1 Pedro 4:7 - Xochapa Mixteco

⁷ Ta vaꞌa ná kundaa ini ndo chi xa yati ni va ndiꞌi xaꞌa ñuu ivi yóꞌó, yakan ndóꞌo̱ ta káxin teꞌe koo ini ndo, ta ndinuꞌu ni ini ndo kaꞌan ni ndo xiꞌin Ndioxi ndiꞌi saa kivi.

1 Pedro 4:7 ပူးပေါင်းရင်းမြစ်များ

San Mateo 24:42

’Saa ndóꞌo̱, koo tuꞌva ndo saa chi köo xíni ndo maa kua ndiko koo yeꞌe, ra kúu Tata ndo, ra chee nuu ndo.

San Mateo 25:13

Saa ndi̱kaꞌan ka ra xiꞌin nda, káchi ra: ―Saa ndóꞌo̱, kundoo tuꞌva ndo chi köo xíni ndo ndá kivi kua, ni ndá hora kua ndiko koo yeꞌe Taa ra xa̱a ñuu ivi yóꞌó ―káchi ra xiꞌin nda.

San Lucas 21:34

Yakan kuenta ni koo ndo xiꞌin mií ndo, ta kündiꞌi ini ndo xaꞌa viko nuu kuxi ndo tin koꞌo ndo, ni kündiꞌi ini ndo xaꞌa ñaꞌa ya ndíꞌi ni ini na köo xíni Ndioxi. Koo tuꞌva ndo saa chi iin kuu soꞌva ndikava kivi ikán sata ndo.

San Lucas 21:36

Xíniñuꞌu ndo koo nduvi ndo, ndinuni kaꞌan ndo xiꞌin Ndioxi ndiꞌi saa tiempo ya ná ndöꞌo ndo saa, ta kuchiñu ndo kaku ndo nuu ndiꞌi tindoꞌo ya vaxi ñuu ivi. Ta saa kuchiñu ndo kundita ndo ndikuiso ndo yeꞌe, Ra xa̱a ñuu ivi yóꞌó ―káchi Jesús xiꞌin na.

San Lucas 22:46

Saa ndi̱kaꞌan ra xiꞌin nda, káchi ra saa: ―¿Ndachu ndóo ndo kíxi ndo? Kuandikoo ndo kaꞌan ndo xiꞌin Ndioxi, ya ná ndïkava ndo ndaꞌa ya väꞌa, ya kuni koto ndoso ndóꞌo̱ ―káchi ra xiꞌin nda.

ROMANOS 12:12

Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

1 Corintios 15:24

Tá si̱ndiꞌi si̱taku ra naꞌa ikán, saa sindiꞌi xaꞌa ra ndiꞌi ndee ya xáꞌnda chiñu nuu na ñuu ivi yóꞌó, xiꞌin ndiꞌi ndee ya kúu mií na kúnaꞌnu xáꞌnda chiñu, xiꞌin ndiꞌi ñaꞌa ya xáꞌnda chiñu nuu ndivi. Saa nditaxi ra ichí ya kúu mií ra ndaꞌa Iva yo Ndioxi.

1 Corintios 7:29

Ta yeꞌe kúni i kaꞌan i ya yóꞌó xiꞌin ndo: Xa kama ni va kuaꞌan ndíꞌi tiempo ya ndóo yo, yakan tá kúu ndóꞌo̱ taa ta kündiꞌi ini ndo xaꞌa ná síꞌi ndo, kundiꞌi ni ka ini ndo xaa chiñu ndo xaꞌa Tata yo Jesucristo, chi xa kama ni ndiko koo ra.

Efesios 6:18

Ta xïkuiin ndo, kaꞌan ni ndo xiꞌin Ndioxi ndiꞌi saa ichí ya ná chindee taꞌan Tachi I̱í ra xiꞌin ndo. Koo ndúvi ni ndo, ta ndïkava ini ndo, kaꞌan ni ndo xiꞌin Ndioxi xaꞌa ndiꞌi na ñuu Ndioxi, na i̱í.

Filipenses 4:5

Vívií koo ndo, tái koo ndo, saa kuni inka naꞌa ya vaꞌa ni íyo ndo. Chi xa kama ni ndiko koo Tata yo Jesucristo kixi ra.

Colosenses 4:2

Ñani yo xiꞌin kuꞌva yo, xïkuiin ndo kaꞌan ni ndo xiꞌin Ndioxi, saa koo ndúvi ni ndo ndiꞌi saa kivi ya taxi ni ndo tixaꞌvi ndaꞌa ra.

2 Timoteo 4:5

Sundi yóꞌo̱, ta kaxin teꞌe ni koo ini un, saa xaꞌa ndee ndiꞌi ini un xiꞌin ya tíxuꞌvi ni un xaꞌa Tata yo Jesucristo, ta ku ïꞌvi un kaꞌan ndoso un tuꞌun vaꞌa xaꞌa ra, saa vívií xaa súvi un chiñu ya ta̱xi Iva yo Ndioxi ndaꞌa un.

Tito 2:12

Xaꞌa ya kúꞌvi ni ini Ndioxi xíni ra yoo kua sínaꞌa ra nuu yo ya xíniñuꞌu yo sindoo yo ndiꞌi taꞌan ya väꞌa íyo ñuu ivi yóꞌó, ta ná ndïkani ini yo ikan yo ndá ka ya väꞌa, saa ná koo káxin ni ini yo, ta ndaa ni ná koo ini yo, i̱í ná koo yo nuu ra.

HEBREOS 10:25

Xíniñuꞌu yo ndikitaꞌan yo xiꞌin na ñani yo tin kuꞌva yo ya xaa kaꞌnu yo Ndioxi. Ta ná ïkan yo tá íkan sava na taꞌan yo, köo xíin ka na ndikitaꞌan na ya xaa kaꞌnu na Ndioxi. Ná xaꞌa ka yo ndee xiꞌin taꞌan yo, saa chi vitin ka kua ndee ni, chi xa kuaꞌan kúyati ni kivi ya ndiko koo tuku Tata yo Jesucristo kixi ra ñuu ivi yóꞌó.

HEBREOS 9:26

Tá ndi̱kan Jesucristo tá kuꞌva i̱kan nda sutu ikán tá nuu kuiya, ta nda tá xa̱á xi̱koo ñuu ivi yóꞌó vi xíniñuꞌu ra kuvi ra kuaꞌa ni ichí, ndikuu. Sundi tiempo ya ku̱yati ndiꞌi xaꞌa ñuu ivi ndóo yo vitin kua ki̱xi ra, ta iindaa va ichí ndi̱taxi ra mií ra ndisoko ra mií ra xaꞌa yo, ta ya i̱kan ra saa ndi̱taxi ra mií ra ndaꞌa Ndioxi yakan si̱ndiꞌi xaꞌa ra kuachi yo.

1 Pedro 1:13

Xaꞌa ya ikán kua koo ndúvi ndo vívií ndikani ini ndo, táku koo ini ndo, ndee ni ndaku koo ini ndo ya ndikiꞌin ndo ñaꞌa vaꞌa ya niꞌi ndo nuu Tata yo Jesucristo tá ná ndiko koo ra kixi ra.

1 Pedro 3:7

Ta saa tu ndóꞌo̱ va ñani yo, ndo íyo ná síꞌi, ndíchi ni va ndikani ini ndo ndá kuꞌva xíniñuꞌu koo vií ndo xiꞌin ná síꞌi ndo. Ta xaa toꞌo ndo ná, saa vívií ndikani vaꞌa ini ndo koo ndo xiꞌin ná tá kuꞌva i̱í ni íyo kisi ya ndasun ni, kuꞌva saa xíniñuꞌu ndo ikan ndo xiꞌin ná. Chi iin káchi ndi̱niꞌi taꞌvi tu ná ñaa va xiꞌin ndo ya niꞌi ná ya vaꞌa nuu Ndioxi kutaku ná xiꞌin ra. Tá íkan ndo saa xiꞌin ná síꞌi ndo, ta köo ñaꞌa kasi nuu tuꞌun ya káꞌan ndo xiꞌin Ndioxi, tá káꞌan ndo xiꞌin ra, ta kuni soꞌo ra ya káꞌan ndo.

1 Pedro 5:8

Ta káxin teꞌe koo ini ndo, küsun ndo, kundito ndo, saa chi kiti nǎꞌa, ri kánitaꞌan xiꞌin ndo ta ndá yokan ndíkun ri xíka ri sata ndo. Tá kuꞌva íkan kiti lion, ri ndee ni ndíkun xíka ndúku tiin kiti kaxi ri, kuꞌva saa íkan kiti nǎꞌa xiꞌin ndo.

El Apocalipsis 16:15

Xaꞌa ya ikán kua xíniñuꞌu ndi̱kaꞌán ini ndo xaꞌa tuꞌun ya ndi̱kaꞌan Tata yo Jesucristo xiꞌin na ndíkun sata ra, káchi ra saa: ―¡Koto ndo vii! Tá íkan iin ra kuiꞌna, kivi köo ndátun ndo ra. Saa koo kivi ndiko koo i ñuu ivi. Ta naꞌa na ndíto koo tuꞌva na ndikiꞌin na yeꞌe, ta taxi Ndioxi ya ndixa kusini na ikán. Ta naꞌa na ndíto, xíniñuꞌu koo tuꞌva tikoto na ya kundixi na, ya ná kükaꞌan nuu na íyo chála na kivi ndiko koo i ―káchi Tata yo Jesucristo ndi̱kaꞌan ra.