Jɔnn 3:16 - Uwumbɔr aagbaŋ

¹⁶ Uwumbɔr aah gee dulnyaa aanib sakpen pu na, nima le u di Ujapɔnbaal tii ni ke unii umɔk gaa u ki kii na taa kpo, u li kpa limɔfal li kaa kpa ndoon na.

UWONBƆR A GBƆNPƆŊ LIKƆƆNL

¹⁶ Mambu Uwonbɔr kaah jiɛ dulinya nan kagin bu le u ta u bija gaŋ sei ti, ke wan ŋa u yada ke waa li kpo, amaa u li kan limiɛfol lan kaa jɔɔ ndiɛmi.

Jɔnn 3:16 ပူးပေါင်းရင်းမြစ်များ

Mpiin 22:12

Le nneel ngbaan bui ke, “Taa ku ubo ngbaan, ki taa ŋa u nibaa. Dandana wee, m bee ke aa san Uwumbɔr ijawaan, ba pu? saa yii ke saan di aajapɔnbaal na ki di toor kitork tii Uwumbɔr.”

Mpiin 22:2

Uwumbɔr nan bui u ke, “Di aajapɔɔn, u ye aajapɔnbaal Aisak, aan aa gee u sakpen na, ki di u buen Moria aatiŋ ni. Nima chee m ga mɔk si lijool libaa paab, aa di u toor kitork tii mi nima chee.”

Aisaya 9:6

Bi ma ubo tii timi. Bi tii timi ubijabo. Le u ga li ye timi aajojoor. Waayimbil ga li ye ke, “Lijinjiir Aasusur,” ni “Mpɔɔn mɔmɔk Aawumbɔr,” ni “N‑yoonn mu kaa kpa ndoon na Aate,” ni “Nsuudoon Aabɔrbo.”

Matiu 9:13

Uwumbɔr Aagbaŋ len ke waa ban ke binib toor kitork baanja ki tii u. U ban ke bi li san tɔb kinimbaak la. Li cha ki ti bae tibɔr ngbaan aatataa. Maa dan ke m nan yin bininyaam. M dan ke m nan yin titunwanbirdam [ke bi nan kpeln baabimbin.”]

Tibɔnyaan ti Mak ŋmee ti na 12:6

Unii ubaa le ti gur u chee. Ujapɔnbaal u, u gee u na le gur. Kookoo yaan le u di ujapɔɔn ngbaan tun bikpaab ngbaan chee, le ki bui ke, ‘Bi ga pak njapɔɔn ma.’

Tibɔnyaan ti Luk ŋmee ti na 2:14

“Cha ti nyuŋ Uwumbɔr u bi paacham na. Lifuur ga li bi dulnyaa wee ni. Uwumbɔr san binib kinimbaak la.”

Jɔnn 1:14

Baah yin u ke Limɔboln na nan kpaln unibɔn, ki nan bi tikaasisik ni. U gee binib chob, ki len ibamɔn baanja la. Le ti kan waah kpa mpɔɔn pu na. Waah ye Uwumbɔr Aajapɔnbaal na, u kpa mpɔɔn ke Ute Uwumbɔr aah kpa pu na.

Jɔnn 1:18

Ubaa aa kee kan Uwumbɔr. Ujapɔnbaal Yesu Kristo, u bi ke Ute Uwumbɔr aah bi pu na, ki bi u chee na, uma le tuk timi Uwumbɔr aah bi pu na.

Jɔnn 1:29

Ki woln kitaak le Jɔnn kan Yesu choo u chee, le u bui ke, “Lik, Uwumbɔr Aapihbo u nyani dulnyaa ni aanib aatunwanbir na.

Jɔnn 10:28

M tii maanib limɔfal li kaa kpa ndoon na. Baan kpo, ubaa mu aan ŋmaa nyan bi ŋŋaal ni.

Jɔnn 3:15

aan unii umɔk gaa mi ki kii na li kpa limɔfal li kaa kpa ndoon na.”

Jɔnn 3:18

Unii umɔk gaa u ki kii na, Uwumbɔr aa len ke waabɔr bii. Unii umɔk kaa gaa u ki kii na, Uwumbɔr len ke waabɔr bii a. Waah kaa gaa Uwumbɔr Aajapɔnbaal ki kii na, nima le cha Uwumbɔr len ke waabɔr bii.

Jɔnn 3:36

Unii umɔk gaa Uwumbɔr Aajapɔɔn ki kii na le kpa limɔfal li kaa kpa ndoon na. Unii umɔk kaa kii Uwumbɔr Aajapɔɔn aamɔb na, waan kan limɔfal li kaa kpa ndoon na. Uwumbɔr gee liŋuul u pu n‑yoonn mu kaa kpa ndoon na.

Jɔnn 6:40

U ban ke unii umɔk bee ke m ye Ujapɔɔn, ki gaa mi ki kii na, u li kpa limɔfal li kaa kpa ndoon na. Le m ga fikr u nkun ni, kookoo aataadaal. Nte Uwumbɔr aageehn le na.”

Rom Yaab 5:10

Buyoonn ti nan ye Uwumbɔr aadim na, le Ujapɔɔn nan kpo ti pu. U pu, le ti ni Uwumbɔr kpaan kijɔtiik. Ti ni Uwumbɔr aah kpaan kijɔtiik na, ŋmaninkabaa taah ga ŋmar waamɔfal pu pu na?

Rom Yaab 5:8

Tima kan, buyoonn ti nan laa ye titunwanbirdam na le Kristo nan kpo ti pu. Nima le mɔk timi Uwumbɔr aah gee timi sakpen pu na.

Rom Yaab 8:32

Uwumbɔr aa yii ke waan tii timi Ujapɔɔn. U nan di Ujapɔɔn ŋa binib aaŋaal ni ke u ti kpo ti mɔmɔk aatunwanbir pu la. Waah tii timi Ujapɔɔn na, u ga ki tii timi tiwan mɔmɔk ki kpee.

Efesusi 2:4

Tɔ, Uwumbɔr mu kpa linimbaasaln sakpen, ki gee timi sakpen.

2 Tesalonika 2:16

Tɔ, Tite Uwumbɔr gee timi sakpen. Waabulchinn pu, le u tii timi lipobisoon li kaan doo na, ni limakl nyaan.

Taitus 3:4

Le Uwumbɔr u gaal timi lir na mɔk timi waah kpa tibulchinn ki gee timi pu na,

Hiibru Yaab 2:9

ti kan Yesu la. Uwumbɔr nan sunn u taab ki cha waatuuntiib jer u, ni yunn siib, aan u ti kpo binib mɔmɔk pu, uma Uwumbɔr aanimbaasaln pu. Dandana wee ti kan ke waah jin nkun aafalaa na, Uwumbɔr di kipak ni liyimbil le di tii u.

1 Jɔnn 3:1

Lik Tite Uwumbɔr aah gee timi sakpen pu na. U yin timi ke waabim. Le ti mu sil ye waabim. Dulnyaa aanib aa nyi Uwumbɔr. Baah kaa nyi Uwumbɔr na, nima pu le baa nyi ti mu.

1 Jɔnn 4:19

Uwumbɔr le nan puen gee timi. Nima pu le ti mu gee u.