Jeremia 30:19 - Uwumbɔr aagbaŋ

¹⁹ Binib bi koo nima na ga gaa kipak aalahn; mpopiin ga dan le bi li tar. M ga di ŋŋaal biin bi pu le bi pɔr kpee; le kina ngbaan tii bi liyimbil.

Jeremia 30:19 ပူးပေါင်းရင်းမြစ်များ

Esra 6:22

Bi nan di mpopiin jin Boroboro u kaa kpa boroboro aanyɔk na Aajim ki ti saa iwiin ilole. Uwumbɔr aah nan cha Asiria aabɔrkpaan san bi kinimbaak ki ter bi, bi maa bima Israel yaab Aawumbɔr Aadichal na pu, le bi nan kpa mpopiin pam.

Nehemia 8:12

Kina pu le binib ngbaan mɔmɔk kun bido ki ti jin, ki nyun, ki kpa mpopiin, ki yakr baah kpa pu na tii biken; ba pu? bi bee baah karn pu tii bi na aatataa.

Nehemia 8:17

Binib bimɔk nan nyan ni tinaagbiir ni na nan ŋa baakakar ki koo ti ponn ni. Ki nya Nunn aajapɔɔn Josua aayoonn ki nan saa liyaadaal ngbaan na, nwiin ngbaan daal le kina aajim nan ki ŋa, kina pu na, binib mɔmɔk aasui nan piin le ni mɔ bi mɔmɔk.

Ilahn 53:6

M mee Uwumbɔr ke linyaŋ ga nya ni Sionn ki dan Israel yaab chee. Uwumbɔr yaa tii Israel yaab nkam kan, bi ga li kpa mpopiin sakpen.

Aisaya 12:1

Nwiin mubaa ga fuu ni le binib ga gaa nlahn ke, “M pak si Uwumbɔr. Aa nan gee m pu liŋuul, dandana ma kan, aa sɔŋ nsui kaa ki gee m pu liŋuul.

Aisaya 26:15

Uwumbɔr, aa cha timi aatimbol moo kpae la, ki kpae ŋipepel mɔmɔk pu, le nimina joo ni si bunyuŋ.

Aisaya 27:6

Iwiin i choo na ni, Jakob aamaal, Israel yaab, ga nyal sil ke busub na, ki ŋeen ki lu. Kitiŋ kee ga gbiin baah tun ki kani pu na.

Aisaya 35:10

Bi ga dii mu ti fuu Jerusalem ni mpopiin, ki gaa ilahn ki tar mpɔɔn pu ni mpopiin. Bi ga li kpa mpopiin n‑yoonn mɔmɔk, bi ga nya kinimbaak ni mpombiin ni kookoo.

Aisaya 51:11

Saah gaa binib bi lii na ga di mpopiin fuu Jerusalem, ki ga li gaa ilahn ki tar ni mpopiin. Bi ga li kpa mpopiin n‑yoonn mɔmɔk; bi ga nya kinimbaak, ni mpombiin ponn ni ki ti saa n‑yoonn mu kaa kpa ndoon na.

Aisaya 51:3

M ga san Jerusalem yaab kinimbaak, ni bimɔk koo kaalangbenn ni na. Kitiŋ ngbaan gur ye nteer la, le m ga ŋa ki tikpin aasaak; ki ga li naahn maah nan ŋa ki Edenn ni na la. Mpopiin ni mmɔɔn ŋmeen le ga li bi ki ni, le bi ga li gaa kipak ni idoon aalahn ki pak mi.

Aisaya 52:9

Nimi Jerusalem aalangbenn, fii ki li tar mpopiin pu, Uwumbɔr gaa waatiŋ lii, ki sɔŋ waanib aasui.

Aisaya 55:5

Dandana ni ga kuun biwɔwɔm aatimbol; n‑yoonn mubaa, baa nan nyi nimi, le dandana ma bi ga san ki nan kpaan ni chee. Min, Nidindaan Uwumbɔr, nimi Israel yaab Aawumbɔr u bi chain na ga cha nimina mɔmɔk ŋa kina; m ga nyuŋ nimi ki tii nimi liyimbil.”

Aisaya 60:19

Nwiin aan ki li ye nimi aawiihn nwiin pu, le uŋmal mu aan ki li ye nimi aawiihn kinyeek; min Uwumbɔr le ga li ye nimi aawiihn mu kaan junn na, maanyuŋ aawiihn le ga li wiin ni pu.

Aisaya 60:22

Hali Jerusalem aadichawaatiir li bi ki bi suuna na ga kpaln litimbol li kpa mpɔɔn sakpen na la. N‑yoonn mu ŋeer na yaa fuu ni kan, m ga cha kina ŋa woween. Min le ye Uwumbɔr.”

Aisaya 60:9

Ni ye iŋɔi i nyan ni dandar na la, i joo ni Uwumbɔr aanib le choo kun ni. Bi joo ni salmaa ni tikunabr la, ke bi nan di nyuŋ timi Israel yaab Aadindaan Uwumbɔr u bi chain ki cha ŋitimbol pak timi waanib na aayimbil.

Jeremia 17:26

Binib ga nya ni Juda aatim ni, ni Jerusalem aatingbaan ni ki dan; bi ga nya ni Benjaminn aapepel ni, ni taab aagongon ni, ki nya ni ŋijoo paab, ni Juda aaŋangii wɔb ki dan. Bi ga joo ni Maadichal ni ipiin i bi ga di see mmii ni na, ni kitork aapiin, ni njikaabim ni tulalee aayon aapiin, ki kpee idoon aapiin pu.

Jeremia 3:16

Le ni yaa nan wiir kitiŋ ngbaan pu kan, binib aan ki len Maakaal Aadakaa bɔr. Baan ki len waabɔr, kaan ki teer u bɔr; baan ki li ban u, kaan ki ŋa uken teen waabuul ni.

Jeremia 31:27

“Min Uwumbɔr len ke n‑yoonn choo, le m ga cha Israel ni Juda aatiŋ gbiin binib ni tiwakor.

Jeremia 31:4

M ga ki gir maa nimi kaan. Ni ga ki gir yoor nimi aagangan ki waa mpopiin aawaal.

Jeremia 33:22

M ga cha maatutunn Ubɔr David aayaabitiib ni Liifai aanibol moo too pɔr, le unii aan ŋmaa kahn bi ke unii aah kaa ŋmaa kahn iŋmabi i bi kitaapaak na, ni litambol li dɔ nnyusakpem aagbaan na pu na.”

Esekiel 36:37

Tidindaan Uwumbɔr nan ki len ke, “M ga cha Israel yaab ki gir ban m chee nterm, m ga cha bi moo pɔr ke kipihpaak na.

Esekiel 37:10

Kina pu na, waah nan tuk mi pu na, m nan nabr kina. Kifuurk nan koo tiwon ngbaan ni, le ti fikr ki fii sil. Bi nan wiir pam, ki ga ŋeer butɔb aajab.

Esekiel 37:26

M ga puu tipuur ti ga tii bi lifuur ki ti saa n‑yoonn mu kaa kpa ndoon na tii bi. M ga maa bi kaan, ki cha bi pɔr kpee, ki di Maadichal siin baatiŋ pu, nin chee li ga li bi ki ti saa n‑yoonn mu kaa kpa ndoon na.

Sekaria 10:8

M ga yin maanib, ki kuun bi nan kpaan. M ga gaa bi lii, ki cha bi ki wiir ke baah nan bi pu na.

Sekaria 12:8

N‑yoonn ngbaan kan, Uwumbɔr ga li kii binib bi bi Jerusalem ponn ni na, le ki cha udaburdaan u ŋmal bi ni na pɔɔk, ke David aah nan bi pu na. David aayaabitiib le ga loln bi pu nsan ke Uwumbɔr aatuun na. U ga loln bi pu nsan ke Uwumbɔr ubaa na la.

Sekaria 2:4

Le njan aatuun na bui uŋeen aatɔ na ke, “Li san ki ti bui unachipɔɔn u joo ŋŋmin mu bi joo ŋaŋni tiwan aafɔfɔk na, ke binib ni tiwakor ti ga li bi Jerusalem aatiŋ ni na ga li wiir pam, le Jerusalem aatiŋ ga li wiir ki jer baah ga ŋmaa maa ŋigon gob ki pu na.

Sekaria 8:19

“Bumɔb aalulm bu ni lulni ŋmanaa, ni ŋmaŋmu, ni ŋmalole, ni ŋmapiik ni na ga kpaln mpopiin, ni mmɔɔn aajim le ki tii Juda aanib. Ni li gee ibamɔn ni nsuudoon.”

Jɔnn 17:22

Saah tii mi saabimbinyaan pu na, kina le m mu tii bi, aan bi li ye unibaan ke m ni si aah ye unibaan pu na.

1 Piita 1:7

ba pu? falaa ngbaan ga mɔk ke ni gaa Yesu ki kii mbamɔm aan naa gaa. Naah gaa u ki kii pu na jer salmaa u ga bii na. Bi joo salmaa pu mmii ponn ni ke bi lik ke u ŋan aan waa ŋan. Kina le Uwumbɔr cha ni ji falaa ke u lik ke ni gaa u ki kii mbamɔm aan naa gaa. Ni yaa gaa u ki kii mbamɔm kan, le ni ga kan mpakm ni nnyuŋ bundaln Yesu Kristo ga nyan ubaa mpaan pu na.