2 Corintios 13:9 - Xochapa Mixteco

⁹ Yakan kúsini ni va nde tá vita ni ini nde, chi ndeꞌe, ta kúni nde ya ná nduu ndee ni ndóꞌo̱. Saa káꞌan ni nde xaꞌa ndo xiꞌin Ndioxi ya ná nduu xa̱á ka ndo, saa xinu ndo nduu ndo naꞌa, na vaꞌa ni.

2 Corintios 13:9 ပူးပေါင်းရင်းမြစ်များ

ROMANOS 15:2

Saa xíniñuꞌu iin iin yo ikan yo xiꞌin na taꞌan yo, ná ndikani ini yo unkua vaꞌa ikan yo xiꞌin na ya koo vaꞌa ini na. Tá íkan yo saa xiꞌin na, ta chíndee taꞌan yo xiꞌin na xáꞌnu ka na xiꞌin tuꞌun Ndioxi, ta ndúndee ka ya ini na, ndáa ni ini na xíni na Jesucristo.

1 Corintios 1:10

Saa káꞌan i xiꞌin ndóꞌo̱ ñani yo tin kuꞌva yo, xíkan ni i ya mani nuu ndo, tixin ndee Tata yo Jesucristo káꞌan i xiꞌin ndo, ya ná ndikitaꞌan vaꞌa ni ndo koo ndo xiꞌin taꞌan ndo, ta iin yuꞌu ná koo ndo, täꞌvi taꞌan ndo, vívií koo ndo xiꞌin taꞌan ndo, iin káchi ndikani xi̱ní ndiꞌi ndo.

1 Corintios 2:3

Yachi tá ndi̱xaꞌan i nuu ndo ta vita ni kúni i, íꞌvi ni i ndakua kísi ya yeꞌe.

1 Corintios 4:10

Xaꞌa ya ndíkun nde Jesucristo, ta ni köo ndáa yaꞌvi nde nuu naꞌa, tá íin nde kíꞌvi va, saa íin nde nuu na. Ta ndóꞌo̱, ta xaꞌa ya ndíkun ndo Jesucristo ta tá íin naꞌa, na ndíchi ni va saa ndu̱u ndo. Ta ndeꞌe, ta vita ni va kúni nde ta mií ka va ndo ku ndo ndu̱ndee ni ka nuu nde, túvi ndo. Vaꞌa ni va káꞌan naꞌa xaꞌa ndo, xáa toꞌo ni na ndóꞌo̱, ta ndeꞌe, ta kúndasi nuu va na xíni na ndeꞌe.

2 Corintios 11:30

Tá tu xíniñuꞌu i kutai ni ini i, ta vaꞌa kutai ni va ini i xaꞌa ñaꞌa ya xíni i vita ni ini i nuu.

2 Corintios 13:11

Ñani yo, ya yóꞌó ku ndiꞌi ya káꞌan nde xiꞌin ndo ta vaꞌa ná kusini ni ndo, saa chikaa ni ndo ndee ya kuaꞌnu ka ndo xiꞌin tuꞌun Ndioxi, ta ná ndu xaa ka ndo, ná nduu ndo tá kuꞌva kúni Ndioxi, ta iin yuꞌu koo ndo xiꞌin taꞌan ndo. Ta saa kua vaꞌa koo Ndioxi xiꞌin ndo, ra táxi ya vaꞌa koo ini ndo, xiꞌin ya kúꞌvi ni ini ra xíni ra ndóꞌo̱.

2 Corintios 13:4

Ya ndixa kua vita ni ndi̱xiyo ini ra tá xi̱nuu ra nuu cruzin ndi̱xiꞌi ra, sundi vitin ta táku ra xiꞌin ndee Ndioxi. Ta saa ndeꞌe, tá kuꞌva vita ndi̱xiyo ini Jesucristo, saa vita íyo ini nde. Ta kutaku nde xiꞌin ra xaꞌa ndee Ndioxi, tá kuꞌva táku mií Jesucristo ya kuchiñu nde chindee nde ndóꞌo̱.

2 Corintios 4:12

Kuꞌva soꞌva kua ndóꞌo̱ ndeꞌe xaꞌa chiñu ya ta̱xi Ndioxi ndaꞌa nde, nda ìyo kuvi nde, ta xaꞌa ya yóꞌó kua vaꞌa táku ndóꞌo̱ nuu Ndioxi vitin.

2 Corintios 7:1

Ta saa ñani mani yo, xa ndi̱kaꞌan Ndioxi xiꞌin yo ya ki̱ndoo ra xiꞌin yo, yakan ná kundaa ni yo mií yo, ná kuxika yo nuu ndá ka ñaꞌa väꞌa, ya xáa yakua ikin kuñu yo xiꞌin ya vaꞌa yo. Ná nditaxi ndiꞌi yo mií yo ndaꞌa Ndioxi, ya xaa toꞌo yo ra, saa kua nduu yo na i̱í nuu ra.

Colosenses 1:28

Ta ndeꞌe káꞌan ndoso nde xaꞌa ra xiꞌin ndiꞌi naꞌa, ndíkani nde nuu na, saa sínaꞌa nde na xaꞌa ndiꞌi tuꞌun ra ya ndíchi táxi Ndioxi ndaꞌa nde. Chi kúni i sinaꞌa i na yóꞌó nuu Ndioxi ya nduu na naꞌa, na ndǎku ni ini nuu ra, ta xa ku̱ndaa vaꞌa ini na xiꞌin tuꞌun ra.

Colosenses 4:12

Saa tu ra Epafras, ra ñuu mií ndo, tíꞌvi ni ra tuꞌun mani xaa nuu ndo. Ta ndiꞌi saa ichí ndee ni káꞌan ra xaꞌa ndo xiꞌin Ndioxi ya ndee ni ná koo vaꞌa ndo, ta ná kuaꞌnu ni ka ndo xiꞌin tuꞌun Ndioxi ya kundaa vaꞌa ini ndo xiꞌin ya, saa xaa súvi ndo ya kúni mií Ndioxi.

1 Tesalonicenses 3:10

Nduvi niuun káꞌan ni nde xaꞌa ndo xiꞌin ra ya ná chindee ra ndeꞌe xaa tuku nde koto nde ndóꞌo, ta saa chindee ka nde ndóꞌo̱ xaꞌa ndá ka ñaꞌa ya xíniñuꞌu kundaa ini ndo xaꞌa, ya kandixa ka ndo Tata yo Jesucristo.

2 Timoteo 3:17

Ta saa kua kuchiñu nduu yo naꞌa, na xa íyo ndúvi, na xa si̱kuaꞌa xaa súvi chiñu vaꞌa nuu Ndioxi.

HEBREOS 12:23

Ta ñuu ikán ku nuu ndi̱kitaꞌan ndo xiꞌin na núnu̱ú na kúu seꞌe Ndioxi, ta na ikán ta xa íyo kivi na nuu tutu ra, na íin tá íin tachi, na ndi̱xiyo ivi na vaꞌa ni, na ndu̱u tá íin naꞌa, na köo ka kuachi kúu mií nuu Ndioxi, na xa nda̱sa i̱í ra. Na ikán ku na xa ndi̱xaa nuu ra xaꞌa ya kúu ra, ra xáa nani kuachi xiꞌin na.

HEBREOS 13:21

Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

HEBREOS 6:1

Ná kuaꞌnu ka yo xiꞌin tuꞌun Ndioxi nda ná xinu koo yo kuu yo tá íyo na xa xa̱ꞌnu. Ta ná ndïko koo tuku yo ikan yo taꞌan ñaꞌa ya xa si̱naꞌa na yoo tá xaꞌa. Chi tá xaꞌa ta si̱naꞌa na yo ya kundàà ni ini yo kuni yo Ndioxi, ta saa si̱naꞌa na yo ya sindoo yo ñaꞌa ya väꞌa, ya köo ndáa yaꞌvi i̱kan yo tá yachi.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.