Rom Yaab 2:29 - Uwumbɔr aagbaŋ

²⁹ Unii u gii lichakpaln, kaa kpeln waabimbin na aa piir Uwumbɔr aasui. Unii u dii Uwumbɔr usui ni na, uma le ye Juu aanibamɔnn. Unii u Uwumbɔr Aafuur Nyaan bi u ni na, nima le ye lichakpangeei bamɔnn. Uwumbɔr le ga pak udaan, naa ye binib.

UWONBƆR A GBƆNPƆŊ LIKƆƆNL

²⁹ Aai wan ye Juu a ninfou ke u ye Juu a ninfou u sufu ni le, le lipunjiil bamɔnl mu be sufu ni le, ki ye kinaaŋin, naa ye nan sɔb dɔ kugbɔŋin nin a binba, u yaa daan gaa u pag Uwonbɔr ban le naa ye uninfo ban ni.

Rom Yaab 2:29 ပူးပေါင်းရင်းမြစ်များ

1 Bibɔrb Aabɔr 29:17

M nyi ke aa tɔŋni unii mɔk aasui lik, le aasui piin binib bi aabimbin ŋan na pu. Mbimbinyaan ni ngeehm ponn ni le m di nsui mɔmɔk tii si nimina mɔmɔk ki kan ke binib bi mɔmɔk kuun do na kpa mpopiin le ki joo ni si ipiin.

Ilahn 45:13

Ubɔr aabɔndinn u mu ye ubɔr aabisal na koo ni ki ŋan sakpen a. Bi di salmaa aakokonn le luu waabɔkul.

Jeremia 4:14

Jerusalem aanib, finn nyan tibir ti bi nisui ni na, aan ki ŋmar. Ni ga li dak tilandakwanbir ki ti saa bayoonn?

Jeremia 4:4

Li joo man tipuur ti ni nan puu tii mi Uwumbɔr na. Nimi Juda ni Jerusalem aanib, di nibaa tii mi man. Ni yaa kaa ye kina kan, maaŋuul ga fii ke mmii na, titunwanbir ti ni tun na pu. Li ga fii, le ubaa aan li bi ki sɔŋ li.”

Jeremia 9:25

Uwumbɔr nan ki bui ke, “N‑yoonn choo, le m ga nan daa Ijipt, ni Juda, ni Edom, ni Amonn, ni Moab, ni nteersakpiin ni aanib bi chee biyigbeer pu aayikpir na aatafal. Ba pu? Bi kaa ye Juda aanib binib bimina ponn ni na gii ŋichakpan, le kaa dii mi. Juda aanib ma kan, bi gii ŋichakpan, kaa tee joo lichakpangeei aakaal aah mɔk pu na.”

Tibɔnyaan ti Luk ŋmee ti na 11:39

Le Tidindaan bui u, “Nimi Farisii yaab, ni ŋir tiyir ni ŋisambil aapuwɔb mbamɔm, kaa ŋir ni ponn ni. Kina le ni ban ke binib bui ke ni ye bininyaam; nisui ponn ni mu gbii kinaayuk aatuln ni titunwanbir.

Tibɔnyaan ti Luk ŋmee ti na 17:21

Baan ŋmaa bui ke, ‘Lik, mu bi do,’ kaan ŋmaa bui ke, ‘Mu bi nima la.’ Uwumbɔr aanaan bi ni ni.”

Jɔnn 12:43

Nima le mɔk ke Juu yaab aaninkpiib ngbaan gee binib aapak ki jer Uwumbɔr yaan.

Jɔnn 4:23

N‑yoonn choo, ki mu fuu ni a, le binib bi dooni Tite Uwumbɔr mbamɔm na ga li dooni u bisui ni, Waafuur Nyaan aapɔɔn pu. Uwumbɔr ban binib kina aaboln le bi li dooni u.

Jɔnn 5:44

Ni nyuŋni tɔb la, kaa ban ke Uwumbɔr, u ye Uwumbɔr baan na, li nyuŋni nimi. Ni ga ŋa kinye aan ki gaa mi ki kii?

Rom Yaab 14:17

Uwumbɔr aanaan aa ye tijikaar ni tiwanyukaan. Mu ye mbimbinyaan, ni nsuudoon, ni mpopiin, Waafuur Nyaan aah tii timi pu na la.

Rom Yaab 2:27

Binib bi kaa gii ŋichakpan na yaa joo Uwumbɔr aakaal kan, bi ŋan jer nimi Juu yaab bi gii ŋichakpan Moses aakaal aah mɔk pu na, ki bii nkaal muken na.

Rom Yaab 3:1

Lichakpangeei aanyoor ye ba? Juu yaab jer binib bi kaa ye Juu yaab na aa?

Rom Yaab 7:6

Dandana wee, taah kpo na, nkaal na aa ki dii timi, ki mu aa ki joo timi tinaagbiir. Le Uwumbɔr Aafuur Nyaan tii timi mbimbipɔm, ke ti tun lituln tii Uwumbɔr. Nkaal na aa ki joo timi.

1 Korenti 4:5

Nima pu na, ni yaa kaa kee ŋeer kan, ni taa ji unii ubaa tibɔr, see Tidindaan nan gir ni. Uma le ga kpiir tiwan ni bɔɔ mbɔmbɔɔn ni na, ki kpiir unibɔn mɔmɔk aalandak. Liyaadaal ngbaan kan, Uwumbɔr ga pak binibamɔm mɔmɔk.

1 Korenti 7:19

Lichakpangeel aa kpa tinyoor. Unii yaa kaa gii kan, ni mu aa kpa tinyoor. Ti yaa kii Uwumbɔr aamɔb kan, nima le kpa tinyoor.

2 Korenti 10:18

Unii yaa pak ubaa kan, nima le aa mɔk ke Uwumbɔr aanimbil gbiin u. Uwumbɔr yaa pak unii kan, nima le mɔk ke Uwumbɔr aanimbil sil gbiin u.

2 Korenti 3:6

Uma le tii timi mpɔɔn ke ti tuk binib waah puu tipuupɔln ti na. Taa tuk bi ke bi yaa kaa kii Moses aakaal mɔmɔk kan, bi ga kpo. Ti tuk bi ke Uwumbɔr Aafuur Nyaan le ga tii bi limɔfal. Ba pu? Moses aakaal mɔk timi ke ti ŋeer nkun, Uwumbɔr Aafuur Nyaan le tii timi limɔfal.

Ikaal 10:16

Nima pu na, n‑yoonn mue ki joo cha, ni kii Uwumbɔr aamɔb, ki di cha nimi aatafalaaŋun ngbaan.

Ikaal 30:6

Nidindaan Uwumbɔr ga tii nimi ni niyaabitiib nsui mu kpa limɔkiir na, nima kan, ni ga li gee u nisui ni mbamɔm, ki li bi kitiŋ ngbaan ni.

Filipi 3:3

Timi bi kpaan Uwumbɔr Aafuur Nyaan chee ki pak u, ki kpa kipupuk Yesu Kristo pu, ki bee ke taan ŋmar tibaa aapɔɔn pu na, timi le kpa lichakpangeei bamɔnn.

1 Tesalonika 2:4

N‑yoonn mɔmɔk ti nan len Uwumbɔr aah ban ke ti len pu na; ba pu? u nan lik taah bi pu na, le ki di waabɔnyaan ngbaan ŋa tiŋaal ni, ke ti tuk binib. Nima pu le ti ban ke ti piir Uwumbɔr aasui, naa ye binib aasui. Uma Uwumbɔr le lik timi aasui ni aah bi pu na.

1 Piita 3:4

Tiwan ni ga cha ni li ŋan na le ye mbimbin mu ŋan na. Ni yaa kpa mbimbin suuna kan, nima le ye kinyaan ki kaan fir, ki ŋan sakpen Uwumbɔr chee na.

1 Samuel 16:7

Le Uwumbɔr bui u ke, “Taa lik waah fɔk ki ŋan pu na pu. M yii u; ba pu? maa dak ke unibɔn aah dak pu na. Unibɔn lik tiwon la, le m ma lik unii aasui ni.”