Nkahm 16:22 - Uwumbɔr aagbaŋ

²² Le Moses ni Aaronn tar lir kitiŋ bipuu pu, ki gaŋni, ki bui ke, “Uwumbɔr, sin le ye umɔfadaan. N‑yoonn mu unibaan ti tun titunwanbir na kan, aa geer binib ngbaan mɔmɔk pu liŋuul la aa?”

Nkahm 16:22 ပူးပေါင်းရင်းမြစ်များ

Mpiin 18:32

Abraham nan ki bui ke, “Ndindaan, m gaŋ si, taa gee liŋuul m pu, ki cha m len kookoo aabɔr tee aa chee. Nibaakan bi yaa pii binib kipiik baanja kan.” Uwumbɔr nan ki bui u ke, “Bi yaa pii kipiik kan, maan bii kitiŋ ngbaan.”

2 Samuel 24:1

Uwumbɔr nan ki gee Israel yaab pu liŋuul, le ki cha David ban tibɔr tii bi. Uwumbɔr nan bui u ke, “Li cha ki ti kahn Israel ni Juda aanib.”

2 Samuel 24:17

David nan kan ntuun mu bi ku binib ngbaan na, le ki bui Uwumbɔr ke, “Min le ye u aabɔr bii na. Min le tun taani. Bigiim bee mu ŋa ba? Aa ga daa min ni maadichal aatafal la.”

Job Aagbaŋ 12:10

Uwumbɔr le joo waawanaankaan aamɔfal; unibɔn mɔk aamɔfal bi uma le aapɔɔn ni.

Ilahn 99:6

Moses ni Aaronn le nan ye waatotoorb, le Samuel nan ye unii u mee u na; bi nan yin Uwumbɔr, le u kii baayim ngbaan.

Ulandaan 12:7

Timi aawon ga ki gir kpaln kitiŋ aatan, le limɔfal aafuurk ga gir buen Uwumbɔr u di li tii timi na chee.

Aisaya 57:16

M tii maanib limɔfal, kina pu na, maan ki galn bi ki gee liŋuul bi pu ki ti saa n‑yoonn mu kaa kpa ndoon na. M yaa ŋa kina kan, bi ga fik.

Jeremia 32:27

“Min le ye Uwumbɔr, u ye unii mɔmɔk Aawumbɔr na. Nibaa aa pɔɔ m chee.

Jeremia 38:16

Le Ubɔr Sedekia nan loon ki puu tii mi ke, “M puu Uwumbɔr u bi, ki tii timi limɔfal na, ke maan ku si, kaan di si tii binib bi ban bi ku si na.”

Esekiel 18:4

Unii mɔmɔk aamɔfal ye min yaan la, min le yeh tetiib ni natiib, ni baabim aamɔfal. Unii u tun titunwanbir na, uma le ga kpo.

Liifai Yaab 10:6

Moses nan ki bui Aaronn ni ujapɔtiib bilee bi gur ki bi, aan bi yin bi ke Eleasar ni Itamar na ke, “Ni toor nimi aayikpir, ki taa kar nimi aawanpeenkaan, ki taa cha nisui bii ninaabitiib ngbaan pu. Ni yaa cha nisui bii bi pu kan, ni mu ga kpo; le Uwumbɔr ga gee liŋuul ŋa Israel yaab mɔmɔk pu. Tɔ, nido yaab Israel yaab bi gur na wii baakpuul, Uwumbɔr aah cha mmii ku ninaabitiib na pu.

Liifai Yaab 4:3

Utotoorninkpel le yaa tun titunwanbir le ni ga joo ni ntafadaan binib pu kan, u di unaaja u ŋan na toor kitork tii Uwumbɔr, waatunwanbir ngbaan pu.

Sekaria 12:1

Uwumbɔr aah nan len Israel aabɔr ti na sɔ. Uma le ye Uwumbɔr u taln kitaapaak na. Uma le naan kitiŋ, le ki tii unibɔn limɔfal. U len ke,

Nkahm 14:5

Le Moses ni Aaronn lir gbaan Israel yaab aanib mɔmɔk aanimbiin ni.

Nkahm 16:23

Le Uwumbɔr bui Moses ke,

Nkahm 16:4

N‑yoonn mu Moses ŋun kina na, le u gbaan kitiŋ ki mee Uwumbɔr,

Nkahm 16:45

“Foor cha binib ngbaan ki sil nibaa man, aan m kpaan ku bi mɔmɔk libuul ni.” Le bi mɔmɔk bilee tar lir bipuu pu.

Nkahm 27:16

“Ndindaan Uwumbɔr, sin u ye umɔfadaan na, m mee ke aa nyan uja u ga ŋmaa joo binib bee na,

Rom Yaab 5:18

Unibaan aatunwanbir pu, le binib mɔmɔk aabɔr bii. Yesu aatunyaan pu, le Uwumbɔr ga len ke binib bimɔk gaa Yesu ki kii na aabɔr ŋan, ki ga tii bi limɔfal li kaa kpa ndoon na.

1 Korenti 13:7

Unii u gee binib na kpa suklaa n‑yoonn mɔmɔk, ki dakl ilandak nyaan uŋeen aatɔtiib pu, ki kpa limakl n‑yoonn mɔmɔk, ki kpa limɔr falaa mɔmɔk ni.

Hiibru Yaab 12:9

Titetiib bi ma timi na nan dar titafal la, le ti pak bi. Nima le ni ŋan ke ti kii Tite Uwumbɔr u bi paacham na aamɔb ki jer kina, aan ki kan limɔfal.

Josua 22:18

Ni yaa yii Uwumbɔr aamɔb din wee kan, u ga gee liŋuul Israel yaab mɔmɔk pu.