2 Corintios 2:10 - Xochapa Mixteco

¹⁰ Vaꞌa ná kundaa ini ndo, chi tá xáa kaꞌnu ini ndo xaꞌa kuachi i̱kan ra ñaa, ta saa tu yeꞌe va, xáa kaꞌnu ini i xaꞌa ra, xaꞌa ya i̱kan ra saa xiꞌin ndóꞌo̱ na veꞌe ñuꞌu. Ta nuu Cristo kua íkan i saa, xáa kaꞌnu ini i xaꞌa ra, xaꞌa ya kúꞌvi ni ini i xíni i ndóꞌo̱.

2 Corintios 2:10 ပူးပေါင်းရင်းမြစ်များ

San Mateo 18:18

’Chi Ndioxi ta̱xi ra ichí ndaꞌa ndo tá kúu ndiꞌi ñaꞌa ya kátun ndo ñuu ivi yóꞌó, ta ndíkunuꞌni ya nuu ndivi, tá kúu ndiꞌi ñaꞌa ya ndáxin ndo ñuu ivi yóꞌó, ta saa ndáxin tu ya nuu ndivi va.

San Juan 20:23

Tá tu xáa kaꞌnu ini ndo xaꞌa kuachi naꞌa, ta saa tu Ndioxi xaa kaꞌnu ini ra xaꞌa kuachi na. Tá tu köo xáa kaꞌnu ini ndo xaꞌa kuachi na, ta ni Ndioxi xäa kaꞌnu ini ra xaꞌa kuachi na ―ka̱chi ra xiꞌin nda.

1 Corintios 5:4

Vaꞌa ndikitaꞌan ndiꞌi ndo tixin kivi Tata yo Jesucristo, ta saa tu yeꞌe va, nda tá káa ra íyo xiꞌin ndo saa káa i. Saa íyo tu ndee Jesucristo va xiꞌin ndo nuu ndíkitaꞌan ndo.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

2 Corintios 5:20

Ta ndeꞌe, tá káa ra xikuaꞌa xíka nuu, saa íin nde, chi ka̱na Ndioxi ndeꞌe ya xíka nuu nde nuu ra ndítuꞌun nde xiꞌin naꞌa. Ta yuꞌu mií Jesucristo kua káꞌan nde xiꞌin ndo, tá káꞌan nde xiꞌin ndo saa, ta tá íin ndeꞌe xáku ndaꞌvi nuu ndo saa íin nde, chi kána Ndioxi ndóꞌo̱ tixin ndeꞌe ya ná ndikitaꞌan mani ndo xiꞌin ra.

2 Corintios 6:6

Xaꞌa ya vaꞌa ni íyo nde nuu naꞌa kua sínaꞌa nde mií nde nuu na ya kúu nde taa, nda xáa chiñu nuu Ndioxi, chi íyo ni ya xínituni nde xaꞌa ya xíni nde ya ndaa, ta xáꞌa ndee ni ini nde nuu ndiꞌi ya, ni köo ndíko koo ini nde, vaꞌa ni ini nde xiꞌin naꞌa. Íkan nde saa xaꞌa ya íyo Tachi I̱í Ndioxi xiꞌin nde, ta ndinuꞌu ni ini nde kúꞌvi ini nde xíni nde na,

Efesios 4:32

Ta vitin xíniñuꞌu ndo koo ndo naꞌa, na vaꞌa ini. Kundaꞌvi ini ndo kuni taꞌan ndo. Xaa kaꞌnu ini ndo xaꞌa taꞌan ndo, tá kuꞌva xa̱a kaꞌnu ini Ndioxi xaꞌa ndo tixin Tata yo Jesucristo.