2 Corintios 5:12 - Xochapa Mixteco

¹² Ta ya káꞌan nde saa xiꞌin ndo ta köo kúni kachi ya kúni nde chinuu vaꞌa nde tuꞌun mií nde. Káꞌan nde saa xiꞌin ndo ya ná koo vaꞌa ini ndo xiꞌin nde, ta saa kuchiñu ndo ndikuiin ndo kaꞌan ndo xaꞌa nde xiꞌin naꞌa, na ndee ni kútai ini xiꞌin mií. Saa chi íyo sava na ta ndee ni kútai ini na ya vaꞌa ni íkan na túvi na. Ndíꞌi ni ini na xaꞌa ya káꞌan vaꞌa inka naꞌa xaꞌa na, ta köo kíꞌin na kuenta xaꞌa ya ndixa íyo nima na.

2 Corintios 5:12 ပူးပေါင်းရင်းမြစ်များ

2 Corintios 1:14

ta ya ndixa kua xa ku̱ndaa loꞌo ini ndo xiꞌin ya xa ndi̱kaꞌan nde xiꞌin ndo. Saa tá ná ndiko koo Tata yo Jesucristo ta kusini ni ndo xiꞌin nde, saa tu ndeꞌe va kusini ni nde xiꞌin ndo.

2 Corintios 10:12

Chi ndeꞌe, ta nda loꞌo köo ndíꞌi ini nde xaꞌa naꞌa, na chínuu vaꞌa ni tuꞌun, tá kuꞌva íkan sava na, ndee ni káꞌan vaꞌa na xaꞌa mií na. Tá íkan na saa, káꞌan vaꞌa na xaꞌa mií na ta ya ikán káꞌan xaꞌa na ya ndixa kua ni köo kúndaa ini na xaꞌa ya káꞌan na.

2 Corintios 10:18

Saa chi naꞌa, na ndee ni ndáa yaꞌvi nuu Ndioxi ku naꞌa, na chínuu vaꞌa ni mií ra tuꞌun xaꞌa. Ta köo ndáa yaꞌvi ya káꞌan vaꞌa ni na xaꞌa mií na nuu ra.

2 Corintios 10:7

Ta ndóꞌo̱, ndisaa kuiti tá íin ñaꞌa ya xíto ndo íkan naꞌa, ta saa kua íyo ya íkan ndo xiꞌin na. Ta án ndá naꞌa ndíkani ini ya ndee ni vaꞌa ndíkun na Jesucristo túvi na, ta saa xíniñuꞌu na kundaa ini na, tá kuꞌva ndíkun na ra, kuꞌva saa ndíkun tu ndeꞌe va ra.

2 Corintios 10:8

Án sana ndíkani ini ndo xaꞌa i ya yáꞌa ni ndee káꞌan i xiꞌin ndo, xaꞌa ya kúu mií i chiñu, ya ta̱xi Tata yo Jesucristo ndaꞌa i xáꞌnda chiñu i nuu ndo, kaꞌán ndo. Sundi yeꞌe, ta köo kúkáꞌán nuu i xiꞌin ya, chi mií ra ku ra ta̱xi ndee ndaꞌa nde ya kuchiñu nde chindee taꞌan nde xiꞌin ndo, ta süvi ya síndiꞌi xaꞌa nde ndóꞌo̱ kua.

2 Corintios 12:11

Tá kuꞌva káꞌan iin ra kiꞌvi va saa káꞌan i, chi mií ndo ku ndo i̱kan saa xiꞌin i, ya káꞌan i saa xiꞌin ndo. Chi ndóꞌo̱ ku ndo xíniñuꞌu kaꞌan vaꞌa xaꞌa i, ndikuu. Sundi ndóꞌo̱, ta ni köo ndáa yaꞌvi vi i nuu ndo. Ta saa ni köo ni̱nu̱ kúni vi i nuu nda chínuu vaꞌa ni tuꞌun ñaa, ya ndee ni naꞌnu ka nda ñaa nuu yeꞌe, túvi ndo.

2 Corintios 3:1

Tá káꞌan nde saa xiꞌin ndo ta ¿án chínuu vaꞌa ni nde tuꞌun nde, túvi ndo? ¡Köo saa íyo ya! Ta ¿án xíniñuꞌu nde kundiso nde tutu sinaꞌa nde nuu ndo ya ndíkuiin ya xaꞌa nde, túvi ndo? ¿Án nduku nde tutu nuu taa ndo ya ndikuiin ya xaꞌa nde nuu kuꞌun nde, tá kuꞌva íkan sava na, túvi ndo?

2 Corintios 6:4

Nda vaꞌa ka va íkan nde, chi ndiꞌi ya íkan nde nuu na ta káꞌan ya xaꞌa nde ya xáa chiñu nde nuu Ndioxi. Xáꞌa ndee ini nde xiꞌin ndiꞌi tindoꞌo ya vaxi nuu nde, saa tu tindiꞌi ini ya vaxi nuu nde, xiꞌin ya kúmani ñaꞌa xíniñuꞌu nde, saa kúndee ini nde xiꞌin ndiꞌi ya suchi ini vaxi nuu nde.

Filipenses 1:26

Tá ná xaa tuku i koto i ndóꞌo̱, ta kusini ni ndo, chi kuni soꞌo ndo ya vaꞌa i̱kan Tata yo Jesucristo xiꞌin i, ta saa xaa kaꞌnu ni ndo ra.