kuꞌva ndíyeꞌe taxan nuu ndivi iin ndíyeꞌe ndaa yaa nuu kéta ñu̱ꞌù iin saa nda nuu kěta ya, saa kuu kivi tá ná ndiko koo i, ndiꞌi ni kúu naꞌa kuni ndiko koo i.

San Mateo 24:3

Saa ke̱e nda kuaꞌan nda iku Olivo, ñaa ndi̱kunduꞌu Jesús xiki ikán, ta ku̱yati nda ítaꞌan xiꞌin ra nuu ra káꞌan sěꞌe nda xiꞌin ra, káchi nda saa: ―Tata, kúni nde kaꞌan un xiꞌin nde maa kua kuu saa. ¿Ta ndá seña kua koo tá ná ndiko koo un tin tá ná ndiꞌi xaꞌa ñuu ivi? ―káchi nda xiꞌin ra.

San Mateo 28:18

Saa ku̱yati Jesús nuu nda, ta ndi̱kaꞌan ra xiꞌin nda, káchi ra saa: ―Ndaꞌa yeꞌe ta̱xi Ndioxi ichí xaꞌa ndiꞌi ni kúu ñaꞌa ya íyo nuu ndivi tin ya íyo ñuu ivi yóꞌó.

San Marcos 13:26

Tá ndiꞌi ikán, saa kuni ndiꞌi na ivi yeꞌe, ra Taa ra xa̱a ñuu ivi yóꞌó, kuni na kixi i xiꞌin viko, ta ndee ni ndee koo i kixi i, iin ndiyeꞌe ndaa ndiꞌi, chi kixi ndiꞌi ndee i xiꞌin i.

San Marcos 14:62

Saa ndi̱kuiin Jesús káꞌan ra: ―Ikán kuu i. Ta kuni ndo yeꞌe, Taa ra xa̱a ñuu ivi yóꞌó, kuni ndo kunduꞌu i ñaꞌñu kuaꞌá Ndioxi ra kaꞌnu, saa kuni ndo yeꞌe ndiko koo i kixi i tañu viko nuu ndivi ni̱nù ―káchi ra xiꞌin nda.

San Lucas 1:2

Tá íyo ya si̱naꞌa nda xi̱taꞌan xiꞌin ra, nda xi̱ni xiꞌin nuu ndiꞌi ya i̱kan ra, saa íyo ya ta̱a nda, chi nda ikán ku nda ndi̱kuiso chiñu kaꞌan ndoso nda tuꞌun ra.

San Lucas 9:43

Ta ndiꞌi na ndóo ikán ndi̱kanda ni ini na xíto na ku̱chiñu Jesús si̱nduvaꞌa ñaꞌa ra xiꞌin ndee Ndioxi. Ta ndóo ndiꞌi na ndi̱kanda ini na xíto na nuu Jesús ndóo na, saa ndi̱kaꞌan ra xiꞌin nda ítaꞌan xiꞌin ra, káchi ra saa:

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 17:2

Chi yóꞌo̱ ku ra ta̱xi ichí ndaꞌa i xaꞌa ndiꞌi na ñuu ivi na ta̱xi un ndaꞌa i yóꞌó, ya ná taxi i ichí ndaꞌa na kutaku na ndiꞌi saa kivi.

ROMANOS 1:4

Ta si̱taku Ndioxi ra tixin ndee Tachi I̱í ra, ndi̱taku ra tañu na ndíi, saa ndi̱kiꞌin ndiꞌi ra ichí ya kaꞌnda chiñu ra xaꞌa ya kúu ra Seꞌe Ndioxi.

1 Corintios 1:17

Ta vaꞌa ná kundaa ini ndo chi Cristo ta köo ndi̱tiꞌvi ra yeꞌe ya sikuchi i naꞌa. Sundi ti̱ꞌvi ra yeꞌe ya kaꞌan ndoso i tuꞌun vaꞌa xaꞌa ra xiꞌin na ivi, ya kuchiñu na kaku na. Ta köo ndíkaꞌan i xiꞌin na xiꞌin tuꞌun ndíchi ni, ya ná sïndiꞌi xaꞌa i ndee, ya ná chïkaa ni̱nu̱ ni i ya ndi̱xiꞌi Cristo ndaꞌa cruzin.

1 Corintios 1:23

Sundi ndeꞌe, ta xaꞌa Jesucristo, ra ndi̱xiꞌi nuu cruzin xaꞌa kuachi va yo kua káꞌan ndoso nde xiꞌin na. Ta tuꞌun yóꞌó nda tá káa yu̱ú nuu káchiꞌi xaꞌa na kóyo na, saa káa ya nuu na judío. Ta na griego ndíkani ini na, tá káa ya kíꞌvi va, saa káa ya nuu na.

1 Corintios 1:7

Xaꞌa ya ikán kua nda iin ñaꞌa vaꞌa köo kümani ka nuu ndo, nani tá ndátun ndo iin saa nda kivi tá ná ndiko koo Tata yo Jesucristo kixi tuku ra ñuu ivi yóꞌó.

1 Corintios 2:1

Ñani yo xiꞌin kuꞌva yo, tá ndi̱xaꞌan i xi̱to i ndóꞌo̱. Tá ndi̱kaꞌan ndoso i tuꞌun xaꞌa Jesucristo xiꞌin ndo xaꞌa ñaꞌa ya ndi̱xiyo sěꞌe nuu ndo yachi. Ta köo ndi̱xiniñuꞌu i tuꞌun ndíchi ni kaꞌan i xiꞌin ndo, tuꞌun ya kuchiñu ndo kundaa ini ndo xiꞌin va ku ya ndi̱kaꞌan i xiꞌin ndo.

1 Corintios 2:4

Tá ndi̱kaꞌan ndoso i xiꞌin ndo xaꞌa tuꞌun ra, ta köo ndi̱xiniñuꞌu i tuꞌun ndíchi ni taꞌan ya xíniñuꞌu na ñuu ivi yóꞌó ya sixinu i ini ndo. Sundi mií Tachi I̱í Ndioxi xiꞌin ndee mií ra kua si̱xinu ra ini ndo xaꞌa tuꞌun ya ndi̱kaꞌan i xiꞌin ndo ya kúu ya ndaa ni.

1 Corintios 5:4

Vaꞌa ndikitaꞌan ndiꞌi ndo tixin kivi Tata yo Jesucristo, ta saa tu yeꞌe va, nda tá káa ra íyo xiꞌin ndo saa káa i. Saa íyo tu ndee Jesucristo va xiꞌin ndo nuu ndíkitaꞌan ndo.

2 Corintios 2:17

Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.

2 Corintios 4:2

Ta xa si̱ndoo ndaꞌa va nde ndiꞌi ñaꞌa ya kaꞌa̱n ni nuu i̱kan sěꞌe nde tá yachi, ta ni köo naꞌa síndaꞌvi nde xiꞌin ya vata, ni tuꞌun Ndioxi ta köo ndínama nde ya xiꞌin ya vata. Nina xiꞌin ya ndaa kua sínaꞌa nde naꞌa, ta köo ñaꞌa ndi̱tiseꞌe nde nuu na. Mií Ndioxi ku ra ndíkuiin xaꞌa nde ya káꞌan nde nina ya ndaa. Ta xaꞌa ya yóꞌó kua vaꞌa kándixa naꞌa tuꞌun ya káꞌan nde, chi xíni na ya ndaa kua káꞌan nde.

Efesios 4:14

Chi saa kua ïkan ka yo tá kuꞌva íkan na vali, ta ni ndöꞌo yo tá kuꞌva ndóꞌo itun barco chi tá vaxi tachi saa kua kánda nu kuaꞌan nu, ta saa yoo, kändixa ndikuu yo ndiꞌi nuu ñaꞌa ya síin ni káa sínaꞌa ndá ka nda väꞌa sínaꞌa, chi nda ikán ta nda kúni sindaꞌvi yoo va ku nda.

Filipenses 3:21

Ta ndinama ra ikin kuñu yo ya vita ni kúu mií yo, saa nduu ya tá káa ikin kuñu mií ra, ya luvi ni. Ta xiꞌin ndee kúu mií ra ya xáꞌnda chiñu ra nuu ndiꞌi ñaꞌa kua ndisama ra yoo.

1 Tesalonicenses 2:19

Ta kúni ni nde xaa nde nuu ndo chi ndóꞌo̱ ku ndo xáꞌa ni ndee xiꞌin nde xaꞌa ya ndee ni vaꞌa ndíkun ndo Tata yo Jesucristo, xaꞌa ya ñaa kua kúsini ni nde xiꞌin ndo. Tá ná ndiko koo Tata yo Jesucristo ñuu ivi yóꞌó ta vaꞌa ni kuni nde xiꞌin ndo, chi ndóꞌo̱ ta tá íin ñaꞌa ya luvi ni níꞌi iin naꞌa nuu kuaꞌan na kéꞌe taꞌan na, saa íin ndo nuu nde. Ta niꞌi ni nde ya vaꞌa nuu Ndioxi xaꞌa ndo tá ná sinaꞌa nde ndóꞌo̱ nuu ra.

2 Tesalonicenses 2:9

Ta kivi ná ndituvi ra nduvaꞌa ikán ñuu ivi yóꞌó ta xiꞌin ndee kiti nǎꞌa kua ndituvi ra, ta ndee ni ndee kuu mií ra, ikan ni ra yatuꞌun nuu naꞌa, saa ndikanda ni ini na kuni na ra xiꞌin ya vata ikan ra nuu na.

1 Timoteo 1:4

Ta kaꞌan un xiꞌin na, ná ndïtuꞌun na kuento yata ya köo ndáa yaꞌvi, ni ná ndïtuꞌun na xaꞌa xií síkua na ndá na veꞌe ku xií na, chi yakan ta ndee ni kǎni kuaꞌan ya, takua síkani taꞌan ya na, ta köo chíndee taꞌan ya xiꞌin na ya kundaa ini na xaꞌa chiñu kúni Iva yo Ndioxi. Chi ndisaa ya ndáa ni ini yo xíni yo Tata yo Jesucristo va kua ndee ni ndáa yaꞌvi.

1 Timoteo 4:7

Ta küni soꞌo un kuento vata, ya köo ndáa yaꞌvi ndítuꞌun naꞌa. Ya vaꞌa ni kua xaꞌa ni un ndee kuu un iin taa, ra vaꞌa ni xáa súvi ya kúni Ndioxi.

Tito 1:14

Ta ná küni soꞌo na kuento yata ya ndítuꞌun mií na judío, ni ná täa tu soꞌo na ya síkuaꞌa ini mií na káꞌan na, na ñaa ku naꞌa, na síndoo ichí Ndioxi ya ndaa.

2 Pedro 2:3

Chi nda ikán ta ya ndee ni kúni nda ku xuꞌun ndo xaꞌa ya sínaꞌa nda ndóꞌo̱ tuꞌun vata. Ta vaꞌa ná kundatun naꞌa nda chi xa ta̱xi Ndioxi kuachi xaꞌa nda, xa xinaꞌa vi íyo ya xaꞌa nda ta kama ni kuu saa xiꞌin nda, ni käku ka vi nda ndakua ndiꞌi xaꞌa nda ikan Ndioxi.

1 Juan 4:14

Ta ndeꞌe xi̱ni xiꞌin nuu nde Jesús, ra kúu Jesucristo ra ti̱ꞌvi Iva yo Ndioxi ki̱xi ñuu ivi yóꞌó. Ta ndíkuiin nde xaꞌa ra ya ki̱xi ra sikaku ra ndiꞌi na ñuu ivi yóꞌó.

Judas 1:14

Ra Enoc, ra uxa ra kúu seꞌe ñani sikua ra Adán, ra ikán ku ra ndi̱kaꞌan xaꞌa nda taa nda sinaꞌa ya vata ñaa, ka̱chi ra saa: “¡Koto ndo vii! Xa xi̱ni i vaxi kuaꞌa ni mil na tatun Ndioxi xiꞌin ra,

El Apocalipsis 1:7

Vaxi kivi ta ndiko koo Tata yo Jesucristo ñuu ivi yóꞌó, kixi ra tañu vi̱kó. Ndiꞌi saa naꞌa kuni xiꞌin nuu na ra kixi ra. Nda naꞌa, na tu̱vi itun íyo kàà xi̱ín nuu, na xa̱a ndu̱vaꞌa ni xiꞌin ra, si̱tikueꞌe ni na ra, ta nda na ikán kuni kixi ra. Ta naꞌa, na ndóo ndiꞌi ni kúu ñaꞌñu ñuu ivi, na köo ndi̱xiin kandixa ñaꞌa, nda na ikán kusuchi ni ini, kuaku ni na tá ná kuni na ra. Saa ná koo.