Jeremia 30:14 - Uwumbɔr aagbaŋ

¹⁴ Nibɔtiib mɔmɔk suln nibɔr a; bitafal aa ki bi ni ponn ni. M tak nimi ke udin na la; nimi aatunwanbir aah wiir aan nimi aabiin nyaŋ sakpen pu na le cha nimi aatafadaan bir.

Jeremia 30:14 ပူးပေါင်းရင်းမြစ်များ

Job Aagbaŋ 16:9

Uwumbɔr aaŋuul ni, le u dar par mi iŋaal ni ŋitaa; u joo kinanaŋ le lik mi.

Job Aagbaŋ 19:11

Uwumbɔr aaŋuul fii, le u bil ban mi; u ŋani mi ke waadinkpaan na la.

Job Aagbaŋ 30:21

Aa ŋani mi mbiin sakpen a; aa di saapɔɔn mɔmɔk le muk mi.

Ilahn 107:17

Binib bibaa nan ye bijɔrb, le ki ji baatunwanbir aafalaa le baabiin aatun pu;

Aisaya 57:13

Ni yaa wii ki ban nterm kan, ni cha nimi aawaa ngbaan ter nimi. Litakpiln libaa aabuln le ga daa ŋi di buen. Le binib bi gaa mi ki kii na ma ga li bi kitiŋ ngbaan pu ki ga li dooni mi Maadichal ni.”

Jeremia 14:17

Uwumbɔr nan bui mi ke m tuk binib ngbaan maapombiin aah bi pu na ki bui bi ke, “M wii nwiin pu ni kinyeek la, taa cha m di cha iwiil, maanib aah kan titotonn sakpen, ni iween i na pu.

Jeremia 2:36

Ni di nibaa ŋa dafir aanib, naah chuun dii ŋitimbol ŋiken aawaa pu na pu. Ijipt yaab ga jinn nimi inimɔɔn ke Asiria yaab aah nan ŋa nimi pu na.

Jeremia 22:20

Jerusalem aanib, li cha Lebanonn aatiŋ pu, ki ti li tar man; li cha Basann aatiŋ pu ki li wii man; li bi Moab aajoo pu ki yin man, ba pu? bi nyaŋ nimaantɔtiib a.

Jeremia 22:22

Naah tun titunwanbir pu na, le libuln ga daa nimi aayidam buen, le bidim ga chur nimaantɔtiib butɔb ni tinaagbiir, le nimi aatiŋ jin inimɔɔn.

Jeremia 30:15

Nnyɔk aa bi ki ga tii nimi laafee, kina pu na, taa ki len nimi aatotonn aabɔr man. Nimi aatunwanbir aah wiir aan nimi aabiin mu nyaŋ sakpen pu na le m daa nitafal kina.

Jeremia 32:29

ki see ki mmii. Bi ga see ki ni tidir ti pu binib seer tulalee aayon tii liwaal Baal ti paab, ki joo ndaan toor kitork tii ŋiwaa, ki cha maaŋuul fii bi pu na mɔmɔk mmii ni.

Jeremia 32:30

Ki nyan Israel yaab ni Juda yaab aapiin aabɔr ni, bi ŋani maah kaa gee pu na la, le baatun fiini maaŋuul.

Jeremia 32:34

Bi nan kpaan di baawaabir ngbaan bil Maadichal li bi maa tii mi pu na, le ki bii lidichal ngbaan.

Jeremia 32:35

Bi maa liwaal Baal aatork aabimbin Hinom Aafataŋ ni, ke bi li joo bijapɔtiib ni bibisatiib toor kitork tii liwaal Molek. Maa nan bui bi ke bi ŋa kina; kina aalandak aa nan kpaan koo nsui ni ke bi ga ŋa kina aawan ki di Juda aanib koon titunwanbir ni.”

Jeremia 38:22

Ti ponn ni, m nan kan bi joo bipiib bi gur Juda aabɔrchiln ni na cha Babiloŋ aajab aaninkpiib chee. Li pel baah nan cha ki len pu na: ‘Ubɔr aajɔtiib bi gee u sakpen na ŋmann u a, bima le gur joo u. Le waah ti chɔb bee tikpakpar ni na, le bi san cha u.’”

Jeremia 4:30

Jerusalem aanib, ni kuln a. Ba ŋa ni pee ŋikekenyaan? Ba ŋa ni gbin nleenyaan ki di nkpanyaan boon ninimbil wɔb? Ni toor nibaa fam la. Nibɔtiib yii nimi le ki ban bi ku nimi.

Jeremia 44:22

Din wee na, nimi aatiŋ dɔ nkuun, le ubaa aa bi ki pu. Binib gur san ki ijawaan la, le Uwumbɔr aah kaa nan ki ŋmaa gaa nimi aabiin ni titunwanbir pu na, le binib gur joo kaayimbil puuni lir biken pu.

Jeremia 5:5

M ga buen binib bi bi mpɔɔn ni na chee le ti ti gbaa tibɔr. Nibaakan, bima ga li nyi Baawumbɔr aah gee pu na, bima ga li nyi Uwumbɔr aah ban ke bi ŋa pu na.” Le bi mu mɔmɔk yii Uwumbɔr aamɔb ki nyan upuwɔb.

Jeremia 5:6

Nima pu le ichinn ga nya ni kichook ni ki nan ku bi; le takɔ mam ga nya ni nteersakpiin ni ki nan daa par par bi, le inaamuun ga li chuun tee mban baatim ponn ni. Binib ngbaan yaa nyan lipaal kan, i ga daa par par bi; ba pu? baatunwanbir wiir sakpen a, le bi fenn bipuwɔb tii Uwumbɔr n‑yoonn mɔmɔk.

Jeremia 50:42

Bi yoor baatɔi ni baajaak aajum; bi kpa mbiin, kaa san kinimbaak. Bi yaa jak baataan kan, yaafuuk naahn nnyusakpem aafuuk la. Bi gor ki ban bi to Babiloŋ butɔb la.

Jeremia 6:23

Bi yoor baatɔi ni kijaak aajum; bi kpa mbiin kaa san kinimbaak. Baataan aafuuk bi ke nnyusakpem aafuuk na la. Bi gor ke bi to Jerusalem butɔb.”

Inandalahn 1:19

M yin mmaantɔtiib, le bi yii, kaa dan nan ter mi. Le bitotoorb ni biyidam bi ban tijikaar, kaa kan, ki ti kpoi kitiŋ ponn ni.

Inandalahn 1:2

Kinyeek ni kitaak aawoln pu, kaanib wii la; le tinyunyunn puu dii bitakpin. Ubaa aa ki bi kijɔtiib mɔmɔk ponn ni ki ga sɔŋ kisui. Kimaantɔtiib di ki kooh a, le bi mɔmɔk gur ye kaadim.

Inandalahn 2:1

Uwumbɔr aaŋuul ponn ni le u di mbɔmbɔɔn biin Sionn pu. U nan kpeln kaanyaan na ŋa tilangbenn. Waaŋuul ngbaan daal le u nan nyan cha Waadichal.

Esekiel 23:22

“Tɔ, Oholiba, min Aadindaan Uwumbɔr aah kpa pu m tuk si na sɔ. Aa bak aabɔtiib ngbaan ni a, le m ga cha baaŋuul fii aa pu, ki cha bi dan ki nan gob si.

Esekiel 23:9

Kina pu le m nan di u tii waah nan gee ubɔtiib Asiria yaab bi sakpen na.

Daniel 9:11

Israel yaab mɔmɔk nan bii saakaal ki yii kaa pel saah len pu na. Ti nan tun si titunwanbir, le aa nan cha saah puun tibɔbir ti aan saatutunn Moses nan ŋmee ŋa saakaal ni na dan nan lir ti pu.

Daniel 9:13

Aa nan tii timi ntafadaan mumɔk nan ŋmee dɔ Moses aakaal ponn ni na. Tidindaan Uwumbɔr, hali nima ngbaan aa cha ti mee si ki aa san timi kinimbaak, bee ti yii timi aatunwanbir ki fenn dii saasan mu ye ibamɔn na.

Daniel 9:5

“Ti tun titunwanbir, ki ŋa tiwan ni kaa ŋan na. Ti yii saah len ke ti ŋa pu na, ki fenn tipuwɔb tii tiwan ni aa mɔk ke ni ŋan na.

Hosea 5:14

M ga tak Israel ni Juda aanib ke uchinn na la. Min mbaa le ga daa par par bi, ki siir cha bi. M yaa nan dar bi cha kan, ubaa aan ŋmaa gaa bi lii.

Obadia 1:7

Nimi aamaantɔtiib ŋmann nimi la; le bi jenn nyan nimi, nimi aatiŋ ponn ni. Binib bi nan ye nijɔtiib na le nyaŋ nimi butɔb ni dandana wee na. Nijɔtiib bi nan ji ni chee tijikaar na le ŋmann nimi koon gaawɔb ni; bi baa le ke, ‘Baalan mu bi kpa na bi la?’