2 Corintios 10:1 - Xochapa Mixteco

¹ Ta yeꞌe Pablo, ku ra káꞌan xiꞌin ndo xáku ndaꞌvi i nuu ndo xiꞌin ya vaꞌa, ya mani ta̱xi Cristo ndaꞌa i. Saa chi sava ndo káꞌan xaꞌa i ya ndee ni vita ini i tá íyo i xiꞌin ndo, sundi tá íyo xíka i nuu ndo ta ndee ni ndaku ini i, káchi ndo xaꞌa i.

2 Corintios 10:1 ပူးပေါင်းရင်းမြစ်များ

San Mateo 11:29

Xaa súvi ndo ya káꞌan i xiꞌin ndo ya káa tá káa itun yuku i. Sikuaꞌá ndo tá kuꞌva íyo i, chi yeꞌe ta köo kueꞌe ini i, ndaꞌvi ni ini i, vaꞌa ni taa ku i, ikán ndo saa, ta saa kuchiñu ndo ndikundee ndo.

San Mateo 21:5

Kaꞌan un xiꞌin na ñuu Sión: “Koto ndo, vaxi ra rey ñuu ndo nuu ndo, Ra toꞌo ni ku ra, ta yóso ra burru loꞌo, iin ri loꞌo ku ri yóso ra, seꞌe kiti ndíso vee ku ri”. Soꞌva káchi Ndioxi nuu ta̱a ra profeta xinaꞌa.

Los Hechos 8:32

Saa nda̱a ra. Ta tuꞌun Ndioxi ya káꞌvi ra kuaꞌan ra, káchi ya saa: Tá ndóꞌo iin kiti levo loꞌo ndáka xitoꞌo ri kuaꞌan ri kuvi ri, saa ndo̱ꞌo ra. Ni köo ndi̱kaꞌan ra tá kuaꞌan ra xiꞌin na kuvi ra. Tá íkan levo loꞌo ni köo ndáꞌi ri iin yayaa ndíchi ri xáꞌnda na kachi sata ri, saa i̱kan ra. Yayaa xi̱ndichi ra nuu na, ni köo ndi̱xuna ra yuꞌu ra ya kaꞌan ra xiꞌin na.

ROMANOS 10:20

Ta iin téteꞌe ndi̱kaꞌan tuku ra Isaías xaꞌa tuꞌun ya ndi̱kaꞌan Ndioxi xiꞌin ra, káchi ra: Naꞌa na köo ndi̱nduku yeꞌe, ta ndi̱niꞌi na yeꞌe. Naꞌa na köo ndákan tuꞌun xaꞌa i, ta ndi̱tuvi i nuu na. káchi Ndioxi xiꞌin ra Isaías, ndi̱kaꞌan ra.

ROMANOS 12:1

Ñani yo xiꞌin kuꞌva yo, xíkan ni i ya mani nuu ndo ya ná nditaxi táku ndo mií ndo ndaꞌa Ndioxi. Soko ndiꞌi ndo mií ndo nuu ra. Tá íin naꞌa na ií, na síkusini ni ini ra, saa koo ndo. Nditaxi ndiꞌi ndo mií ndo ndaꞌa ra xaꞌa ya kúndaꞌvi ni ini ra xíni ra ndóꞌo̱. Tá íkan ndo saa ta xáa kaꞌnu ni ndo ra, ta ya ñaa ku mií ya ndixa ni ka ndáa yaꞌvi nuu ra.

ROMANOS 15:15

Ya ndaa kua, kuaꞌa ni ya ndi̱kaꞌan i ta̱a i xaa nuu ndo, nuu ndítuꞌun téꞌe i xiꞌin ndo, saa chi kúni i ná ndïndoso ini ndo xaꞌa ya káꞌan i saa xiꞌin ndo. Chi Ndioxi ta vaꞌa ni ini ra xiꞌin i xaꞌa ya ta̱xi ra ichí ndaꞌa i xáa chiñu i nuu ra.

1 Corintios 2:3

Yachi tá ndi̱xaꞌan i nuu ndo ta vita ni kúni i, íꞌvi ni i ndakua kísi ya yeꞌe.

1 Corintios 4:10

Xaꞌa ya ndíkun nde Jesucristo, ta ni köo ndáa yaꞌvi nde nuu naꞌa, tá íin nde kíꞌvi va, saa íin nde nuu na. Ta ndóꞌo̱, ta xaꞌa ya ndíkun ndo Jesucristo ta tá íin naꞌa, na ndíchi ni va saa ndu̱u ndo. Ta ndeꞌe, ta vita ni va kúni nde ta mií ka va ndo ku ndo ndu̱ndee ni ka nuu nde, túvi ndo. Vaꞌa ni va káꞌan naꞌa xaꞌa ndo, xáa toꞌo ni na ndóꞌo̱, ta ndeꞌe, ta kúndasi nuu va na xíni na ndeꞌe.

1 Corintios 4:21

¿Ta unkua kúni ndo ikan i xiꞌin ndo tá ná xaa i koto i ndóꞌo̱? ¿Án kúni ndo xaa i sitixuꞌvi i ndóꞌo̱? ¿Án vaꞌa ka xaa i koto i ndóꞌo̱ xiꞌin ya mani, ya kúꞌvi ini i xíni i ndóꞌo̱ xiꞌin ya kaꞌnu ini? Koto ndo unkua vaꞌa túvi míi va ndo.

2 Corintios 10:10

Chi sava ndo káꞌan: “Tutu ya táa ra Pablo ñaa, ta ndee ni kueꞌe káꞌan ra xiꞌin ya, ndaku ni káꞌan ra, sundi mií ra ta ni köo ndee káꞌan vi ra, vita ni va ini ra, ta ni köo ndáa yaꞌvi tuꞌun káꞌan ra nuu naꞌa, káchi ndo xaꞌa i”.

2 Corintios 10:2

Ta xaꞌa ya ñaa kua káꞌan i xiꞌin sava ndo vaꞌa ka ná ndinama ini ndo xaꞌa ya ndíkani ini ndo xaꞌa i saa, ta ni yeꞌe ta ndäꞌi kueꞌe i nuu ndo ya ndíkani ini ndo xaꞌa i ya xáa súvi i chiñu tá kuꞌva íkan na ñuu ivi yóꞌó, káchi ndo xaꞌa i. Chi yeꞌe ta xa íyo ndúvi va i ya kaꞌan i xiꞌin sava ndo.

2 Corintios 10:7

Ta ndóꞌo̱, ndisaa kuiti tá íin ñaꞌa ya xíto ndo íkan naꞌa, ta saa kua íyo ya íkan ndo xiꞌin na. Ta án ndá naꞌa ndíkani ini ya ndee ni vaꞌa ndíkun na Jesucristo túvi na, ta saa xíniñuꞌu na kundaa ini na, tá kuꞌva ndíkun na ra, kuꞌva saa ndíkun tu ndeꞌe va ra.

2 Corintios 11:21

Kúkaꞌán ni nuu i káꞌan i saa xiꞌin ndo, chi ndeꞌe, ta nda loꞌo köo ndíxaa nduvaꞌa nde xiꞌin ndo, tá kuꞌva íkan nda ñaa xiꞌin ndo. Xaꞌa ya ñaa kua vita ni va ndi̱xiyo ini nde xiꞌin ndo, túvi ndo. Tá ndá naꞌa kútoo kaꞌan vaꞌa xaꞌa mií, ta saa tu yeꞌe va, káꞌan vaꞌa i xaꞌa i, vani tá káa iin ra yáꞌa loꞌo ini va saa káa i, ya káꞌan i kuꞌva saa xiꞌin ndo.

2 Corintios 11:30

Tá tu xíniñuꞌu i kutai ni ini i, ta vaꞌa kutai ni va ini i xaꞌa ñaꞌa ya xíni i vita ni ini i nuu.

2 Corintios 12:5

Ta xaꞌa ya i̱kan Ndioxi saa xiꞌin i, ta vaꞌa ni chinuu vaꞌa i tuꞌun i nuu ndo, ndikuu, sundi yeꞌe, ta küvi chinuu vaꞌa ni i tuꞌun i, ya vaꞌa ni kaꞌan i xaꞌa kua vita ni ini va i.

2 Corintios 3:12

Ta xa kúndaa teꞌe ini nde xaꞌa ya saa íyo ya, yakan kua ndee ni vaꞌa ndítuꞌun teꞌe nde xiꞌin ndo.

2 Corintios 5:20

Ta ndeꞌe, tá káa ra xikuaꞌa xíka nuu, saa íin nde, chi ka̱na Ndioxi ndeꞌe ya xíka nuu nde nuu ra ndítuꞌun nde xiꞌin naꞌa. Ta yuꞌu mií Jesucristo kua káꞌan nde xiꞌin ndo, tá káꞌan nde xiꞌin ndo saa, ta tá íin ndeꞌe xáku ndaꞌvi nuu ndo saa íin nde, chi kána Ndioxi ndóꞌo̱ tixin ndeꞌe ya ná ndikitaꞌan mani ndo xiꞌin ra.

2 Corintios 6:1

Ndóꞌo̱ xiꞌin ndeꞌe, ta iin káchi xáa chiñu yo nuu Ndioxi, yakan xíkan ni nde ya mani nuu ndo ya ná kundàà vií ni ndo ya vaꞌa ndi̱niꞌi ndo nuu Tata yo.

2 Corintios 7:4

Ta ndinuꞌu ni ini i ndi̱kaꞌan i xiꞌin ndo ya ndee ni kúsini i xiꞌin ndo, vaꞌa ni kúni i xiꞌin ndo, ta̱xi ni ndo ndee ndaꞌa i, vani ndee ni ti̱xuꞌvi nde.

Gálatas 4:13

Xa xíni mií ndo tá kivi ndi̱xaꞌan i nuu ndo tá núnu̱ú ta ndee ni ndee ndóꞌo i kúꞌvi i, yakan ndi̱xaa i ñuu ndo ta saa kua ndi̱tuꞌun i xiꞌin ndo tuꞌun vaꞌa xaꞌa Tata yo Jesucristo, nuu kaku ndo.

Gálatas 5:2

Mií yeꞌe, Pablo káꞌan xiꞌin ndo, xíkan i ya mani nuu ndo ya ná kuni soꞌo ndo ya káꞌan i xiꞌin ndo, chi tá ná ndiko koo tuku ndo xaa súvi ndo ya ndikunuu tuni Ndioxi ndóꞌo̱, ta ya ñaa kúni kachi ya köo ndáa yaꞌvi ya ndi̱xiꞌi Cristo xaꞌa kuachi ndo tá tu saa.

Efesios 3:1

Ta xaꞌa ya vaꞌa ndiꞌi ndóꞌo̱ köo kúu judío kua ndíkaa yeꞌe, Pablo veꞌe kàà yóꞌó ya ndíkun i ichí Jesucristo.

Efesios 4:1

Yeꞌe, Pablo, ndíkaa i veꞌe kàà xaꞌa ya xáa chiñu i nuu Tata yo Jesucristo, ta xíkan ni i ya mani nuu ndo ya ná koo ndo tá kuꞌva kúni mií ra, xaꞌa ya ñaa kua ka̱na ra ndóꞌo̱.

Filipenses 4:5

Vívií koo ndo, tái koo ndo, saa kuni inka naꞌa ya vaꞌa ni íyo ndo. Chi xa kama ni ndiko koo Tata yo Jesucristo kixi ra.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

2 Tesalonicenses 3:17

Ta mií yeꞌe Pablo ku ra táa tutu yóꞌó xiꞌin ndaꞌa i táa i ya, letra mií i kua táa i xaa ya nuu ndo ya kundaa ini ndo yeꞌe ku i tíꞌvi ya xaa ya ndaꞌa ndo.

FILEMÓN 1:19

Mií yeꞌe Pablo ku ra chi̱kaa ndaꞌa nuu tutu yóꞌó ya ndíkuiin i chaꞌvi i nuu un xaꞌa ya níka ra Onesimo ñani yo nuu un, ta ndïndoso ini un chi saa tu mií va un níka un nuu i xaꞌa ya ndi̱kaku un, táku un vitin.

FILEMÓN 1:9

sundi yeꞌe, ta köo kúni i ikan i saa xiꞌin un, xáku ndaꞌvi va i nuu un xaꞌa ya íyo ni ya kúꞌvi ini Ndioxi nima i. Ta xa xíni mií un, yeꞌe, ta xa ku̱chee va i vitin, ta síin tu ndíkaa i veꞌe kàà yóꞌó va xaꞌa ya ndíkun i Tata yo Jesucristo.

1 Pedro 2:11

Ñani yo tin kuꞌva yo, ndóꞌo̱ ta tá íin naꞌa, na ndóo tóo xiꞌin na xíka tóo ñuu ivi yóꞌó saa íin ndo, yakan xíkan ni i ya mani nuu ndo, ndee koo ini ndo ta täxi ka ndo kaꞌnda chiñu ya väꞌa kúni kaꞌnda chiñu nuu ikin kuñu ndo, chi ndiꞌi ya väꞌa ñaa ta kánitaꞌan ya xiꞌin ya vaꞌa ndo.

El Apocalipsis 1:9

Yeꞌe Juan ñani ndo ku i, saa chi iin káchi kándixa yo Tata yo Jesucristo, ta ndóꞌo̱ xiꞌin yeꞌe ndíkun yo ichí nuu xáꞌnda chiñu Ndioxi. Xaꞌa ya iin ku yo xiꞌin taꞌan yo, ta iin káchi tíxuꞌvi ndiꞌi yo xiꞌin taꞌan yo, saa táxi Ndioxi ndee ra ndaꞌa yo, ya kúndee ini yo xiꞌin ya tíxuꞌvi yo. Xaꞌa ya ndi̱kaꞌan ndoso i tuꞌun Ndioxi ya si̱naꞌa Tata yo Jesucristo yeꞌe, yakan ti̱in na chiñu yeꞌe ndi̱xaꞌan na ndi̱ndaka na yeꞌe iku loꞌo ya Patmos, ya ndíkaa maꞌñu nduta ñûꞌu xaꞌa ya síndoꞌo ni na ini i.