1 Corintios 2:14 - Xochapa Mixteco

¹⁴ Ta naꞌa, na köo íyo Tachi I̱í Ndioxi xiꞌin ta köo kúchiñu na kundaa ini na xaꞌa ya vaꞌa ke̱e nuu ndivi, chi tá káa tuꞌun ya kíꞌvi va saa káa ya nuu na. Köo kúchiñu na kundaa ini na xaꞌa ya, saa chi ndisaa naꞌa, na kúu mií Tachi I̱í Ndioxi ku na kúchiñu kúndaa ini xiꞌin ya.

1 Corintios 2:14 ပူးပေါင်းရင်းမြစ်များ

San Mateo 16:23

Saa ndi̱ko koo Jesús ndi̱kaꞌan ra xiꞌin ra, káchi ra saa: ―¡Kuataꞌa nuu i, Timiaꞌa! Saa chi sási un nuu i ya ná ïkan i ya kúni Iva i Ndioxi. Chi yóꞌo̱ ta köo ndíkani ini un tá kuꞌva ndíkani ini Ndioxi. Ndíkani ini un tá kuꞌva ndíkani ini na ñuu ivi yóꞌó va ―káchi Jesús xiꞌin ra Pedro.

San Juan 10:20

Kuaꞌa ni na káꞌan, káchi na saa: ―Küni soꞌo ndo ya káꞌan ra, tachi nduvaꞌa kúu mií ra yakan ndu̱kiꞌvi ra ―káchi na.

San Juan 12:37

Ni kuaꞌa ni yatuꞌun Ndioxi xi̱ni na judío íkan Jesús ta köo ndi̱xiin na kandixa ñaꞌa na.

San Juan 14:17

Ta ya ikán ku Tachi Ndioxi ya sinaꞌa ndóꞌo̱ xaꞌa ya ndaa. Ta na köo ndíkun yeꞌe ta küvi ndikiꞌin na ya koo ya xiꞌin na, chi köo xíni na ya, ta ni küchiñu na kuni xiꞌin nuu na ya. Sundi ndóꞌo̱ ndíkun yeꞌe ta xíni ndo ya, ta íyo ya xiꞌin ndo, saa koo ya xiꞌin ndo ndiꞌi saa ichí.

San Juan 14:26

Sundi Tachi I̱í ya tiꞌvi Iva i kixi Sindiko ya ini ndo, ta tixin kivi yeꞌe kua kixi ya chindee ya ndóꞌo. Saa sinaꞌa ndiꞌi ya ndóꞌo̱, ta sindikaꞌán ya ini ndo xaꞌa ndiꞌi tuꞌun ya ndi̱kaꞌan i xiꞌin ndo.

San Juan 15:26

Saa ndi̱kaꞌan ka Jesús xiꞌin nda, káchi ra saa: ―Tá ná kixi Tachi Ndioxi ya Sindiko ini ndo ndikuiin ya xaꞌa i kaꞌan ya xiꞌin ndo. Ta ya tiꞌvi i kixi ta ya ndaa ni kua chi nuu Iva i vaxi ya.

San Juan 5:44

Köo xíin ndo kandixa ndo yeꞌe, saa chi kútoo ni ndo kaꞌan vaꞌa ndo xaꞌa taꞌan ndo, ta köo ndúku ndo ya kaꞌan vaꞌa Ndioxi xaꞌa ndo ―káchi ra xiꞌin nda.

San Juan 8:43

¿Ta ndachu küvi kundaa ini ndo ya káꞌan i xiꞌin ndo? Xaꞌa ya köo xíin ndo ndikiꞌin ndo tuꞌun ya káꞌan i xiꞌin ndo kua küvi kundaa ini ndo tuꞌun i.

Los Hechos 16:14

Ta iin yá taꞌan ná ikán náni yá Lidia ke̱e yá iin ñuu vaꞌa ya chee ni Tiatira nani ya, saa kúu mií yá chiñu xíko yá toto, ta ya vaꞌa ni ku ya xíko yá, ndakua ndíꞌi tuun ya xíko yá. Ta káñuꞌu ni yá ikán Ndioxi. Saa xíni soꞌo ni yá ya káꞌan ra Pablo, ta chi̱ndee Iva yo yá xu̱na yá nima yá nuu tuꞌun ra.

Los Hechos 17:18

Ta sava nda xíka ikán ku nda ndíchi ni chi si̱kuaꞌa nda xiꞌin na náni epicúreos, ta sava nda si̱kuaꞌa xiꞌin na náni estoicos xa̱á nda káꞌan nda xaꞌa ra, káchi nda saa: ―¿Unkua káꞌan ví ra? ra síndaꞌvi naꞌa va ku ra ―káchi nda. Ta inka na káꞌan: ―Ra xíka káꞌan ndoso xaꞌa inka ndioxi va ku ra ―káchi nda. Saa káchi nda chi xi̱ni soꞌo nda káꞌan ra tuꞌun vaꞌa xaꞌa Jesús ta káꞌan ra xiꞌin na ya ndi̱taku ra.

Los Hechos 17:32

Saa tá xi̱ni soꞌo na ya ndi̱kaꞌan ra ya ndítaku na ndíi, ta saa xa̱á sava na kúsiki ndaa na ra, ta inka na káchi saa: ―Vaꞌa kuáꞌan, nda inka kixi un saa kuni soꞌo ka nde ya káꞌan un ―káchi na xiꞌin ra.

Los Hechos 18:15

Sundi xaꞌa tuꞌun va xiꞌin kivi na ya vaxi nuu ley mií va kua káni taꞌan ndo. Xaꞌa ya ñaa kua xäa nani i kuachi xiꞌin ndo, vaꞌa xaa nani mií va ndo ya xiꞌin taꞌan ndo ―káchi ra xiꞌin na.

Los Hechos 25:19

Kuachi xaꞌa ñaꞌa íkan mií na judío va kua, káni taꞌan na xaꞌa ya síin káa ya kándixa na, ta síin kua sínaꞌa ra Pablo. Chi káꞌan ra xaꞌa iin ra náni Jesús ndi̱xiꞌi ra ta ndi̱taku ra, káchi ra Pablo.

1 Corintios 1:18

Tá ndíkani i tuꞌun xaꞌa Cristo ya ndi̱xiꞌi ra nuu cruzin, ta tá káa tuꞌun kíꞌvi saa káa ya káꞌan i nuu naꞌa, na ku̱aꞌan ichí nuu ndiꞌi xaꞌa na. Sundi mií yo síkaku Ndioxi, ta xíni yo tuꞌun yóꞌó ta ndee ni ndee kúu mií ya xaꞌa ya kúu ya tuꞌun Ndioxi.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

1 Corintios 1:23

Sundi ndeꞌe, ta xaꞌa Jesucristo, ra ndi̱xiꞌi nuu cruzin xaꞌa kuachi va yo kua káꞌan ndoso nde xiꞌin na. Ta tuꞌun yóꞌó nda tá káa yu̱ú nuu káchiꞌi xaꞌa na kóyo na, saa káa ya nuu na judío. Ta na griego ndíkani ini na, tá káa ya kíꞌvi va, saa káa ya nuu na.

1 Corintios 1:25

Saa chi tuꞌun Ndioxi ya köo ndáa yaꞌvi nuu naꞌa, na ndíchi ni túvi mií na ñuu ivi yóꞌó, ya ikán ka ku ya ndáa yaꞌvi ni nuu ya xínituni mií na. Ta ya ndíkani ini naꞌa, káꞌan na xaꞌa tuꞌun Ndioxi, ni köo ndee ya, vita ni ya káchi na. Ta ya ikán ka ku ya yáꞌa ni ka ndee, nuu ndee ya kúu mií na ñuu ivi yóꞌó.

1 Corintios 15:44

Ikin kuñu yo, ya ndúxin ta ya ñuu ivi yóꞌó ku ya, sundi tá ná nditaku yo ta taꞌan ikin kuñu ya íyo nuu ndivi nduu ya. Saa chi tá íyo ikin kuñu ya kúu mií yo ñuu ivi yóꞌó, ta saa tu nuu ndivi va kuu mií yo inka ikin kuñu yo.

1 Corintios 15:46

Xaꞌa ya ñaa kua kúndaa ini yo süvi xiꞌna ra íyo ndivi ku ra ki̱xi ñuu ivi yóꞌó, chi xiꞌna ra ivi yóꞌó va ku ra ki̱xi, ta si̱ndiꞌi saa ki̱xi ra íyo ndivi.

1 Corintios 2:12

Ta Ndioxi ta̱xi ra Tachi mií ra ndaꞌa yo ya kuchiñu yo kundaa ini yo xaꞌa ñaꞌa, ya vaꞌa ta̱xi ra ndaꞌa yo. Chi kúu mií yo Tachi ra, ta köo kúu mií yo tachi ya xáꞌnda chiñu nuu na ñuu ivi yóꞌó.

1 Corintios 3:1

Ñani yo xiꞌin kuꞌva yo, yachi, ta yeꞌe köo ndíkuvi ndituꞌun i xiꞌin ndo tá kuꞌva ndítuꞌun i xiꞌin naꞌa, na xa xuxa tuꞌun Ndioxi ini. Yakan ndi̱kaꞌan i xiꞌin ndo tá kuꞌva káꞌan yo xiꞌin naꞌa, na ndíkani ini ndisaa xaꞌa mií, chi ndóꞌo̱ ta tá íin na lee vali va saa íin ndo, xaꞌa ya sikan ndi̱kundikun ndo ichí Tata yo Jesucristo.

Santiago 3:15

Ya ndíchi kúu mií ndo ta süvi nuu Ndioxi vaxi ya, ya kána koo xi̱ní na ñuu ivi yóꞌó va ku ya, chi kiti nǎꞌa ku ri táxi ndíkani ini ndo ya ndee ni ndíchi ndo, túvi ndo.

1 Juan 2:20

Sundi ndóꞌo̱ ta ta̱xi Tata yo Jesucristo Tachi I̱í ra ndaꞌa ndo, ta xa xíni ndiꞌi ndo ya ndaa.

1 Juan 2:27

Sundi ndóꞌo̱ ta xa kúu mií ndo Tachi I̱í Ndioxi ya ta̱xi Tata yo Jesucristo ndaꞌa ndo. Ta köo xíniñuꞌu sinaꞌa inka naꞌa ndóꞌo̱, chi Tachi I̱í mií Ndioxi sínaꞌa ndóꞌo̱ xaꞌa ndiꞌi ni kúu ñaꞌa. Ta ya sínaꞌa Tachi ra ku ya ndaa, süvi ya vata kua káꞌan Tachi ra xiꞌin ndo. Ta ndinuꞌu ni ini ndo kundikun vaꞌa ka ndo Tata yo Jesucristo tá kuꞌva sínaꞌa Tachi I̱í Ndioxi ndóꞌo̱.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

Judas 1:19

Ta nda káꞌan i xaꞌa xiꞌin ndo ku nda, táva kuachi xiꞌin ndo ta taꞌvi taꞌan ndo, ta ndisaa ya kútoo mií ikin kuñu nda kua íkan nda, ta köo Tachi Ndioxi íyo xiꞌin nda.