Jona 3:4 - Uwumbɔr aagbaŋ

⁴ Jona nan piin ki bɔ dii kitiŋ ngbaan ponn ni, le waah chuun nwimɔn aasachuln na, le u mooni tuk binib ngbaan ke, “Joo cha ni iwiin imonko ilee na, Ninefa aatiŋ ga kuln.”

Jona 3:4 ပူးပေါင်းရင်းမြစ်များ

2 Bibɔrb 20:1

N‑yoonn mumina le ubɔrkpaan Hesekia nan buŋ ki ti gur siib u kpo. Uwumbɔr aabɔnabr Aisaya, u aate nan ye Amos na nan buen u ti mann u, le ki ti bui u ke, “Uwumbɔr bui ke, ‘Gor tiwan mɔmɔk, ba pu? saan ŋmar. Gor ki li kii nkun.’”

2 Bibɔrb 20:6

M ga di ŋibin kipiik ni ŋiŋmu kpee saamɔfal pu. M ga gaa si ni Jerusalem aatiŋ kimina Asiria aatiŋ aabɔrkpaan ngbaan chee lii. M ga li kii kitiŋ kimina, mbaa aanyuŋ pu, ni maah nan puu tipuur ti tii maatutunn David na pu.”

Aisaya 30:18

Nee mɔmɔk pu na, Uwumbɔr beenin si kii ke u san nimi kinimbaak. Waah tun ni ŋan na pu na, u gor ke u san nimi kinimbaak. Binib bi di bibaa tii Uwumbɔr na kpa mpopiin.

Jeremia 42:10

‘Ni yaa ban ke ni li beenin bi kitiŋ kimina pu kan, m ga maa nimi ŋidichal ki taa bii nimi, m ga cha ni moo chɔbaan ki taa ki kpokl lir. Maah nan cha libiil li dan ni pu na tii mi mpombiin pam.

Jona 3:10

Uwumbɔr nan kan baah ŋa pu na; u nan kan ke bi di cha baabiin aabimbin, kina pu le u kpeln waalandak kaa ki daa bitafal ke waah ba ga daa pu na.

Matiu 12:41

Jona nan tuk Ninefa aatiŋ aanib Uwumbɔr aabɔr. Le bi kpeln baabimbin. Min, u jer Jona na, le tuk nimi Uwumbɔr aabɔr, le naa kpeln nimi aabimbin. Bundaln Uwumbɔr ga ji binib tibɔr na, Ninefa aatiŋ aanib aah nan kpeln baabimbin pu na, nima le ga mɔk ke nimi aabɔr bii.

Tibɔnyaan ti Luk ŋmee ti na 11:30

Uwumbɔr aah nan ŋa Jona pu na, ni nan ye limɔkl le ki tii Ninefa aatiŋ aanib. Kina le waah ga ŋa min Unibɔn Aabo pu na ga li ye limɔkl ki tii dandana aanib ngbaan.

Tibɔnyaan ti Luk ŋmee ti na 11:32

Jona nan tuk Ninefa aatiŋ aanib Uwumbɔr aabɔr, le bi kpeln baabimbin. Min, u jer Jona na le tuk dandana aanib Uwumbɔr aabɔr, le baa kpeln baabimbin. Bundaln Uwumbɔr ga ji binib tibɔr na, Ninefa aatiŋ aanib aah nan kpeln baabimbin pu na, nima le ga mɔk ke dandana aanib aabɔr bii.”

Ikaal 18:22

Ubɔnabr yaa nabr tibɔr aan taa nan gbiin waah len pu na kan, taa ye mbamɔn, le ni mɔk ke taa nyan ni Uwumbɔr chee. Ni mɔk ke ubɔnabr ngbaan len ubaa aageehn aabɔr la. Ni taa san u ijawaan.