Maika 3:11 - Uwumbɔr aagbaŋ

¹¹ Igaŋgaŋlik pu le kitiŋ ngbaan aajojoob joo ki, le bitotoorb tuk binib Uwumbɔr Aakaal ki gaal tipar, le bibɔnabr mu kpiir Uwumbɔr aah len pu na ŋimombil pu, le bi mɔmɔk len ke Uwumbɔr bi ti chee. Bi len le ke, “Tibɔbir tibaa aan dan ti chee. Uwumbɔr bi ti chee.”

Maika 3:11 ပူးပေါင်းရင်းမြစ်များ

Ŋiyataŋak 17:23

Bibɔjirb bi kpa beebee na looni gaal igaŋgaŋlik la, kina pu na, mbamɔn aan ŋmaa ŋa.

Aisaya 1:23

Saayidam ye binib bi kaa kii maamɔb na la, ki ye binaayukb aajɔtiib, le ki gaal ipiin, ni igaŋgaŋlik n‑yoonn mɔmɔk. Baa ter nkpobim buyoonn bi bi tibɔr ni na, kaan pel bikpopiib aabɔr buyoonn bi di ti fuu ni bi chee na.

Aisaya 48:2

Le ni tee mak ke ni ye Uwumbɔr aatisakpeŋ aanib la, le ki tii Israel yaab Aawumbɔr naadii; waayimbil le ye Uwumbɔr Mpɔɔnsakpiindaan.

Aisaya 5:23

Le buyoonn ni yaa kan igaŋgaŋlik na, ni di binib bi aabɔr aa ŋan na di lii, le kaa tii binib bi aabɔr ŋan na baabamɔn.

Aisaya 56:11

Bi naahn ibɔ i kaa ji babr na la. Bi ye bisalolm bi kaa kpa nlan na. Bi mɔmɔk ŋani baah gee pu na la, le ki ban bibaa aanyaan.

Jeremia 23:17

Bi tuk binib bi yii kaa pel maah len pu na ke nibaa aan ŋa bi, le ki tuk binib bimɔk kpa tafalaaŋun na ke tibɔbir aan dan bi pu.”

Jeremia 26:7

Bitotoorb, ni bibɔnabr, ni binib ngbaan mɔmɔk ŋun m bi len nimina mɔmɔk Uwumbɔr Aadichal ni,

Jeremia 5:12

Uwumbɔr aanib yii u ki bui ke, “Mbamɔn, waan sil ŋa nibaa. Tibɔbir aan dan ti pu; butɔb ni nkon aan lir ti pu.”

Jeremia 6:13

Binib bi pɔɔ na, ni bi kaa pɔɔ na mɔmɔk pɔɔni bibaa ke bi di beebee le kan ŋimombil, hali maabɔnabtiib ni bitotoorb ji binib ngbaan la.

Jeremia 7:4

Taa ki len n‑yoonn mɔmɔk ‘Uwumbɔr Aadichal sɔ, Uwumbɔr Aadichal sɔ, nima pu le ti kpa ŋŋmarm.’ Ni ŋmanni nibaa la. Uwumbɔr Aadichal aan nya nimi ntafadaan ni.

Jeremia 8:10

Kina pu le m ga di baakpaakon tii bikpaacham, ki di bipuutiib tii bijab biken. Binib bi pɔɔ na, ni bi kaa pɔɔ na mɔmɔk pɔɔni bibaa ke bi di beebee le kan ŋimombil. Hali maabɔnabtiib ni bitotoorb ji binib la.

Esekiel 22:12

Saanib bibaa ku binib le ki gaal tipar. Biken gaal ŋimombil paani baah pinn pu tii biŋeen aatɔtiib Israel yaab biken na, le ki kani kina aajinjin pu ŋimombil. Bi suln mbɔr.” Bidindaan Uwumbɔr le len kina.

Esekiel 22:27

Kitiŋ aaninkpiib naahn takɔ tiib la, le ki dar par baah ku tinann ti na. Bi ku binib le ke bi kan ŋimombil.

Esekiel 34:2

U nan bui ke, “Unibɔn, len tibɔbir Israel aajojoob pu. Nabr maabɔr tuk bi, ki bui bi min Bidindaan Uwumbɔr aah tuk bi pu na: Nimi Israel aapihdam, nimɔfal junn a. Ni kpiini nibaa la, kaa kpiini ipiih na.

Hosea 4:18

Bi yaa ti nyun ndaan bab kan, le bi fii lir kidagook pu, le ki neen inimɔɔn n‑yoonn ngbaan ki jer kipak.

Hosea 4:8

Maanib aatunwanbir pu le ni moo kani titunwanbir aatork aawangol, le ki ban ke bi li moo tun titunwanbir.

Amos 5:14

Cha tiwan ni ŋan na li ye tiwan ni ni ban na, ki taa li ban kinimbɔŋ aabɔr, ki li kpa limɔfal; le Uwumbɔr Mpɔɔnsakpiindaan ga sil li bi ni chee, ke naah len ke u bi ni chee pu na.

Amos 9:10

Titunwanbirdam bi ŋmal maanib ni na ga kpoi butɔb ni, binib bi mɔmɔk len ke, ‘Uwumbɔr aan cha kinimbɔŋ duun ni timi’ na ga kpoi.”

Maika 3:5

Baabɔnabr bi gaal tipar na le ŋmann maanib ke nsuudoon bi bi chee, le ki faani binib bi kaa pa bi na ke butɔb choo. Uwumbɔr bui bibɔnabr ngbaan ke,

Maika 7:3

Bi mɔmɔk ye binib bi nyi titunwanbir aatuln na la. Ŋitun aaninkpiib, ni bibɔlem ban igaŋgaŋlik la. Binib bi kpa mpɔɔn na len baah ban pu na la, le bi kpaani ki kpokl.

Sefania 3:3

Kaaninkpiib bi ke ichinn i ŋuuni na la; le kaabɔjirb naahn takɔ tiib bi nkon joo bi na, kaan ŋmaa mɔr ke likpabl li dɔ ki ti woln kitaak.

Sefania 3:4

Uwumbɔr aabɔnabr bi bi ki ponn ni na kpa kigaak kaa kpa mbamɔn; le bitotoorb bii tiwan ni bi chain na, le ki fenn Uwumbɔr aakaal diir baah gee niwɔb na.

Malakai 1:10

Uwumbɔr Mpɔɔnsakpiindaan ki bui ke, “M ba neen ke ni ponn ni ubaa laŋ Maadichal aajaaleŋ tiib, aan ni taa ki ŋmaa koo ki ti tuur mmii mu kaa kpa tinyoor tibaa na maatork aabimbiln paab. Nsui aa piin ni pu; maan gaa ipiin i ni joo nan tii mi na.

Malakai 2:9

Ni yii, kaa kii maa ban pu na. Ni yaa ji maanib tibɔr kan, ni ganni la. Nima pu na, m mu ga cha Israel yaab lik seen nimi.”

Nkahm 16:15

Moses nan gee liŋuul sakpen, le ki bui Uwumbɔr ke, “Binib bee yaa joo ni baapiin kan, taa gaa i. Maa ŋa bi taani ubaa, ki mu aa gaa baabon ubaa.”

Nkahm 22:7

Nima na, Moab yaab, ni Midiann yaab aayidam nan ban ŋimombil ŋi bi ga ti di pa tipuur ngbaan pu na, le ki buen Balaam chee ki ti bui u Balak aabɔr ngbaan.

Matiu 3:9

ki taa bui ke niyaaja aah ye Abraham na, nima le ga cha ni nyan ntafadaan ni. M tuk nimi la, Uwumbɔr ga ŋmaa di ŋitakpal ŋimina kpaln Abraham aayaabitiib,

1 Timoti 3:3

U taa li ye udagbiir, ki taa gbaa binib [ki taa li kpa iniman]. U li bi suuna ki taa li kpa kinikpakpak. Unimbil taa li man ŋimombil pu.

Taitus 1:11

Ni ŋan ke aa cha bi ŋmin; ba pu? bi mɔk binib mmɔkm mu kaa ba ye bi mɔk bi na, ki cha ŋidichal ŋibaa ponn ni aanib mɔmɔk yenn. Ŋimombil pu, le bi ŋani kina. Naa ŋan.

1 Piita 5:2

ni li ter Uwumbɔr aanib bi bi nido na, ke upihkpaal aah lik waapiih pu na. Ni taa ter bi limukl aaterm. Ni li ter bi nimi aageehn, Uwumbɔr aah ban pu na. Ni taa ter bi ŋimombil pu, ni li ter bi ni mpopiin.

Juud 1:11

Tibɔbir bi bi pu la. Bi yii Uwumbɔr aamɔb ke Keenn aah nan yii pu na. Bi mɔk binib mmɔkm mu kaa ŋan na ŋimombil pu, ke Balaam aah nan ŋa pu na. Bi yii baaninkpiib aamɔi ke Kora aah nan yii pu na. Uwumbɔr ga bii bi mu.

1 Samuel 8:3

Bi mu aa nan tee dii bite aasan. Baalandak nan ye le ke bi kan ŋimombil, kina pu na, bi nan gaal igaŋgaŋlik, kaa nan ji tibɔr mbamɔm.