Jɔnn 19:30 - Uwumbɔr aagbaŋ

³⁰ Waah moor ni na, le u bui ke, “Maatuln doo a,” le ki gaa tiin, ki cha waawiin nyan, le u kpo.

UWONBƆR A GBƆNPƆŊ LIKƆƆNL

³⁰ Yisa kaah nan gaa nyun nin, le ki bei ke, “Ni diɛu.” Le ki tibin u yul tum le ki kpo.

Jɔnn 19:30 ပူးပေါင်းရင်းမြစ်များ

Mpiin 3:15

Aa ni upii ngbaan ga li ye tɔb aadim la. Saabim ni waabim mu ga li ye tɔb aadim la. Uyaabil ga faa wii aayil, le aa mu ga gaa utaagbeln.”

Ilahn 22:15

Nneen ni kuur ke titan na la, le nlambil tam nlakpaŋ. Aa di cha mi titan ni, ki di mi tii nkun.

Aisaya 53:10

Uwumbɔr bui ke, “Ni nan ye maageehn le ke u ji falaa; waakun nan ye kitork ki ga joo ni chapinn na la. Le ni tii u nsan u kan uyaabitiib; u ga li kpa limɔfal li fɔk na, aan maah ban pu na ŋa uma pu.

Aisaya 53:12

Le m ga tii u nkakaa mu nyuun na lipepel li bi bininyuum, ni mpɔɔndam aakaasisik ni na. U di waamɔfal tii waageehn pu, ki yakr titunwanbirdam chee baapal. U gaa titunwanbirdam pam aasisiiyaan, ki mee Uwumbɔr ke u di cha pinn bi.”

Daniel 9:24

“Ŋibin ŋi Uwumbɔr di siin ke u nyan saanib, ni kitiŋ ki bi chain na titunwanbir ni, ni tiwan ni kaa ŋan na ni na, ye ŋibin imonko itaa ni kipiik nfum mulole pu la. U ga di cha pinn titunwanbir, ki cha ibamɔn i ga li bi n‑yoonn mɔmɔk na dan, le tidaŋ ngbaan, ni Uwumbɔr aabɔnabr ngbaan aamɔbon ga gbiin, le Uwumbɔr Aadichal li bi chain na ga ki gir sil.

Daniel 9:26

N‑yoonn ngbaan aah ga ti doo pu na, le bi ga ku Uwumbɔr aah lee usaloln u kaa tun taani ubaa na. Le ubɔr pɔɔl ubaa aajab ga nan ber kitiŋ ngbaan ni Uwumbɔr Aadichal na. Ndoon ngbaan ga nan fuu ni ke nwam na la. Mu ga li joo ni butɔb ni libiil li Uwumbɔr nan gor siin na la.

Sekaria 13:7

Uwumbɔr Mpɔɔnsakpiindaan bui ke, “Kijaak aajuk, finn ngeen pu, ki ti tak upihkpaal u tun maatuln na. Ku u, ki cha ipiih yaa.

Matiu 20:28

ki li bi ke min Unibɔn Aabo aah bi pu na; maa dan dulnyaa wee ni ke bi nan tun lituln tii mi, m dan ke m nan tun lituln tii binib, ki kpo ke m gaa binib pam lii la.”

Matiu 27:50

Le Yesu ki teen mpɔɔn pu, le ki cha waawiin nyan, le ki kpo.

Matiu 3:15

Le Yesu bui u ke, “Kii kina n‑yoonn mue. Ni ŋan ke ti ŋa Uwumbɔr aah ban pu na mɔmɔk.” Le Jɔnn kii ki muin u nnyun ni.

Tibɔnyaan ti Mak ŋmee ti na 15:37

Le Yesu ki teen mpɔɔn pu, le ki kpo.

Tibɔnyaan ti Luk ŋmee ti na 22:37

M tuk nimi la, ni ŋmee Uwumbɔr Aagbaŋ ponn ni ke bi ga ŋa mi ke baah ŋani titunwanbirdam pu na. Le bi ga sil ŋa mi kina. Baah nan ŋmee maabɔr pu na, ni mɔmɔk bi gbiini la.”

Tibɔnyaan ti Luk ŋmee ti na 23:46

Le Yesu teen mpɔɔn pu, le ki bui ke, “Nte Uwumbɔr, m di maawiin ŋa aaŋaal ni la.” Waah len kina na, le u kpo.

Jɔnn 10:11

“Min le ye upihdaanyaan na. Upihdaanyaan ga ŋmaa kpo waapiih pu.

Jɔnn 10:18

Ubaa aan nyan maamɔfal m chee. M ga di li bil maageehn pu la. M kpa mpɔɔn ke m di li bil, ki kpa mpɔɔn ke m ki yoor li. Nte Uwumbɔr le tuk mi ke m ŋa kina.”

Jɔnn 17:4

M nyuŋ si dulnyaa wee ni; m tun saah tii mi lituln li na ki doo.

Jɔnn 19:28

Le Yesu bee ke u tun waatuln doo a. Le u bui ke, “Nnyunyuu chuu mi.” Waah len kina na, ni gbiin Uwumbɔr Aagbaŋ aah len pu na.

Jɔnn 4:34

Le u bui bi, “Maajikaar le ye ke m ŋa Uwumbɔr u tun ni mi na aah gee pu na, ki tun waatuln doo.

Rom Yaab 10:4

Kristo fuu ni ke binib bi gaa u ki kii na aabɔr li ŋan. Naa ye ke baah dii nkaal pu na le cha baabɔr ŋan.

Rom Yaab 3:25

U nan di Yesu siin binib aanimbil ni, ke u nan kpo, aan uma Uwumbɔr taa ki gee liŋuul ti pu. Ti yaa gaa Yesu ki kii kan, waasin pu le Uwumbɔr ga di cha pinn timi. Nima le mɔk ke Uwumbɔr ŋani ni ŋan na; ba pu? u nan kpa limɔr, kaa bii binib bi tun titunwanbir buyoonn Yesu Kristo aa kee dan dulnyaa wee ni na.

1 Korenti 5:7

Ni ŋan ke ni nyan boroboro aanyɔkpok, aan ki li ye boroboro u kaa kpa nnyɔk na. Ni sil ye boroboro u kaa kpa nnyɔk na la. Maah len pu na le ye ke titunwanbir siib ga bii ni mɔmɔk. Nima pu na, ni nyan titunwanbir mɔmɔk nikaasisik ni. Ni ye bininyaam la. Ni li ŋani ke bininyaam na. Ba pu? Kristo nan di ubaa toor kitork tii Uwumbɔr, timi aatunwanbir pu.

Filipi 2:8

ki sunn ubaa taab, ki kii Uwumbɔr aamɔb, hali ki ti kpo ndɔpuinkoo pu.

Hiibru Yaab 12:2

Cha ti li lik Yesu chee man. Waapɔɔn pu le ti nan piin ki gaa u ki kii. Waapɔɔn mu pu, le ti ga tii u naadii, ki ti saa ndoon. Mpopiin mu u ga nan kan mu na pu, le u jin falaa ni inimɔɔn ndɔpuinkoo pu, ki lik inimɔɔn ngbaan fam. Dandana wee le u ka Uwumbɔr aabɔrjal aaŋangii wɔb.

Hiibru Yaab 9:22

Nkaal ngbaan aah dii pu na, bi yaa nan ban ke bi ŋa tiwan chain kan, see bi di nsin yɔk yɔk ni pu le ki ŋa ni chain. Nsin yaa kaa nyan kan, Uwumbɔr aan di cha pinn titunwanbir.