1 Tesalonicenses 3:3 - Xochapa Mixteco

³ ya ná ndïkava ini ndo xaꞌa ya tíxuꞌvi ni ndo vitin. Xa xíni tu mií va ndo ya xíniñuꞌu yo ndoꞌo ni yo.

1 Tesalonicenses 3:3 ပူးပေါင်းရင်းမြစ်များ

San Lucas 21:12

’Sundi xiꞌna ndoꞌo ni ndóꞌo̱, saa yaꞌa ya ñaa. Xaa nduvaꞌa ni na xiꞌin ndo. Taxi na kuachi xaꞌa ndo nuu na naꞌnu veꞌe ñuꞌu sinagoga, taan na ndóꞌo̱ veꞌe kàà tin taxi na kuachi xaꞌa ndo kuꞌun ndo nuu na veꞌe chiñu án nuu nda rey. Xaꞌa ya ndíkun ndo sata i kua ikan na saa xiꞌin ndo.

San Juan 16:2

Chi vaxi kivi ta tava ndaꞌa na chiñu naꞌnu nuu na judío ndóꞌo̱ ini veꞌe ñuꞌu sinagoga. Ta saa ni kuni na kaꞌni na ndóꞌo̱, saa chi tá íkan na saa xiꞌin ndo ta vaꞌa ni xáa súvi na ya kúni Ndioxi, kaꞌán na.

San Juan 16:33

Soꞌva káꞌan i xiꞌin ndo ya ná kündiꞌi ini ndo, ta tuun ni kundikun ndo yeꞌe saa koo vaꞌa ni ini ndo. Saa chi kixi ni tindoꞌo nuu ndo ñuu ivi yóꞌó, sundi kundaa ni ini ndo kuni ndo yeꞌe, saa chi yeꞌe ta xa ku̱chiñu i xa̱a kanaa i ñuu ivi yóꞌó ―káchi Jesús.

Los Hechos 14:22

Tá ndi̱xaa nda iin iin ñuu ikán saa ta̱xi ka nda ndee ndaꞌa na ndíkun Jesús ya ná kundaa ni ka ini na kuni na ra. Ta saa ndi̱kaꞌan ka ra Pablo xiꞌin na, káchi ra saa: ―Xíniñuꞌu yo ndoꞌo ni yo saa kuchiñu yo kiꞌvi yo koo yo xiꞌin Ndioxi nuu xáꞌnda chiñu ra ―káchi ra xiꞌin na.

Los Hechos 2:25

Soꞌva ndo̱ꞌo ra ndi̱taku ra chi xa xinaꞌa vi ndi̱kaꞌan ra rey David xaꞌa Jesús, ya ndi̱kaꞌan ra xiꞌin Iva ra Ndioxi, káchi ra saa: Ndiꞌi saa kivi xíni i Iva i Ndioxi, íyo tuꞌva ra xiꞌin i ñaꞌñu kuáꞌá i ya chindee ra yeꞌe ya ná ku ïꞌvi i nuu ndá ka ñaꞌa.

Los Hechos 21:11

Ndi̱xaa ra xíto ra ndeꞌe. Tá ndi̱xaa ra, ta ti̱in ra cinturón ra Pablo, ka̱va nuu ra sukun ndaꞌa ra tin sukun xaꞌa ra, saa xa̱á ra káꞌan ra: ―Soꞌva káchi Tachi I̱í Ndioxi xaꞌa ra xíin iín toko ya yóꞌó, tá kuꞌva i̱kan i xiꞌin cinturón ra, saa ikan na judío xiꞌin ra tá ná xaa ra ñuu Jerusalén. Katun na ndaꞌa ra tin xaꞌa ra, saa ndi̱taxi na ra ndaꞌa naꞌa na köo kúu judío, káchi Tachi I̱í Ndioxi ―káchi ra Agabo ikán xiꞌin nde.

Los Hechos 21:13

Ta ndi̱kuiin ra, káchi ra saa: ―Küaku ndo chi nda yeꞌe kúchiꞌña ini íkan ndo. Tá ti̱in na yeꞌe ka̱tun na, ta vaꞌa ná tiin va na yeꞌe, chi yeꞌe ta xa íyo tuꞌva i kundoꞌo i xaꞌa Tata yo Jesús, vani kaꞌni na yeꞌe xaꞌa va ra ―káchi ra xiꞌin na.

Los Hechos 9:16

Saa chi yeꞌe ta sinaꞌa i ra ndá kuꞌva xíniñuꞌu ra ndoꞌo ni ra xaꞌa kivi i ―káchi Jesús xiꞌin ra Ananías.

ROMANOS 5:3

Ta süvi ndisaa xaꞌa ya vaꞌa yóꞌó ku ya kúsini yo, chi kúsini tu yo tá vaxi tindoꞌo nuu va yo. Saa chi xíni yo ndiꞌi tindoꞌo ndóꞌo yo ta xáa ndee ka ya ini yo xiꞌin ya uꞌvi vaxi nuu yo, ta ndee ka ndíkundikun yo ichí Ndioxi.

1 Corintios 15:58

Ñani mani, xaꞌa ya ñaa kua xíniñuꞌu ndo ndee ni ndee kundikun ndo ichí Ndioxi, xaꞌa ni ndo ndee ta ndïko koo ini ndo ya íkan ndo saa, iin tuun saa chikaa ini ndo xaa chiñu ni ndo xaꞌa Tata yo, saa chi chiñu íkan ndo nuu ra, ta süvi ya uun ku ya.

1 Corintios 4:9

Chi ndeꞌe xíka chiñu nuu Tata yo Jesús, ta tá íin naꞌa, na ndíkun nda sindiꞌi vaꞌa va, saa íin nde túvi yeꞌe. Chi tá íin naꞌa, na xa ndíta nuu xa kaꞌni ñaꞌa va na, saa íin nde. Xíto ni na ñuu ivi yóꞌó nuu nde xiꞌin na tatun Ndioxi, ndíkanda ni ini ndiꞌi na xíto na nuu nde, ya ndóꞌo nde saa.

Efesios 3:13

Xaꞌa ya ñaa kua xíkan ni i ya mani nuu ndo ya ná ndïko koo ini ndo xaꞌa tindoꞌo ya ndóꞌo i. Nda vaꞌa ka ná kuni ndo xaꞌa ya ndóꞌo i saa, ta ná koo vaꞌa ni ini ndo xaꞌa ya tíxuꞌvi ni i, chi ndóꞌo̱, ta níꞌi ka ndo ya toꞌo xaꞌa ya ndóꞌo i kuꞌva saa.

Filipenses 1:28

Ta yeꞌe kúni i kuni soꞌo i xaꞌa ndo ya köo íꞌvi ndo xíni ndo naꞌa, na kúndasi nuu xíni ndóꞌo̱. Chi tá ná kuni na ya íkan ndo saa, ta saa kua kundaa teꞌe ni ini na ya kuaꞌan na ichí nuu ndiꞌi xaꞌa na, ta ndóꞌo̱, ta kaku ndo, saa chi Ndioxi ku ra chindee taꞌan xiꞌin ndo.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

1 Tesalonicenses 5:9

Chi Ndioxi ta köo ndi̱kaxin ra yoo ya sindoꞌo ra yoo, ndi̱kaxin ra yoo ya sikaku ra yoo tixin Tata yo Jesucristo.

2 Tesalonicenses 1:4

Ta ndeꞌe, ta ndee ni kúsini nde xiꞌin ndo, saa ndítuꞌun nde xiꞌin na ñani yo, na veꞌe ñuꞌu nuu kuaꞌan nde, káꞌan nde xaꞌa ndo xiꞌin na ya ndee ni ñúꞌu ndo nuu tindoꞌo, tíxuꞌvi ni ndo. Vani saa ndóꞌo̱ ndo ta ndee ni ndáa ini ndo xíni ndo Tata yo Jesucristo, xáꞌa ni ndo ndee kuaꞌan ndo ichí ra.

2 Timoteo 1:8

Xaꞌa ya ñaa kua kükaꞌán nuu un ndikuiin un kaꞌan un xaꞌa Tata yo Jesucristo. Ni xaꞌa yeꞌe kükaꞌán nuu un xaꞌa ya ndíkaa i veꞌe kàà yóꞌó xaꞌa ra. Ya ndee ni ka xíniñuꞌu un ikan un kua xaꞌa ndee ni ini un ndoꞌo un xiꞌin i xaꞌa tuꞌun vaꞌa xaꞌa ra. Ta mií ra taxi ndee ndaꞌa yo ya kuchiñu yo nuu ndiꞌi tindoꞌo vaxi nuu yo.

1 Pedro 2:21

Xaꞌa ya ñaa kua ka̱na Ndioxi ndóꞌo̱ ya xaꞌa ndee ni ini ndo kundoꞌo ndo tá kuꞌva ndo̱ꞌo mií Cristo xaꞌa ndo, kuꞌva saa xíniñuꞌu ndo ikan ndo, chi saa íyo ya si̱naꞌa ra ndóꞌo̱ ikan ndo.

El Apocalipsis 2:10

Ta ndóꞌo̱ ku ïꞌvi ndo nuu tindoꞌo ya uꞌvi ni vaxi nuu ndo. Saa chi íyo naꞌa, na kúni xaa súvi ya kúni kiti nǎꞌa án kiti Timiaꞌa, kiti Satanás. Tiin na sava ndóꞌo̱ taan na veꞌe kàà, nuu koto ndoso na ndóꞌo̱ án ya ndixa kua kándixa ndo yeꞌe. Ta ndoꞌo ni ndo uxi kivi. Ta káꞌan ni i xiꞌin ndo ya ná síndikoo ndo ichí i, ndinuꞌu ni ini ndo kandixa ndo yeꞌe, nda kivi tá ná kuvi ndo. Saa ndikiꞌin ndo ya vaꞌa taxi i ndaꞌa ndo nuu kutaku ndo xiꞌin i ndiꞌi saa kivi ya vaxi.

El Apocalipsis 2:13

Ta xíni ndiꞌi i ya íkan ndo, saa xíni i ya ndóo ndo ñuu nuu xáꞌnda chiñu kiti nǎꞌa náni Satanás. Ni saa va, sundi ndóꞌo̱, ta nda iin kivi köo síndoo ndo ichí i. Kándixa ni ndo yeꞌe. Ni tá xa̱ꞌni na ra Antipas taꞌan ndo, ra ndee ni xi̱ndikun yeꞌe, xaꞌa ya ikán kua xa̱ꞌni na ra. Chi ñuu nuu ndóo ndo ñaa, ta kiti nǎꞌa, kiti Satanás va ku ri xáꞌnda chiñu nuu ya.