2 Corintios 7:11 - Xochapa Mixteco

¹¹ Na taꞌan yo, koto mií ndo, ndá kuꞌva chi̱ndee ya suchi ini ta̱xi Ndioxi ndo̱ꞌo ndo: Ta vaꞌa xaa súvi ndo ya chi̱kaa ini ndo ikan ndo xiꞌin ra taꞌan ndo ñaa. Chi ndóꞌo̱ ta kúni ndo sinaꞌa ndo mií ndo ya köo kuachi ndo ta kúndasi nuu ndo xíni ndo kuachi. Saa ndíꞌi ni ini ndo xaꞌa tindoꞌo ya íyo nuu ndo. Ta vitin, kúni ndo kuni ndo yeꞌe, chi ndíꞌi ni ini ndo xaꞌa i. Ta íyo ndúvi ndo ya taxi ndo kuachi xaꞌa ra taꞌan ndo ñaa. Xaꞌa ya íkan ndo saa ta sínaꞌa ndo mií ndo ya köo íyo yuꞌu ndo xiꞌin ra, ta ya ñaa kúni kachi ya kíndoo ndika ndo xaꞌa kuachi ra taꞌan ndo ñaa.

2 Corintios 7:11 ပူးပေါင်းရင်းမြစ်များ

San Marcos 3:5

Saa ndi̱saa ni Jesús ndi̱koto ra nuu nda ndóo ikán, ta ku̱chiꞌña ka vi ini ra, chi tuun ni nima nda. Saa ndi̱kaꞌan ra xiꞌin ra ndi̱ndichi ndaꞌa ikán, káchi ra saa: Sindikaa ndaꞌa un ―káchi ra xiꞌin ra. Saa si̱ndikaa ra ndaꞌa ra. Tá si̱ndikaa soꞌva ra ya, ta ndikun ndu̱vaꞌa ya.

San Juan 2:17

Saa ndi̱kaꞌán ini nda ítaꞌan xiꞌin ra xaꞌa tuꞌun Ndioxi ya ta̱a na xinaꞌa, ta ya ikán káchi ya saa: “Tá káa ñu̱ꞌu̱ ya ndee ni xáꞌmi ñaꞌa, saa káa ya ndóꞌo nima i xaꞌa ya ndee ni ndíꞌi ini i xíni i veꞌe un.” káchi ra.

Los Hechos 17:16

Tá íyo ra Pablo ñuu Atenas ndátun ra xaa ra Silas xiꞌin ra Timoteo, saa ku̱chiꞌña ni ini ra, chi xi̱ni ra kuaꞌa ni ndioxi ya síkuaꞌa mií na kándixa na.

ROMANOS 11:20

Saa ndixa íyo ya, vaꞌa kundaa ini ndo. Chi ya ndi̱taꞌnda ndaꞌa itun olivo tàtà ikán, ta xaꞌa ya köo ndi̱xiin na kandixa na Cristo kua. Yakan vaꞌa ndi̱kundikun ndóꞌo̱ íin tá íyo itun olivo ikú. Yakan kütai ni ini ndo, vaꞌa ni ka ná ku íꞌvi ndo kuni ndo Ndioxi.

ROMANOS 14:18

Tá íkan ndo saa xáa chiñu ndo nuu Jesucristo, ta xáa sini ni ndo ini Ndioxi, nda naꞌa ta vaꞌa ni káꞌan na xaꞌa ndo.

ROMANOS 3:5

Ya ndaa kua, xaꞌa ya väꞌa íkan yo ta sínaꞌa ya mií yo, ya iin mií Ndioxi ku ra ndaa ni nuu yo. Yakan kua ¿án vaꞌa kaꞌan yo xaꞌa Ndioxi, ra väꞌa ku ra chi táxi ra tíxuꞌvi yo xaꞌa kuachi yo? Soꞌva ndíkani xiní sava na ñuu ivi yóꞌó.

1 Corintios 12:25

Saa i̱kan Ndioxi xiꞌin ikin kuñu yo, ya ná täꞌvi taꞌan ya, saa kua vaꞌa kundiꞌi ini ya xiꞌin taꞌan ya ta chindee taꞌan ya xiꞌin taꞌan ya.

1 Corintios 5:13

Mií Ndioxi ku ra xaa nani kuachi xiꞌin naꞌa, na köo xíni tuꞌun ra. Xaꞌa ya ñaa kua vaꞌa ka tava ndo ra ndíkaa xiꞌin ndo veꞌe ñuꞌu xaꞌa ya väꞌa kéꞌe ra.

1 Corintios 5:2

¡Ta ndóꞌo̱, ta ndo kútai ini va ku ndo xaꞌa ya väꞌa íkan ra ñaa nuu ndo! ¡Ndóꞌo̱ kuchiꞌña ini vi ku ndo, ndikuu, ta köo íkan ndo saa! Ta ra íkan saa, ta vaꞌa tava ndo ra, ná keta ra veꞌe ñuꞌu, täxi ka ndo ndikaa ra xiꞌin ndo.

2 Corintios 13:7

Nina saa káꞌan ni nde xaꞌa ndo xiꞌin Ndioxi ya ná ïkan ndo ndá ka ñaꞌa väꞌa, ya káꞌan nde saa xiꞌin ndo, ta süvi xaꞌa ya kúni nde ya ná kuni naꞌa ya ndi̱yaꞌa vaꞌa nde nuu ya xi̱to ndoso nde mií nde kua. Káꞌan nde saa xiꞌin ndo ya ná ikan ndo ñaꞌa vaꞌa nuu Ndioxi, vani sava ndo ndíkani ini xaꞌa nde ya köo ndi̱yaꞌa nde nuu ya xi̱to ndoso nde mií nde, kaꞌán ndo.

2 Corintios 2:6

Ta vaꞌa va, chi xa cha̱ꞌvi va ra xaꞌa kuachi ya i̱kan ra chi xa iin káchi si̱ndoꞌo ndiꞌi va ndo ini ra.

2 Corintios 6:4

Nda vaꞌa ka va íkan nde, chi ndiꞌi ya íkan nde nuu na ta káꞌan ya xaꞌa nde ya xáa chiñu nde nuu Ndioxi. Xáꞌa ndee ini nde xiꞌin ndiꞌi tindoꞌo ya vaxi nuu nde, saa tu tindiꞌi ini ya vaxi nuu nde, xiꞌin ya kúmani ñaꞌa xíniñuꞌu nde, saa kúndee ini nde xiꞌin ndiꞌi ya suchi ini vaxi nuu nde.

2 Corintios 7:1

Ta saa ñani mani yo, xa ndi̱kaꞌan Ndioxi xiꞌin yo ya ki̱ndoo ra xiꞌin yo, yakan ná kundaa ni yo mií yo, ná kuxika yo nuu ndá ka ñaꞌa väꞌa, ya xáa yakua ikin kuñu yo xiꞌin ya vaꞌa yo. Ná nditaxi ndiꞌi yo mií yo ndaꞌa Ndioxi, ya xaa toꞌo yo ra, saa kua nduu yo na i̱í nuu ra.

2 Corintios 7:7

Ta saa ni süvi ndisaa xaꞌa ya xa̱a ra nuu nde kua ndi̱ndiko ini nde, chi xaꞌa ya ndee ni vaꞌa ndi̱xaꞌa ndo ndee xiꞌin ra kua si̱ndiko ni ini nde. Ndi̱tuꞌun ra xiꞌin nde ya ndee ni kúni ndo kuni ndo ndeꞌe, ta saa ndi̱kaꞌan ra xiꞌin nde ya kúsuchi ni ini ndo xaꞌa kuachi ndo. Saa ndi̱tuꞌun ra xiꞌin nde ya ndee ni ndíꞌi ini ndo xaꞌa i, yakan ndee ni vaꞌa ka ku̱ni i xiꞌin tuꞌun ya xi̱ni soꞌo i xaꞌa ndo.

2 Corintios 7:9

Ta vitin ta kúsini ni i, ta süvi xaꞌa ya xa̱a suchi i ini ndo kua kúsini ni i, xaꞌa ya ndi̱ko koo ini ndo nuu Ndioxi kua kúsini ni i xiꞌin ndo. Ta ya ku̱suchi ni ini ndo tá kuꞌva kúni mií Ndioxi kua ku̱suchi ini ndo, ta süvi ndeꞌe ku nde ndi̱xaa nduvaꞌa xiꞌin ndo.

2 Corintios 9:2

Chi xa xíni i ini ndo ya ndee ni vaꞌa kúni ndo chindee ndo na, kuꞌva saa kua vaꞌa ni ndi̱tuꞌun i xaꞌa ndo xiꞌin ndiꞌi na veꞌe ñuꞌu, na ndóo estado Macedonia. Ndi̱kaꞌan i xiꞌin na xaꞌa ndóꞌo̱ ndóo estado Acaya, ya ndee ni vaꞌa íyo ndúvi ndo chindee ndo na taꞌan yo, na ndaꞌvi. Ta nda kuiya ya ndi̱yaꞌa xa̱á ndo íkan ndo saa, ta xaꞌa ya vaꞌa ni íkan ndo, ta saa ndiꞌi na taꞌan yo, na ndóo Macedonia yóꞌó kúni tu na yóꞌó va chindee taꞌan na xiꞌin na taꞌan yo.

Efesios 4:26

Yakan tá xáa ndo sáa ini ndo xiꞌin taꞌan ndo, ta vaꞌa kama sindiko ndo ini ndo, ta säa ndo inii nduvi ndaa xiꞌin taꞌan ndo.

Efesios 5:11

Ta ïkan ndo ñaꞌa väꞌa taꞌan ñaꞌa ya íkan na ñaa nuu naá. Ta vaꞌa ndituꞌun ndo xiꞌin na ya ná kundaa ini na xaꞌa ñaꞌa ya väꞌa íkan na.

Filipenses 2:12

Na taꞌan yo, na kúꞌvi ni ini i xíni i, yachi tá ndi̱xiyo i xiꞌin ndo ta ndiꞌi saa ichí xa̱a súvi ni ndo tuꞌun Ndioxi ya ndi̱kaꞌan i xiꞌin ndo. Ta saa tu vitin va, vani köo íyo i xiꞌin ndo ta ndee ni ka xíniñuꞌu ndo xaa nduxa ndo ya ikan ndo ya vaꞌa taꞌan ya íkan naꞌa, na síkaku Ndioxi. Ikan ndo saa xaꞌa ya xáa toꞌo ndo Ndioxi, saa tu xaꞌa ya íꞌvi ndo xíni ndo ra.

1 Tesalonicenses 4:6

Sïndaꞌvi taꞌan ndo käka sěꞌe ndo xiꞌin yá síꞌi ñani ndo, án xiꞌin i̱í kuꞌva ndo. Saa chi ndiꞌi na íkan saa ta sindoꞌo ni Ndioxi na. Tá íyo ya xa ndi̱kaꞌan ni nde xiꞌin ndo yachi, saa íyo ya.

1 Timoteo 5:20

Tá tu ya ndixa kua íyo kuachi nda ta köo xíin nda sindoo nda ya väꞌa íkan nda, ta vaꞌa kaꞌan un xiꞌin nda nuu chútu ndiꞌi na veꞌe ñuꞌu ya ná sindikoo nda ya väꞌa íkan nda. Ta saa ku íꞌvi naꞌa ya ná ïkan na tá kuꞌva íkan nda.

2 Timoteo 2:15

Ta xaꞌa ni un ndee ya koo un iin taa ra vaꞌa ni íyo nuu Ndioxi, ta saa köo ya kukaꞌan nuu un kuni un ra xaꞌa ya vaꞌa ni xáa chiñu un, ta ndaa ni sínaꞌa un tuꞌun ra nuu naꞌa, saa xáa súvi un ya ndaa sínaꞌa un.

Tito 3:8

Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.

HEBREOS 4:1

Yakan yoo, ta ná kundiꞌi ni ini yo, kiꞌvi yo koo yo nuu ndikundee yo xiꞌin Ndioxi. Ta kuenta ni ná koo yo süvi ka vi ya ndoo sava yo chí sata, ta küchiñu yo kiꞌvi yo koo yo nuu ndikundee yo xiꞌin ra.

Santiago 3:17

Sundi naꞌa, na kúu mií ya ndíchi vaxi nuu Ndioxi ta köo ikán na ñaꞌa ya väꞌa, nina ya vaꞌa íkan na, ni köo kuachi ini na, saa kúu na, naꞌa na vaꞌa ni ini xiꞌin na ivi, kúndaꞌvi ini na xíni ñaꞌa na, ndiꞌi saa ichí kúni na xaa súvi na ya vaꞌa. Saa íkan na ya vaꞌa xiꞌin ndiꞌi naꞌa, ta köo íyo uvi yuꞌu na, na íkan saa ku na ndixa ndíkun ichí Ndioxi.

1 Pedro 1:17

Ta ndóꞌo̱, tá káꞌan ndo xiꞌin Ndioxi, ta kaꞌan ndo xiꞌin ra ya kúu ra Iva ndo. Ta vaꞌa va chi köo ndi̱kaxin ra nda iin naꞌa, iin kuꞌva xáa nani ra kuachi xiꞌin ndiꞌi na. Xaꞌa ya ñaa kua xíniñuꞌu ndo xaa súvi ndo ndiꞌi ñaꞌa íkan ndo xiꞌin ya toꞌo, nani ndóo naꞌa ndo ñuu ivi yóꞌó.

1 Pedro 2:2

Koo ndo tá kuꞌva íin na vali, na sikan ka̱ku, na ndee ni káꞌun ini ta kúni ni na chichin na, kuꞌva saa xíniñuꞌu ndo nduku ni ndo nina tuꞌun ya vaꞌa, ya kúu tuꞌun Tata yo, saa kua nduu ndo na ndinuꞌu ni ndíkun ichí ra, ya kaku ndo.

Judas 1:23

Ta chindee taꞌan ndo xiꞌin na ná kaku na, ndixita ndo na täxi ndo kuꞌun na nuu koko na, saa kundaꞌvi ni ini ndo kuni ndo inka na, ta xíniñuꞌu kuenta ni koo ndo xiꞌin mií ndo, saa ná kundási nuu ndo chiñu väꞌa ya kini ni íkan na.

El Apocalipsis 3:19

Káꞌan i tuꞌun uꞌvi ni yóꞌó xiꞌin ndo, chi saa káꞌan uꞌvi i xiꞌin naꞌa, na kúꞌvi ini i xíni i. Saa táxi i tíxuꞌvi ni na ya ná ndiko koo ini na kuꞌun na ichí vaꞌa. Saa ndóꞌo̱, xíniñuꞌu ndo ndiko koo ini ndo xaꞌa ya väꞌa íkan ndo, ta ndinuꞌu ni ini ndo ndiko koo ini ndo kundikun ndo Ndioxi.