2 Corintios 10:8 - Xochapa Mixteco

⁸ Án sana ndíkani ini ndo xaꞌa i ya yáꞌa ni ndee káꞌan i xiꞌin ndo, xaꞌa ya kúu mií i chiñu, ya ta̱xi Tata yo Jesucristo ndaꞌa i xáꞌnda chiñu i nuu ndo, kaꞌán ndo. Sundi yeꞌe, ta köo kúkáꞌán nuu i xiꞌin ya, chi mií ra ku ra ta̱xi ndee ndaꞌa nde ya kuchiñu nde chindee taꞌan nde xiꞌin ndo, ta süvi ya síndiꞌi xaꞌa nde ndóꞌo̱ kua.

2 Corintios 10:8 ပူးပေါင်းရင်းမြစ်များ

2 Corintios 1:24

Ta ya ñaa ta köo kúni kachi ya, xáꞌnda ni nde nuu ndo xaꞌa kuꞌva ya ndáa ini ndo xíni ndo Ndioxi, chi ndóꞌo̱ ta xa ndee ni va ndáa ini ndo xíni ndo ra, ta ndisaa ya kúni ndeꞌe kua, iin káchi xaa chiñu nde xiꞌin ndo nuu chindee taꞌan nde xiꞌin va ndo ya ná kusini ni ndo.

2 Corintios 10:4

Saa chi ndeꞌe, ta köo xíniñuꞌu nde taꞌan ndaꞌa chiñu ya xíniñuꞌu na ñuu ivi yóꞌó tá kánitaꞌan na, chi ndeꞌe, ta ndee Ndioxi va ku ya xíniñuꞌu nde ya kuchiñu sindiꞌi xaꞌa nde ndiꞌi ndee ya väꞌa, ya ndíkuita kánitaꞌan xiꞌin nde.

2 Corintios 10:9

Ta köo kúni i ya ndikani ini ndo kúni i síꞌvi i ndóꞌo̱ xiꞌin tutu ya táa i xaa nuu ndo.

2 Corintios 12:19

Ta ¿án sana ndíkani ini ndo xaꞌa nde ya ndíkuiin nde xaꞌa nde ndiꞌi saa tiempo nuu ndo, káꞌán ndo, ta yakan kua táa nde tutu yóꞌó xaa ya nuu ndo, túvi ndo? Ta süvi saa íyo ya. Chi ndeꞌe ndíkun Ndioxi ku nde, ta nuu mií ra kua káꞌan nde xiꞌin ndo, chi ñani nde ku ndóꞌo̱, ta ndiꞌi ya íkan nde xiꞌin ndo ta xaꞌa ya kúni nde chindee taꞌan nde xiꞌin ndo va kua.

2 Corintios 12:6

Ta saa ni ná kaꞌan vaꞌa ni i xaꞌa mií i, ndikuu, ta süvi ra kíꞌvi ku i ya káꞌan i saa, chi ya ndaa ni va kua káꞌan i xiꞌin ndo. Sundi yeꞌe, ta köo kúni i xaa kaꞌnu xiꞌin mií i nuu ndo, chi köo kúni i ya ndikani ini ndo xaꞌa i ya ndee ni ndáa yaꞌvi i nuu ndo xaꞌa kuꞌva íyo i án xaꞌa ya káꞌan i xiꞌin ndo.

2 Corintios 13:10

Táa kuee i tutu yóꞌó xaa ya nuu ndo yachi ka tá täꞌan xaa i nuu ndo, tá íyo xíka ni i saa káꞌan i xiꞌin ndo. Chi tá ná xaa i nuu ndo ta köo xíniñuꞌu i koo ndaku ni ini i xiꞌin ndo xiꞌin ichí ya ta̱xi Tata yo ndaꞌa i kuniñuꞌu i xiꞌin ndo. Chi ichí ta̱xi ra ndaꞌa i xaꞌa ndo, ta ya chindee taꞌan i xiꞌin va ndo kua, süvi xaꞌa ya sindiꞌi xaꞌa i ndóꞌo̱ xiꞌin kua.

2 Corintios 13:8

Chi ndeꞌe, ta küvi ikan nde ndá ka ñaꞌa ya köo íyo yuꞌu xiꞌin ya ndaa, nina ya vaꞌa, ya íyo yuꞌu xiꞌin ya ndaa kua xíniñuꞌu nde ikan nde.

2 Corintios 7:14

Yeꞌe, ta ndi̱kaꞌan vaꞌa ni i xaꞌa ndo xiꞌin ra, ta vaꞌa chi köo ndi̱sikaꞌán ndo nuu i xiꞌin ra, tá kuꞌva íyo ya ndaa ndi̱tuꞌun nde xiꞌin ndo, ta saa íyo tu ya ndi̱kaꞌan nde xiꞌin ra Tito va: ya ndee ni kúsini nde xiꞌin ndo.

2 Corintios 7:4

Ta ndinuꞌu ni ini i ndi̱kaꞌan i xiꞌin ndo ya ndee ni kúsini i xiꞌin ndo, vaꞌa ni kúni i xiꞌin ndo, ta̱xi ni ndo ndee ndaꞌa i, vani ndee ni ti̱xuꞌvi nde.

Gálatas 1:1

Yeꞌe, Pablo, ra xíka chiñu nuu Tata yo Jesucristo ku i táa tutu yóꞌó, xaa ya nuu ndo. Ta süvi na ñuu ivi yóꞌó ku na ndi̱taxi chiñu ndaꞌa i kúu i apóstol, chi mií Tata yo Jesucristo xiꞌin mií Iva yo Ndioxi, ra si̱taku Tata yo Jesucristo ku ra ta̱xi chiñu ndaꞌa i xáa chiñu i nuu ra.

2 Timoteo 1:12

Xaꞌa ya káꞌan ndoso i tuꞌun vaꞌa xaꞌa ra kua ndóꞌo ni i vitin. Sundi köo kúkaꞌán nuu i xaꞌa ya ndóꞌo i. Chi yeꞌe, ta xa kúndaa teꞌe ini i unku ra ndáa ni ini i xíni i, ta ndee ni ndee kúu mií ra ya chindee ra yeꞌe ya xaa súvi i ndiꞌi chiñu ya ta̱xi ra ndaꞌa i xaa súvi i.