2 Pedro 1:12 - Xochapa Mixteco

¹² Ta ndóꞌo̱, ta xa xíni ndiꞌi ndo ya yóꞌo̱, ta tuun ni ndíkun ndo ya ndaa ya xa si̱naꞌa na ndóꞌo̱, ni yeꞌe ta ndiꞌi saa ichí síndikaꞌán i ini ndo ya ná ndïndoso ini ndo xaꞌa ya yóꞌó.

2 Pedro 1:12 ပူးပေါင်းရင်းမြစ်များ

Los Hechos 16:5

Ta ndúndee ka na veꞌe ñuꞌu ndáa ni ini na xíni na Jesús, saa ndúkuaꞌa ka na ndíkundikun ichí ra iin iin kivi.

Filipenses 3:1

Ñani yo xiꞌin kuꞌva yo, vitin káꞌan i xiꞌin ndo kusini ni ndo xiꞌin ya i̱kan Tata yo Jesucristo xaꞌa ndo. Chi yeꞌe, ta köo kúxuxan i taa tuku i ya xa ta̱a i xaa nuu ndo, chi ya yóꞌó kua chindee ni ndóꞌo̱.

Colosenses 1:5

Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

Colosenses 2:7

Tá kuꞌva kúnu ni ñúꞌu tioꞌo itun án tá kuꞌva kúnu ni kuáꞌa xaꞌa veꞌe, kuꞌva saa ndee ni tuun kandixa ndo ra, xaꞌa ni ndo ndee xiꞌin taꞌan ndo, koo ndo tá kuꞌva xa ku̱ndaa ini ndo xaꞌa ya ndaa si̱naꞌa nde ndóꞌo̱, ta saa taxi ni ndo tixaꞌvi ndaꞌa ra.

1 Timoteo 4:6

Tá sínaꞌa un tuꞌun ya ndaa yóꞌó nuu na ñani yo xiꞌin kuꞌva yo, na veꞌe ñuꞌu, saa kua koo un iin ra vaꞌa ni xáa chiñu nuu Tata yo Jesucristo. Saa chi tá íyo ya vaꞌa ni xíxi yo táxi ndee ndaꞌa yo, kuꞌva saa íyo tuꞌun Tata yo Jesucristo ya kándixa ni yo xiꞌin tuꞌun ra ya xa si̱kuaꞌa un.

2 Timoteo 1:6

Xaꞌa ya ñaa kua káꞌan i xiꞌin un ya ná kuniñuꞌu ni un ndee vaꞌa ya ta̱xi Tachi I̱í Ndioxi ndaꞌa un tá kivi chi̱nuu ndaꞌa i xi̱ní un. Täxi un ndiꞌi xaꞌa ya.

HEBREOS 10:32

Ta saa ndóꞌo̱, ndikaꞌán ni ini ndo ndá kuꞌva ndo̱ꞌo ndo yachi, tá sikan ndi̱yeꞌe nima ndo xiꞌin tuꞌun vaꞌa xaꞌa Tata yo Jesucristo, ta ndee ni tindoꞌo ki̱xi nuu ndo, ta ndi̱xaꞌa ndee ndiꞌi ini ndo xiꞌin ya ndinuꞌu ni ini ndo xi̱ndikun ndo sata ra.

HEBREOS 13:9

Täxi ndo sindaꞌvi naꞌa ndóꞌo̱ xaꞌa inka tuꞌun ya köo íyo yuꞌu xiꞌin tuꞌun ya si̱naꞌa Tata yo Jesucristo ndóꞌo̱. Ya vaꞌa ni ka va kua ná ndundee ka nima ndo xiꞌin ya vaꞌa ndi̱niꞌi uun ndo nuu Iva yo Ndioxi. Sundi na ikán ta ndisaa xaꞌa ley yata káꞌan na, ndá ñaꞌa kua vaꞌa kuxi yo ta ndá ñaꞌa kua küvi kuxi yo, káchi na, ta ya sínaꞌa na ikán ta nda loꞌo köo chíndee taꞌan ya xiꞌin nda iin naꞌa.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.

1 Pedro 5:12

Ra Silvano ñani yo ku ra ndee ni tuun ndíkun Tata yo Jesucristo, ta ra yóꞌó ku ra kuniꞌi tutu yóꞌó xaa ya ndaꞌa ndo, ta̱a i uvi ndaa tuꞌun xaa ya nuu ndo ya xáꞌa ni i ndee xiꞌin ndo káꞌan i xiꞌin ndo xaꞌa tindoꞌo ya ndee ni ndóꞌo ndo vitin, ta ya ñaa kua káꞌan ya ndee ni kúꞌvi ini Ndioxi xíni ra ndóꞌo̱.

2 Pedro 1:13

Chi nani táku i ta xíniñuꞌu i sindikaꞌán i ini ndo xaꞌa ya yóꞌó, tá íyo i xiꞌin ndo ñuu ivi yóꞌó.

2 Pedro 1:15

Ta xaꞌa ya ikán kua ndíꞌi ni ini i síndikaꞌán i ndóꞌo̱ ndiꞌi saa ichí, yachi ka tá íyo i xiꞌin ndo ya ná kuñuꞌu ni ini ndo xaꞌa ya káꞌan i xiꞌin ndo tá kivi köo ka i íyo xiꞌin ndo.

2 Pedro 3:1

Ñani yo xiꞌin kuꞌva yo, ya yóꞌó ku tutu ya uvi táa i xaa ndaꞌa ndo. Ta̱a i uvi saa ya xaa ya ndaꞌa ndo ya ndíkani i nuu ndo ya ná koo vaꞌa ni ya xínituni ndo saa ndikani ndaku ni ini ndo.

2 Pedro 3:17

Ñani mani, ndóꞌo̱ ta xa kúndaa va ini ndo xaꞌa ya kuu, yakan kuenta ni koo ndo täxi ndo sindaꞌvi nda väꞌa ñaa ndóꞌo̱ ya kuꞌun ndo ichí väꞌa nuu nduvita ini ndo, ta kündikun tuun ka ndo Tata yo Jesucristo.

1 Juan 2:21

Táa i tutu yóꞌó xaa ya ndaꞌa ndo, chi xa xíni ndo ya ndaa ta süvi ndo täꞌan kundaa ini xiꞌin ya ndaa ku ndo. Chi ndóꞌo̱ ta xa kúndaa vaꞌa ini ndo xiꞌin ya ndaa, saa chi nuu íyo ya ndaa, ta köo ka ya vata íyo.

2 Juan 1:2

Ta saa ndeꞌe kúꞌvi ni ini nde xíni nde ndóꞌo̱, saa chi íyo ya ndaa ini yo vitin, ta saa koo ya xiꞌin yo ndiꞌi saa tiempo ya vaxi.

Judas 1:17

Sundi ndóꞌo̱ ñani yo, ta ndikaꞌán ni ini ndo xaꞌa tuꞌun ya ndi̱kaꞌan nda xa̱a chiñu nuu Tata yo Jesucristo tá yachi.

Judas 1:3

Ñani mani, xa yachi vi kúni ni i taa i tutu yóꞌó xaa ya ndaꞌa ndo nuu káꞌan i xiꞌin ndo xaꞌa ya síkaku Iva yo Ndioxi yoo. Ta nda vitin vi táa i ya xaa ya nuu ndo ya ndúku ni i ya mani nuu ndo káꞌan i xiꞌin ndo, täxi ndo sindaꞌvi nda sínaꞌa ya vata ndóꞌo̱, ta xaꞌa ni ka ndo nde ya kandixa ni ndo tá kuꞌva ku̱ndaa ini na ñuu Ndioxi.

Judas 1:5

Ta yeꞌe ra kúni i sindikaꞌán i ini ndo xaꞌa ya xa xíni vaꞌa ndo xaꞌa: Chi Iva yo Ndioxi ta si̱kaku ra na Israel ñuu Egipto, ta sindiꞌi saa si̱ndiꞌi xaꞌa yaa ra naꞌa, na köo ndi̱xiin kandixa ñaꞌa.