1 Pedro 5:12 - Xochapa Mixteco

¹² Ra Silvano ñani yo ku ra ndee ni tuun ndíkun Tata yo Jesucristo, ta ra yóꞌó ku ra kuniꞌi tutu yóꞌó xaa ya ndaꞌa ndo, ta̱a i uvi ndaa tuꞌun xaa ya nuu ndo ya xáꞌa ni i ndee xiꞌin ndo káꞌan i xiꞌin ndo xaꞌa tindoꞌo ya ndee ni ndóꞌo ndo vitin, ta ya ñaa kua káꞌan ya ndee ni kúꞌvi ini Ndioxi xíni ra ndóꞌo̱.

1 Pedro 5:12 ပူးပေါင်းရင်းမြစ်များ

San Juan 21:21

Tá xi̱ni ra Pedro ra ikán, ta saa ndi̱ndakan tuꞌun ra Jesús káchi ra saa: ―Tata, ta ra yóꞌó, ¿unkua kundoꞌo ra? ―káchi ra.

Los Hechos 11:23

Tá ndi̱xaa ra Bernabé ikán ta xi̱ni ra ya kuaꞌa ni ya vaꞌa íkan Ndioxi xiꞌin na, ñaa kúsini ni ra. Ta saa ndi̱xaꞌa ra ndee xiꞌin na ya ndinuꞌu ni ini na ná kundikun na ichí Tata yo, ta vitin taan ná kandixa ka ñaꞌa na, káchi ra xiꞌin na.

Los Hechos 15:22

Saa ndi̱xinu ini nda apóstol xiꞌin na xikuaꞌa tin ndiꞌi ka na ndíkun Jesús, ñaa ndi̱kaxin nda sava nda taꞌan nda ya kuꞌun nda xiꞌin ra Pablo tin ra Bernabé ndaka nda tutu ikán ndaꞌa na köo kúu judío ndóo ñuu Antioquía. Ta nda ndi̱kaxin na ikán ku ra Judas, ra káꞌan na xiꞌin Barsabás, xiꞌin inka ra Silas. Nda kúnaꞌnu nuu na ndíkun Jesús ku nda ikán.

Los Hechos 20:24

Ta nda iin ñaꞌa küvi kasi nuu i xaꞌa chiñu ya íkan i, ni köo ndíꞌi ini i, tá tu kuvi i xaꞌa ra, ta vaꞌa kuvi va i xaꞌa ra. Chi ya ndee ni ndíꞌi ini i xaꞌa kua sixinu i chiñu nuu ra ya ta̱xi ra ndaꞌa i xaa súvi i nuu ra ya ndikuiin i kaꞌan ndoso i tuꞌun vaꞌa xaꞌa ra xiꞌin naꞌa ya ná kundaa ini na ndá kuꞌva kúꞌvi ni ini Ndioxi xíni ra na.

ROMANOS 5:2

Saa tu xaꞌa ya kándixa yo Jesucristo kua ndi̱niꞌi uun yo nuu ndi̱kiꞌvi yo ndi̱kitaꞌan vaꞌa ni yo xiꞌin Ndioxi, ta ni küxika ka yo nuu ra. Saa kúsini ni yo chi kúndaa teꞌe ini yo ya koo yo xiꞌin ra nuu kuni yo ya chee ni kúu mií Ndioxi.

1 Corintios 15:1

Ñani yo tin kuꞌva yo, kúni i ná ndikaꞌán ini ndo xaꞌa tuꞌun vaꞌa xaꞌa Tata yo Jesucristo ya xa ndi̱kaꞌan ndoso i xiꞌin ndo. Ta ya yóꞌó ku ya xa ku̱ndaa ini ndo xaꞌa ta nda vitin tuun ni kándixa ndo ya.

2 Corintios 1:19

Saa chi ra ñani yo ra Silvano xiꞌin ra Timoteo tin yeꞌe, ta ndi̱kaꞌan ndoso nde xiꞌin ndo xaꞌa Tata yo Jesucristo, ra kúu Seꞌe Ndioxi. Ta köo uvi yuꞌu ra, nina ya ndaa káꞌan ra ndiꞌi saa kivi, ta ndixa síxinu ra tuꞌun káꞌan ra.

2 Corintios 1:24

Ta ya ñaa ta köo kúni kachi ya, xáꞌnda ni nde nuu ndo xaꞌa kuꞌva ya ndáa ini ndo xíni ndo Ndioxi, chi ndóꞌo̱ ta xa ndee ni va ndáa ini ndo xíni ndo ra, ta ndisaa ya kúni ndeꞌe kua, iin káchi xaa chiñu nde xiꞌin ndo nuu chindee taꞌan nde xiꞌin va ndo ya ná kusini ni ndo.

Efesios 3:3

Vani xa kuaꞌa ni kuiya ndi̱xiyo sěꞌe ñaꞌa ya chi̱tuni mií ra nuu naꞌa, sundi nuu yeꞌe ta xa si̱tuvi va ra ya nuu i tá kuꞌva ndi̱kaꞌan i xiꞌin ndo nuu ta̱a i loꞌo nuu ndo tá yachi.

Efesios 6:21

Ta ra ñani yo Tíquico ku ra vaꞌa ni ítaꞌan xiꞌin i xáa chiñu nde nuu Tata yo Jesucristo, ta ra ñaa ku ra ndituꞌun xiꞌin ndo xaꞌa i xiꞌin ndiꞌi ya ndóꞌo i.

Colosenses 1:7

Ta ya yóꞌó kua xi̱ni soꞌo ndo si̱naꞌa ra ñani yo, ra Epafras, ra xáa chiñu xiꞌin nde nuu Tata yo Jesucristo. Ta ndinuꞌu ni ini ra xáa chiñu ra nuu Tata yo ya chindee ra ndóꞌo̱.

Colosenses 4:7

Ta ra ñani yo, ra Tíquico, ra kúꞌvi ni ini yo xíni yo, ra ndee ni vaꞌa xáa chiñu nuu Ndioxi, ra ítaꞌan xiꞌin i xáa chiñu nde nuu Iva yo, ra yóꞌó ku ra ndituꞌun xiꞌin ndo xaꞌa ndiꞌi ya ndóꞌo i.

Colosenses 4:9

Saa tíꞌvi i ra Tíquico ñani yo xaa ra xiꞌin ra Onésimo ñani yo, ra ñuu mií ndo, ra kúꞌvi ni ini i xíni i, ra ndee ni vaꞌa xáa chiñu xiꞌin i nuu Tata yo Jesucristo. Tíꞌvi i ra xaa ra xiꞌin ra, ta nda ñaa ku nda ndituꞌun xiꞌin ndo xaꞌa ndiꞌi ya ndóꞌo nde yóꞌó.

1 Tesalonicenses 1:1

Yeꞌe Pablo xiꞌin ra Silvano tin ra Timoteo ku nde tíꞌvi tutu yóꞌó xaa ya ndaꞌa ndiꞌi ndóꞌo̱ ñani yo xiꞌin kuꞌva yo, na veꞌe ñuꞌu ndóo ñuu Tesalónica. Káꞌan ndioxi nde xiꞌin ndiꞌi ndo. Ta mií Iva yo Ndioxi xiꞌin Tata yo Jesucristo ná ikan ni ya vaꞌa xiꞌin ndo, saa ná taxi ra koo vaꞌa ni ini ndo.

2 Tesalonicenses 1:1

Yeꞌe Pablo, xiꞌin ra Silvano tin ra Timoteo ku nde tíꞌvi tutu yóꞌó xaa ya ndaꞌa ndóꞌo̱, na veꞌe ñuꞌu, na ndóo ñuu Tesalónica nuu káꞌan ndioxi nde xiꞌin ndo. Chi xa iin ku ndo xiꞌin Iva yo Ndioxi tin Tata yo Jesucristo.

HEBREOS 13:22

Na taꞌan yo, xíkan ni i ya mani nuu ndo, kaꞌnu ni koo ini ndo xaꞌa ya loꞌo ni kua táa i nuu tutu yóꞌó xaa ndaꞌa ndo. Ta taa ni soꞌo ndo ya káꞌan i xiꞌin ndo, ya xáꞌa ni i ndee xiꞌin ndo.

1 Pedro 1:13

Xaꞌa ya ikán kua koo ndúvi ndo vívií ndikani ini ndo, táku koo ini ndo, ndee ni ndaku koo ini ndo ya ndikiꞌin ndo ñaꞌa vaꞌa ya niꞌi ndo nuu Tata yo Jesucristo tá ná ndiko koo ra kixi ra.

1 Pedro 4:10

Saa chi Iva yo Ndioxi ta xa kuaꞌa ni va ya vaꞌa, ya xínituni ke̱e nuu ndivi ta̱xi ra ndaꞌa iin iin ndo, ya kuniñuꞌu ndo ya ikan ndo ya vaꞌa xiꞌin taꞌan ndo. Saa kua kuchiñu ndo ikan ndo kuaꞌa ni ya vaꞌa xaꞌa ya kúꞌvi ni ini Ndioxi xíni ra ndóꞌo̱.

2 Pedro 1:12

Ta ndóꞌo̱, ta xa xíni ndiꞌi ndo ya yóꞌo̱, ta tuun ni ndíkun ndo ya ndaa ya xa si̱naꞌa na ndóꞌo̱, ni yeꞌe ta ndiꞌi saa ichí síndikaꞌán i ini ndo ya ná ndïndoso ini ndo xaꞌa ya yóꞌó.

2 Pedro 2:15

Chi si̱ndoo nda ichí vaꞌa ya ndaa, ta nda̱ñuꞌu nda kuaꞌan nda ichí taꞌan ya ndi̱xika ra profeta Balam seꞌe ra Beor, chi ra ikán ta ku̱too ni ra chaꞌvi naꞌa ra xaꞌa ya i̱kan ra ya väꞌa.

3 Juan 1:12

Ta ra Demetrio ta vaꞌa ni va ínuu tuꞌun ra nuu naꞌa, ínuu vaꞌa ni tuꞌun ra saa chi tá kuꞌva káꞌan tuꞌun Ndioxi, saa íyo ra. Ta saa tu ndeꞌe va, xíni nde ya ndixa kua káꞌan na xaꞌa ra, ta ni mií un xíni un ya ndaa kua káꞌan nde xaꞌa ra.

Judas 1:3

Ñani mani, xa yachi vi kúni ni i taa i tutu yóꞌó xaa ya ndaꞌa ndo nuu káꞌan i xiꞌin ndo xaꞌa ya síkaku Iva yo Ndioxi yoo. Ta nda vitin vi táa i ya xaa ya nuu ndo ya ndúku ni i ya mani nuu ndo káꞌan i xiꞌin ndo, täxi ndo sindaꞌvi nda sínaꞌa ya vata ndóꞌo̱, ta xaꞌa ni ka ndo nde ya kandixa ni ndo tá kuꞌva ku̱ndaa ini na ñuu Ndioxi.