Nnyam 14:12 - Uwumbɔr aagbaŋ

¹² Taah nan ban ti nya na, taa nan tuk si ke kina ga ŋa aa? Ti nan tuk si ke aa cha ti li bi Ijipt yaab chee ki li ye baanaagbiib. Ti yaa ba ye binaagbiib kan, ni ba ga li soor ti pu ni taah ga kpo nteersakpiin mue ni fam pu na.”

Nnyam 14:12 ပူးပေါင်းရင်းမြစ်များ

Ilahn 106:7

Tiyaajatiib aah nan bi Ijipt aatiŋ ni na, baa nan bee Uwumbɔr aatukpaan aatataa; bi nan suln waah mɔk bi waageehm kaa ti ki nyi mumɔk pu na, le ki yii waamɔb Limɔɔkal Aanyusakpem na chee.

Nnyam 13:17

N‑yoonn mu Ijipt aabɔr ngbaan nan tii nsan ke binib ngbaan nya ki li cha na, Uwumbɔr aa nan cha bi dii Filistia aasan, nsan ngbaan mu le nan geei kaa daa. Uwumbɔr nan dakl ke, “Maa ban binib ngbaan kpeln baalandak ki gir buen Ijipt aatiŋ ni buyoonn bi kan ke bi ga to butɔb nsan ni na.”

Nnyam 3:9

Mbamɔn, m ŋun maanib aah wii pu na, m kan Ijipt yaab aah ŋani bi falaa pu na.

Nnyam 5:21

Bi nan bui Moses ni Aaronn ke, “Uwumbɔr kan naah ŋa tiwan ni na, ki ga daa nitafal, nimi le cha ubɔr ni waaninkpiib nan timi. Nimi le tii bi nsan ke bi ku timi.”

Nnyam 6:9

Moses nan tuk Israel yaab Uwumbɔr aah len pu na, le baa nan ŋun tii u; ba pu? bisui nan bii pam, baah nan bi tinaagbiir ni aan Ijipt yaab ŋani bi mbiin pu na.

Hosea 4:17

Ŋiwaa le chuu Israel aanib. Cha bi li dii baah gee nsan mu na.

Jona 4:3

Uwumbɔr, cha m kpo. M yaa ba tee kpo kan, ni ba soor ni ke m li kpa limɔfal.”

Jona 4:8

Nwiin aah puu na, le Uwumbɔr cha liwipuul wɔb aabuln li ton na dan, le ki nan see Jona aayil, le u ti ban u fik. Le u mee Uwumbɔr ke u ba kpo. U nan bui ke, “M yaa ba tee kpo kan, ni ba soor ni ke m li kpa limɔfal.”

Tibɔnyaan ti Mak ŋmee ti na 1:24

le ki teen ke, “Sin Yesu u ye Nasaref aatiŋ aanii na, aa ban ba ti chee? Aa dan aa nan ŋa timi fam la aa? M nyi si. Aa ye Uwumbɔr aanii u ye chain na la.”

Tibɔnyaan ti Mak ŋmee ti na 5:7

Le Yesu bui ke, “Tiyayaar, nyan uja ngbaan ni.” Le u teen ki len mpɔɔn pu ke, “Yesu, si u ye Uwumbɔr u kaa kpa ŋeen aatɔ na Aajapɔɔn na, aa ban ba m chee? M gaŋ si Uwumbɔr pu, taa ŋa mi falaa.”