Maika 4:13 - Uwumbɔr aagbaŋ

¹³ Uwumbɔr bui ke, “Jerusalem aanib, li cha ti daa nimi aadim aatafal man. M ga cha ni li pɔɔ ke unaaja u kpa tikur aayiin ni tikumann aataabuseen na. Ni ga ber ŋitimbol pam, le baah di mpɔɔn kan liwangol li na, ni ga joo ni li nan tii min, u ye dulnyaa mɔmɔk Aawumbɔr na.”

Maika 4:13 ပူးပေါင်းရင်းမြစ်များ

Ilahn 24:1

Uwumbɔr le yeh dulnyaa, ni tiwan nimɔk bi u ponn ni na; kitiŋ kee, ni bi mɔmɔk bi ki pu na ye u yaab la.

Ilahn 68:29

ki nyan Saadichal li bi Jerusalem ponn ni, nin chee bibɔrb joo ni si baapiin na.

Ilahn 72:10

Speenn aatiŋ, ni ŋidik pu aabɔrb ga tii u ipiin; Arabia ni Itiopia aatim aabɔrb ga joo ni ipiin.

Aisaya 18:7

N‑yoonn choo le Uwumbɔr Mpɔɔnsakpiindaan ga nan gaa ipiin nyan ni kitiŋ ki ŋimɔɔ yakr ki na chee, litimbol ngbaan le kpa mpɔɔn ki pɔɔ, le ki kpa binib bi fɔk, aan biwon joon kpal kpal, aan dulnyaa wee aanib san bi ijawaan na. Bi ga li joo ni ipiin ngbaan ki dan Sionn aajool pu, nin chee bi dooni Uwumbɔr Mpɔɔnsakpiindaan na.

Aisaya 21:10

Maanib Israel yaab, bi poi nimi ke idi na la, le dandana m ban m moon ki bui nimi tibɔnyaan ti m ŋun Uwumbɔr Mpɔɔnsakpiindaan chee na; uma le ye nimi Israel yaab Aawumbɔr.

Aisaya 23:18

Bi ga di ŋimombil ŋi bi kani kitiirk ni na di tii Uwumbɔr. Baan ki di ŋi bil; le binib bi dooni Uwumbɔr na ga gaa baamombil ngbaan ki di daa tijikaar ni tiwanpeenkaan ni bi ban na.

Aisaya 5:28

Baapiin ka, le bi gor baatɔi ke bi too. Baataan aataabuseen pɔɔ ke lichachatakpal na, le baataan aatɔroku tiib aataa manni mala mala ke kinaakpaajabuŋ na.

Jeremia 51:20

Uwumbɔr len ke, “Babiloŋ, sin le ye maagagaar, sin le ye maajawan ti m joo to butɔb na. M joo sin le wiil ŋitimbol ni nnaan,

Jeremia 51:33

Naan yunn le baadim ga nyaŋ bi ki taa taa bi bil ke baah poi ŋikalmaan lipaal pu pu na. Min Uwumbɔr Mpɔɔnsakpiindaan, u ye Israel yaab Aawumbɔr na, le len kina.”

Daniel 2:44

Bibɔrb ngbaan aapuwɔb le Uwumbɔr u bi paacham na ga siin nnaan mu kaan li kpa ndoon na. Ubaa aan ŋmaa nyaŋ mu butɔb ni, le muma tee ga kuln nnaan mɔmɔk ki li bi ki cha n‑yoonn mu kaa kpa ndoon na.

Hosea 10:11

“Israel nan bi n‑yoonn mubaa ke unaasal u bi bae tiwan mbamɔm na la, le ki gor kii ke u poi idi. Le m nan di ndɔ puin usil mu ŋan na pu, le ki di iŋmin pui u ke u tun lituln li pɔɔ jer kina na. M cha Juda dar ŋikujal, le ki cha Israel dar nkucham.

Maika 5:7

Israel aanib bi ŋmar na ga li naahn limaln li Uwumbɔr tun ni li na le ŋitimbol pam chee, ki naahn utaal u pui tijikaar pu na. Bi ga li bi Uwumbɔr pu la, naan li ye unibɔn pu.

Habakuk 3:12

Aa nan di liŋuul bɔ dii kitiŋ kee pu; le saaŋuul ponn ni aa taa taa ŋitimbol pu.

Sekaria 12:3

Tɔ, n‑yoonn ngbaan yaa nan fuu ni kan, m ga cha Jerusalem nyuŋ ke litakpal sakpeln na. Le litimbol li pɔɔn libaa ke li yoor li na kan, li kan titotonn. Dulnyaa aatimbol mɔmɔk ga kuun nan kpaan ke ŋi tak Jerusalem.

Sekaria 12:6

“N‑yoonn ngbaan kan, m ga ŋa Juda aataŋaal ke kichook ni aamii na la, bee mmii mu bi njikaabim mu kuur na aakpaab ni pu na la. Bi ga kuln ŋitimbol ŋi mɔmɔk mann goln bi na. Jerusalem aanib ga li bi lifuur ni, baatiŋ ponn ni.

Sekaria 4:14

Le u bui mi ke, “Ima le ye bijab bilee bi Uwumbɔr, u ye kitiŋ kee mɔmɔk Aawumbɔr na, nyan bi ke bi li tun waatuln na.”

Sekaria 6:5

Le u gar mi ke, “Itaan aatɔroku tiib binaa ngbaan le ye libuln ki nyani liwipuul, ni liwilir, ni ŋŋangan, ni ŋŋangii wɔb na, li laa nyan ni Uwumbɔr u yeh kitiŋ kee mɔmɔk na aanimbiin ni la.

1 Korenti 16:2

Likpaakool daal mɔmɔk, ni mɔmɔk aah kan tinyoor pu na, ni di ngem bil, ki li kii buyoonn m ga labr ni na. Nima kan, m yaa nan fuu ni kan, naan ki piin ki li too ŋimombil.

Ikaal 33:25

Uwumbɔr li kii nimi aatim ke baah di tikur aajaaleŋ tiib le kiir mu na, aan ni li pɔɔ ki ti saa nimi aakundaal.”

Josua 6:19

Tiwan nimɔk bi di tikunabr, bee salmaa, bee tikumann, bee tikur ŋa ni na, ni di ni nan tii Uwumbɔr. Ni di tiwan ngbaan mɔmɔk ki di ŋa Uwumbɔr Aabool ni.”