1 Corintios 12:18 - Xochapa Mixteco

¹⁸ Sundi Ndioxi, ta xa xíni vaꞌa va ra nuu toso ra tá iin, tá iin ñaꞌñu ya xíniñuꞌu ikin kuñu yo, tá kuꞌva kúni mií ra saa íyo ya i̱kán ra xiꞌin yo.

1 Corintios 12:18 ပူးပေါင်းရင်းမြစ်များ

San Lucas 10:21

Saa chútu ndaa Tachi I̱í Ndioxi Jesús mi hora ikán. Ñaa xa̱á ra káꞌan ra xiꞌin Ndioxi, káchi ra saa: ―Tata, xáa kaꞌnu ni i yóꞌo̱, chi yóꞌo̱ ku ra ku xitoꞌo ndiꞌi ñaꞌa ya íyo nuu ndivi tin ya íyo ñuu ivi yóꞌó. Kúsini ni i xiꞌin un chi ti̱seꞌe un ya yóꞌó nuu na ndíchi ni, na xíni ni, ta si̱naꞌa un ya nuu na köo xíni, na íin tá íin na vali, saa i̱kan un Tata, chi saa ku̱ni mií un ikan un ―káchi Jesús xiꞌin Ndioxi.

San Lucas 12:32

Saa ndi̱kaꞌan ka Jesús, káchi ra saa: ―Ndóꞌo̱ ndíkun sata i ta ku ïꞌvi ndo chi tá íyo iin tiꞌvi levo vali sana i saa íin ndo. Ta kúsini ni va Ndioxi taxi ra koo ndo xiꞌin ra nuu xáꞌnda chiñu ra.

ROMANOS 12:3

Xaꞌa ya vaꞌa ni Ndioxi ta si̱niꞌi uun ra nuu i káꞌan i xiꞌin ndo, yakan xíkan ni i ya mani nuu ndo ndïkani ini ndo ya vaꞌa ni ka mií ndo nuu inka naꞌa. Vaꞌa ka kiꞌin ni ndo kuenta ndá kuꞌva ndíkani ini ndo xaꞌa mií ndo. Ta ndáꞌvi, ndáꞌvi ndikani ini ndo, ikan ndo tá kuꞌva íyo ya vaꞌa ta̱xi Ndioxi ndaꞌa iin iin ndo ya kándixa ndo ra.

ROMANOS 12:6

Ta xaꞌa ya kúꞌvi ni ini Ndioxi xíni ra yoo, ta xa síin xa síin si̱niꞌi taꞌvi ra iin iin yo, ta̱xi ra ya vaꞌa xínituni yo, ya ke̱e nuu ndivi ndaꞌa yo. Tá tu ndi̱niꞌi sava yo ya kaꞌan ndoso yo ndá ka tuꞌun ya vaxi nuu Ndioxi xiꞌin naꞌa, ta vaꞌa saa ná koo ya kaꞌan yo xiꞌin na, tá kuꞌva ndáa ni ini yo Ndioxi.

1 Corintios 12:11

Ta iindaa mií Tachi I̱í Ndioxi ku ya íkan ndiꞌi ya yóꞌó xiꞌin ndee ku mií ya, chi iindaa mií ya kú ya xíni ndá kuꞌva kúni mií ya siniꞌi ya nuu iin iin naꞌa.

1 Corintios 12:17

Tá tu nina nduchi nuu ná koo ndiꞌi ikin kuñu yo ta küchiñu yo kuni soꞌo yo. Tá tu nina soꞌo yo ná koo ndiꞌi ikin kuñu yo, ta küchiñu yo taꞌmi yo xiko, ndikuu.

1 Corintios 12:19

Saa chi tá iin nuu ndi̱xiyo ndiꞌi ikin kuñu yo, ta küvi koo yo iin naꞌa, ndíkuu.

1 Corintios 12:24

Ta vaꞌa ná kundaa ini ndo, chi ñaꞌñu ya luvi ni náꞌa, ta köo xíniñuꞌu ndo kundaa ni ndo ya, mií ra ku ra chi̱taꞌan ndiꞌi ya xiꞌin taꞌan ya, ñaꞌñu ya köo ndaa yaꞌvi ni túvi ndo, ya ñaa ka kua ndee ni ndáa yaꞌvi nuu mií ra, yakan ná kundaa ni yo ñaꞌñu ñaa.

1 Corintios 12:28

Ta xa xíni yo mií Ndioxi ku ra to̱so yo veꞌe ñuꞌu ya xaa chiñu yo. Chiñu núnu̱ú ta̱xi ra ndaꞌa sava yo ku ya kúu yo apóstol, ta sava yo ku profeta, nda káꞌan tuꞌun yuꞌu Ndioxi, sava tu yo ku yo sínaꞌa tuꞌun Ndioxi, sava tu yo ta̱xi ra ichí ndaꞌa yo ya ikan yo yatuꞌun Ndioxi, sava yo ta̱xi ra ichí ndaꞌa yo ya sindaꞌa yo na kúꞌvi, sava tuku yo ta̱xi ra ichí ndaꞌa yo ya chindee taꞌan yo xiꞌin naꞌa, sava tuku yo ta̱xi ra ichí ndaꞌa yo ya kaꞌnda chiñu yo nuu na veꞌe ñuꞌu, sava tuku yo ta̱xi ra ichí ndaꞌa yo ya kaꞌan yo inka nuu tuꞌun ya köo ndi̱sikuaꞌa yo.

1 Corintios 15:38

Saa chi̱nduꞌu Ndioxi ya ndiꞌi siꞌva tàtà chíꞌi yo ta kuaꞌa ni nuu ku ri, tá kuꞌva kúni mií ra ikan ra xiꞌin iin iin nuu siꞌva ikán, saa íkan ra xiꞌin ri.

1 Corintios 3:5

Ndikani vaꞌa ini ndo, ¿án chee ni yeꞌe, Pablo, túvi ndo? ¿Án ra Apolos ku ra chee ni túvi ndo? Süvi saa íyo ya. Moso va ku nde xáa chiñu nde nuu Ndioxi, ta chíndee nde ndóꞌo̱ ya ná kandixa ni ndo Ndioxi va. Íkan iin iin nde chiñu ya ta̱xi Ndioxi ndaꞌa va nde.

Efesios 1:5

Xaꞌa ya kúꞌvi ni ini ra xíni ra yoo kua ndi̱kaxin ra yoo, saa ndi̱kuiso ndaꞌvi ra yoo ndu̱u yo seꞌe ra tixin Jesucristo. Chi saa chi̱tuni mií ra i̱kan ra xiꞌin yo, ta kúsini ni ra xaꞌa ya i̱kan ra saa xiꞌin yo.

Efesios 1:9

Ta si̱naꞌa ra ñaꞌa nuu yo ya chi̱tuni mií ra ndi̱xiyo sěꞌe nuu ra. Ta ndee ni kúsini ra si̱naꞌa ra ya yóꞌó nuu yo tixin seꞌe ra Jesucristo, chi saa chi̱kaa ini ra ikan ra xiꞌin yo.

El Apocalipsis 4:11

―Iva yo Ndioxi, iin mií un ku un kaꞌnu ni nuu nde, yakan iindaa yóꞌo̱ ku ra kúu mií ichí ndikiꞌin ni un tuꞌun vaꞌa ya káꞌan nde xiꞌin un, saa ná ndikunuu sukun ni ya toꞌo un, chi yóꞌo̱ ku ra ndee ni ndee kúu mií, ta iindaa yóꞌo̱ ku un si̱kuaꞌa ndiꞌi ni kúu ñaꞌa ya íyo ñuu ivi yóꞌó. Tá íyo ya chi̱tuni mií un, saa íyo ndiꞌi ya si̱kuaꞌa un, ―káchi na xikuaꞌa ikán xiꞌin Ndioxi.