Maika 7:8 - Uwumbɔr aagbaŋ

⁸ Timi aadim aa kpa nsan ke bi li kpa mpopiin timi aafalaa pu. Ti lir la, le ki mu tee ga ki fii. Ti bi mbɔmbɔɔn ni le dandana, le Uwumbɔr ga tii timi nwiihn.

Maika 7:8 ပူးပေါင်းရင်းမြစ်များ

Job Aagbaŋ 31:29

Maa kee kpa mpopiin maadim aafalaa ponn ni, kaa mɔɔni buyoonn tibɔbir kan bi na.

Ilahn 112:4

Bininyaam yaa bi mbɔmbɔɔn ni kan, ni ye nwiihn ŋmeen la; ni ye nwiihn ki tii binib bi san kinimbaak, ki kpa tiŋann, ki si chob na.

Ilahn 143:3

Maadin ban mi, ki chuu mi, ki nyaŋ mi kookoo a. U di mi ŋa kiyondiik bɔmbɔɔn na ni, le m gur bi ke binib bi kpoi n‑yaayoonn na.

Ilahn 20:8

Kina aanib ga gbeer le ki lir, le tima ga fii nyal sil.

Ilahn 27:1

Uwumbɔr le ye maawiihn, uma le gaal mi lir; Maan san ubaa ijawaan. Uwumbɔr kii mi le ki nyani mi linimaln mɔmɔk ni; maan li san ijawaan kpala.

Ilahn 35:19

Taa cha maadim aasui piir maalirm pu; bi ye binyamɔndam la. Taa cha binib bi nan mi fam na laa mi, maasuubiin pu.

Ilahn 37:21

Ubiindaan yaa pinn tiwan kan, waa ki teeni, le uninyaan ma tii waapiin usui mɔmɔk.

Ilahn 37:24

Bi yaa lir kan, baan doon kitiŋ, ba pu? Uwumbɔr le ter bi.

Ilahn 38:16

Taa cha maadim aasui piir maasuubiin pu; taa cha bi li kpa kipupuk maalirm pu.

Ilahn 84:11

Tidindaan Uwumbɔr le ye timi aakikiir, ni timi aabɔr u kpa kipak sakpen na, u ŋani timi tiŋann ki tii timi bunyuŋ. Binib bi aabimbin ŋan na, waa cha bi lanni tiwanyaan nibaa.

Ilahn 97:11

Nwiihn woln binib bi aabimbin ŋan na pu, le mmɔɔn bi bininyaam chee.

Aisaya 2:5

Nimi Jakob aayaabitiib, cha ti li gur chuun man nwiihn mu Uwumbɔr di tii timi na ni.

Aisaya 49:9

M ga bui biyom ke, ‘Li cha man, ni fuur a,’ ki bui binib bi bi mbɔmbɔɔn ni na ke, ‘Dan nwiihn ni man.’ Bi ga li naahn ipiih i ŋmɔ timoor ŋigongon paab na la;

Aisaya 50:10

Nimi bi mɔmɔk pak Uwumbɔr ki kii waatutunn aabɔr na, nibaakan ni ga li chuun isan i bɔɔn na ni, ni mu tee tii Nidindaan Uwumbɔr naadii, ki li mak u pu.

Aisaya 9:2

Nima aanib bi bi mbɔmbɔɔn ni na kan nwiihn sakpiin. Bi nan bi mbɔmbɔɔn ni, le dandana, nwiihn woln bi pu.

Jeremia 48:27

Moab, teer saah nan yuul Israel aanib pu na. Aa nan ŋani bi ke baah ye binaayukb le bi chuu bi na.

Jeremia 50:11

Uwumbɔr len ke, “Babiloŋ aanib, ni nan gaa maatimbol aawangol butɔb ni. Ni kpa mpopiin le ki mɔɔni, le ki chuun ke unaa u bi taa gbaar ŋikalmaan, ni utaan u bi wii na,

Jeremia 8:4

Uwumbɔr nan bui mi ke m tuk waanib ke, “Unii yaa lir kitiŋ kan, waa ki fi sii paacham aa? Unii yaa yenn nsan kan, waa ki fenn upuwɔb aa?

Esekiel 25:6

“Tidindaan Uwumbɔr aah len pu na sɔ: Ni nan faa ibambaan ki fii yuk mpopiin pu. Ni nan lik seen Israel aatiŋ.

Esekiel 35:15

ke aasui aah nan piir Israel aatimbol li ye min yaan na aalirm pu pu na. Seir aajoo, mbamɔn, Edom aatiŋ mɔmɔk ga doon nkuun. N‑yoonn ngbaan le unii mɔmɔk ga bee ke min le ye Uwumbɔr.”

Esekiel 36:5

“Min Dindaan Uwumbɔr le len tibɔbir ŋitimbol ŋi mann goln Israel na pu, ni Edom aatimbol mɔmɔk pu. Maaŋuul ponn ni le m len kina; ba pu? bi nan di mpopiin ni lik‑seen gaa maatiŋ Israel ni kaamoŋmɔpaan.

Amos 9:11

Uwumbɔr ki len ke, “Nwiin mubaa choo, buyoonn m ga ki gir maa Ubɔrkpaan David aanaan mu bi ke lidichal li ber doo na. M ga ki gir fiin mu. M ga ki fiin mu siin ke mu aah nan bi pu n‑yaayoonn na.

Obadia 1:12

Naa ŋan ke ni ba li mɔɔni buyoonn ninaabitiib Juda yaab kan mpombiin na. Nwiin mundaal bi nan kuln baatiŋ na, naa ba ga nan li kpa mpopiin liyaadaal ngbaan. Naa ŋan ke buyoonn bi nan bi tibɔbir ni na, nimi li bi laa.

Maika 4:10

Jerusalem aatiŋ aanib, li mur fenni ki ker idun ke upii u imalween joo u na, ba pu? ni ga nya kitiŋ ponn ni ki ti li koo timoor ni. Ni ga buen Babiloŋ aatiŋ ni; le Uwumbɔr ga ti tee gaa nimi, nimi aadim chee lii nima.

Maika 7:10

Timi aadim ga kan nimina, le ki ji inimɔɔn, bidimbaam bi nan ŋani timi yaansara ki bui ke, “Nidindaan Uwumbɔr bi la?” na. Ti ga kan binib aah nyaŋ bi pu na, ki taa bi bil kitiŋ ke tikpakpar na.

Sekaria 12:8

N‑yoonn ngbaan kan, Uwumbɔr ga li kii binib bi bi Jerusalem ponn ni na, le ki cha udaburdaan u ŋmal bi ni na pɔɔk, ke David aah nan bi pu na. David aayaabitiib le ga loln bi pu nsan ke Uwumbɔr aatuun na. U ga loln bi pu nsan ke Uwumbɔr ubaa na la.

Malakai 4:2

Le nimi bi kii maamɔb na, m ga di maaŋmarm aapɔɔn biin ni pu ke nwiin na, ki sɔŋ nimi aaween ke nwindam na. Ni ga ŋmar ki li kpa mpopiin ke inaabi i bi gbinn i lii na la.

Matiu 4:16

nima aanib bi bi mbɔmbɔɔn ni na kan nwiihn sakpiin. Binib bi bi mbɔmbɔɔn ni, ki san nkun ijawaan na, nwiihn woln bi pu.”

Jɔnn 16:20

M tuk nimi mbamɔn la, nimi le ga li kaani ki wii; dulnyaa aanib ma ga li kpa mpopiin. Ni ga li kpa mpombiin; nimi aapombiin ngbaan mu ga nan kpaln mpopiin.

Jɔnn 8:12

Yesu nan ki len kinipaak ngbaan chee ki bui bi, “Min le ye dulnyaa ni aawiihn ki wolni binib aanimbil. Unii umɔk dii mi na aan li bi mbɔmbɔɔn ni. U ga li kpa limɔfal, ki ga li bi nwiihn ni.”

Lituln 26:18

aan ki ti tuk bi maaliin, ki cha binimbil woln, ki nyan bi mbɔmbɔɔn ni, ki cha bi li bi nwiihn ni, ki nyan bi kinimbɔŋ aaŋaal ni, ki di bi ŋa Uwumbɔr aaŋaal ni, aan ki cha bi gaa min Yesu ki kii, aan Uwumbɔr di cha pinn bi baatunwanbir, ki ŋa bi waanib ponn ni bibaa, baah gaa min Yesu ki kii pu na pu.’”

2 Korenti 4:6

Uwumbɔr u nan len ke “Cha nwiihn woln mbɔmbɔɔn ni” na, uma le woln tinimbil, ke ti bee waah ŋan sakpen pu na. Yesu Kristo aabimbin aah bi pu na le mɔk timi Uwumbɔr aah ŋan sakpen pu na.

2 Korenti 4:9

Binib ŋani timi falaa, le Uwumbɔr aa di cha timi. Bi lii timi kitiŋ, ki mu aa ku timi.

Tibɔkpiirkaan 21:23

Kitiŋ ngbaan aa ban nwiin ni uŋmal li wiin ki ponn ni; ba pu? Uwumbɔr aah wiin pu na woln ki ponn ni. Kaakaryaa ye Upihbo ngbaan la.

Tibɔkpiirkaan 22:5

Kinyeek aan ki li bi. Baan li ban karyaa, kaan li ban nwiin; ba pu? Tidindaan Uwumbɔr le ga li wiin bi pu. Bi ga li ye bibɔrb ki cha n‑yoonn mu kaa kpa ndoon na.