2 Corintios 11:23 - Xochapa Mixteco

²³ Tá tu kútai ni ini nda chi nda xáa chiñu ni nuu Cristo ku nda túvi nda, ta yeꞌe, ta ndee vaꞌa ka va xáa chiñu i nuu ra. Nda tá káa iin ra kíꞌvi va saa káa i ya káꞌan i saa. Chi yeꞌe ta ndee ni ka chíkaa i ndee nuu nda ñaa, kuaꞌa ni ichí ku̱nduvaꞌa na xiꞌin i, ta kuaꞌa ni ichí chi̱kaa na yeꞌe veꞌe kàà nuu nda ñaa, ta ndi̱xaꞌa ndee ndiꞌi ini i ndo̱ꞌo i saa, ta kuaꞌa ni ichí ku̱ni kaꞌni na yeꞌe.

2 Corintios 11:23 ပူးပေါင်းရင်းမြစ်များ

Los Hechos 14:19

Ta saa ndi̱xaa sava nda judío ndóo ñuu Antioquía xiꞌin nda ndóo ñuu Iconio, síxinu nda ini na ñuu Listra ikán ya ná kaꞌni na ra Pablo. Saa ndi̱xinu ini na, ñaa xa̱á káni na ra xiꞌin yu̱ú. Xa ndi̱xiꞌi va ra, káꞌán na, saa ndi̱kuñuu ndai na ra ndi̱xaꞌan na si̱kana na ra nda nuu ñuu.

Los Hechos 20:23

Sundi ndiꞌi saa ñuu nuu xa ndi̱xaꞌan i ta káꞌan Tachi I̱í Ndioxi xiꞌin i ndoꞌo ni i ta kuꞌun i veꞌe kàà, káchi ya xiꞌin i.

Los Hechos 21:11

Ndi̱xaa ra xíto ra ndeꞌe. Tá ndi̱xaa ra, ta ti̱in ra cinturón ra Pablo, ka̱va nuu ra sukun ndaꞌa ra tin sukun xaꞌa ra, saa xa̱á ra káꞌan ra: ―Soꞌva káchi Tachi I̱í Ndioxi xaꞌa ra xíin iín toko ya yóꞌó, tá kuꞌva i̱kan i xiꞌin cinturón ra, saa ikan na judío xiꞌin ra tá ná xaa ra ñuu Jerusalén. Katun na ndaꞌa ra tin xaꞌa ra, saa ndi̱taxi na ra ndaꞌa naꞌa na köo kúu judío, káchi Tachi I̱í Ndioxi ―káchi ra Agabo ikán xiꞌin nde.

Los Hechos 25:14

Saa ndi̱xiyo naꞌá na xiꞌin ra, ñaa ndi̱tuꞌun ra Festo xiꞌin ra rey Agripa xaꞌa ra Pablo, káchi ra saa: ―Íyo iin ra taa si̱ndikoo ra Félix veꞌe kàà.

Los Hechos 27:1

Saa ti̱ndaa kivi ya ndi̱kaꞌan ra gobernador Festo ya tiꞌvi ra ra Pablo kuꞌun ra ñuu Roma ya ndíkaa Italia. Ta̱xi ra ra Pablo kuaꞌan ra xiꞌin inka ka nda ñúꞌu veꞌe kàà, kuaꞌan nda xiꞌin ra Julio, ra ndíso chiñu xiꞌin iin ciento nda lapa, ta tiꞌvi nda ikán náni ya batallón Augusto.

Los Hechos 28:16

Tá ndi̱xaa nde ñuu Roma ta ta̱xi ra xáꞌnda chiñu nuu nda lapa ndiꞌi nda preso ndaꞌa ra kaꞌnu nuu ndiꞌi nda lapa ñuu Roma. Sundi ra Pablo ta ta̱xi na chiñu ñuu Roma ichí ndaꞌa ra koo ra inka ñaꞌñu nuu koo iin ra lapa kundaa ñaꞌa ra.

Los Hechos 28:30

Saa ndi̱xiyo ra Pablo uvi kuiya ñuu Roma, cha̱ꞌvi ra iin veꞌe nuu ndi̱xiyo ra. Ta ndiꞌi na xáꞌan veꞌe ra ndíkiꞌin vaꞌa ndiꞌi ra na.

Los Hechos 9:16

Saa chi yeꞌe ta sinaꞌa i ra ndá kuꞌva xíniñuꞌu ra ndoꞌo ni ra xaꞌa kivi i ―káchi Jesús xiꞌin ra Ananías.

ROMANOS 8:36

Nda tuꞌun Ndioxi ya ta̱a na xinaꞌa, káchi ya saa: Xaꞌa ya kándixa nde yóꞌo̱, Iva yo Ndioxi, ta kúni na kaꞌni na ndeꞌe ndiꞌi saa kivi. Íkan na saa xiꞌin nde tá kuꞌva íkan na xiꞌin iin kiti levo loꞌo, tá ku̱aꞌan ri nuu kuvi ri, káchi tuꞌun Ndioxi.

1 Corintios 15:10

Ta xaꞌa ya vaꞌa ni Ndioxi xiꞌin i kua kúu i apóstol tá kuꞌva íyo i vitin, saa ni xaꞌa ya vaꞌa ni ra xiꞌin i kua chíndee ra yeꞌe vaꞌa xáa súvi i chiñu nuu ra. Ta yeꞌe, ndee ni ka xáa chiñu i nuu tá kúu ndiꞌi nda taꞌan i, nda xáa chiñu nuu ra. Ta süvi xiꞌin ndee mií i kua xáa chiñu i, chi mií Ndioxi va ku ra chíndee taꞌan xiꞌin i xáa súvi i ya xaꞌa ya kúndaꞌvi ni ini ra xíni ra yeꞌe.

1 Corintios 3:5

Ndikani vaꞌa ini ndo, ¿án chee ni yeꞌe, Pablo, túvi ndo? ¿Án ra Apolos ku ra chee ni túvi ndo? Süvi saa íyo ya. Moso va ku nde xáa chiñu nde nuu Ndioxi, ta chíndee nde ndóꞌo̱ ya ná kandixa ni ndo Ndioxi va. Íkan iin iin nde chiñu ya ta̱xi Ndioxi ndaꞌa va nde.

1 Corintios 4:1

Tá kivi ndíkani ini ndo xaꞌa yeꞌe xiꞌin ra Apolos, ta xíniñuꞌu ndo ndikani ini ndo ya kúu nde ndisaa moso kuiti nda xáa chiñu nuu Tata yo Jesucristo, ta ka̱na ra ndeꞌe xaꞌa ya ndáa ini ra xíni ra ndeꞌe sinaꞌa nde naꞌa xaꞌa chiñu ra ya íyo sěꞌe.

1 Corintios 4:11

Ta nda kivi vitin ta ndee ni káꞌun ini nde kúni kuxi nde ta íchi tu nde tikuii va, ni köo tu toto kundixi va nde, saa xáa nduvaꞌa naꞌa xiꞌin nde, ta ni köo tu veꞌe va nde.

1 Corintios 4:9

Chi ndeꞌe xíka chiñu nuu Tata yo Jesús, ta tá íin naꞌa, na ndíkun nda sindiꞌi vaꞌa va, saa íin nde túvi yeꞌe. Chi tá íin naꞌa, na xa ndíta nuu xa kaꞌni ñaꞌa va na, saa íin nde. Xíto ni na ñuu ivi yóꞌó nuu nde xiꞌin na tatun Ndioxi, ndíkanda ni ini ndiꞌi na xíto na nuu nde, ya ndóꞌo nde saa.

2 Corintios 10:7

Ta ndóꞌo̱, ndisaa kuiti tá íin ñaꞌa ya xíto ndo íkan naꞌa, ta saa kua íyo ya íkan ndo xiꞌin na. Ta án ndá naꞌa ndíkani ini ya ndee ni vaꞌa ndíkun na Jesucristo túvi na, ta saa xíniñuꞌu na kundaa ini na, tá kuꞌva ndíkun na ra, kuꞌva saa ndíkun tu ndeꞌe va ra.

2 Corintios 11:5

Ta saa chínuu vaꞌa ni nda tuꞌun nda ya ndee ni naꞌnu nda, káchi nda ndi̱xaa nda nuu ndo. Ta yeꞌe, ta nda loꞌo köo ni̱nu̱ kúni i nuu nda ñaa, ya káꞌan nda saa.

2 Corintios 3:6

Iindaa mií Ndioxi ku ra ta̱xi ndee ndaꞌa nde ya kuchiñu nde xaa súvi nde tuꞌun ya xa̱á ki̱ndoo ra ikan ra xiꞌin na ñuu ra. Ta tuꞌun ya xa̱á ki̱ndoo ra xiꞌin yo, ta köo ndi̱kaꞌi ya nuu yu̱ú tá kuꞌva ndi̱xiyo ley Ndioxi ya ta̱xi ra ndaꞌa ra Moisés xinaꞌa, chi ley ikán ta ta̱xi ya kuachi xaꞌa naꞌa ndi̱xiꞌi na, sundi Tachi I̱í Ndioxi ta ya táxi kutaku yo ku ya.

2 Corintios 4:11

Ta ndeꞌe táku nde, ta ndiꞌi saa ichí xíka ìyo ni nde nuu ya kuvi nde xaꞌa Jesús. Íkan nde saa ya ná kuni naꞌa ya táku ra xiꞌin nde, vani ya ndíꞌi xaꞌa ku ikin kuñu nde.

2 Corintios 6:9

Ta sava na vani xíni vaꞌa na ndeꞌe, ta ndása xïni na ndeꞌe, sundi mií Ndioxi ta xíni vaꞌa va ra ini nde. Sava na ndíkani ini xaꞌa nde tá íin nde xa xíꞌi saa íin nde, káchi na, ta süvi ya ndaa kua, chi ndeꞌe táku va ku nde, sava tu ichí xa̱a ndu̱vaꞌa ni na xiꞌin nde, sundi köo ndi̱xaꞌni na ndeꞌe.

Gálatas 6:17

Ñani yo, yóꞌó ku nuu káꞌan i xiꞌin ndo, xíkan ni i ya mani nuu ndo, täva ka ndo kuachi xiꞌin i. Chi yeꞌe, ta ndee ni va kuaꞌa yanda íyo ikin kuñu i nuu ti̱kueꞌe ni i xaꞌa ya ndóꞌo ni i xaꞌa Tata yo Jesucristo.

Efesios 3:1

Ta xaꞌa ya vaꞌa ndiꞌi ndóꞌo̱ köo kúu judío kua ndíkaa yeꞌe, Pablo veꞌe kàà yóꞌó ya ndíkun i ichí Jesucristo.

Efesios 4:1

Yeꞌe, Pablo, ndíkaa i veꞌe kàà xaꞌa ya xáa chiñu i nuu Tata yo Jesucristo, ta xíkan ni i ya mani nuu ndo ya ná koo ndo tá kuꞌva kúni mií ra, xaꞌa ya ñaa kua ka̱na ra ndóꞌo̱.

Efesios 6:20

Ta mií Iva yo Ndioxi ku ra ta̱xi chiñu ndaꞌa i ya kaꞌan ndoso i tuꞌun ra, ta xaꞌa ya ñaa kua ndíkaa i veꞌe kàà yóꞌó. Ta kaꞌan ni ndo xaꞌa i xiꞌin Ndioxi ya ná taxi ra ndee ndaꞌa i kaꞌan i xiꞌin naꞌa, ta ná ku ïꞌvi i kaꞌan i xiꞌin na.

Filipenses 1:13

Chi ndiꞌi nda lapa, nda ndáa veꞌe kàà yóꞌó xiꞌin ndiꞌi ka naꞌa, kúndaa ini na xaꞌa i ya núꞌni i xiꞌin cadena yóꞌó xaꞌa ya xáa chiñu i nuu Jesucristo.

Filipenses 2:17

Tá tu xíniñuꞌu kuvi i xaꞌa Cristo, ta xa íyo ndúvi va i ikan i saa, ta kúsini ni i chi kuvi i nuu Ndioxi ya soko i mií i nuu ra, ta nduu i tá kuꞌva káa nduta, rá sóko na nuu ra, nuu chindee taꞌan i xiꞌin ndo sixinu i ya sóko ndo nuu ra xaꞌa ya ndee ni kándixa ndo ra. Xaꞌa ya ñaa kua kúsini ni i ikan i ndá ka ñaꞌa xaꞌa ndo.

Colosenses 1:24

Ta yeꞌe, ta kúsini ni va i ya tíxuꞌvi i xaꞌa ndo vitin ñani yo xiꞌin kuꞌva yo na veꞌe ñuꞌu, chi xaꞌa ya tíxuꞌvi i saa kua síxinu ka i ya ti̱xuꞌvi ni Jesucristo xaꞌa ndóꞌo̱ kándixa ra, chi ikin kuñu ra ku ndo.

Colosenses 1:29

Xaꞌa ya yóꞌó kua chíkaa ni i ndee xiꞌin chiñu ya íkan i nuu Tata yo Jesucristo, chi mií ra ku ra táxi ni ndee ndaꞌa i xáa chiñu ni i nuu ra xiꞌin ndee ra ya ndee ni íyo xiꞌin i.

1 Tesalonicenses 3:2

ta ti̱ꞌvi nde ra Timoteo, ñani yo, xaa ra nuu ndo koto ra ndóꞌo̱. Ta ra ñaa iin káchi vaꞌa ni xáa chiñu ra nuu Ndioxi xiꞌin nde, káꞌan ndoso ra tuꞌun vaꞌa xaꞌa Tata yo Jesucristo. Ta ti̱ꞌvi nde ra xaa ra nuu ndo koto ra ndóꞌo̱, ya chindee ra ndóꞌo̱ kandixa ni ka ndo tuꞌun xaꞌa Tata yo Jesucristo, saa xaꞌa ni ra ndee xiꞌin ndo,

1 Timoteo 4:6

Tá sínaꞌa un tuꞌun ya ndaa yóꞌó nuu na ñani yo xiꞌin kuꞌva yo, na veꞌe ñuꞌu, saa kua koo un iin ra vaꞌa ni xáa chiñu nuu Tata yo Jesucristo. Saa chi tá íyo ya vaꞌa ni xíxi yo táxi ndee ndaꞌa yo, kuꞌva saa íyo tuꞌun Tata yo Jesucristo ya kándixa ni yo xiꞌin tuꞌun ra ya xa si̱kuaꞌa un.

2 Timoteo 1:16

Saa káꞌan ni i xiꞌin Iva yo Ndioxi ya ná kundaꞌvi ni ini ra kuni ra na veꞌe ra ñani yo, ra Onesíforo. Chi ndee ni kuaꞌa ichí ndi̱xaꞌa ra ndee xiꞌin i, ta köo ndi̱kukaꞌán nuu ra kuni ra yeꞌe xaꞌa ya ndíkaa i veꞌe kàà yóꞌó.

2 Timoteo 1:8

Xaꞌa ya ñaa kua kükaꞌán nuu un ndikuiin un kaꞌan un xaꞌa Tata yo Jesucristo. Ni xaꞌa yeꞌe kükaꞌán nuu un xaꞌa ya ndíkaa i veꞌe kàà yóꞌó xaꞌa ra. Ya ndee ni ka xíniñuꞌu un ikan un kua xaꞌa ndee ni ini un ndoꞌo un xiꞌin i xaꞌa tuꞌun vaꞌa xaꞌa ra. Ta mií ra taxi ndee ndaꞌa yo ya kuchiñu yo nuu ndiꞌi tindoꞌo vaxi nuu yo.

2 Timoteo 2:9

Ta suvi xaꞌa tuꞌun vaꞌa ikán kua ndee ni ndóꞌo̱ i ndíkaa i veꞌe kàà yóꞌó, nda tá íyo iin ra ndee ni kaꞌnu kuachi kúu mií, saa íyo i, núꞌni i xiꞌin kàà ndíkaa i. Ta vaꞌa chi tuꞌun Ndioxi ta köo núꞌni vi ya.

2 Timoteo 3:11

Ta xa kúndaa ini mií un ya ndee ni tindoꞌo ki̱xi nuu i xaꞌa Cristo, tá ndi̱xiyo i ñuu Antioquía, xiꞌin ñuu Iconio tin ñuu Listra. Ta mií Tata yo Jesucristo ku ra si̱kaku yeꞌe nuu ndiꞌi tindoꞌo ya ndo̱ꞌo i.

FILEMÓN 1:9

sundi yeꞌe, ta köo kúni i ikan i saa xiꞌin un, xáku ndaꞌvi va i nuu un xaꞌa ya íyo ni ya kúꞌvi ini Ndioxi nima i. Ta xa xíni mií un, yeꞌe, ta xa ku̱chee va i vitin, ta síin tu ndíkaa i veꞌe kàà yóꞌó va xaꞌa ya ndíkun i Tata yo Jesucristo.

HEBREOS 10:34

Saa ku̱ndaꞌvi ni ini ndo xi̱ni ndo na tá ñúꞌu na veꞌe kàà. Ta nda kúsini ndo tá xíto ndo kíndaa na ñaꞌa ndo ndaꞌa ndo. Saa chi ndóꞌo̱, ra xíni ndo, vaꞌa ni ka ñaꞌa kúu mií ndo nuu ndivi, ya taxi Ndioxi ndaꞌa ndo, saa chi ya ikán ta nda iin ichí ndïꞌi xaꞌa ya.