2 Corintios 13:5 - Xochapa Mixteco

⁵ Yakan vaꞌa koto ndoso ndo mií ndo ndá kuꞌva íyo ndo, ta saa kua vaꞌa kundaa ini ndo án ndinuꞌu ini ndo kándixa ndo Jesucristo. Tá vaꞌa ka̱na ndo ya xi̱to ndoso ndo mií ndo, ta saa kua kúndaa ini ndo ya ndixa kua kándixa ndo ra, ta íyo ra xiꞌin ndo. Tá tu köo vaꞌa ndíkana ndo, ta kúni kachi ya köo kándixa ndo ra, ta köo íyo ra xiꞌin ndo.

2 Corintios 13:5 ပူးပေါင်းရင်းမြစ်များ

San Juan 14:23

Saa ndi̱kuiin Jesús, káꞌan ra: ―Na kúꞌvi ini xíni yeꞌe, ta xáa súvi na ya káꞌan i xiꞌin na ta kuꞌvi ini Iva i kuni ra na, ta saa kixi Iva i tin yeꞌe, kixi nde koo nde xiꞌin na.

San Juan 15:4

Ta xíniñuꞌu ndo kutaꞌan tuun ndo xiꞌin i, ta saa tu yeꞌe va kutaꞌan tuun i xiꞌin ndo. Tá kúu yoꞌó teꞌe itun uva küvi kana kuiꞌi nuu ya tá tu köo ítaꞌan yoꞌo teꞌe xiꞌin nu, ta saa kundoꞌo tu ndóꞌo̱ va, tá tu köo ítaꞌan tuun ndo xiꞌin i.

San Juan 17:23

Yeꞌe ku ra íyo xiꞌin na yóꞌó, ta yóꞌo̱ ku un íyo xiꞌin yeꞌe, yakan vaꞌa ni nduu na iin yuꞌu xiꞌin taꞌan na, ta saa kua kundaa ini na ñuu ivi yóꞌó, ya ti̱ꞌvi un yeꞌe vaxi i. Ta kuni na ya kúꞌvi ni ini un xíni un na ndíkun yeꞌe, tá kuꞌva kúꞌvi ini un xíni un yeꞌe, saa kúꞌvi ini un xíni un na.

San Juan 17:26

Ta xa si̱naꞌa i na yóꞌó xaꞌa ndee kúu mií kivi un saa sinaꞌa ka i na. Íkan i saa ya ná koo ni ya kúꞌvi ini un xiꞌin na, tá kuꞌva kúꞌvi ni ini un xíni un yeꞌe, saa íkan tu yeꞌe va xiꞌin na, koo i xiꞌin na ―káchi Jesús ndi̱kaꞌan ra xiꞌin Ndioxi.

San Juan 6:56

Ndiꞌi na xíxi kuñu i ta xíꞌi na níi i, na ikán ku na ítaꞌan vaꞌa ni xiꞌin i, saa tu yeꞌe va íyo i xiꞌin na.

San Juan 6:6

Ndi̱kaꞌan ra saa takua xíto ndoso ñaꞌa ra, chi xa xíni vaꞌa va ra unkua ikan ra.

ROMANOS 1:28

Xaꞌa ya ndi̱ndoso ini na xaꞌa Ndioxi, ta ni köo ndi̱xiin na kundaa ini na xaꞌa ra, yakan sa̱ña ndaꞌa ra na, xa̱á na íkan na ya väꞌa, ya ndíkani xiní mií na.

ROMANOS 8:10

Sundi tá íyo Cristo xiꞌin ndo, ta taxi Tachi I̱í Ndioxi kutaku ndo, chi ndúu ndo naꞌa, na köo ka kuachi kúu mií nuu ra. Saa íkan ra xiꞌin ndo, va ni ya xa ndi̱xiꞌi ku ikin kuñu ndo xaꞌa kuachi.

1 Corintios 11:28

Yakan kuenta ni koo ndo xiꞌin mií ndo, xiꞌna koto ndoso ndo mií ndo, án vaꞌa íyo ndo nuu Tata yo, ta saa kuxi ndo tin koꞌo ndo vino.

1 Corintios 11:31

Saa chi tá tu xiꞌna ná koto ndoso vaꞌa yo mií yo án vaꞌa íkan yo nuu Tata yo, ta köo xíniñuꞌu ra sitixuꞌvi ra yoo.

1 Corintios 3:16

Ta saa ndóꞌo̱, ¿án köo kúndaa ini ndo ya íin ndo tá káa veꞌe ñuꞌu Ndioxi, ta íyo tu Tachi I̱í ra xiꞌin va ndo?

1 Corintios 6:15

¿Án köo kúndaa ini ndo, iin iin ñaꞌñu ikin kuñu yo ta kúu ya ikin kuñu Tata yo Jesucristo? Ta ¿án vaꞌa sikitaꞌan yo ikin kuñu Tata yo Jesucristo xiꞌin ikin kuñu iin ñaꞌa yá xíko mií nuu ndiꞌi taa? ¡Küvi ikan yo saa!

1 Corintios 6:19

¿Án köo xíni ndo ya kúu ikin kuñu ndo veꞌe ñuꞌu Tachi I̱í Ndioxi, ya ta̱xi ra ndaꞌa ndo íyo ya xiꞌin ndo? ta mií ra ku ra xáꞌnda chiñu nuu ndo.

1 Corintios 6:2

¿Án köo xíni ndo, na ñuu Ndioxi ku na xaa nani kuachi xiꞌin ndiꞌi ni kúu na ñuu ivi yoꞌó? Tá tu kúu mií ndo ichí ya xaa nani ndo kuachi ndiꞌi na ñuu ivi, ta ¿ndachu köo kúchiñu ndo xaa nani ndo kuachi vali xiꞌin taꞌan mií ndo?

1 Corintios 9:24

Ta xa kúndaa vaꞌa ini ndo, naꞌa na xínu nuu kéꞌe taꞌan na, ta kuaꞌa ni va ku na xínu, ta süvi ndiꞌi na níꞌi ñaꞌa, iindaa va ku na kúchiñu níꞌi ya. Ta saa ndóꞌo̱, ndinuꞌu ni ini ndo xaa súvi ndo ya kúni Ndioxi, tá kuꞌva íkan na kéꞌe taꞌan saa ikan ndo ndakua ná ndikiꞌin ndo ñaꞌa ya niꞌi ndo nuu Ndioxi.

1 Corintios 9:27

Sundi yeꞌe, ta síndoꞌo ni va i ikin kuñu i, saa xáa nduxa i xiꞌin ya ná kandixa ya yeꞌe. Saa xáꞌa ni i ndee xiꞌin mií i ya xaa súvi ni i ya kúni ra, koto ka ndïkiꞌin i ya vaꞌa taxi Ndioxi ndaꞌa i nuu ndivi, vani ra ndi̱kaꞌan ndoso tuꞌun ra ndi̱xiyo i.

2 Corintios 6:16

Köo íyo yuꞌu naꞌa, na kúu veꞌe ñuꞌu Ndioxi xiꞌin naꞌna ndioxi ya ndíi. Ta saa yoo, chi yo veꞌe ñuꞌu Ndioxi ra táku ku yo. Tá kuꞌva ndi̱kaꞌan mií ra, káchi ra saa: Yeꞌe, ta koo i xiꞌin na, saa kaka i xiꞌin na, Ndioxi na kúu i, saa kúu na, na ñuu mií i, káchi Ndioxi.

Gálatas 2:20

Ta yeꞌe, nda tá káa ra ínuu nuu cruzin xiꞌin Tata yo Jesucristo saa káa i, ta köo táku ka i xaꞌa mií i, chi ndisaa xaꞌa mií ra kua táku i. Kivi táku i ini ikin kuñu i ya kúu mií i, ta ndisaa xaꞌa ya ndáa ni ini i xíni i Tata yo Jesucristo ra kúu Seꞌe Ndioxi kua táku i, chi mií ra ku ra kúꞌvi ni ini xíni yeꞌe, saa ta̱xi ra mií ra ndi̱xiꞌi ra xaꞌa i.

Gálatas 4:19

Ñani mani, nda tá íin seꞌe i saa íyo ndo nuu i, ta tuku va tíxuꞌvi ni i xaꞌa ndo. Nda tá kuꞌva ndóꞌo̱ iin ñaꞌa yá ndee ni xáꞌnda seꞌe, saa ndóꞌo̱ i xiꞌin ndo, nda ná xinu ndo koo ndo tá kuꞌva íyo mií Cristo.

Gálatas 6:4

Ta koto ndoso ndo mií ndo xaꞌa ñaꞌa íkan ndo, saa kusini ni ndo xiꞌin ya íkan ndo. Tá tu vaꞌa ni ka íkan ndo ndá ka chiñu túvi ndo, ta käꞌan ndo xaꞌa ya íkan inka naꞌa.

Efesios 3:17

Saa xíkan ni tu i ya vaꞌa nuu Iva yo Ndioxi ya ná kandixa ni ka ndo Cristo, saa ná kuꞌvi ni ini ndo kuni ñaꞌa ndo, ta nda tá káa iin tioꞌo itun kúnu ni ndíkaa, án veꞌe ya tuun ni ndi̱kuaꞌa xaꞌa, kuꞌva saa ná kuaꞌnu ni ka tuꞌun ra nima ndo.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

Colosenses 2:19

Chi na ñaa, ta köo táxi na kaꞌnda chiñu Cristo nuu na, ra kúu xi̱ní xáꞌnda chiñu nuu ndiꞌi na veꞌe ñuꞌu, chi mií ra kú ra táxi táku ndiꞌi na, ta ikin kuñu ra ku ndiꞌi yo kándixa ñaꞌa. Tá kuꞌva íyo tuchi ya chítaꞌan ikin kuñu yo, kuꞌva saa íyo Jesucristo xiꞌin yo chíndee ra yoo ya ná kuchiñu yo ndikitaꞌan vaꞌa yo xiꞌin taꞌan yo, ta saa kuchiñu yo kuaꞌnu yo tá kuꞌva kúni mií Ndioxi.

Colosenses 2:7

Tá kuꞌva kúnu ni ñúꞌu tioꞌo itun án tá kuꞌva kúnu ni kuáꞌa xaꞌa veꞌe, kuꞌva saa ndee ni tuun kandixa ndo ra, xaꞌa ni ndo ndee xiꞌin taꞌan ndo, koo ndo tá kuꞌva xa ku̱ndaa ini ndo xaꞌa ya ndaa si̱naꞌa nde ndóꞌo̱, ta saa taxi ni ndo tixaꞌvi ndaꞌa ra.

1 Timoteo 2:15

Xaꞌa ya ikán kua sikaku Ndioxi ná síꞌi tá íyo ná káku seꞌe ná, chi ndáa ni ini ná xíni ná ra, saa kúꞌvi ni ini ná xíni ná ra, ta ndúu i̱í ni ka va ná xaꞌa ya vaꞌa íkan ná nuu ra.

2 Timoteo 3:8

Ta nda vata ñaa, ta tá kuꞌva ndi̱xiyo ra Janes xiꞌin ra Jambres xinaꞌa, saa íkan nda, chi saa i̱kan nda ikán, ke̱ꞌe taꞌan nda xiꞌin ra Moisés. Ta kuꞌva saa íkan nda vata ñaa, süvi ya ndaa kua káꞌan nda nda ndu̱chiꞌña ya xínituni ku nda yakan ni köo ndáa ka ini nda xíni nda Tata yo Jesucristo.

Tito 1:13

Ta ya ndaa ni ndixa kua ndi̱kaꞌan ra xaꞌa na, yakan yóꞌo̱, ta ndee koo ini un xiꞌin na ndaꞌi un xiꞌin na ya ná ïkan na ya väꞌa, sinaꞌa un na, ya ná kutuun tuꞌun Ndioxi nima na ta ná kundaa ni ini na ra.

Tito 1:16

Káꞌan na xíni na Ndioxi sundi ndiꞌi ñaꞌa väꞌa íkan na ta ndínaꞌa na mií na ya köo xíni na ra, ta ndíkuaa va na ra, saa kúndasi nuu na xíni na naꞌa, ta köo xíin na xaa súvi na ya kúni Ndioxi, ta nda iin ñaꞌa vaꞌa küchiñu na ikan na.

Tito 2:2

Saa sinaꞌa un nda ñani yo, nda xikuaꞌa, ya ná koo kaxin ni ini nda, ná koo ni ya toꞌo nda, ndá ya íkan nda ta xiꞌna ná ndikani vaꞌa ini nda saa ikan nda ya. Saa sinaꞌa un nda ndee ni ná kundaa ini nda kuni nda Tata yo Jesucristo ya taxi ra ndee ndaꞌa nda, saa ná kuꞌvi ni ini nda kuni taꞌan nda, ta káꞌnu ni ná koo ini nda xiꞌin taꞌan nda.

HEBREOS 12:15

Kuenta ni koo ndo xiꞌin taꞌan ndo, kïꞌvi ndo kuachi ya táxi kuxika naꞌa nuu ya kúꞌvi ni ini Ndioxi xíni ra na. Täxi ndo kaku ya väꞌa nima ndo saa nduu ndo tá íyo iku uva, ya xatu ni síkuaꞌa kueꞌe xiꞌin naꞌa. Ta ìyo ni sindiꞌi xaꞌa ndo ya vaꞌa kuaꞌa ni naꞌa.

HEBREOS 4:1

Yakan yoo, ta ná kundiꞌi ni ini yo, kiꞌvi yo koo yo nuu ndikundee yo xiꞌin Ndioxi. Ta kuenta ni ná koo yo süvi ka vi ya ndoo sava yo chí sata, ta küchiñu yo kiꞌvi yo koo yo nuu ndikundee yo xiꞌin ra.

HEBREOS 6:8

Ta naꞌa, na ndíko koo ini xaꞌa ra, tá íin ñuꞌú iyá nuu kána nina itun iñu án iku väꞌa saa íin na. Ta ìyo ni tavi chiꞌña Ndioxi ñuꞌú ikán saa sindiꞌi xaꞌa yaa ra ya, kaꞌmi ndiꞌi ra ya. Tá ndóꞌo ñuꞌú ikán, saa kundoꞌo ndiꞌi naꞌa, na köo xíin ka kandixa ra.

Santiago 4:4

¡Ndóꞌo̱, ta süvi ndóꞌo̱ kúꞌvi ini xíni Ndioxi ku ndo! ¿Án köo xíni ndo ndiꞌi naꞌa, na kútoo ni ikan taꞌan ñaꞌa íkan na ñuu ivi yóꞌó, na ñaa ta na káni taꞌan xiꞌin Ndioxi ku na? Saa chi ndiꞌi naꞌa, na kútoo ni ikan ya väꞌa íkan na ñuu ivi yóꞌó, ta ndúu na naꞌa, na sâa ini xíni Ndioxi.

1 Pedro 5:9

Ndaku ni koo ini ndo, tuun ni kundaa ini ndo Tata yo Jesucristo, täxi ndo keꞌe ri nǎꞌa ndóꞌo̱. Chi tá kuꞌva ndóꞌo ndóꞌo̱, saa ndóꞌo ndiꞌi ni kúu na taꞌan yo, na kándixa Tata yo Jesucristo na ndóo ndiꞌi saa kúu xaꞌa ñuu ivi.

El Apocalipsis 2:5

Yakan xíniñuꞌu ndo ndikaꞌán ini ndo ndá kuꞌva ndi̱xiyo ndo tá yachi, tá sikan xa̱á ndo kándixa ndo yeꞌe. Ta nduku ndo kuꞌva ya kuchiñu ndo kuꞌvi tuku ini ndo kuni ndo yeꞌe, tá kuꞌva ku̱ꞌvi ni ini ndo xi̱ni ndo yeꞌe tá núnu̱ú. Chi tá tu ná ïkan ndo saa, ta xaa i nditaꞌan i ndóꞌo̱, saa sikutaꞌa i kàà ndo nuu ndíchi ya xíxi ñu̱ꞌu̱ ini ya.