2 Corintios 13:11 - Xochapa Mixteco

¹¹ Ñani yo, ya yóꞌó ku ndiꞌi ya káꞌan nde xiꞌin ndo ta vaꞌa ná kusini ni ndo, saa chikaa ni ndo ndee ya kuaꞌnu ka ndo xiꞌin tuꞌun Ndioxi, ta ná ndu xaa ka ndo, ná nduu ndo tá kuꞌva kúni Ndioxi, ta iin yuꞌu koo ndo xiꞌin taꞌan ndo. Ta saa kua vaꞌa koo Ndioxi xiꞌin ndo, ra táxi ya vaꞌa koo ini ndo, xiꞌin ya kúꞌvi ni ini ra xíni ra ndóꞌo̱.

2 Corintios 13:11 ပူးပေါင်းရင်းမြစ်များ

San Mateo 1:23

“Kee seꞌe iin yá kuâán loꞌo, taa loꞌo koo seꞌe yá kaku. Ta ra loꞌo seꞌe yá ta kunani ra Emanuel”. Chi kivi ra yóꞌó ta kúni kachi ya: “Ndioxi íyo xiꞌin yo” ―káchi ra ndi̱kaꞌan ndoso tuꞌun Ndioxi xinaꞌa.

San Mateo 5:48

Xaꞌa ya ñaa kua ná koo ndo naꞌa, na ndaa ini, tá kuꞌva íyo Iva yo Ndioxi ra i̱í, ra ndaa ini ―káchi Jesús xiꞌin na.

San Marcos 10:49

Saa ndi̱kundichi Jesús, ta ndi̱kaꞌan ra xiꞌin na ya ná kuꞌun na kana na ra. Ñaa ndi̱xaꞌan na ka̱na ñaꞌa na, káchi na saa: ―Ndikiꞌin ini un, kundichi koꞌo yo, chi kána Jesús yóꞌo̱ ―káchi na xiꞌin ra.

San Marcos 9:50

Ya vaꞌa ku i̱ín, chi ndása yasin ya ñaꞌa xíxi yo. Sundi tá ndíꞌi ya uꞌva ya, ta küchiñu ka nduu uꞌva tuku ya, yakan ndóꞌo̱ ta xíniñuꞌu ndo kuu ndo ivi na vaꞌa, taꞌan i̱ín ya vaꞌa. Ta xíniñuꞌu ikan ndo ya vaꞌa xiꞌin naꞌa, ta vívií koo ndo xiꞌin ndiꞌi na taꞌan ndo ―káchi Jesús.

San Lucas 9:61

Saa ndi̱kaꞌan tuku inka ra, káchi ra saa: ―Tata, kúni i kundikun i yóꞌo̱, sundi kundatun naꞌa loꞌo un ná kuꞌun i ndai na veꞌe i saa kixi i kuꞌun i xiꞌin un ―káchi ra.

San Juan 17:23

Yeꞌe ku ra íyo xiꞌin na yóꞌó, ta yóꞌo̱ ku un íyo xiꞌin yeꞌe, yakan vaꞌa ni nduu na iin yuꞌu xiꞌin taꞌan na, ta saa kua kundaa ini na ñuu ivi yóꞌó, ya ti̱ꞌvi un yeꞌe vaxi i. Ta kuni na ya kúꞌvi ni ini un xíni un na ndíkun yeꞌe, tá kuꞌva kúꞌvi ini un xíni un yeꞌe, saa kúꞌvi ini un xíni un na.

Los Hechos 15:29

küxi ndo ñaꞌa ya táxi na ndaꞌa naꞌna ya káꞌan na kúu ndioxi. Ni ni̱í kiti küxi ndo. Ni ri ndíxita na sukun küxi ndo. Ta ni kïꞌvi ndo xiꞌin ñaꞌa tá tu süvi yá síꞌi ndo ku yá, ta saa tu ná síꞌi va tá tu süvi ií na ku taa. Tá xáa súvi ndiꞌi ndo ya yóꞌó ta vaꞌa ni íkan ndo. Ta ya yóꞌó ku ndiꞌi ya káꞌan nde xiꞌin ndo, ná koo vaꞌa ni ini ndo”, káchi nda apóstol xiꞌin tutu ikán.

Los Hechos 18:21

Saa nda̱i ra na, káchi ra saa: ―Xíniñuꞌu kuꞌun i ñuu Jerusalén viko ya vaxi, sundi ná kuꞌun i tá Ndioxi ndi̱kaꞌan, ta ndiko koo tuku i koto i ndóꞌo̱ ―káchi ra xiꞌin na. Saa keta ra ñuu Éfeso kuaꞌan ra xiꞌin barco.

Los Hechos 23:30

Ta vitin ku̱ndaa ini i, chítaꞌan tuꞌun na kaꞌni na ra, yakan tíꞌvi i ra xaa ra ndaꞌa un, ta ndi̱kaꞌan i xiꞌin na táxi kuachi xaꞌa ra ná xaa na nuu un xaa nani un kuachi xiꞌin na. Ya yóꞌó ku ndiꞌi ya káꞌan i xiꞌin un, Tata. Ndikitaꞌan ka yo”, káchi ra xiꞌin tutu kuaꞌan ndaꞌa ra gobernador ikán.

ROMANOS 12:16

Ta vívií koo ndo xiꞌin taꞌan ndo, käni taꞌan ndo. Kütai ni ini ndo nuu naꞌa, vívií koo ndo xiꞌin na, ta saa ikan ndo xiꞌin ndiꞌi na, ni na ndáꞌvi ku na, ta koto vií ndo na. Ta ndäsa xíni ni ka ndo mií ndo nuu inka naꞌa.

ROMANOS 12:18

Xaꞌa ni ndo ndee, nduku ndo kuꞌva ya koo vaꞌa ndo xiꞌin ndiꞌi naꞌa.

ROMANOS 14:19

Xaꞌa ya ñaa kua ná xaꞌa ni yo ndee ya koo vií yo xiꞌin taꞌan yo, na kándixa Jesucristo. Kuꞌva saa ná ikan yo ya chindee taꞌan yo xiꞌin na taꞌan yo ya ná kuaꞌnu ka na xaꞌa ya ndíkun na Jesucristo.

ROMANOS 15:13

Ta vitin káꞌan i xiꞌin mií Ndioxi ra chíkaa ndee ini ndo ya kundatun ndo ya vaꞌa ikan ra xiꞌin ndo. Ná taxi ni ra ya kúsini ni ndo, saa ná koo vaꞌa ni ini ndo. Ta saa ná ndundee ni ka ya kándixa ndo ya ndátun ndo niꞌi ndo tixin ndee Tachi I̱í ra.

ROMANOS 15:33

Ta Iva yo Ndioxi ra táxi ya koo vaꞌa ni ini yo, ná koo ra xiꞌin ndo ndiꞌi saa kivi. Saa ná koo.

ROMANOS 16:20

Ta Iva yo Ndioxi, ra táxi íyo ya vaꞌa ini yo, kama ni sindiꞌi xaꞌa ra kiti nǎꞌa náni Satanás, kuaxin xaꞌa ra ri, saa chi̱nduꞌu ra ri tixin xaꞌa ndo. Ta ná chikaa ni Tata yo Jesucristo ya vaꞌa ndóꞌo̱.

1 Corintios 1:10

Saa káꞌan i xiꞌin ndóꞌo̱ ñani yo tin kuꞌva yo, xíkan ni i ya mani nuu ndo, tixin ndee Tata yo Jesucristo káꞌan i xiꞌin ndo, ya ná ndikitaꞌan vaꞌa ni ndo koo ndo xiꞌin taꞌan ndo, ta iin yuꞌu ná koo ndo, täꞌvi taꞌan ndo, vívií koo ndo xiꞌin taꞌan ndo, iin káchi ndikani xi̱ní ndiꞌi ndo.

2 Corintios 1:4

Chi mií ra ku ra síndiko ini yo xiꞌin ndiꞌi ni kúu tindoꞌo ya ndóꞌó yo, ta saa kuchiñu yo chindee taꞌan yo xiꞌin inka naꞌa, sindiko yo ini na, tá kuꞌva síndiko mií ra ini yo.

2 Corintios 13:14

Ta saa ná niꞌi ni ndo ya vaꞌa nuu Tata yo Jesucristo xiꞌin ya kúꞌvi ni ini Iva yo Ndioxi xíni ra ndóꞌo̱. Saa ná koo Tachi I̱í Ndioxi xiꞌin ndiꞌi ndo ndiꞌi saa ichí. Saa ná koo.

2 Corintios 13:9

Yakan kúsini ni va nde tá vita ni ini nde, chi ndeꞌe, ta kúni nde ya ná nduu ndee ni ndóꞌo̱. Saa káꞌan ni nde xaꞌa ndo xiꞌin Ndioxi ya ná nduu xa̱á ka ndo, saa xinu ndo nduu ndo naꞌa, na vaꞌa ni.

Efesios 4:12

Ta mií Cristo ku ra si̱niꞌi ndee vaꞌa yóꞌó nuu ndiꞌi yo kúu ñuu ra, yo i̱í, xa̱a ndúvi ra xiꞌin yo xaꞌa chiñu ra ya chindee taꞌan yo xiꞌin taꞌan yo, saa xaꞌa ni yo ndee xiꞌin na kúu ikin kuñu ra.

Efesios 4:3

Ta saa nduku ndo kuꞌva ya ndikitaꞌan vií ndo kundoo vaꞌa ni ndo xiꞌin taꞌan ndo tá kuꞌva si̱kitaꞌan vií mií Tachi I̱í Ndioxi ndóꞌo̱, chi xaꞌa ya ikán kua si̱kitaꞌan ya ndóꞌo̱ xiꞌin taꞌan ndo ya ná koo vaꞌa ni ndo.

Efesios 6:23

Ñani yo, mií Ndioxi ná taxi ni ya koo vaꞌa ini ndo, ta ná kundaa ni ini ndo kuni ndo ra xiꞌin ya kúꞌvi ni ini ra xíni ra ndóꞌo̱, ta saa ná koo Tata yo Jesucristo xiꞌin ndo ndiꞌi saa ichí.

Filipenses 1:27

Ta kuenta ni koo ndo xaa súvi ndo ndisaa ya káꞌan tuꞌun ra xiꞌin ndo. Án xaa i koto i ndóꞌo̱ án xäa i nuu ndo, sundi kúni i kuni soꞌo i tuꞌun vaꞌa xaꞌa ndo ya ndaku ni íyo ndo xiꞌin tuꞌun Tata yo, ta iin yuꞌu ni ku ndo, iin ítaꞌan ndiꞌi ndo xáa chiñu ndo xaꞌa ra.

Filipenses 3:16

Sundi ya xa ku̱ndaa ini yo xaꞌa yóꞌó kua xíniñuꞌu ni yo xaa súvi yo vitin taan, ta saa ná ikan yo xiꞌin taꞌan yo.

Filipenses 4:2

Ta vitin xíkan ni i ya mani nuu ná kuꞌva yo, yá Evodia xiꞌin yá Síntique, ya ná ndikitaꞌan vaꞌa ná, saa chi ná ndíkun Tata yo Jesucristo ku uvi saa ná.

Filipenses 4:4

Ndiꞌi saa kivi ná kusini ni ndo xaꞌa Tata yo Jesucristo. Saa káꞌan tuku i xiꞌin ndo: Kusini ni ndo.

Filipenses 4:9

Xaa súvi ndo ya xa si̱naꞌa i ndóꞌo̱, ya xa ta̱xi i ichí ndaꞌa ndo xaꞌa, ya xi̱ni soꞌo ndo ndi̱kaꞌan i xiꞌin ndo xiꞌin ya xi̱ni ndo i̱kan i. Ikan ndo ya yóꞌó ta koo Ndioxi xiꞌin ndo chi mií ra ku ra táxi ya koo vaꞌa ini ndo.

1 Tesalonicenses 3:10

Nduvi niuun káꞌan ni nde xaꞌa ndo xiꞌin ra ya ná chindee ra ndeꞌe xaa tuku nde koto nde ndóꞌo, ta saa chindee ka nde ndóꞌo̱ xaꞌa ndá ka ñaꞌa ya xíniñuꞌu kundaa ini ndo xaꞌa, ya kandixa ka ndo Tata yo Jesucristo.

1 Tesalonicenses 4:1

Ñani yo xiꞌin kuꞌva yo, xíkan ni nde ya mani nuu ndo, káꞌan ni nde xiꞌin ndo xaꞌa ya xa si̱naꞌa nde ndóꞌo̱ ndá kuꞌva koo ndo tá kuꞌva kúni mií Ndioxi. Saa xíkan ni nde ya mani nuu ndo tixin ichí mií Tata yo Jesucristo káꞌan nde xiꞌin ndo ya ná xaꞌa ni ka ndo ndee koo vaꞌa ni ndo.

1 Tesalonicenses 4:18

Xiꞌin tuꞌun ya káꞌan i xiꞌin ndo yóꞌó kua kaꞌan ndo xiꞌin na taꞌan ndo, xaꞌa ndo ndee xiꞌin na.

1 Tesalonicenses 5:13

Kuꞌvi ni ini ndo kuni ndo na ñaa ta saa xaa toꞌo ndo na xaꞌa chiñu íkan na nuu ndo. Ta vivií ni koo ndo xiꞌin taꞌan ndo.

1 Tesalonicenses 5:16

Ta ndiꞌi saa kivi koo vaꞌa ni ini ndo, kusini ni ndo.

1 Tesalonicenses 5:23

Ta mií Ndioxi, ra táxi koo vaꞌa ni ini yo ná xaa i̱í ni ra ndiꞌi ni kúu ya vaꞌa ndo xiꞌin ya xínituni ndo xiꞌin ikin kuñu ndo. Saa ná chivaꞌa ra ndóꞌo̱, nda iin kuachi ná küu mií ndo tá kivi ná ndiko koo tuku Tata yo Jesucristo kixi ra ñuu ivi yóꞌó.

2 Tesalonicenses 2:16

Ta mií Tata yo Jesucristo xiꞌin mií Iva yo Ndioxi ku ra kúꞌvi ni ini xíni yoo, saa si̱ndiko ra ini yo ndiꞌi saa kúu ichí, ta ndixaꞌa ni ra ndee xiꞌin yo ya ndee ni tuun kundikun yo ra, xaꞌa ya vaꞌa ni ini ra xiꞌin yo.

2 Tesalonicenses 3:1

Ya yóꞌó kua sindiꞌi káꞌan nde xiꞌin ndo, kaꞌan ndo xaꞌa nde xiꞌin Ndioxi ya ná kuchiñu kuita kama tuꞌun ra ndiꞌi ni kúu ñaꞌñu, ta ná ndikiꞌin vaꞌa ni na ya tá kuꞌva ndi̱kiꞌin vaꞌa ndóꞌo̱ ya.

2 Tesalonicenses 3:16

Ta mií Iva yo ra táxi koo vaꞌa ni ini yo, ná taxi ra koo vaꞌa ni ini ndo ndiꞌi saa ichí xaꞌa ndiꞌi ya íkan ndo. Ta saa ná koo ra xiꞌin ndiꞌi ndo.

2 Timoteo 2:22

Ta ïkan un taꞌan ya kútoo ni na kuâán vali ñuu ivi yóꞌó ikan na, ndi̱xita un mií un nuu ya. Xaꞌa ni un ndee ya xaa súvi un ya vaꞌa, ya ndaa, ta saa ná kundaa ni ini un kuni un Ndioxi, saa ná kuꞌvi ni ini un kuni un naꞌa, ta xaꞌa un ndee ya koo vaꞌa ini un xiꞌin na. Ta saa ikan un xiꞌin ndiꞌi na ñani yo, na kándixa ni Iva yo Ndioxi xiꞌin ndinuꞌu ini na.

HEBREOS 12:14

Ta nduku ndo kuꞌva ya koo vaꞌa ni ndo xiꞌin ndiꞌi naꞌa. I̱í ni koo ndo, saa chi tá tu köo i̱í ini ndo ta küchiñu ndo kuni ndo Ndioxi. Ta ni nda iin naꞌa, ta küchiñu na kuni na ra, tá tu kéꞌe na ya väꞌa.

HEBREOS 13:20

Ta mií Iva yo ku ra táxi koo vaꞌa ni ini yo, mií ra ku ra si̱taku Tata yo Jesucristo tañu na ndíi, ta mií ra ku ra ndáa ni ndóꞌo̱ tá kuꞌva íkan iin ra ndee ni vaꞌa ndáa levo sana ra, saa íkan ra xiꞌin ndo. Ta ki̱ndoo ra xiꞌin ndo ya ikan ra ya xa̱á xiꞌin ndo xaꞌa nií ra nduta ndi̱xita nuu cruzin. Ta nda iin ichí ndïsama ini ra xaꞌa ya ki̱ndoo ra xiꞌin ndo.

Santiago 1:4

Chi tá köo ndíko koo ini ndo nuu tindoꞌo ya vaxi nuu ndo saa kua kuchiñu ndo xinu ndo nduu ndo tá kuꞌva kúni mií Ndioxi, nduxuxa tuꞌun ra ini ndo ta nda iin ñaꞌa kümani nuu ndo.

1 Pedro 3:11

Ta vaꞌa ná kuxika na nuu ya väꞌa íkan na, ta saa xáa na ikan na ya vaꞌa. Ná nduku ka na kuꞌva ya koo vaꞌa na xiꞌin taꞌan na, ta ná koo vaꞌa ni ini na.

1 Pedro 3:8

Vitin káꞌan i xiꞌin ndo, vívií koo ndo xiꞌin taꞌan ndo, iin yuꞌu koo ndo. Vívií kutaꞌan ndo. Kuꞌvi ini ndo kuni taꞌan ndo, kundaꞌvi ini ndo kuni taꞌan ndo, xaa ni̱nu̱ ndo mií ndo.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.

El Apocalipsis 22:21

Ta Jesucristo ra chee nuu yo ná ikan ra ya vaꞌa xiꞌin ndo. Saa ná koo.