Tibɔkpiirkaan 6:12 - Uwumbɔr aagbaŋ

¹² Le m kan Upihbo ngbaan ki chuu dabr ndam loloob. Le kitiŋ deŋ sakpen. Le nwiin bɔln ke likekebɔln na. Le uŋmal mann ke nsin na.

UWONBƆR A GBƆNPƆŊ LIKƆƆNL

¹² Le n lig ki kan waah tabir kuwan tabin waŋ kan kpiɛ miloobin. Le kutingbɔŋ dam takpem. Nween labir libunbɔnl ki nann botu a kinkenl lan wee bi ta tiŋɔɔkor ki naan nin, le uŋmal mu mann ke nchamin,

Tibɔkpiirkaan 6:12 ပူးပေါင်းရင်းမြစ်များ

Aisaya 24:23

Uŋmal ga bɔnn, le nwiin aan ki li wiin; ba pu? Uwumbɔr Mpɔɔnsakpiindaan ga ŋa ubɔrkpaan. U ga li ye Jerusalem u bi Sionn aajool pu na aabɔr, le binib ngbaan aaninkpiib ga kan waah nyuun sakpen pu na.

Aisaya 29:6

Libuul ngbaan ni, le Uwumbɔr Mpɔɔnsakpiindaan ga gaa nimi lii. U ga cha utaal gben, le kitiŋ mu ga deŋ. U ga cha kibuŋ ki pɔɔ na ni imii dan;

Aisaya 34:4

Nwiin, ni uŋmal, ni iŋmabi mɔmɔk ga ker lir ni kitiŋ ki kpaln titan. Kitaapaak ga kpab buen ke baah kpab nkan pu na, le iŋmabi ker lir ni ke ŋikakan aafar ti kuur na aah ker lir ni kitiŋ pu na.

Aisaya 50:3

M ga ŋmaa cha kitaapaak bɔln, ke kaah bi wii binib bi kpo na aakpowiil le na.”

Joel 2:10

I yaa choo kan, kitiŋ deŋni la, le kitaapaak jii. Nwiin ni uŋmal mɔmɔk bɔnn chirm, le iŋmabi aa ki wiin.

Joel 3:15

Nwiin ni uŋmal ga bɔln, le iŋmabi aan ki li wiin.

Amos 1:1

Tibɔr ti Amos u ye upihkpaal ki nyan ni Tekoa aatiŋ ni na nan len na sɔ. Ŋibin ŋilee waahr aan kitiŋ nin deŋ na, n‑yoonn ngbaan le Usia nan ye Juda aabɔrkpaan aan Jehoas aajapɔɔn Jeroboam mu nan ye Israel aabɔrkpaan na, le Uwumbɔr nan kpiir Israel aatiŋ aabɔr timina mɔmɔk tuk Amos.

Amos 8:9

N‑yoonn choo le nwiin ga lir liwinjakal pu, le dulnyaa bɔnn liwiyil pu. Min Nidindaan Uwumbɔr le len kina.

Sekaria 14:5

Kifataŋ ki yakr lijool limina nfum mulee na ponn ni, le ni ga dii ki san ŋmar. Ni ga san ke kitiŋ aah nan puu, Juda aabɔr Usia aayoonn, aan niyaajatiib nan san pu na. Ndindaan Uwumbɔr ga joo ni waatuuntiib mɔmɔk ki dan.

Matiu 11:21

U nan len ke, “Korasinn aatiŋ aanib, tibɔbir bi ni pu. Betseda aatiŋ aanib, tibɔbir bi ni mu pu; ba pu? m yaa ba nan tun lijinjiir aatun Taya aatiŋ ponn ni, ni Saidonn aatiŋ ponn ni ke maah tun ni ponn ni pu na kan, bi ba ga kpeln baabimbin ni yunn a, ki li pee tiwanpeenkaan ni saak kuub na, ki di nfatan puk biyil, aan ki mɔk ke bisui bii baatunwanbir pu.

Matiu 24:29

“N‑yoonn ngbaan aafalaa aapuwɔb, le paacham aawan aan ki li bi mbamɔm. Nwiin ga bɔln. Uŋmal mu aan ki li wiin. Iŋmabi mu ga lir.

Matiu 24:7

Linibol libaa ga to linibol liken butɔb. Nnaan mubaa aanib ni nnaan muken aanib ga to tɔb butɔb. Nkon ga lir ntim pam ponn ni. Kitiŋ ga deŋ ŋipepel pam.

Matiu 27:45

Nwiin kaasisik ni le itingbaan mɔmɔk bɔln, ki ti saa nwiin aah kpar pu na.

Matiu 27:54

Butɔb aajab aaninkpel, ni binib bi bi u chee ki si kii Yesu na aah kan kitiŋ aah deŋ pu na, ki kan tiwan nimɔk ŋa na, le ijawaan chuu bi sakpen. Le bi bui ke, “Mbamɔn, u sil ye Uwumbɔr Aajapɔɔn la.”

Matiu 28:2

Le kitiŋ deŋ sakpen; ba pu? Uwumbɔr aatuun ubaa nan nyan ni paacham, le ki nan chuu lekr litakpal ngbaan, le ki kal li pu.

Tibɔnyaan ti Mak ŋmee ti na 15:33

Nwiin kaasisik ni, le itingbaan mɔmɔk bɔln, ki ti saa nwiin aah kpar pu na.

Tibɔkpiirkaan 11:13

N‑yoonn ngbaan le kitiŋ deŋ pam. Le kitisakpeŋ ngbaan aadir ligeln kipiik lir kitiŋ. Kitiŋ aah deŋ pu na le ni ku binib ŋichur ŋilole. Binib bi gur kaa kpo na, ijawaan chuu bi sakpen, le bi nyuŋ Uwumbɔr u bi paacham na.

Tibɔkpiirkaan 16:18

Le utaal moor, kifuuk mu faa, le utaal teen, le kitiŋ deŋ sakpen ki ti nyaŋ. Uwumbɔr aah nan naan binib buyoonn na, kitiŋ aa nan deŋ sakpen ke kaah deŋ n‑yoonn ngbaan sakpen pu na.

Tibɔkpiirkaan 16:8

Le Uwumbɔr aatuun nanar mu di falaa u bi waasambil ni na kpir nwiin pu. Le Uwumbɔr cha mu seer binib ke mmii aah seer pu na.

Tibɔkpiirkaan 8:12

Le Uwumbɔr aatuun nanar mu pii waakakaan. Le nwiin ligetatar chuu gii ki bɔln. Uŋmal ligetatar, ni iŋmabi ligetatar mu chuu gii ki bɔln. Le nwiin ligetatar aa wiin. Kinyeek ligetatar mu aa wiin.

Tibɔkpiirkaan 8:5

Le Uwumbɔr aatuun ngbaan moo mmii mu bi kitork aabimbiln paab na gbiin tulalee aayon aasambil ngbaan, le ki di mee yaa dulnyaa wee ponn ni. Le kifuuk faa, le utaal tar ki moor, le kitiŋ deŋ.