1 Corintios 9:20 - Xochapa Mixteco

²⁰ Xaꞌa ya ikán kua, tá íyo i xiꞌin na ñuu i na judío, ta tá íin na ikán saa íkan i ya kuchiñu i chindee taꞌan i xiꞌin na, kandixa na Tata yo Jesucristo. Tá íyo i xiꞌin na taꞌan i na ndíkun ley ra Moisés, ta saa íkan i, vani köo kándixa ka i tá kuꞌva kándixa mií na. Ta íkan i saa ya ná kuchiñu chindee taꞌan i xiꞌin na kaku na.

1 Corintios 9:20 ပူးပေါင်းရင်းမြစ်များ

Los Hechos 16:3

Saa kúni ra Pablo kuꞌun ra Timoteo xiꞌin nda. Ñaa xa̱ꞌnda ra chiñu ya ná ndikunuu tuni Ndioxi ra takua ná ndikiꞌin vaꞌa na judío ra ñuu nuu kuꞌun ra xiꞌin nda, chi xíni na ya kúu iva ra griego.

Los Hechos 18:18

Ta naꞌá ni ndi̱ndoo ra Pablo ñuu Corinto ndi̱xiyo ra xiꞌin na xíka ichí Jesús. Sindiꞌi ikán ta ndi̱kaꞌan ndioxi ra xiꞌin na, saa ndi̱kiꞌin ra kuaꞌan ra xiꞌin ra Aquila tin yá Priscila síꞌi ra Aquila. Nda̱a na sata iin barco itun kuaꞌan nda estado Siria. Ñaa ndi̱xaa na ñuu Cencrea ta ikán ndi̱xata teꞌe ra Pablo xiní ra, nuu ndínaꞌa ra mií ra ya síxinu ra ya xa ki̱ndoo ra xiꞌin Ndioxi.

ROMANOS 11:14

Yakan ndee ni ndíkundee i káꞌan ndoso i tuꞌun ra xiꞌin ndo, chi kúni i ná ndukuiñu xiní na ñuu i kuni na ndóꞌo̱, ta saa ndiko koo na nuu Ndioxi ya sikaku ra sava na.

ROMANOS 3:19

Xa xíni mií yo ndiꞌi ya káꞌan ley Ndioxi ya ta̱a na xinaꞌa, ta káꞌan ya xaꞌa mií yo ya ndi̱ndoo ya ndaꞌa yo, yakan köo ka ya taa nuu yo. Ta̱xi Ndioxi ley ikán ndaꞌa xii sikua yo na judío, ya ná kundaa ini ndiꞌi naꞌa ya ndíso yo kuachi nuu Ndioxi.

Gálatas 2:19

Saa chi yeꞌe, ta tá káa ra xa ndi̱xiꞌi va saa káa i nuu ley ya ta̱a ra Moisés. Suvi mií ley ikán kua xa̱ꞌni yeꞌe tá kivi ndi̱xiꞌi i nuu ya, ta saa kua ndi̱taku i ya xaa súvi i ya kúni mií Ndioxi.

Gálatas 4:21

Sava ndóꞌo̱ ñani yo, ta kúni tuku va ndo ndiko koo ndo xaa súvi ndo ley ya ta̱a ra Moisés ta ¿án köo xíni ndo unkua káꞌan ya?

Gálatas 4:5

Saa i̱kan Ndioxi ti̱ꞌvi ñaꞌa ra ki̱xi ra ya chindee ra yoo saña yo ndaꞌa ley ya ta̱a ra Moisés, ta ndi̱kuiso ra yoo ndu̱u yo seꞌe ra.

Gálatas 5:18

Sundi tá táxi ndo xáꞌnda chiñu Tachi I̱í Ndioxi nuu ndo, ta saa kua kíndoo ndika ndo, köo xáꞌnda chiñu ka ley ya ta̱a ra Moisés nuu ndo.